Ngam Fanay fare Babyor ni Kenggin e “Mang e Rayog ni Ngan Fil ko Thin rok Got?” ni Ngam Tababnag e Numon ku Be’
1. Mang reb e ban’en nib beech ni kan ngongliy ni ngad fanayed u nap’an e machib?
1 Ke ngongliy fare Ulung ni Ma Pow’iyey reb e booklet ni kenggin e “An Introduction to God’s Word,” ma kan piliyeg e re ke babyor ney nga yugu boch e thin. Uw rogon ni ngad fanayad e re babyor ney u nap’an ni gad be fal’eg rogodad ni nga darod ko machib? Bochan ni kan fal’eg e re babyor ney ni bod rogon fare Reasoning book ni bay e thin ko Bible u tan e pi kenggin e machib u Bible, ma aram fan nrib ga’ angin nra yib ni faan gad ra fanay u nap’an e machib.
2. Uw rogon ni ngad fanayed fare babyor ni “An Introduction to God’s Word” u nap’an e machib?
2 Sana rayog ni ngam fanay e bin 8 e deer ma gog ni nge lungum: “Gamad be yan u roy e daba’ ni gamad be fith ko girdi’ ko uw rogon lanin’rad u murung’agen e re deer ni baaray, ‘Gur, Got e ir e be k’aring e pi gafgow ni gad be mada’nag?’ [U boch e binaw e bfel’ ni ngan dag e re deer ney ngak e en ni gimew be non.] Uw rogon ni ga be lemnag? [Mmotoyil ko n’en nra yog.] Bay e fulweg ko re deer ney u Bible nrayog ni ngan pagan’uy ngay. Mu pithig e ke rom e Bible mag beeg taareb ara l’agruw e thin riy nrayog ni nge tamilangnag e fulweg ko deer rok. Ma faanra faen ni gimew be non e baadag e n’en ni kam weliyew, mag dag fa 20 i deer ngak, ma gog ngak ni nge mel’eg reb u fithik’ ni ir e baadag ni ngam weliyew ko yay ni migid ni gimew ra mada’. Fa reb e rayog ni ngam pi’ reb e babyor rodad ngak ni ku be weliy boch murung’agen fare n’em ni kafin mu weliyew.
3. Faan gad ra yan ko machib ko pi binaw ni girdi’ riy e gathi yad e Kristiano, ma uw rogon ni ngad fanayed fare babyor ni kenggin e “An Introduction to God’s Word”?
3 Rayog ni ngad fanayed e bin 4 e deer nge bin 13 nge mada’ ko 17 e deer u nap’an ni gad be machib ko pi binaw ni girdi’ riy e gathi yad boch e Kristiano. Bod nrayog ni ngam fanay e n’en ni bay ko fare deer ko 17 me lungum: “Gamad be weliy murung’agen e tabinaw ngak e girdi’. Uw rogon u wan’um? Ga be lemnag ni boor e magawon ni ma mada’nag e pi tabinaw e ngiyal’ ney? [Mmotoyil ko n’en nra yog.] Boor e tabinaw ni kar pirieged ni bay angin e re thin ney ngorad: “Urngin e ppin ni thingari ta’ fan figirngin.” [De t’uf ni nga mog ngak ni bay e re thin ney ko Efesus 5:33. Faanra ga be non ngak reb e ppin ma rayog ni ngam weliy ngak e n’en ni bay ko Efesus 5:28.] Ga be lemnag ni faan ra fol e piin nib mabgol ko re fonow ney ma ra yib angin ngorad, fa?”
4. Mang e rayog ni ngam rin’ u tomuren ni kam nonow be’ ni gathi ir reb e Kristiano?
4 Tomuren ni kam nonow, mi gimew yarmiy ko wuin e ku rayog ni kum ululgow ko n’en ni kam weliyew. Sana rayog ni ngam weliyew murung’agen reb e thin nu Bible ni bay ko fare deer ni kam weliyew u taabang. Ma ra munmun mag tamilangnag ngak ni fapi thin ni kam weliyew e bay u lan e Bible. Ma aram e rayog ni ngam pi’ reb e babyor ngak ni ga be lemnag nra adag ni nge beeg nib l’ag rogon ko n’en ni kam weliyew nge rogon ni be lemnag murung’agen e Bible.—Mu guy fare insert ni bay ko fare Machib Ko Gil’ilungun ko December 2013.