Ra Fel’ Rogomed ko Michan’ Rog ma Ra Fel’ Rogog ko Michan’ Romed

1. Mang e ra yog ngodad u nap’an nra yib e piin ni yad lekag e ulung ko ulung rodad?

¹ I yol apostal Paul ngak e ulung nu Roma ni gaar: “Ri gub adag ni nggub gguymed nggu pi’ e thin rok Got ngomed nge gelnagmed. N’en ni gu be lemnag e ra fel’ rogomed riy, ma er rogon gag nra fel’ rogog riy ni baaray rogon: ra fel’ rogomed ko michan’ rog ma ra fel’ rogog ko michan’ romed.” (Rom. 1:11, 12) Ku er rogon e ngiyal’ nra yib e piin ni ma lekag e ulung nga ra reb e ulung e ngiyal’ ney.

2. Mang fan ni yima announcenag e ngiyal’ nra yib e circuit overseer in e pul u m’on riy?

² Fare Ulung: U m’on nra yib e circuit overseer ni nge guy reb e ulung ma ka dalip e pul nga m’on riy ni yima announcenag ko ulung. Re n’ey e ma ayuwegdad ni ngad fl’eged rogodad ma gad thilyeg e schedule rodad ni fan e nge fel’ rogodad riy. (Efe. 5:15, 16) Faanra ga ma un ko maruwel, ma rayog ni mu ning e matal rom ya nge yog ni mu un ko machib u mit e tabinaw ko re wik nem. Boch e girdi’ e yad ma fal’eg rogorad nge yog nra uned ko pioneer ni ayuw ko re pul nem. Faanra kam finey ni ngam man nga bayang, ma mang ndab mu thilyeg e yaram rom ni fan e ngam moy ko re wik nem?

3. Mang e rayog ni ngad rin’ed ni fan e nge yib e athamgil nga lanin’dad?

³ Fan ni ma yib e circuit overseer e nge pi’ e athamgil nga laniyan’ e girdi’ me fil rogon e machib u mit e tabinaw ngorad. Mang ndab mu ning ni ngam un ngak ara ppin rok nfaanra ke un ko mabgol? Ba felan’ e circuit overseer ni nge un ngak e pi publisher nib muun ngay e piin ngathi rib n’uw nap’an ni kar uned ko machib nge piin ni ba adag ni nge salap ko machib u mit e tabinaw. Gubin e girdi’ nrayog ni ngar filed ban’en ko machib ni ma tay mar folgad ko thin nra yog ngorad. (1 Kor. 4:16, 17) Faan ga ra pining ni nge un ngom ko abich ma rayog ni ngam sabethingow u taabang nge yog ni pi’ e athamgil nga lanin’um. (Heb. 13:2) Bochan ni ba m’ag e pi welthin nra pi’ ko ulung, ma ba fel’ ni ngan motoyil ngay nib fel’ rogon.

4. Uw rogon ni ngad pied e athamgil nga laniyan’ e circuit overseer rodad?

⁴ Fa En ni Circuit Overseer: Apostal Paul e bod rogon pi walagen ni i ayuweg, ya i yib e skeng ngak me par ni be magafan’ ngay ma ku ma felfelan’ u nap’an ni yibe pi’ e athamgil nga laniyan’. (2 Kor. 11:26-28) Nap’an ni rung’ag e ulung nu Roma nra yib Paul nge guyrad, ma bochi yad e ranod nga Market ni Appius fithingan ni fan e ngar mada’gad​—ni aram 46 mile paloggin! “Ma faani guyrad Paul, me pining e magar ngak Got ni bochrad.” (Acts 28:15) Ku rayog ni ngam pi’ e athamgil nga laniyan’ e circuit overseer. Mu dag ngak ni ga be tafinaynag u nap’an nra yib ni nge lekag e ulung ma ga “pi’ puluwon ni ke l’agruw yay,” ko ngongol nib pasig. (1 Tim. 5:17) Mog ma ga dag ni ga be tay fan e maruwel ni be tay ni fan ngom. Yow e ppin rok e yow ra felfelan’ ko ngiyal’ ni yow ra guy e michan’, nge t’ufeg, nge k’adan’ ni ga be tay.​—2 Thess. 1:3, 4.

5. Mang fan ni gad gubin mab t’uf ni ngan pi’ e athamgil nga lanin’dad e ngiyal’ ney?

⁵ Ngiyal’ ney e “ri bayi mo’maw’ ni ngan par rogon e tin riyul’ ni girdien Kristus,” ere mini’ u fithik’dad e de t’uf ni ngan pi’ e athamgil nga laniyan’? (2 Tim. 3:1) Mu dugliy e chiney rogon ni ngam un i tay tanggin e circuit overseer. Gad gubin​—nib muun ngay e piin piilal ni ma lekag e ulung nge pi publisher—​nrayog ni ngad uned i pi’ e athamgil nga laniyan’ boch e girdi’. Er rogon nrayog ni “nge bigimed mi i pi’ e athamgil nga laniyan’ bigimed, me bigimed mi i ayuweg bigimed.”​—1 Thess. 5:11.