Kag Be Tay Fa Gi Babyor Rom Ndawor Mu Fal’eg?
Mang babyor eram? Aram fare DPA (durable power of attorney) card ni yima fal’eg ni fan ngak e piin ni kar uned ko taufe. Dariy bagadad ni manang e ‘n’en nra yib ngak gabul,’ ere rib ga’ fan ni ngam turguy e re miti tafalay ni gab adag ni ngam un ngay u nap’an ni kam m’ar mag tay nga babyor ni ka chiney! (Jas. 4:14; Acts 15:28, 29) Kan fal’eg fare video ni kenggin e Transfusion-Alternative Health Care—Meeting Patient Needs and Rights ni nge ayuwegem. Mu yaliy e re video nem, mu tomuren mag sul nga daken e pi n’en ni kam fil ni ga be fanay e pi deer ni baaray mag yibilay e n’en ni kam dugliy ni ngam rin’.—Ban’en ni ngan tay fanay i yan riy e: Thingari dugliy e gallabthir ko yad ra pag e bitir rorad ni kab achig ni ngar yaliyed e re video ney fa danga’ ni bochan e bay yaan e girdi’ nib m’ar riy ni yibe sey.
(1) Mang fan ni be thilyeg boch e togta e lem rorad u murung’agen e racha’ ni yibe kuruf ko m’ar? (2) Mu weliy dalip e kanawo’ ni yibe sey e girdi’ nib m’ar riy ndanir fanay e racha’? (3) In e togta u fayleng i yan e ka rogned nib fel’ u wan’rad ni ngar tafalaynaged e girdi’ ndab ra fanayed e racha’? Mang fan nib fel’ u wan’rad e re n’ey? (4) Mang e be dag boch e report ko aspital u murung’agen e racha’ ni yibe fanay? (5) Mang e riya’ ni bay ko racha’ ni yibe fanay? (6) Mang e ke tamilang u wan’ boor e togta u murung’agen e tafalay ndanir fanay e racha’ ngay? (7) Mang e ma k’aring e anemia? Uw feni gel ngak e girdi’? Ma mang e rayog ni ngan rin’ ni ngan ayuweg be’ ni bay e anemia rok? (8) Uw rogon nrayog ni ngan yoornag e red-cell u fithik’ e racha’ rok be’? (9) Ba miti mang tafalay e yibe tay ni nge dabi map’ boor e racha’ nga but’ ko ngiyal’ ni kan seyey? (10) Rayog ni nge yib angin ko bitir ara be’ nrib gel e maad’ad ni ke tay, fa? (11) Mang e bin nib mat’aw e kanawo’ ni ngan tafalaynag be’ riy? (12) Mang nib ga’ fan ni nge gur e piin Kristiano ngar turguyed e miti tafaly ni yad ra un ngay ndab ni fanay e racha’ ngay? Uw rogon ni ngad rin’ed e re n’ey?
Ra be’ ma ir rok e ra dugliy e re miti tafalay nra un ngay ni bay ko re video ney ni be yan u rogon e nangan’ rok. Kam turguy e re miti tafalay ni ga ra un ngay fa gimed ra un e bitir rom ngay? Ma kam ngongliy bang fare DPA card ngom fa ngomed e bitir rom? Ra ga baadag ni ngkum nang boch u murung’agen e re n’ey mag guy e insert ko Machib Rodad Ni Fan Ko Gil’ilungun Got ko November 2006 u tan fare thin ni “Uw Rogon u Wan’ug e Pi N’en ni Blood Fraction nge Ku Mit e Tafalay nib L’ag nga Rachaeg?” Dab mu pagtalin ni ngam tay e pi n’ey ko DPA card mag weliy ngak e piin ni kar sign gad ko card rom nge chon e tabinaw rom ni gathi yad e Pi Mich e n’en ni kam dugliy
[Caption on page 7]
• Kam dugliy e re miti tafalay ni ga ra un ngay fa gimed ra un e bitir rom ngay, fa?
• Kam ngongliy bang e DPA card ngom nra ayuwegem u nap’an ni ke buch ban’en rom, fa?