Yira Tabab i Pining e Girdi’ ko Puguran ko March 17
1. Mang e yira tabab i rin’ ko March 17?
1 Fare Puguran ni yima tay u gubin e duw e yima weliy riy murung’agen e yam’ ni tay Jesus. (1 Kor. 11:26) Ere, gad baadag ni nge un boch e girdi’ ngodad ko re madnom ney mar rung’aged murung’agen fare biyul ni tow’ath ni ke pi’ Jehovah. (John 3:16) Biney e duw e gad ra tabab i pining e girdi’ ko Puguran ko Sabado ko March 17. Ga be nameg ni ngam un i rin’ e re maruwel ney nib fel’ rogon, fa?
2. Mang e rayog ni nga dogned u nap’an ni gad ra pi’ bang e invitation ngak be’?
2 N’en Nrayog ni Nga Dogned: Ba fel’ ndabi yoor ban’en ni nga dogned. Rayog ni nge lungum: “Siro’. Kug bow ni nggu piningew gur nge chon e tabinaw rom nga reb e madnom nrib ga’ fan ni yira tay u ga’ngin yang e fayleng ko April 5. Yira pi’ e welthin ni be weliy angin e yam’ ni ke tay Jesus nge n’en ni be rin’ e chiney. Re gi babyor ney e bay riy e gin’en nge ngiyal’ ni yira tay e re muulung ney.” Nap’an ni yibe wereg e re invitation ney ko Sabado nge Madnom, mab fel’ ni ngkun chagiliy e magazine ngay ngan pi’.
3. Uw rogon ni ngad pininged urngin e girdi’ nrayog?
3 Ngan Pining Urngin e Girdi’ Nrayog: Gad be nameg ni ngad pininged urngin e girdi’ nrayog. Ere dab mu pagtalin e piin ni ga ma fil e Bible ngorad, nge piin ni kam sul ni ngam guyrad, nge girdi’ rom, nge girdi’ ni gimed nga maruwel ara skul, nge piin buguli yoror rom, nge ku boch e girdi’ ni ga manang. Ra yog e piin piilal ko ulung rom rogon ni ngan wereg e invitation ko yungi n’en ni yima machib riy. Re n’ey ni gad ma rin’ u gubin e duw e rib ga’ angin. Nap’an ni yan reb e ppin nga bangi ban’en ni be tay reb e ulung e Puguran rorad riy fa binem e duw, me yan reb e walag i yog ngak ni nge ayuweg ngar gayew e en ni ke pining ko Puguran. Machane, me yog fare pin ndariy be’ u rom ni manang ya ke yib nga tabinaw rok ma ke pirieg e invitation ni ke tay be’ e rorran nem.
4. Mang boch i fan ni ngad pasiggad i pining e girdi’ ko fare puguran?
4 Dabisiy ma bay be’ nra yib ko Puguran ni bochan e invitation ni kam tay u tabinaw rok. Demtrug rogon ma ra yib angin e athamgil ni ga ra tay. Pi babyor ni ga ra wereg e ra tamilangnag ni ke mang Jesus e Pilung. Ga ra un ko re maruwel ney u fithik’ e pasig ma rayog ni nge nang e girdi’ ko gin ni yima machib riy, nge pi walag, nge Jehovah nrib ga’ fan u wan’um fare biyul ni tow’ath ni kan pi’.—Kol. 3:15.