Ngad Pininged e Magar ngak e Girdi’ ni Kar Bad ko Puguran

Ra taw ko rofen ni March 23, ma sogonap’an 12 milyon ara boor ko 12 milyon e girdi’ ni yad ra yib ni ngar uned i madnomnag fare Puguran ko yam’ ni tay Jesus. Nap’an e re madnom nem ma yira pi’ reb e welthin nra tamilangnag ngak e girdi’ murung’agen fare biyul ni aram e tow’ath rok Jehovah nib muun ngay e pi tow’ath nra yag ko girdi’ boch nga m’on. (Isa 11:6-9; 35:5, 6; 65:21-23; Joh 3:16) Machane, faen nra pi’ fare welthin e gathi yigoo ir e ra weliy e tin riyul’ ni nge nang e piin ni kar bad ni ngar uned ko fare madnom. Gad gubin nrayog ni ngad rin’ed e re n’ey ni aram e ngad pininged e magar ngak e piin ni kar bad ni ngar uned ko re madnom ney. (Ro 15:7) Baaray boch e kanawo’ u rogon nrayog ni ngan rin’ e re n’ey.

• Mu athamgil ni ngam pining e magar ngak e piin ni kar bad ni ngar uned ko puguran nib muun ngay e piin ni kar maloggad ko ulung ko bin ni kemus ni ngam par nga chiya rom ngam sonnag e ngiyal’ ni ngan tabab

• Yugu aram rogon ni ga be ayuweg e piin ni kam piningrad ko fare puguran, machane ngkum gay rogon ni ngam non ngak e piin ni kar bad ni bochan ni ke pi’ be’ bang e invitation ngorad. Ra kam guy be’ ni ireram e som’on ni ke un ko muulung, mag pining ni nge par nga toobem, mag pithig e Bible nge babyoren e tang rom ni ngam guyew

• Tomuren fare welthin mag pithig u puluwom ni ngam non ngak boch e girdi’, ya faanra bay e deer rorad ma rayog ni ngam ayuwegrad. Faanra de yoor e tayim ni ke magey mag yarmiy ni ngam non ngak facha’ ni baadag e machib u ba ngiyal’ u lan fare wik. Ma faanra dab mu nang e telefon rok nge gin ni ma par riy, ma rayog ni nge lungum ngak: “Gu baadag ni nggu nang e tafinay rom u murung’agen fare puguran. Uw rogon me yag ni ngad nonow?”