Gad Be Kirebnag e Thin De Riyul’ ni Yibe Togopuluwnag Ngak Got
1 Ke yan bokum biyu’ e duw ni be fanay Satan e machib ni googsur ni nge bannag boor e girdi’ riy. Ke tunguy boch e machib ni bod e machib ko Trinitas, nge yaal ndabi yim’, nge infierno. Ku be gay rogon ni nge maruwaran’ e girdi’ u murung’agen e En ke Sunmiydad nge Bible. Maku tolangan’ ni bochan ramaen dowey ara gin ni be’ be’ riy e ku boch e lem ni ma taleg ndabi taw e machib nib riyul’ nga gum’irchaen be’. (2 Kor. 4:4) Uw rogon ni ngad kirebniged e pi machib ney nde riyul’ ni ke michan’ e girdi’ ngay yad be togopuluwnag ngak Got?—2 Kor. 10:4, 5.
2 Ba L’ag Lanin’rad Ngay: Ra ke michan’ be’ nga bmit e machib ni yima fil ko teliw rok mab ga’ nib l’ag rarogon laniyan’ ngay. Boch i yad e ka bogi machib nde puluw nni fil ngak u nap’an ni kab bitir ma ke michan’ ngay. Ere faanra ngad ayuweged yad, ma thingar da nonad ngorad u fithik’ e tayfan nge m’ug ni gad be tayfan e n’en yad be lemnag.—1 Pet. 3:15.
3 Rayog ni ngad daged e tayfan ko pi girdi’ ney ni faanra da paged yad ngar weliyed e tin nib michan’rad ngay nge fan ni ke mich u wun’rad. (Jas 1:19) Sana ke mich u wun’rad ndabi yim’ e yaal ni bochan e kem’ be’ nib t’uf rorad ma yad baadag ni ngkur guyed faanem bayay. Fa yad ma madnomnag boch e madnom ko fayleng ni bochan e yad ba adag ni ngar chaggad girdien e tabinaw rorad u taabang. Faanra da motoyilgad ngorad ma rayog nda nanged rarogon lanin’rad miki ayuwegdad nge yog nda machibniged yad nib fel’ rogon.—Prov. 16:23.
4 Mu Folwok Rok Jesus: Ke dag Jesus e kanawo’ nib fel’ u rogon ni fulweg e deer rok ba tamachib ko Motochiyel. De fulweg Jesus e deer rok ni ka chingiyal’ nem, ya sana dabi mich u wan’ fare tamachib. Ere, n’en ni rin’ Jesus e weliy e thin ko Bible me pag faanem ni nge weliy laniyan’, me ayuweg ni nge fal’eg i lemnag u daken reb e fanathin.—Luke 10:25-37.
5 Machib ni googsur ni ma fil yurba’ e teliw ni ke michan’ boch e girdi’ ngay e ri de taareb rogon ko Thin Rok Got nib riyul’. (Heb. 4:12) Faanra da guman’gad ngad gayed rogon ni ngad tawgad nga gumir’chaen e girdi’, ma aram e rayog ni ngad ayuweged yad ngar digeyed e machib ni googsur me mich e thin nriyul’ u wan’rad ni ir e ra ayuwegrad nge dab kur manged sib.—John 8:32.