Ngaum ‘Runguy’ e Girdi’
1. Mang e rib t’uf ko girdi’ e ngiyal’ ney?
1 Dariy ba ngiyal’ ni ke t’uf e ayuw rok boor e girdi’ ni bod e ngiyal’ ney. Bochan ni be gel e kireb ko re fayleng ney, ma boor e girdi’ ni ma kireban’rad, ma yad ma mochuch, ma dakuriy e athap rorad. Bokum milyon e girdi’ nib t’uf e ayuw rorad, ma gadad e piin Kristiano e rayog ni ngad daged ni gad be lemnag e piin migid ngodad. (Matt. 22:39; Gal. 6:10) Uw rogon ni ngad rin’ed e re n’ey?
2. Mang e bin th’abi fel’ e kanawo’ ni ngad daged e runguy riy?
2 Ba Maruwel ni Ma M’ug e Runguy Riy: Kemus ni goo Got e ir e ra pi’ e bin riyul’ e ayuw ngodad. (2 Kor. 1:3, 4) Ke pi’ Jehovah e athamgil nga lanin’dad ni ngad folwokgad rok ngaud “runguyed” e girdi’, ma ke tay chilen ngodad ni ngad weliyed fare thin nib fel’ ni murung’agen Gil’ilungun ngak e piin migid ngodad. (1 Pet. 3:8) Gad ra un ko re maruwel ney ma aram e bin th’abi fel’ e kanawo’ nrayog ni ngad ayuweged e piin ni “ke kireban’rad,” ya kemus ni Gil’ilungun Got e rayog ni nge ayuweg e piin ni kar gafgowgad. (Isa. 61:1) Bochan ni ma runguy Jehovah e girdi’ rok, ma aram fan ni dabki n’uw nap’an me chuweg gubin e kireb, me sunmiy reb e fayleng nib beech.—2 Pet. 3:13.
3. Uw rogon ni ngaud lemnaged e girdi’ ni bod rogon ni ma lemnagrad Jesus?
3 Mu Lemnag e Girdi’ ni Rogon ni Ma Lemnagrad Jesus: Nap’an ni i machibnag Jesus e girdi’ ni boor ni kar muulunggad nga taabang ma i lemnagrad ni yad gubin. Manang nra bagayad mab t’uf ni nge fel’ e tha’ u thilrow Got, ya yad bod e saf ndariy be’ ni be gafaliyrad. Nap’an ni guyrad Jesus, me taganan’ ngorad, ma aram me tabab i machibnagrad u fithik’ e gum’an’. (Mark 6:34) Ra ud lemnaged e girdi’ ni bod rogon ni ma lemnagrad Jesus, ma aram e rayog ni ngad runguyed yad. Ra m’ug e re n’ey u rogon ni gad ma non nge rogon ni gad ma sap ngorad. Ma ra m’on e machib u wan’dad, ma gad non u rogon nrayog ni nge ayuwegrad.—1 Kor. 9:19-23.
4. Mang fan ni ngaud runguyed e girdi’?
4 Boor e girdi’ ko pi nam u fayleng ni yad be motoyil ko fare thin nib fel’ ni murung’agen Gil’ilungun Got, maku yad ba felfelan’ ni bochan ni gad ma lemnagrad. Faanra ud daged e runguy ngorad, ma aram e rayog ni ngad felfelan’naged ma gad pining e sorok ngak e Got rodad ni ma runguyey ni aram Jehovah.—Kol. 3:12.