“Ngam Weliyed Ngan Nang e Thin nib Fel’”
1. Mang boch e thin nib fel’ ni gad ma wereg?
1 De yoor e thin nib fel’ ko re fayleng ney ma gad ba taw’ath ni “ngad weliyed ngan nang e thin nib fel’ ni yib rok Got ni murung’agen feni t’uf e girdi’ rok Got.” (Acts 20:24) Ba muun ngay ni ngad weliyed ko girdi’ ni “tin tomren e rran” e ra thumur ma ra yib e fayleng nib mat’aw rok Jehovah ma “tin kakrom ban’en e ke chuw.” (2 Tim. 3:1-5; Rev. 21:4) Ngiyal’ nem e dabkun m’ar. (Isa. 33:24) Piin nib t’uf rodad ni kar m’ad e ra fas ko yam’ mar uned ko tabinaw rodad nge pi fager rodad. (John 5:28, 29) Ra paradis e fayleng ni polo’. (Isa. 65:21-23) Aram boch e thin nib fel’ ni gad ma wereg!
2. Mang fan nib fel’ ni ngan weliy ngan nang e thin nib fel’ ko ngiyal’ ko Puguran?
2 March nge April nge May aram e pi pul nib fel’ ni ngan wereg e thin nib fel’. Yab fel’ e yafang ko pi pul nem mab n’uw nap’an e rran u boor yang u fayleng me ere rayog ni ngan un ko machib nib n’uw boch nap’an. Maku bin th’abi ga’ fan e madnom ni aram fare Puguran e ran madnomnag u ga’ngin yang e fayleng u tomren ni aw e yal’ ko Sabado, March 22. Ereray e ngiyal’ ni ngan tabab i fl’eg rogon ni ngaun ko machib ni boor.
3. Mang e ra ayuweg e pi tabinaw nge yoor e machib ni ngar ted?
3 Pioneer ni Ayuw: Rayog ni ngam yarmiy ni ngam un ko pioneer ni ayuw ko reb fa l’agruw fa dalip e pul? Mang ni dabmu dugliy boch e tayim u nap’an e fol babyor ko tabinaw rom ngam puruy’gad u murung’agen? Faanra yira maruwel u taabang ma rayog ko reb fa boch e girdi’ ko tabinaw ni ngar uned ko pioneer ni ayuw. (Prov. 15:22) Ngam meybilgad ku Jehovah u murung’agen ma ra flaabnagmed. (Prov. 16:3) Mus ni dariy be’ u tabinaw nrayog ni nge un ko pioneer ni ayuw ma rayog ko urngin e girdi’ ni ngar nameged nge yoor e machib ni ngar ted mar maruwelgad u taabang e piin nrayog ni ngar uned ko pioneer.
4. Uw rogon nrayog ni ngad fl’eged e schedule rodad nrayog ni ngad uned ko pioneer ni ayuw ni faanra gad ma maruwel nib polo’ e tayim?
4 Faanra ga ma maruwel nib polo’ e tayim ma ngam fl’eg e schedule ma sana rayog ni ngam un ko pioneer ni ayuw. Sana rayog ni ngam machibnag e girdi’ u nap’an ni kam tal ko maruwel ko misiw ni fan ko abich. Fa rayog ni ngam ning ni ngan pi’ e territory ngom nib chugur ko tabinaw rom ara tagil’ e maruwel rom ma ngam un ko machib reb e awa u m’on ara tomren e maruwel. Rayog ni nge yoor e tayim rom ko machib ni faan ga ra tay e tin nde ga’ fan ngam rin’ u reb e pul mag un ko machib ko wikend. Ke yog rok boch e girdi’ ni ngar fanayed e tayim ko vacation ni ngar uned ko machib.
5. Mang ayuw ni ngam pi’ ko piin nib pillibthir ara marwoth ni ngar uned ko pioneer ni ayuw?
5 Faanra kam pillibthir ara marwoth fa dariy gelngim ma rayog ni ngam un ko pioneer ni ayuw nfaanra ngam un ko machib boch uw u gubin e rran. Ngam ning ku Jehovah ni nge pi’ ngom “re gelngin nem ni ir e ba th’abi gel rok Got.” (2 Kor. 4:7) Bay reb e walag ni ppin ni 106 e duw rok me un ko pioneer ni ayuw! Girdi’ rok ni Kristiano nge yugu boch e girdi’ ko ulung e kar ayuweged ke un ko machib u mit e tabinaw i yan me sul ngak e girdi’ nke mada’nag nge piin yibe fil e Bible ngorad nge yugu boch ban’en ko machib. Ke un ko pi publisher me tababnag ragag e Bible study. Ke gaar: “Nap’an ni gu ma lemnag u murung’agen e ngiyal’ ni kug tow’ath ni kug un ko pioneer ni ayuw, ma rib t’uf rog Jehovah nge Fak nge ulung Rok. Gu ba adag ni nggu gaar, ‘kari magar Jehovah!’”
6. Uw rogon nrayog ko pi fel’ yangaren ni kar taufegad ma yad be un ko skul ni ngar uned ko pioneer ni ayuw?
6 Faanra gur be’ nib fel’ yangaren ma kam taufe ma ga be un ko skul ma sana rayog ni ngam un ko pioneer ni ayuw. Bod rogon e piin ni ma maruwel nib polo’ e tayim ma rayog ni ngam un ko machib ko wikend. Sana rayog ni ngam un ko machib reb e awa fa boch u tomren e skul boch e rran. Bay e skul holiday nrayog ni ngam un ko machib? Faanra ga ba adag ni ngam un ko pioneer ni ayuw ma nga mog ko gallabthir rom.
7. Mang e rayog ni nge rin’ e pi piilal ngar ayuweged e ulung ngar pasiggad ko machib ko ngiyal’ ko Puguran?
7 Ngan Pasig: U daken e kanawo’ ni yad ma tay ma rayog ko pi piilal ni ngar k’aringed e ulung ngar pasiggad. (1 Pet. 5:2, 3) Rayog ni ngar dugliyed boor boch e ngiyal’ ni ngan muulung ko machib ni fan ko piin nra un ko machib nkakadabul fa tomren skul fa maruwel. Fare service overseer e susun ni nge dugliy e pi publisher ni ke bung rogorad ni ngar yarmiyed e muulung ko machib mar guyed ni bay e territory nge magazine nge babyor nib gaman ko pi pul ney nib ga’ fan ko machib.
8. Mang e gad be fil ko n’en ni rin’ reb e ulung?
8 Bay reb e ulung ni boch e pul u m’on riy ma pi piilal e kar tababgad i pining e girdi’ ngar uned ko pioneer ni ayuw. Gubin e wik mar weliyed ko ulung ko in e publisher ni ra un ko pioneer ni ayuw. Aram e ke pi’ e athamgil nga laniyan’ e girdi’ ya boor e girdi’ e ra maruwel u taabang. Kan fl’eg e muulung ko machib ko kakadbul nge blayal’. Angin ni yib riy e ke un 53 e girdi’ ko pioneer ni ayuw ko April, ni aram baley e girdi’ ko ulung!
9. Mang fan nib fel’ ni nge un e girdi’ ko publisher e ngiyal’ ko Puguran?
9 Ngan Ayuweg e Girdi’ Ngar Wereged e Machib: Nap’an ni ra un e tin beech e girdi’ nge pi fel’ yangaren ko publisher ma rayog ni ngan piningrad ngar uned ko machib u taabang ko pi publisher nib salap ko machib. Rayog e re n’em u nap’an e ngiyal’ ko Puguran ya boor e girdi’ ko ulung e ra un ko machib. Bay be’ ni ga be fil e Bible ngak ni be mon’og i yan ma ke puluwnag e par rok ko pi motochiyel rok Jehovah? Bay e bitir rom nib llowan’ ni be mon’og i yan ko tirok Got ban’en ma dawora manged e publiser? Faanra ba adag e pi girdi’ ney ni ngar manged ko publisher ma nga nog ko pi piilal. Fare presiding overseer e ra yarmiy ni l’agruw e piilal e ra non ngomew e bitir rom fa study rom.
10. Uw rogon nrayog ni nge ayuweg e piin piilal e piin ni kar talgad ko machib?
10 Maku bfel’ ko piin ni kar talgad ko machib ni ngar uned ko ulung biyay. Pi piilal ni Congregation Book Study overseer nge yugu boch e piilal e susun ni ngar guyed e pi girdi’ ney mar pininged yad ngar uned ngorad ko machib. Faanra ke n’uw nap’an faram ni kar talgad ko machib ma l’agruw e piilal e ra non ngorad ngan turguy ni faanra bay rogorad ni ngar uned ko machib.—km 11/00 p. 3.
11. Mang e bin th’abi gel e kanawo’ ni kan dag “feni t’uf e girdi’ rok Got?”
11 Ngan Fl’eg Rogon ko Puguran: Fare biyul e aram e bin th’abi gel e kanawo’ ni kan dag “feni t’uf e girdi’ rok Got.” “Machane kug finey ni pogofan rog e dariy rogon ngog, ni fan e nge yog ni gu mu’nag e maruwel ni kan pag fan ngog mu gu mu’nag e maruwel ni Somol Jesus e ke pi’ ngog ni nggu rin’, ni aram e nggu weliy ngan nang e Thin Nib Fel’ ni yib rok Got ni murung’agen feni t’uf e girdi’ rok Got.” (Acts 20:24) Bokum milyon e girdi’ u ga’ngin yang e fayleng e ra muulung ko Sabado, March 22, u tomren ni aw e yal’ ni ngan madnomnag fare Puguran ko yam’ ni tay Kristus. Ngad pininged ma ngad ayuweged urngin e piin nib yul’yul’ ngar uned ko re madnom ney ya ra tamilangnag ko uw fene t’uf e girdi’ rok Jehovah.
12. Mini’ e susun ni ngad pininged ngar uned ko Puguran?
12 Ngan yoloy ko babyor fithingan urngin e piin ni ga ra pining. Dabisiy ni ga ra pining e girdi’ rom nge piin buguli yoror rom nge girdi’ ni ga manang u tabon e maruwel fa skul, nge piin ga be fil e Bible e chiney nge kafram nge urngin e girdi’ ni ga manang. Faanra deeriyem boch e girdi’ u murung’agen fare Puguran ma ra ayuwegem e pi thin ko appendix u murung’agen fare Abich Rok Somol ko page 206-8 ko fare babyor ni Bible Teach. Sana ra bing e kanawo’ ni ngan tababnag e Bible study ya rayog ni ngam beegew fare babyor ni fan ko Bible study.
13. Uw rogon ni ke flaabnag Jehovah l’agruw e publisher ni kar piningew e girdi’ ngar unew ko Puguran?
13 Reb e ppin e ke yoloy ko babyor fithingan 48 e tabinaw. Nap’an ni ke mu’ i piningrad me yoloy nga but’. Ma kari falfalan’ ya 26 e girdi’ ni ke pining ni kar uned ko Puguran! Reb e walag ni bay e kantin rok e ke pining reb e tamaruwel ni ir e prist faram. Ke un fare pumoon ko Puguran nge mu’ me gaar: “U lan taareb e awa ma kab boor ban’en ni kug fil u murung’agen e Bible ko 30 e duw ni kug un ko Galesiya ko Katolik.” Tomren fare Puguran ma ke un ko fol Bible ko babyor ni Bible Teach.
14. Mang campaign e ra tabab ko March 1 u ga’ngin yang e fayleng?
14 Campaign: Ran tabab ko Sabado, March 1 nge mada’ ko March 22 ma ngan wereg e babyor ko Puguran u ga’ngin e fayleng. Urngin e girdi’ e ra adag ni ngar uned ko re campaign ney nib ga’ fan. Fel’ ni ngan pi’ fare babyor ngak e girdi’ u tabinaw ma gathi ke mus ni ngan tay nga langan e mab. Machane faanra ri ba ga’ e territory ma ra turguy e pi piilal ni ngan tay fare babyor ko pi tabinaw ni demoy be’ riy. Maku gad ra wereg e pi magazine ko wikend.
15. Uw rogon nrayog ni ngad wereged fare invitation ko Puguran?
15 De yoor e tayim ni ngan wereg e pi invitation ere bfel’ ni ngan weliy buchuuw e thin. Ngam gol ngak e girdi’ ma ngam pasig. Rayog ni ngam gaar: “Gamad be piningem nge tabinaw rom nge pi fager rom ngam uned ko reb e madnom nib ga’ fan ko March 22. Baaray e invitation romed. Bay riy u murung’agen fare madnom.” Sana ra fith facha’ boch e deer. Fa ra fek fare babyor me yog ni ba adag ni nge un ngay. Ngam yoloy e re n’ey nga but’ ma ngam yarmiy ni ngam sul ngak.
16. Mang experience e be tamilangnag ko uw fene ga’ fan ni ngan pining e girdi’ ko binaw ngar uned ko Puguran?
16 Fa binem e duw me pirieg be’ ni salthaw fare babyor ni invitation u langan e mab. Ba adag ni nge un machane thingari yog ko ani ga’ ko salthaw ni sergeant. Ke dag fare babyor ngak fare sergeant ma aram me yog fare sergeant ni gallabthir rok e yow e Pi Mich ma kafram e un ngorow ko pi muulung. Ma ke yog ko fare salthaw nrayog ni nge un ko Puguran miki un ngak!
17. Uw rogon ni gad ma dag ni dad paged nge maadab fare tow’ath ni pi’ Got?
17 Mu Dag ni Ga Ma Tay Fan: Be chugur iyib e ngiyal’ ko Puguran 2008 ma ra bagadad e nge lemnag ko uw fene gel ni gad ba t’uf rok Jehovah. I yoloy apostal Paul ni gaar: “Gamad be wenig ngomed ni be lungumad: ke yog ngomed e tow’ath ni pi’ Got, ere thingar dab mpaged nge maadab.” (2 Kor. 6:1) Uw rogon ni gad ma dag ni dad paged nge maadab fare tow’ath ni pi’ Got? I yoloy Paul ni gaar: “Machane urngin ban’en ni gamad be rin’ e gamad be dag riy ni gamad bogi tapigpig rok Got.” (2 Kor. 6:4) Ere gad ma dag ni gad ma tay fan fare tow’ath ni pi’ Jehovah u daken e ngongol rodad nib fel’ nge rogon ni gad ma wereg fare thin nib fel’ u fithik’ e pasig. Nap’an e ngiyal’ ko Puguran ma rayog ni ngad uned ko machib nge mus rogon ma ngad micheged fare thin nib fel’.
[Kahol ko page 3]
Chon Mini’ e Rayog ni Ngar Uned ko Pioneer ni Ayuw?
◼ Girdien e tabinaw
◼ Piin ni ma maruwel nib polo’ e tayim
◼ Pi pillibthir nge piin nib marwoth
◼ Piin ni be un ko skul
[Kahol ko page 4]
Nap’an ni Ngan Wereg e Invitation:
◼ Ngan weliy buchuuw e thin u fithik’ e pasig
◼ Ngan yoloy nga but’ e piin ni ba adag e machib ma ngan sul ngorad
◼ Ngan wereg e pi magazine ko wikend