Kam Turguy e N’en ni Ngam Rin’ u Nap’an ni Kam M’ar ara Nap’an ni Ke Buch Ban’en Rom, Fa?
Gad gubin nrayog ni nga yigi buch ban’en rodad nib tomgin. (Jas. 4:14) Ere, be’ nib gonop e ra fal’eg rogon u m’on riy. (Prov. 22:3) Kam turguy e re mit i tafalay ni ga ra un ngay, ma kam yoloy e n’en ni kam turguy nga but’, fa? Kan ngongliy fare video ni Transfusion-Alternative Health Care—Meeting Patient Needs and Rights, nge fare DVD ni Transfusion-Alternatives—Documentary Series ni nge ayuwegem. Ere, mu yaliy mag guy ko rayog ni ngam fulweg e pi deer ni baaray fa danga’. Thingari dugliy e gallabthir ko yad ra pag e bitir rorad ni ka yad ba achig ni ngar yaliyed e gal video ney fa danga’ ni bochan e bay yaan e girdi’ nib m’ar riy ni yibe sey.
(1) Mang fan ni be thilyeg boch e togta e lem rorad u murung’agen e racha’ ni yibe kuruf ko m’ar? (2) Mu weliy dalip e kanawo’ ni yibe sey e girdi’ nib m’ar riy ndanir fanay e racha’. (3) In e togta u fayleng i yan e ka rogned nib fel’ u wan’rad ni ngar tafalaynaged e girdi’ ndab ra fanayed e racha’? (4) Mang e be dag boch e report ko aspital u murung’agen e racha’ ni yibe fanay? (5) Mang e riya’ ni bay ko racha’ ni yibe fanay? (6) Mang e ke tamilang u wan’ boor e togta u murung’agen e tafalay ndanir fanay e racha’ ngay? (7) Mang e ma k’aring e anemia, ma mang e rayog ni ngan rin’ ni ngan ayuweg be’ ni bay e anemia rok? (8) Uw rogon nrayog ni ngan yoornag e red-cell u fithik’ e racha’ rok be’? (9) Ba miti mang tafalay e yibe tay ni nge dabi map’ boor e racha’ nga but’ ko ngiyal’ ni kan sey be’? (10) Rayog ni nge yib angin ko bitir ara be’ nrib gel e maad’ad ni ke tay, fa? (11) Mang e bin nib mat’aw e kanawo’ ni ngan tafalaynag be’ riy?
Bochan nra be’ ma ir rok e ra dugliy e re mit i tafalay nra un ngay ni bay ko re video ney ni be yan u rogon e nangan’ rok, mab fel’ ndab mu son nge mada’ ko ngiyal’ ni kam m’ar ara ke buch ban’en rom mfin mu dugliy e n’en ni ngam rin’. Fare insert ko Machib Rodad Ni Fan Ko Gil’ilungun Got ko November 2006 e ra ayuwegem ni ngam dugliy e n’en ni ngam rin’ ni be yan u rogon e n’en ni kam fil. Ma faanra kam un ko taufe, mag tay e n’en ni kam dugliy ko fare DPA card, mu um fek u gubin yang ni ga be yan riy.
[Blurb ko page 3]
Kam turguy e re mit i tafalay ni ga ra un ngay, ma kam yoloy e n’en ni kam turguy nga but’, fa?