Ngan Par nib Gapas ma Dabni Rus
1 Boor e girdi’ ni gad ma machibnag e yad ba yul’yul’ ko tin ni ke michan’rad ngay machane de puluw ko thin nriyul’ ko Bible. Thingar dabda rusgad ni ngad weliyed e machib machane ku gad ba adag ni ngad pired ni “ba aw e gapas u thildad urngin e girdi’.” (Rom. 12:18; Acts 4:29) Uw rogon nrayog ni ngad pared ni dabda rusgad ma gad ba gapas, u nap’an ni gad ma wereg fare thin ko Gil’ilungun Got?
2 Ngam Pirieg e Tin ni Ke Taareban’mew Ngay: Be’ nib gapas e ma guy rogon ndabi tugthin. Ya faanra ngan togopuluw ko thin ni yog be’ ni kari michan’ ngay ma aram e dabi ayuweg nge fel’ e lem rok. Faanra yog ban’en ni de puluw ma sana rayog ni ngad weliyed ban’en ni rayog ni nge taareban’dad ngay. Faanra ngan tamilangnag e tin ni ke taareban’dad ngay ma rayog ni nge dabi par nib gelan’ ma rayog ni ngan taw nga gum’erchaen.
3 Faanra ngad paged nge yog be’ ban’en nde riyul’, ma gad be n’ag e thin nriyul’ fa? Danga’. Ya maruwel rodad ko Kristiano e gathi ngad yal’uweged urngin ban’en nra yog e girdi’ nde puluw, ya susun ni ngad wereged fare thin nib fel’ ko Gil’ilungun Got. (Matt. 24:14) Ere dabda togopuluwgad ko urngin ban’en nde puluw nra yog be’ ya ngad lemnaged ni aram rogon nrayog ni ngad nanged fan e lem rok.—Prov. 16:23.
4 Dabni Moningnag: Bay yu ngiyal’ ni thingar dabda rusgad ni ngad pied e fulweg ko machib ngoogsur. Machane gad e girdi’ nib gapas ere dabda moningnaged e piin ni ke michan’rad ko machib ni googsur. Ngongol nib tolangan’ e ra k’aring e togopuluw ma ngongol nib sobut’an’ mab gol e ra ayuweg e piin nib t’uf rorad e thin nriyul’ nge fel’ e lem rorad. Ngan tay fan e girdi’ nge tin ni ke michan’rad ngay ma ra mom rorad ngar adaged e thin ni gad be weliy.
5 I lemnag apostal Paul e tin ni ke michan’rad ngay e piin ni ke machibnag ma ke guy rogon ni nge weliy fare thin nib fel’ uw rogon ni ra taw nga gum’ercha’rad. (Acts 17:22-31) Ke “mang urngin mit e girdi’ ngak urngin mit e girdi’,” ni fan e nge “yognag boch i yad ngak Kristus.” (1 Kor. 9:22) Rayog ni ngad rin’ed ni aram rogon ni dabda rusgad ni ngad wereged fare thin nib fel’ u fithik’ e gapas.