Ngam Fl’eg e Kanawo’ ni Ngam Wereg e Machib
1 Ba thilthil rarogon e girdi’ u lan e ulung ko Kristiano. Machane ke taareb lanin’dad ni ngad pininged e sorok ku Jehovah. (Ps. 79:13) Faanra gad ba m’ar ara bay yugu boch e magawon rodad ma dabiyog ni ngad uned ko machib nge mus rogon ma uw rogon nrayog ni ngad fl’eged e kanawo’ ni ngad machibnaged e girdi’?
2 Nap’an e Pi N’en ni Yima Rin’ u Reb e Rran nge Reb: I machibnag Jesus e girdi’ u gubin ngiyal’. Ke non ngak Matthew u nap’an ni ke yan u but’ me pag e ofis ko tamukun tax, nge Zakeus u nap’an ni be milekag, nge be’ ni ppin nu Samaria u nap’an ni be toffan. (Matt. 9:9; Luke 19:1-5; John 4:6-10) Ku arrogon gadad ma nap’an ni gad be rin’ e pi n’en ni yima rin’ u reb e rran nge reb ma rayog ni ngad sabethingad ko girdi’ ma ngad machibnaged yad. Faanra bay e Bible rodad nge boch e tract ara brochure, ma aram e ra k’aringdad ni ngad weliyed u murung’agen e athap rodad.—1 Pet. 3:15.
3 Dabiyog ni ngam man u but’ ma ngam un ko machib u mit e tabinaw iyan? Ngam tiyan’um ko yu ngiyal’ ni rayog ni ngam wereg e machib u nap’an ni ngam man un ko tafalay (Acts 28:30, 31) Faanra thingar mu par u tabinaw, ma kam wereg e machib u daken e telefon ara babyor ni kam yoloy? Bay reb e walag ni ppin ni ma yoloy e babyor ngak e girdi’ rok ni gathi yad e Pi Mich. Ma ma yoloy u murung’agen e pi thin ko Bible ni ma pi’ e athamgil nga lanin’uy nge boch e experience rok u nap’an ni ke wereg e machib.
4 U Tabon e Maruwel ara Skul: Rogon ni gad ba adag ni ngad pininged e sorok ku Jehovah e ra k’aringdad ni ngad yunged e awoch ko thin nriyul’ u tabon e maruwel rodad ara skul. Bay reb e publisher ni meruk e duw rok ni ke weliy u skul e n’en ni ke bieg u murung’agen e pul u lan fare babyor ko Awake! Tomren ni kan nog ngak fare sensey ko mang babyor ni ke weliy e pi thin nem riy ma ke tabab i fek urngin e babyor ko Wulyang Ntagil’ E Damit nge Awake! U tabon e maruwel rodad ma faanra gad ra tay e babyor ni Knowledge ara Rayog ni Ngam Par ni Gab Fas u bang ni rayog ni nge guy e girdi’ ma sana yad ra fith boch e deer ngom ma rayog ni ngam weliy e machib ngorad.
5 Rayog ni ngam lemnag boch e kanawo’ ni ngam wereg e machib u nap’an e pi n’en ni ga ma rin’ u reb e rran nge reb? Faan gad ra rin’ urngin ban’en nrayog rodad ma gubin e rran ma gad ra athamgil ni ngad “pininged e sorok ku Got.”—Heb. 13:15.