Ba Maruwel Nrib Gel e Felfelan’ Riy
1. Mang maruwel e yibe rin’ e ngiyal’ ney ni be ayuweg e girdi’ ngar nanged e tin riyul’?
1 Kari felfelan’ e girdi’ u nap’an e bin som’on e chibog ni kar guyed e piin nib m’ar ni kan golnagrad. (Luke 5:24-26) Ngiyal’ ney e gad ma felfelan’ ko maruwel ni gad ma ayuweg e girdi’ ni ngar nanged e tin riyul. (Rev. 22:1, 2, 17) Gad ma felfelan’ ni ngad beeged murung’agen boch e girdi’ ni ke thil e par rorad ni bochan e Thin Rok Jehovah nge gelngin nib thothup! Machane kab gel e felfelan’ riy ni ngan un ko re maruwel ney min fil e Bible ko girdi’.
2. Mang felfelan’ e ra yib ngodad u nap’an ni gad ra fil e tin nriyul’ ngak be’?
2 Mini’ fithingan Got? Mang fan ni ma pag Got e gafgow? Mang e ra rin’ Gil’ilungun Got ni fan ko girdi’? Gad ma felfelan’ ni ngad pied e fulweg ko pi deer nem maku gad ma felfelan’ u nap’an ni kad ayuweged be’ ke nang e tin nriyul’. (Prov. 15:23; Luke 24:32) Nap’an nra mon’og be’ ko tirok Got ban’en, ma aram e ra tabab ni nge yog fithingan Jehovah, ma ra thil rogon e munmad rok nge rogon ni nge fal’eg yaan, ma ra tal ko pi ngongol nib kireb, ma ra tabab i machibnag e girdi’. Faanra be mon’og iyan me ognag ir me un ko taufe, ma aram e ke mang reb i walagdad ma gad maruwel u taabang. Aram fan ni gad ma felfelan’!—1 Thess. 2:19, 20.
3. Mang e rayog ni ngad rin’ed me yog ni ngad tababgad i fil e Bible ngak be’?
3 Rayog ni Ngam Pi’ e Ayuw? Faanra ga ba adag ni ngam un ko re maruwel ney nib gel e falfalan’ riy ma ngam meybil ku Jehovah nge yog ni ngam fil e Bible ngak be’, ma ngam rin’ e n’en ni ga be yibilay. (1 John 5:14) Ngam machib ko yungi n’en ni bay e girdi’ riy nge ngiyal’ ni bay e girdi’. Ngan guy rogon ni ngan tababnag e fol Bible ku be’ ko ngiyal’ nib puluw. (Ekl. 11:6) Nap’an ni kam pirieg be’ ni baadag e machib ma ga sul ngam ayuweg ni nge mon’og ko tirok Got.—1 Kor. 3:6-9.
4. Mang fan ni ngad pasiggad i tababnag e fol Bible ngak e girdi’?
4 Boor e girdi’ ni kar m’ad ni bochan ni ngar nanged e tin riyul’. Ere mini’ e rayog ni nge ayuwegrad? (Matt. 5:3, 6) Ngad paged fadad ngad lebguyed fare maruwel ko machib u m’on ni nge mus fare maruwel ko mokun woldug.—Isa. 6:8.