Reb e Ban’en ni Kan Pilyeg e Changar Ngan Guy Nrayog ni Nge Gelnag e Michan’ Rodad

9:1-7

Am lemnag rogon laniyan’ Jesus u nap’an ni rung’ag laman e Chitamangin u tharmiy ni ke yog ni ke felan’ ngak u nap’an ni kan pilyeg e changar rok fa dalip i apostal rok ngar guyed ni ke thil yaan. Ba mudugil nre n’ey nib buch rok e aram e n’en ni gelnag e michan’ rok ni nge athamgil u fithik’ e pi magawon nra yan u fithik’. Re n’ey e ban’en nri yib angin ngak Peter nge James nge John ma dar paged talin. Ku ireray e n’en ni micheg nga lanin’rad ni Jesus e ir fare Messiah, ma bay rogon ni ngar motoyilgad ngak. Sogonap’an 32 e duw nga tomuren, maku dawori pagtalin Peter e n’en ni buch rok Jesus nge rogon ni ke gelnag e pagan’ rok ko “thin rok Got ni i weliy fapi profet.”​—2Pe 1:16-19.

Yugu aram rogon ndad guyed e re n’ey nni pilyeg e changar rok fa dalip i apostal rok Jesus ni ngar guyed, machane gad be guy rogon ni be lebug. Ya be gagiyeg Jesus e ngiyal’ ney ni ir e Pilung nib gel gelngin. Ma dabki n’uw nap’an ma ra “yan ko mahl nge gel” me bing e kanawo’ ya nge yag ni ngad thapgad nga lan e bin nib beech e m’ag. ​—Re 6:2.

Bochan ni ga be guy ni be lebug e pi yiiy u Bible, ma uw rogon ni be gelnag e re n’ey e michan’ rom?