Mu Machib nib Mom Nrayog ni Ngan Nang Fan
1. Uw rogon ni ngan machib?
1 Rib ga’ fan ni ngan machibnag e girdi’ nib mom nrayog ni ngar nanged fan. Gad ra salap i “fil e thin rok Got” ngak e girdi’ ni faan gad ra lemnag rogon ni i machib Jesus ni ir fare Sensey ni Th’abi Salap.—2 Timothy 4:2; John 13:13.
2. Uw rogon me nang be’ fan e n’en ni gad be machibnag ngak, ma mang angin?
2 Mu Non nib Mom ni ngan Nang Fan e Thin Rom: Bay boch e machib nib ga’ fan mab mo’maw’ i nang fan u lan fare welthin ni tay Jesus u daken e burey, machane ke weliy nib mom nrayog ni ngan nang fan. (Matthew guruy ni 5-7) Piin ni ur motoyilgad ngak e kar gingad “nga rogon e machib ni ke tay.” Ki mada’ ko fapi salthaw nni nol’ograd ni ngar koled Jesus me lungurad: “Dariy be’ ni kaa welthin ni bod rogon e re moon nem!” (Matthew 7:28, 29; John 7:46) De t’uf ni nga dogned boch e thin ara fanathin nib mo’maw’ ni ngan nang fan. Ya gad ra yog e thin nib mom ma rayog ni nge nang e girdi’ fan e n’en ni gad be machibnag.
3. Mang fan ni boor ban’en ni ma weliy boch e girdi’ u nap’an e machib, ma uw rogon ni ngad siyeged e re n’ey?
3 Mu Gonopiy Urngin e Thin ni Nga Mog: I lemnag Jesus rarogon e piin ni be machibnagrad ya nge dabi yoor ban’en ni nge weliy ngorad. (John 16:12) Thingar mu fal’eg i yaliy rarogon e piin ni kam mada’nagrad ma ga puluwnag rogon e n’en ni ga ra weliy ngorad, ni bod u nap’an ni ga be machibnag e girdi’ rom ara piin ni kafin ra adaged e machib, ara piin bitir. Dabi pag urngin ban’en ni ngad weliyed ngorad ni yugu aram rogon ni gad be guy ni yad be motoyil. Ya piin nib yul’yul’ e yad ra ulul i fil murung’agen Jehovah.—John 17:3; 1 Korinth 3:6.
4. Mang fan nib fel’ ni kemus ni tin nib ga’ fan e ngad weliyed u nap’an e fol Bible?
4 Mu Weliy e Tin nib Ga’ Fan: De athukuy Jesus rogon e machib ni i tay fa weliy boor ban’en ni taab yay. Nap’an ni gaar: ‘Gubin e yam’ ni bay u lan e low e yad ra yib u lan e low rorad nga wuru’,’ ma de weliy e n’en nra buch rok e piin ni yira fasegrad ko yam’. (John 5:28, 29) Ere nap’an ni gad be fil e Bible ngak e girdi’ ma thingar ni fil ngorad e tin nib ga’ fan ni ngar nanged e ngiyal’ nem ma dab ni uneg boor ban’en ngay.
5. Mang angin nra yib ngodad ni faan gad ra machib nib mom nrayog ni ngan nang fan?
5 Ri gad be pining e magar ngak Jehovah ya ke fil ngodad e tin nib t’uf ni ngad nanged nib mom nrayog ni ngad nanged fan! (Matthew 11:25) Ere ku thingar da machibnaged e girdi’ ni aray rogon, ma angin nra yib ngodad e gad ra felfelan’ ko machib ni gad be tay.