Mu Ayuweg e En ni Gimew Be Yan ko Machib
1. Mang angin ni faanra gimew be’ ni gimew be machib u taabang?
1 Immoy bayay ni mel’eg Jesus 70 i gachalpen ni nga ranod ko machib “ni yad lal’agruw.” (Luke 10:1) Dariy e maruwar riy nre yaram nem e ke bing e kanawo’ ngak pi gachalpen ni ngar ayuweged yad mi yad pi’ e athamgil nga lanin’rad u nap’an ni yad be machib. Ere, uw rogon ni ngam ayuweg e en ni gimew be yan ko machib?
2. Nap’an ni be non e en ni gimew be yan u nap’an e machib, ma uw rogon ni ngam motoyil, ma mang fan?
2 Mmotoyil: Mu fal’eg e motoyil u nap’an ni be non e en ni gimew be yan u nap’an e machib. (Jas. 1:19) Faanra be beeg reb e thin nu Bible, mu kum pithig e Bible rom. Mu sap ngak e en ni be non, ndemtrug ko faen ni yibe machibnag, fa faen ni gimew be yan ko machib. Faan ga ra fal’eg e motoyil ko n’en ni yibe weliy, ma aram e ku ra pi’ e athamgil nga laniyan’ faen ni yibe machibnag ni ngki motoyil.
3. Mingiyal’ e ba fel’ ni ngam non?
3 Mu Gonopiy e Ngiyal’ ni Ngam Non: Nap’an ni be machibnag e en ni gimew be yan u taabang be’, mag pag nge mang ir e i non ya nge m’ug ni ga be tayfan. (Rom. 12:10) Dab mu th’ab e sabethin rok faen ni be non nge mang gur e mu non. Machane, faanra daki nang faen ni gimew be yan e n’en ni nge yog, fa ke togopuluw faen ni yibe machibnag, fa ke fith reb deer ma de nang e fulweg riy, ma rayog ni ngam pi’ e ayuw, ngam ulul ko n’en ni be yog faen ni gimew be machib u taabang. Dab mu thilyeg e n’en ni yibe weliy murung’agen. (Prov. 16:23; Eccl. 3:1, 7) Faanra kam non ma susun e nge m’ug ni ga be weliy fel’ngin e n’en ni ke weliy faen ni gimew be yan ko machib u taabang.—1 Kor. 14:8.
4. Mang e ra k’aring e felfelan’ ngodad me yibnag angin e machib ni kad ted?
4 Nap’an ni mu’ fa 70 i gachalpen Jesus ko machib, mar sulod ni “kar felan’gad.” (Luke 10:17) Ere, ku arrogodad nrayog ni ngad felfelan’gad u nap’an e machib ni faan gad ra motoyil ma gad gonopiy e ngiyal’ ni ngad nonad u nap’an ni be machib e en ni gad be yan ko machib u taabang.