Ngaun Mon’og i Yan ko Machib
1. Mang boch ban’en ni i rin’ e pi tapigpig rok Got ko bin som’on e chibog ni be dag nib t’uf ni ngad mon’oggad u rogon ni gad ma machib?
1 Piin Kristiano e thingar ra mon’oggad ko machib. Aram fan ni skulnag Jesus pi gachalpen u rogon ni ngar mon’oggad ko re maruwel ney. (Luke 9:1-5; 10:1-11) Maku ireram fan ni fek Aquila nge Priscilla Apollos nga tabinaw rorow ngar “weliyew ngak murung’agen Kanawoen Got nib puluw.” (Acts 18:24-26) Maku ireram fan ni pi’ Paul e athamgil nga laniyan’ Timothy ni nge tiyan’ ko pi n’en ni be machibnag ya nge ‘guy e girdi’ ni gubin ni be mon’og i yan.’ (1 Tim. 4:13-15) Ere, demtrug n’umngin nap’an ni kad manged tapigpig rok Somol ni gad be machibnag fare thin nib fel’, machane ba t’uf ni ngad mon’oggad u rogon ni ngad rin’ed e re maruwel ney.
2. Uw rogon nrayog ni ngad filed boch ban’en rok e pi walagdad?
2 Mu Fil Boch Ban’en Rok Yugu Boch e Walag: Reb e kanawo’ nrayog ni ngad mon’oggad ko machib e aram e ngad filed boch ban’en rok e tin ni ka bay e pi walagdad. (Prov. 27:17) Ere, ba t’uf ni ngad tedan’dad u nap’an nra dag reb i walagdad e kanawo’ u rogon ni ngan machib. Mu fith ngak e pi walag ni yad ba salap ko machib rogon ni ngan rin’, mag motoyil nib fel’ rogon ko n’en ni yad ra yog. (Prov. 1:5) Gur, de mudugil u wan’um rogon ni ngam sul ngak be’ ara rogon ni ngam tababnag e fol Bible ara yugu reb i kanawoen e machib? Mu athamgil ngam fith faen ni be yarmiy e machib ara reb e walag ni nge ayuwegem. Ma dab mu pagtalin ni gelngin Jehovah nib thothup e ku rayog ni nge ayuwegdad u rogon ni ngad mon’oggad ko machib, ere ba t’uf ni ngad ninged gelngin Got nib thothup ni gubin ngiyal’.—Luke 11:13.
3. Mang e thingar da rin’ed u nap’an ni ke yog reb i walagdad reb i kanawoen e machib ngodad, ni yugu aram rogon ndawor da ninged e ayuw rok?
3 Faanra ke yog reb e walag ngom yugu reb e kanawo’ u rogon ni ngam mon’og ko machib, ma dab mu damumuw ni yugu aram rogon ndawor mu ning e ayuw rok. (Ekl. 7:9) Ngam bod Apollos ni ngam dag nib ga’ fan e re ayuw nem u wan’um u fithik’ e sobut’an’. Ya ga ra rin’ ni aram rogon, ma aram e ga be dag ni gab gonop.—Prov. 12:15.
4. Mang reb i fan ni yog Jesus nib t’uf ni ngad mon’oggad u rogon e machib ni gad ma tay?
4 Ra Ngan Mon’og ko Machib ma Yibe Pining e Sorok ngak Got: I fanay Jesus e fanathin ni nge pi’ e athamgil ngak pi gachalpen ni ngar mon’oggad ko machib. I taarebrogonnag ir nga kenggin e grapes, ma pi gachalpen ni kan dugliyrad e ke taarebnagrad nga papa’ngin. I yog ni en Chitamangiy e ma tamilangnag owchen urngin i pa’ngin ni be yib wom’engin riy, ni fan e nge tamilang owchen nge “yib wom’engin ni pire’.” (John 15:2) Bod rogon be’ ni bay e milay’ rok ni grapes ni baadag ni nge k’uf ni boor wom’engin, ere ku arrogon Jehovah ni ku baadag ni ngad mon’oggad u rogon ni ngad “pininged e magar nga fithingan u lungudad.” (Heb. 13:15) Faanra ke yag ni ngad mon’oggad ko machib ni gad ma tay, ma mang angin nra yib ngodad? Ke pi’ Jesus e fulweg ko re deer ney ni gaar: “Ara’ rogon min ta’ fan e en ni Chitamangiy ni faanra yib wom’engimed ni pire’.”—John 15:8.