“Ngam Pired nib Aw e Gapas u Thilmed nge Urngin e Girdi’”
1. Mang fonow u Bible e susun ni ngad folgad riy u nap’an ni ka darod nga tafen be’ ma ke damumuw?
1 Pi tapigpig rok Jehovah e yad e girdi’ ni yad baadag e gapas, ma machib ni yad ma tay e yad ma rin’ u fithik’ e gapas. (Isa. 52:7) Machane, bay yu ngiyal’ ni gad ma mada’nag boch e girdi’ ni kar damumuwgad ni bochan e ka darod nga taferad. Ere, mang e ra ayuwegdad ni ngad pared ni bay e gapas u thildad urngin e girdi’ u nap’an ni kad mada’naged be’ ni aray rogon?—Rom. 12:18.
2. Mang nib ga’ fan ni nge tamilangan’dad u rarogon e girdi’?
2 Nge Tamilangan’um u Rarogorad: Yugu aram rogon ni bay boch e girdi’ ni yad ma damumuw ngodad ni bochan e dubrad e machib, machane boch e girdi’ e gathi aram fan ni yad ma damumuw. Reb e rayog nib kireb e ngiyal’ ni ka darod nga taferad. Faen ni ka darod nga tafen e rayog ni ke damumuw nga yugu ban’en. Machane, mus ni faanra ke damumuw ni bochan e ka darod nga tafen ko machib, ma dab da paged talin nrayog ni dabun e machib ni bochan boch ban’en nde puluw ni ke mich u wan’. (2 Kor. 4:4) Faanra tamilangan’dad u rarogon facha’ ma ra ayuwegdad ni nge dab da damumuwgad ngak.—Prov. 19:11.
3. Uw rogon ni ngad ted fan e girdi’ ni gad ma machibnag?
3 Ngam Tay Farad: Boor e girdi’ ko gin ni gad ma machib riy ni ke michan’rad nga boch ban’en nib mo’maw’ ni ngar thilyeged. (2 Kor. 10:4) Bay mat’awrad ni ngar dugliyed ko ngar motoyilgad ngodad, fa danga’. Ere, susun ndab da darifannaged yad ni bochan e michan’ rorad ara da daged ngorad ni ka boor ban’en ni gad manang u murung’agen e Bible ngorad. Faanra ka rogned ni ngad chuwgad u taferad, ma susun e ngad rin’ed u fithik’ e tayfan.
4. Mang e be yip’ fan ni ngad nonad u fithik’ e sumunguy?
4 Mu Non u Fithik’ e Sumunguy: Mus ni faanra ke yog be’ e thin nib kireb ngodad, ma susun ni ngad nonad ngorad u fithik’ e sumunguy. (Kol. 4:6; 1 Pet. 2:23) Mu guy rogon ni nga mog ban’en nra m’agan’mew ngay ni gimew l’agruw. Bod nrayog ni nga mog ngak fan ni ke damumuw. Machane, yu ngiyal’ e ba fel’ ni ngam chuw.—Prov. 9:7; 17:14.
5. Mang boch i angin nra yib ni faan gad ra machib u fithik’ e gapas?
5 Faan gad ra guy rogon ni ngad pared ni bay e gapas u thildad urngin e girdi’, ma rayog ni nge dabi pagtalin faen ni ud nonad ngak rogon e ngongol rodad, maku rayog ni nge motoyil ko yay ni migid ni ke guy be’ rogon ni nge machibnag. (Rom. 12:20, 21) Mus ni faanra be m’ug nri dabun ni nge motoyil ngodad, ma rayog nra boch ngaram me mang reb e walag. (Gal. 1:13, 14) Demtrug ko ra adag e tin riyul’ fa danga’, ma faan gad ra t’ar lanin’dad ngad ngongolgad ngorad u fithik’ e gapas ma aram e gad be tayfan Jehovah nge machib ni gad be tay.—2 Kor. 6:3.