Ngan Wereg e Pi Magazine ni Ma Micheg e Thin Riyul’
1. Mang e ma rin’ fare Wulyang Ntagil’ E Damit nge Awake!?
1 Fagali magazine ni Wulyang Ntagil’ E Damit nge Awake! e aram ba talin e maruwel ni bin ni ba ga’ fan ko maruwel ko Gagiyeg rok Got ni ngan machibnag e girdi’ ngar manged pi gachalpen Jesus. (Matt. 24:14; 28:19, 20) Ke felfelan’dad ni ngad wereged e gali babyor ney ko ngiyal’ ni ngad uned i wereg e machib u murung’agen e Gagiyeg Rok Got.
2. Mang e kan thilyeg ko Wulyang Ntagil E Damit nge Awake!, ma mang fan?
2 Kad guyed ni kafram ma kan thilyeg ga’ngin e pi magazine ney nge pi n’en ni bay riy nge ku rogon ni ngan wereg ngak e girdi’. Kan thilyeg e pi n’em ni fan e nge yib angin me n’igin ni nge adag urngin e girdi’, ma nge taw e thin ko Gagiyeg rok Got nga gum’irchaen “urngin e girdi’ ngar thapgad ngak Got ma ngar nanged e tin nib riyul’.”—1 Tim. 2:4.
3. Uw rogon ni yira wereg e pi magazine ko machib?
3 Ka nap’an e January 2006, ma kad fanayed in e kanawo’ kad salapgad i wereg e Awake! ni yima fl’eg ni taab yay u gubin e pul. Ma chiney e ku aram rogon ni gad ra wereg Fare Wulyang Ntagil’ E Damit Ni Be Weliy Morngaagen Gil’ilungun Jehovah u mit e tabinaw. Bay e thin ni nga nog u murung’agen e pi magazine u wuru’ e Machib Rodad ni Fan ko Gil’ilungun Got. Ba ga’ ni ma tamilangnag e thin u wuru’ fare magazine ma yu ngiyal’ e ma tamilangnag yugu boch e thin ni bay riy. Ra yib angin ni ngad weliyed e pi thin nem ni faanra kad beeged fare article ma ngad weliyed ko thin rodad u rogon ni ba m’ag ko binaw rodad.
4. Mang fan nib fel’ ni ngam weliy yugu boch e thin ara presentation ni dariy ko Machib Rodad?
4 Fare babyor ni Machib Rodad Ni Fan Ko Gil’ilungun Got e bay riy e thin ni ngan weliy u ra reb e magazine machane ku rayog ni ngam weliy yugu boch e thin. Ya sana yugu reb e article e ba m’ag ko girdi’ u lan e binaw. Ara sana ga be lemnag nra yib angin ni ngam tamilangnag yugu reb e article ni ri ga ba adag.
5. U m’on ni ngam fl’eg rogon e presentation u reb e magazine ma mang e thingar mu rin’?
5 Uw Rogon ni Ngam Fl’eg Rogon e Presentation ara Thin ni Nga Mog: Som’on ma thingar mu nang fare article ni ga ra wereg. Sana dabiyog ni ngam beeg urngin e thin u lan e magazine u m’on ni ga ra wereg ko machib. Machane, thingar mu yul’yul’ ma gab pasig i weliy u murung’agen fare article ni ga ra tamilangnag. Kemus nrayog ni ngam rin’ e re n’ey ni faanra ga manang fan fare thin ni ga ra weliy.
6. Uw rogon ni ngad fl’eged rogon e presentation rodad ara machib ni ngad ted?
6 Bin migid, mu par nrayog ni ngam thilyeg e tin som’on e thin ni nga mog. Rayog ni ngam tababnag e machib ko reb e deer ni ba m’ag ko boch e thin u lan e magazine nra pug e tafinay rok e girdi’. Gubin ngiyal’ ma ga par ni ke pagan’um nga gelngin e thin rok Got nge taw nga gum’irchaen e girdi’. (Heb. 4:12) Mu mel’eg e thin nu Bible ni ba m’ag ko machib ni ngam tay, ni aram e thin nu Bible ni bay u lan e article ni ga ra wereg. Amu lemnag rogon ni ngam puthuy e thin nu Bible ko thin ko article.
7. Uw rogon ni nge fel’ boch e thin ni gad ma weliy ko machib?
7 U Gubin Ngiyal’ Nrayog: Ra nge yib angin e presentation, ma thingar nog. Mu un nga girdien e ulung ngam wereg e pi magazine ko Sabado. Mu pi’ e magazine ngak e piin ni kam pi’ e magazine ngak kafram. U gubin ngiyal’ ma ga pi’ e magazine ngak e Bible study rom nge yugu girdi’ ni bay u tabinaw ko ngiyal’ ni ngam sul ngak be’. Ku rayog ni ngam wereg e magazine ngak e girdi’ ko ngiyal’ ni ngam man ko chuway’, milekag, ara ngiyal’ ni ga be son u aspital. Nga mu thilyeg e machib ni nge yib angin u nap’an reb e pul.
8. Uw rogon ni ri ba fel’ fagali magazine ni Wulyang Ntagil’ E Damit nge Awake!?
8 Ri ba fel’ fa gali magazine ni Wulyang Ntagil’ E Damit nge Awake! Ya pi magazine nem e ma pining e sorok ku Jehovah ni ir e Pilung ko palpalth’ib. (Acts 4:24) Pi thin riy e ma fl’eg laniyan’ e girdi’ ko fare thin nib fel’ u murung’agen e Gagiyeg rok Got ma ma ayuwegrad ni nge mich Jesus Kristus u wan’rad. (Matt. 24:14; Acts 10:43) Maku, pi thin riy e ma tamilangnag e pi n’en ni be buch u fayleng ni be lebug e yiiy nu Bible. (Matt. 25:13) Ra mu fl’eg rogom ni ngam wereg e pi magazine u rogon nrayog rom ma aram ga be ayuweg e girdi’ u lan e binaw nge fel’ rogorad riy!
9. Uw rogon ni ngad fl’eged rogodad ni ngad sulod ngak e girdi’?
9 Nap’an e ngiyal’ nrayog mag wereg e magazine, ara mus ko ngiyal’ nib fel’ e machib u thilmew be’, mu fith reb e deer nra pithig e kanawo’ ni ngam sul ngak ngam machibnag biyay. Faan gad ra pasig i yung awochngin e thin riyul’, ma rayog ni nge mudugilan’dad nra pithig Jehovah gum’irchaen e girdi’ ni yad ba yul’yul’ ni ngar nanged mar pigpiggad Ngak.—1 Kor. 3:6.