Dalip Ban’en nra Ayuwegem Ngam Salap ko Machib
1. Mang fan ni thingar da guyed rogon ni ngad salapgad ko machib?
1 Urngin e Pi Mich rok Jehovah e yad e sensey ko thin rok Got. Yugu demtrug ko gad be machibnag be’ ko yay ni som’on, ara kad sulod ngak be’ ni baadag e machib, ara gad be fil e Bible ngak be’ ma urngin e pi n’ey e gad be ayuweg ni nge nang boch ban’en. Ma ban’en ni gad be fil ngak e ba ga’ fan, ya re n’ey e aram e “thin ni bay u lan fare babyor nib thothup” ma ra ayuweg ni nge ‘thap ngak Got.’ (2 Tim. 3:15) Ireray e tow’ath nrib fel’! Baaray dalip ban’en nra ayuwegdad ngad salapgad ko machib.
2. Uw rogon ni ngad filed e thin rok Got ngak be’ ni nge mom ni nge nang fan?
2 Mom ni Ngan Nang Fan: Faan gad ra weliy ban’en ngak be’ nri gad manang murung’agen, ma mom ni ngad paged talin ni mo’maw’ e re n’ey ngak ya dawori nang. Ere, nap’an ni ga be fil e Bible ngak be’, dab mu weliy boor ban’en ngak ya kemus ni ngam tamilangnag ban’en ni bay rogon ko machib ni gimew be weliy murung’agen. Nge weliy be’ boor e thin ngak e en ni baadag e machib e gathi be yip’ fan ni ir e sensey nib fel’. (Prov. 10:19) Ba ga’ ni kemus ni thin nu Bible nrib ga’ fan e ba t’uf ni ngan beeg. Tomuren ni kan beeg reb e thin nu Bible ma kemus ni thin ni bay rogon ko n’en ni gimew be weliy murung’agen e ngam weliyew. Fare Welthin rok Jesus u daken e Burey ni bay ko Matthew guruy ni 5 nge mada’ ko 7 e be weliy murung’agen e tin riyul’ mab toar fan, machane buchuuw e thin ni yog ma ba mom ni kan nang fan.
3. Mang nib ga’ fan e fanathin, ma miti mang fanathin e ba fel’?
3 Fanathin: Fanathin e ma pug e tafinay rok be’, ma rayog ni nge k’aring e felfelan’ ngak be’, ma ra ayuweg ni nge dabi pagtalin ban’en. Dab mu lemnag nib t’uf ni ngam mang be’ ni ma weliy chepin ban’en ya nge yog ni ngam weliy boch ban’en u fithik’ e fanathin nib fel’. Ba ga’ ni i weliy Jesus boch e thin u fithik’ e fanathin nib ngoch mab mom ni kan nang fan. (Matt. 7:3-5; 18:2-4) Boch e sasing ni kan yoloy nga bangi babyor e ku rayog ni ngan fanay u nap’an ni gad be fil e Bible ngak be’. Rayog ni ngam lemnag rogon ni ngam weliy reb e fanathin ngak be’ ni ga be fil e Bible ngak ma ra yib angin ngak u nap’an ni gimew be fil e Bible.
4. Uw rogon ni ngad fanayed boch e pi deer nra yib angin?
4 Deer: Be’ ni ga be fil e Bible ngak e thingari lemnag fan fapi deer ni ga be fith ngak. Ngam gum’an’ u tomuren ni kam fith reb e deer ngak. Faanra mu gurgur ngam weliy e fulweg ma dabiyog ni ngam nang ko ke tamilang u wan’ fa danga’. Faanra ke pi’ e fulweg nde puluw, mab fel’ ngkum fith boch e deer ko bin ni ngam pi’ e fulweg nib puluw ngak. (Matt. 17:24-27) Riyul’ ni dariy bagadad nra mang reb e sensey nrib fel’. Ere, Bible e be pi’ e athamgil nga lanin’dad ni ngad ayuweged rogon ni gad be weliy murung’agen e thin rok Got ngak e girdi’. Gad ra rin’ ni aram rogon ma ra fel’ rogodad riy nge piin ni be motoyil ngodad.—1 Tim. 4:16.