Rib Ga’ Fan e Fol Bible u Tabinaw!
1. Mange ri be lemnag fare Ulung i Piilal ni Ma Pow’iy e Maruwel Rodad, ma mang fan?
1 Ri ma lemnag fare Ulung i Piilal ni ma Pow’iy e Maruwel Rodad e tin nib t’uf ko pi tapigpig rok Jehovah ni bod ko bin som’on e chibog. (Acts 15:6, 28) Be chugur i yib fare gafgow nib ga’ ere ba ga’ fan ni nge reb e tamachib ko Gil’ilungun me par nib fel’ thilrow Jehovah. Uw rogon ni ngam fanay e tayim ni un tay kafram ni fan ko Fol Babyor ko Ulung? Yibe pi’ e athamgil ngak urngin e girdi’ ni ngar ted e re ngiyal’ i n’em ni fan ko fol babyor u tabinaw. Ngad fanayed e re tayim ney u fithik’ e gonop nge yog nda filed boor ban’en ko Thin ni ke thagthagnag Got me yog ni yib angin ngodad.—Ps. 1:1-3; Rom. 11:33, 34.
2. Uw rogon ni ngad yarmiyed e fol babyor u tabinaw?
2 Fol Babyor u Tabinaw ni Balayal’: Yibe pi’ e athamgil ngak e piin lolugen e tabinaw ni ngar rin’ed e n’en nib milfan ngorad u p’eowchen Jehovah nge yog nib angin e fol babyor u tabinaw mu un tay ni gubin ngiyal’. (Deut. 6:6, 7) Walag ni pumoon nge ppin ndawori yog reb e tabinaw ngorad e rayog ni ngar fanayed e re tayim ney ni fan ko fol Bible ni goo yad nge ngan fl’eg i gay boch ban’en. Ba ga’ fan ni ‘urngin yay nra mab e kanawo’ ngodad ma ngad maruwelgad ngay’ nib fel’ rogon ni fan ko fol Bible mu ud fl’eged i lemnag nge yog nda gelgad ko tirok Got ban’en ya ‘tiney e rran e ba mo’maw.’—Efe. 5:15, 16.
3, 4. Mang boch ban’en nrayog ni ngad fanayed ko fol Bible rodad, ma mange ngad lemnaged?
3 Mange Ngan Fil: Fare babyor ni Watch Tower Publications Index ara Watchtower Library ko CD-ROM e ra ayuwegem u nap’an ni ga be gay boch ban’en nrayog ni ngam fanay u nap’an e fol Bible. Fapi thin ni bay ko Wulyang Ntagil’ E Damit ni kenggin e “Rogon ni Nge e Felfelan’ Nga Lan e Tabinaw” nge “Mu Skulnag e Bitir Romed,” nge “Fan Ngak E Piin Bitir” e ra ayuwegem u nap’an e fol Bible. Fare Awake! e bay e thin riy ni kenggin e “Deer ni Ma Fith e Piin Fel’ Yangaren” nge ku boch e article ni be weliy murung’agen e tin ke sunmiy Got.
4 Fol Bible nib fel’ rogon e rayog ni nge ayuweg e tabinaw ngar nanged fan e motochiyel rok Got nib fel’ rogon. (Heb. 4:12) Yu ngiyal’ e rayog ni ngam yaliyed boch e video ni ke ngongliy e ulung mi gimed weliy boch ban’en u murung’agen. Boor ban’en nib thil mab fel’ nrayog ni ngan rin’. Mang ni dab mu fith girdien e tabinaw rom ko n’en ni yad ba adag ni ngam rin’ed?
5. Mang nrib ga’ fan e fol Bible e ngiyal’ ney?
5 Feni Ga’ Fan e Re N’ey e Chiney: Gad ra gel ko tirok Got ban’en ma ra ayuwegdad ni ngad pired nib “mudugil, ma gad guy e n’en ni bayi rin’ Jehovah ni nge yoror rodad ni dabi buch ban’en rodad.” (Ex. 14:13) Ba t’uf e thin rok Got ni nge pow’iy e gallabthir u rogon ni ngar chuguliyed pi fakrad u “fithik’ e girdi’ ndar yal’uwgad ma yad ba kireb.” (Fil. 2:15) Ba t’uf e ayuw ko piin bitir nge yog nra gelgad ko pi magawon ni ma yib ngorad u skul. (Prov. 22:3, 6) Piin mabgol e ba ga’ fan ni ngar gelnaged e tha’ u thilrad nge Jehovah. (Ekl. 4:12) Ere ngad fanayed e tin ni ka bay e tayim ngad gelnaged gadad ko ‘michan’ rodad nib thothup’!—Jude 20.