Mu Ayuweg e Lem Rom

1. Mang kenggin e circuit assembly ni fan ko duw ni 2013, ma mang fan e re muulung ney?

¹ I yog Jesus ngak pi gachalpen ni nge t’uf Jehovah rorad u polo’ i gum’ircha’rad, nge gelngirad, nge lem rorad. (Matt. 22:37, 38) Pi convention nge assembly ni yira tay ko biney e duw e kan ngongliy rogon ni fan e nge ayuwegdad ni ngad gelnaged e bin riyul’ i rarogodad. Kenggin faram e district convention rodad e “Mu Kol Ayuw u Rogon ni Ga Be Lem!” Ma kenggin e special assembly rodad ni fan ko duw ni 2013 e “Mu Ayuweg e Nangan’ Rom.” Ma kenggin e pi circuit assembly ni yira tabab i tay ko bin migid e pul e “Mu Ayuweg e Lem Rom,” nib puluw ko Matthew 22:37. Re assembly ney e kan ngongliy rogon ni nge ayuwegdad ni gad gubin ni ngad fal’eged i yaliy rogon ni gad ma lem ma gad guy rogon ni nge m’agan’ Jehovah ngay.

2. Mang boch e deer ni susun e ngad fal’eged i lemnag e fulweg riy u nap’an e re muulung ney?

² N’en ni Yira Weliy: Nap’an ni gad be motoyil ko pi welthin ni yira pi’ u nap’an e circuit assembly, ma susun e ngad fal’eged i lemnag e fulweg ko pi deer ni baaray ni bay rogon ko pi n’en nib ga’ fan ni yira weliy:

• Uw rogon ni ngad siyeged e ‘lem ko girdi’’?

• Uw rogon ni ngad chuweged e n’en ni be tay laniyan’ e girdi’ u fithik’ e lumor?

• Ba miti mang lem e gad baadag ni nge yag ngodad?

• Mang angin nra yib ngodad ni faanra ud fal’eged i lemnag ban’en?

• Uw rogon nrayog ni ngad paged Jehovah ni nge gagiyegnag rogon ni gad ma lem?

• Uw rogon ni nge gelnag e piin figirngiy, nge piin leengiy, nge piin gallabthir, nge piin bitir e felfelan’ u lan e tabinaw?

• Uw rogon ni ngad fal’eged rogodad ni fan ko rran rok Jehovah?

• Mang e be yip’ fan ni ngad fal’eged rogon lanin’dad ni ngad ngongolgad?

• Mang angin ni ma yib ngak e piin ni yad ma fol ko n’en ni kar filed?

3. Mang nib ga’ fan ni ngad uned ko re assembly ney, ma gad fal’eg e motoyil ko pi welthin ni yira pi’, ma gad fol ko pi n’en ni gad ra fil riy?

³ Be guy Satan rogon ni nge kirebnag lanin’dad. (2 Kor. 11:3) Ere thingar ud guyed rogon ni ngad gagiyegniged rogon ni gad ma lem, ma gad guy rogon ni nge m’agan’ Jehovah ngay. Ba t’uf ni ngaud lemgad ni bod rogon Kristus, ma gad guy rogon ni ngad gelgad ko lem ko re fayleng ney. (1 Kor. 2:16) Ere, mu guy rogon nge yag nim un ko re assembly ney, mag fal’eg e motoyil ko pi welthin ni yira pi’ riy. Faan gad ra fol ko pi n’en ni yira weliy u nap’an e re muulung ney, ma ra ayuwegdad ni ngad fal’eged rogon lanin’dad ya nge yag nda pasiggad ko pi n’en ni gad ma rin’ ni fan nga Gil’ilungun Got.—1 Pet. 1:13.