Mu Fil Ngak e Bitir Rom ni Nge Pining e Sorok Ku Jehovah
1. Rayog rok e pi bitir ni ngar pininged e sorok ngak Jehovah fa?
1 Be pi’ Psalm 148:12, 13 e athamgil nga laniyan’ e pi pagel nge rugod ni ngar “pininged e sorok nga fithingan Jehovah.” Bay e thin u lan e Bible u murung’agen e pi bitir ni kar rin’ed. Ya i “par Samuel ngi i pigpig ngak Jehovah.” (1 Sam. 2:18) I yog “bochi buliyel” ngak e ppin rok Naaman nrayog rok e profet rok Jehovah u Israel ni nge chuweg e daraw rok.” (2 Ki. 5:1-3) Nap’an e ngiyal’ ni i yan Jesus nga lan e tempel me ngongliy e maang’ang, mi tolul e pi “bitir” ni yad be yog ni be lungurad: “Ke sorok Fak David!” (Matt. 21:15) Uw rogon nrayog rok e pi gallabthir ni ngar filed ngak e pi bitir rorad ni ngar pininged e sorok ku Jehovah?
2. Mang ni ba ga’ fan ni nge dag e gallabthir rogon ni nge rin’ ngak e bitir rok?
2 Ngan Dag Rogon: U m’on ni nge fil e matam u Israel e tin riyul’ ngak e bitir rok nge taw nga gum’irchaen, ma kan fonownag ngak ni som’on ma thingari par ni ba t’uf Jehovah rok ma thingari tay e pi motochiyel rok nga gum’irchaen. (Deut. 6:5-9) Faan ga ra yog e thin nib puluw u murung’agen e machib u mit e tabinaw ma ga un ngay u gubin e wik, ma ba ga’ ni ra lemnag e bitir rom ni ba ga’ fan e machib u mit e tabinaw u wan’.
3. Uw rogon ni ke fel’ rogon reb e walag ni ppin ko kanawo’ ni tay e gallabthir rok?
3 Be weliy reb e walag ni ppin ni gaar: “Nap’an e ngiyal’ ni ka gub rugod, ma ba muun ko yaram ko tabinaw romad ni nggu uned ko machib u mit e tabinaw u gubin e Sabado nge Madnom. Ke tamilang u wan’ug ni kari gel e falfalan’ u wan’ e gallabthir rog ko machib u mit e tabinaw. Kan tay nga lanin’mad ni machib u mit e tabinaw e aram ban’en ni bay e falfalan’ riy.” Ke mang e re walag ney reb e publisher ndawor ni taufenag ko ngiyal’ ni medlip e duw rok ma ke pag 33 e duw ni ke un ko pioneer.
4. Uw rogon ni ngam fil rogon ngak e bitir ni nge mon’og iyan?
4 Ngan Fil Rogon ni Nge Mon’og Iyan: Mu tay ni nge rin’ e bitir rom ban’en ko ngiyal’ ni ngam marod ko machib u mit e tabinaw. Rayog rok e bitir ni nge pining e girdi’, ara pi’ e tract ngak e girdi’, ara bieg e thin nu Bible. Aram rogon ni ra yog e falfalan’ ngak me par nib puluw laniyan’ ko ngiyal’ ni nge wereg e thin u murung’agen Gil’ilungun Got. Nap’an e ngiyal’ ni nge ilal i yan, ma susun ni nge yoor i un ko machib u mit e tabinaw. Ere, mu ayuweg e bitir rom ni ngi i mon’og i yan me lemnag ni nge nameg ban’en nib m’ag ko tirok Got ban’en.
5. Mang e ba t’uf rok e bitir ni nge mang reb e publisher ndawor ni taufenag?
5 Mu non ngak e piin ni piilal ko ngiyal’ ni bay rogon e bitir rom ni nge mang reb e publisher ndawor ni taufenag ma baadag ni nge un ngay. Ra nge mang reb e publisher ma ra tamilang u wan’ ni be mil fan ngak ni nge pining e sorok ngak Jehovah. Dab mu pag talin nde t’uf rok e bitir ni nge nang e pi n’en ni manang e piin nib ilal ni kan taufenagrad ko ngiyal’ ni nge mang reb e publisher. Manang e bitir rom fan e machib u Bible fa? Ma fol ko pi motochiyel nu Bible u murung’agen e ngongol nde yalen? Ba adag ni nge un ko machib u mit e tabinaw ma ba adag ni nge mang reb e Mich Rok Jehovah fa? Faanra arrogon, ma rayog rok e piin ni piilal ni ngar turguyed ni nge mang reb e publisher ndawor ni taufenag.—Mu guy e Organized to Do Jehovah’s Will, pp. 79-82.
6. Mang fan ni ba fel’ ni nge fil e gallabthir rogon ngak e bitir rorow?
6 Ra nge fil e gallabthir ngak e bitir ni nge pining e sorok ku Jehovah u gum’irchaen ma ba t’uf ni ngar maruwelgad ngay. Gathi ri boor ban’en ni ma pi’ e falfalan’ nga laniyan’ e gallabthir ko ngiyal’ ni ngar guyew ni ke mon’og e bitir i yan ko tirok Got ban’en. Kab ga’ fan riy e be falfalan’ Jehovah ko ngiyal’ nra weliy e bitir u murung’agen e maruwel nib fel’ rok Jehovah.