“Mu Tay Lanin’um” Ko Tempel Rok Got!

“Fak e girdi’, . . . mu tay lanin’um ko urngin ban’en ni gu be dag ngom . . . Mog gubin ban’en ni ga be guy rok piyu Israel.”​—EZEKIEL 40:4, New World Translation.

1. Uw rarogon e girdi’ rok Got u nap’an e duw ni 593 B.C.E.?

NAP’AN e duw ni 593 B.C.E., aram e bin 14 e duw ni kan chuweg yu Israel ko binaw rorad. Be par piyu Jew u Babylon ma dabi siy ni ur lemnaged ni rib palog nga orel ko binaw rorad. Ma yay ni tomur ni kar guyed Jerusalem e yibe urfeg, ma kan buthug fre yoror, ma ke puth urngin e naun riy. Fre tempel rok Jehovah​—ni aram e n’en nth’abi fel’ ko re mach nem faram, ya aram e tochuch ko bin machalbog e liyor u fayleng—e ke puth. Ma ka bay boor e duw ni ra par yu Israel ni ku yad ba e kalbus. Ya ra yan i gaman 56 e duw fini thapegrad min pagrad u kalbus.​—Jeremiah 29:10.

2. Mang fan nra kireban’ Ezekiel ni nge lemnag ko uw rogon e tempel rok Got u Jerusalem?

² Dabi siy ni ke kireban’ Ezekiel ni profet ni nge lemnag murung’agen e tempel rok Got ni ke muchubu’, ma bokum miriay e mayal palongin, ma ke mang e gin ni ma yan yan e gamanman ni maloboch riy. (Jeremiah 9:11) Ma Buzi ni chitamangin e immoy ni ir e prist u rom. (Ezekiel 1:3) Ma rayog ni nge un Ezekiel ko re taw’ath nem, machane kan fek nib kalbus ni yad e piin nib tolang nu Jerusalem u nap’an ni kab pagal ko duw ni 617 B.C.E.. Ma chiney e ke 50 e duw rok, ma sana be lemnag Ezekiel ni dabki guy Jerusalem biyay, maku dabi un i toy fre tempel biyay. Ere mu lemnag, uw fene falfalan’ Ezekiel ni kan piliyeg e changar rok me guy yaan fre tempel!

3. (a) Mang fan ni kan piliyeg e changar rok Ezekiel nge guy yaan fre tempel? (b) Mang aningeg ban’en ni guy Ezekiel ni baga’ fan?

³ Re n’ey ni i guy Ezekiel u nap’an ni ke pig e changar rok, e bay ko mereb e guruy ko babyor rok, ma be pi’ e athamgil nga laniyan’ piyu Jew ya be micheg ban’en. Ran sulweg e bin machalbog e liyor nga rogon! Ma in e chibog nga tomren nge mada’ ko ngiyal’ ney, ma ka be pi’ e re n’em e athamgil nga laniyan’ e piin nib t’uf Jehovah rorad. Uw rogon? Ngad fl’eged i lemnag ko mang fan fre n’en ni guy Ezekiel ni fan ko piyu Israel ni kan kalbusnagrad. Bay aningeg guruy riy ni baga’ fan: fre tempel, nge fre ulung i prist, nge ani baga’ lungun, nge fre binaw.

Kan Sulweg Fre Tempel Nga Rogon

4. Kan fek Ezekiel ngan u tabolngin e ngiyal’ ni i pig e changar rok, ma mang e ke guy u rom, ma mini’ e be dag e pi n’en nem ngak?

⁴ Som’on ma kan fek Ezekiel nga “daken ba burey ni rib tolang.” Mu le’luch ko re burey nem e bay e tempel ni baga’ riy, ni bod yaan ba mach ni kan yororiy. Ma reb e engel ni “bod yaan e wasey ni row,” e ke fek fre profet nga ranow nga lan e gin’em. (Ezekiel 40:2, 3, NW) Nap’an ni be ul’ul’ iyan e changar rok nni piliyeg, me guy Ezekiel ba engel ni be foleg dalip e garog ni ra reb e lo’l’agruw ma ra lo’l’agruw ma bay e singgil ko matanag, ma bay e gin ni mit e naun, nge lan e garog, nge singgil ko abich, nge altar, nge fre tempel ma fa l’agruw i singgil nba’ e Gin Thothup nge Gin Th’abi Thothup.

5. (a) Mang e ke yog Jehovah ngak Ezekiel nrayog ni nge pagan’ ngay? (b) Mang e be yip’ fan “doguren e pi pilung rorad” nib t’uf ni ngan chuweg ko tempel, ma mang fan ni baga’ fan e re n’ey?

⁵ Ma aram e ke m’ug Jehovah riy. Ke yan nga lan fre tempel me yog ku Ezekiel ni Ra par u rom. Ma be yog nib t’uf ni ngan klinnag e naun Rok ni gaar: “Ma chiney e ngar chuweged u p’eowcheg e ngongol ndarngal ni yad be un ngay nge dogur ko pi pilung rorad, ma gu ra par u fithik’rad ndariy n’umngin nap’an.” (Ezekiel 43:2-4, 7, 9, NW) Pi “dogur ko pi pilung rorad nem” ba sor fan ko pi liyos rorad. Pi tayugang nu Jerusalem e ur alitnaged e tempel rok Got ko liyos, ma kar ted ni aram e pilung rorad. (Mu taarebnag ko Amos 5:26.) Pi liyos nem e gathi tin nib fas ban’en ara pi pilung, ya yad ba yam’, mab alit u p’ewochen Jehovah. Ere thingarni chuwegrad.​—Levitikus 26:30; Jeremiah 16:18.

6. Mang e be yip’ fan ya kan foleg fre tempel?

⁶ Mang fan e re n’ey ni i guy Ezekiel? Be micheg ko piyu Israel ni ran sulweg e liyor nib machalbog nga rogon u lan e tempel rok Got. Ma bochan ni kan foleg fre tempel ma be micheg ni dariy e maruwar riy ni ra lebuguy Got e re n’en nem ni ke guy Ezekiel. (Mu taarebnag ko Jeremiah 31:39, 40; Zekariah 2:2-8.) Ma ran chuweg urngin e liyor ko liyos. Ma aram e ra fal’eg Jehovah waathan e naun rok.

Fre Ulung i Prist nge Ani Baga’ Lungun

7. Mang e kan tamilangnag u murung’agen piyu Levi nge pi prist?

⁷ Maku ran chuweg e alit u fithik’ fre ulung i prist, ma ran biechnag. Ran puwan’ ko piyu Levi ya kar paged ni nga un liyor ko liyos, ma ran pining e sorok ku pi fak Zadok ni yad e prist ya ur pared nib biech.a Machane gali ulung nem e ra un ko pigpig u lan e naun rok Got ni kan sulweg nga rogon​—ni ke mus ni piin nib yul’yul’. Miki gaar Jehovah: “Ma susun ni ngar filed ko girdi’ rog e n’en nib thil u thilin ban’en nib thothup nge ban’en nib alit; nge rogon nib thil ban’en nde klin ko n’en nib klin.” (Ezekiel 44:10-16, 23, NW.) Ere ran sulweg nga rogon fre ulung i prist, ma ran taw’athnag e k’adan’ ni tay e piin ni prist.

8. (a) Mini’ e piin ni baga’ lungurad u Israel kakrom? (b) Rogon ni guy Ezekiel ma mang e mmil fan ngak e an ni baga’ lungun ni fan ko liyor nib machalbog?

⁸ Miki pig e changar rok Ezekiel me guy murung’agen e en ni baga’ lungun. Ka nap’an Moses ma immoy e piin ni baga’ lungurad ko re nam nem. Fre bugithin ni Hebrew ni baga’ lungun e na·siʼʹ, ma rayog ni nge sor fan ko reb e tabinaw ara ganong, ara nam. Ma ke pig e changar rok Ezekiel me guy e pi tayugang ko yu Israel ni kan puwan’ ngorad ni bochan ni kar gafgownaged e girdi’ ma kan nog ngorad ni ngar ngongolgad nib yal’uw mab mat’aw. Fa ani baga’ lungun e gathi ir bang ko fre ulung i prist, machane ka baga’ fan ko liyor nib machalbog. Ya ma yan u mit e tempel ngu lan e garog ni be un ko girdien e pi ganong ni gathi yad e prist, ma ma par ko reb e chiya u daken e beranda ko Garog nu Ngek, ma ma pi’ boch e gamanman ni nge pi’ e girdi’ ko maligach. (Ezekiel 44:2, 3; 45:8-12, 17) Ere n’en ni guy Ezekiel e ke micheg ni ran sulweg fre nam nga rogon ma pi tayugang riy e yad e piin nib fel’, ni yad e pumoon ni ra tay tanggin e pi prist mi yad yarmiy e girdi’ rok Got nrogon ma yad ra dag e kanawo’ ko tirok Got ban’en.

Fre Binaw

9. (a) Uw rogon ni ran yu guruynag fre binaw, ma mini’ e dabi tafanay bang e binaw? (b) Mang fre ayuw nib thothup ni kan pi’, ma mang e bay riy?

⁹ Bin tomur, me guy Ezekiel fre binaw nu Israel ni ga’ngin. Ran yu guruynag ni fan ko ra reb e ganong. Ma fa en ni ga’ lungun e ku ran pi’ bangi binaw ngak nge tafanay. Machane pi prist e dabra tafanayed e binaw ya gaar Jehovah, “I gag e binaw rorad.” (Ezekiel 44:10, 28; Numbers 18:20) N’en ni guy Ezekiel e ke dag ni ran pi’ e binaw ko ani baga’ lungun u baraba’ fa gin ni ka nog ayuw nib thothup ngay. Aram ba binaw ni aningeg e tabthung riy ma kan yu guruynag ni dalip yang​—bin ni m’on e guruy e fan ko piyu Levi ni kar kalgadngan’rad, ma bin lukngun e guruy e fan ko pi prist, nge bin tomur e guruy e fan ko fre mach nge milay’. Ma tempel rok Jehovah e bay ko birok e prist e binaw, u lukngun.​—Ezekiel 45:1-7.

10. Fre thin ni kan yiiynag u murung’agen rogon ni ngan yu guruynag fre binaw e ba sor fan ko mang ni fan ko piyu Judea ni yad e kalbus?

¹⁰ Pi n’ey ni gubin e dabi siy ni ke pi’ e athamgil nga laniyan’ e piin ni kan chuwegrad u Jerusalem! Ya kan yarmiy ni ra reb e tabinaw ma bay e binaw rok. (Mu taarebnag ko Mikah 4:4.) Ma bin machalbog e liyor e ra par ko gin nib tolang u lukngun fre binaw. Ma ke guy Ezekiel ni fa ani ga’ lungun e bod e pi prist ya ra par ko binaw ni ke pi’ e girdi’ ngak ni ayuw rorad. (Ezekiel 45:16) Ere nap’an ni be par e girdi’ u lan fre binaw ni kan sulweg nga rogon ma susun ni ngar pied e ayuw ni fan ko piin ni ke dugliyrad Jehovah ni ngar rogned e thin, mi yad tay tanggirad ma yad fol rorad. Re binaw ney e rib yaram mab pagan’ ma girdi’ riy e be aywegrad.

11, 12. (a) Uw rogon ni ma pi’ Jehovah e athamgil nga laniyan’ e girdi’ rok ni ra pi’ e flaab ko binaw rorad ni kan sulweg nga rogon? (b) Mang e be yip’ fan e yu ke gek’iy ni bay u baraba’ fre lul’?

¹¹ Ma ra fal’eg Jehovah waathan e binaw rorad? Fre thin ni kan yiiynag ni yaan ban’en e be pi’ e fulweg ko re deer ney. Bay reb e lul’ ni be yib ko fre tempel, ma be ga’ iyan, me mang ba lul’ ni ba gel u p’ebgul fangi day ni Dead Sea. Mu rom ma ke pi’ e yafas ko ran, me yoor e nig riy mab fel’ e shiyobay ko fita’ u dap’ e l’ay. Ma ra baraba’ fre lul’ ma ba’ e gek’iy ni be k’uf u gubin ngiyal’, ma wom’engin e fan ko ggan ma ma golnag e liliy.​—Ezekiel 47:1-12.

¹² Rogon e re n’ey u wan’ piyu Israel e bod rogon boch e thin ni kan yiiynag faram ni ke l’agan’rad ngay mu ur chaariyed. Ke yoor ko taab yay ni ke yiiynag e pi profet rok Jehovah u murung’agen yu Israel ni kan sulwegrad nga rogon ma ke bod e paradis. Boor e thin ko profet e kan yiiynag u murung’agen e yungi n’en nder tugul ban’en riy me yoor e yafas riy. (Isaiah 35:1, 6, 7; 51:3; Ezekiel 36:35; 37:1-14) Ere bpuluw ni nge athapeg e girdi’ ni ra pi’ Jehovah e flaab ngorad ni bod e lul’ ni be yib u lan fre tempel rok ni kan sulweg nga rogon. Ma aram e ran faseg e re nam nem ya ur moyed nib yam’ ko tirok Got ban’en. Ma ran flaabnag e pi girdi’ nem ni kan sulwegrad nga rogon ko pi pumoon nib gel ko tirok Got ban’en​—ni yad e piin nib mat’aw mab mudugil ni bod e yu ke gek’iy u baraba’ fre lul’, ma yad e pi pumoon ni ra pow’iy e girdi’ ngar sulweged e binaw nga rogon. Ku arrogon Isaiah ni ke yoloy murung’agen e “yu ke gek’iy ni baga’ kenggin ma ra bagayad e bayi rin’ e tin nib mat’aw” ni “bay ra fulweged nga rogon fapi binaw ni ke n’uw nap’an ni i par ni ke puth e naun riy.”​—Isaiah 61:3, 4.

Wuin ni Ke Lebug e N’en ni Ke Guy Ezekiel?

13. (a) Uw rogon ni ke flaabnag Jehovah e girdi’ rok ko “yu ke gek’iy ni baga’ kenggin ni ra bagayad ma be rin’ e tin mat’aw”? (b) Uw rogon ni ke lebug fre thin ko profet u murung’agen fangi day ni Dead Sea?

¹³ Ke sulan’ yu Israel u nap’an ni ka ranod ko binaw rorad fa? Ri danga’! Nap’an e duw ni 537 B.C.E. ma boch e girdi’ nu Israel e kar sulod ko binaw rorad. Ma fa “yu ke gek’iy ni baga’ kenggin ni ra bagayad ma be rin’ e tin mat’aw”​—ni chon Ezra ni ir e tayol, nge Haggai nge Zekariah ni profet, nge Joshua ni Prist nib Tolang​—e kar pow’iyed e girdi’ mar toyed boch e naun biyay. Ma piin ni baga’ lungurad ni bod Nehemiah nge Zerubbabel, e kar gagiyegnaged e binaw u rogon nib yal’uw mab mat’aw. Kan fulweg fre tempel rok Jehovah nga rogon, ma pi n’en ni ke pi’ ni fan ko yafos​—ni pi flaab ni yib ko girdi’ ni ma fol rok​—e ke yib biyay nga daken e binaw ni bod e lul’. (Deuteronomy 30:19; Isaiah 48:17-20) Reb e flaab e tamilangan’. Ya kan sulweg e pi prist ko maruwel rorad, ma kar filed fre Motochiyel ngak e girdi’. (Malaki 2:7) Ma wenegan ni yib riy e ke fas e girdi’ biyay ko tirok Got ban’en, ma kar manged pi tapigpig rok Jehovah nib yul’yul’, ni bod rogon fangi day ni Dead Sea ni kan golnag ke yoor e nig riy ma ke fel’ rogon e shiyobay ko fita’.

14. Mang fan ni ka bay e yay nl’agruw ni ra lebug e thin ni yiiynag Ezekiel ma kab ga’ fan ko n’en ni buch u nap’an ni chuw yu Jew u Babylon?

¹⁴ Pi n’ey ni buch e ke mus aram rogon ni ke lebug e n’en ni guy Ezekiel fa? Danga’; ya ka bay ban’en nib baga’ fan ni ra buch. Mu lemnag: Fre tempel ni i guy Ezekiel e dabiyog ni ngan ngongliy u rogon ni ka nog. Rriyul’ ni i fol piyu Jew ko pi n’en ni guy Ezekiel ma kar rin’ed boch ban’en u rogon ni ka nog.b Machane, fre tempel ni ke guy Ezekiel e kaygi ga’ ndabiyog ni nge taw nga daken fre Burey nu Moriah, ni aram e gin ni immoy e bin som’on e tempel riy. Maku fre tempel ni guy Ezekiel e da immoy u lan fre mach ya ke guy u bang nib palog ko yugu reb e binaw, ma fa bin l’agruw e tempel e kan toy ko gin ni immoy e bin som’on riy u Jerusalem. (Ezra 1:1, 2) Maku dariy e lul’ ni yib ko fre tempel u Jerusalem. Ere yu Israel kakrom e ke mus ni boch ban’en ko n’en ni ke yiiynag Ezekiel ni kar guyed ni ke lebug. Ere ba tamilang ni ku ra lebug e re thin ko profet nem u rogon nib spiritual.

15. (a) Wuin ni ke tabab e tempel nib spiritual rok Jehovah ni nge maruwel? (b) Mang e be dag ni n’en ni guy Ezekiel e de lebug u nap’an ni immoy Kristus u fayleng?

¹⁵ Ere thingarda sapgad ko tempel rok Jehovah nib spiritual ni ngad guyed ko uw rogon ni ke lebug e n’en ni guy Ezekiel, ma aram e n’en ni weliy apostal Paul murung’agen u lan e babyor ni Hebrews. Re tempel nem e kan tabab i maruweliy u nap’an ni kan dugliy Jesus Kristus ni nge mang Prist nib Tolang ko 29 C.E. Ma ke lebug e n’en ni guy Ezekiel u nap’an Jesus fa? Be m’ug riy ni danga’. Jesus ni ir fre Prist nib Tolang, e ke lebuguy e n’en ni be yip’ fan e Rofen ni Biyul’ u nap’an ni ke un ko taufe, me pi’ e yafas rok nib maligach, ma nap’an ni yan nga lan e Gin Nth’abi Thothup, u tharmiy. (Hebrews 9:24) Machane n’en ni guy Ezekiel e dariy u murung’agen fre prist nib tolang nge fa Rofen ni Biyul’. Ere be m’ug riy ni n’en ni guy Ezekiel e de sor fan ko ngiyal’ u nap’an e bin som’on e chibog C.E. Ere ma sor fan ko mang ngiyal’?

16. Mang yugu reb e thin ko profet ni taareb rogon ko n’en ni i guy Ezekiel, ma uw rogon ni ma ayuwegdad ngad nanged e ngiyal’ nra lebug e n’en ni guy Ezekiel ko yay ni baga’ fan?

¹⁶ Ngad lemnaged e n’en ni guy Ezekiel ma gad ra nang e fulweg ko re deer nem. I yoloy Ezekiel ni gaar: “I piliyeg Got e changar rog me fekeg iyib nga lan e binaw nu Israel me tayeg nga daken ba burey ni rib tolang, ma bay reb e naun riy ni bod e mach ma bay ko le’luch.” (Ezekiel 40:2) Re “burey ney ni rib tolang” e bod rogon e n’en ni be yog u Mikah 4:1 ni gaar: “Tin ni bay fini yib e rran e fare burey [rok Jehovah] ni bay e tempel riy e bayi par ni ir e th’abi tolang u fithik’ e burey. Girdien pire’ e nam e bay ra thelapgad ngay.” Wuin ni ke lebug e re thin ko profet ney? Mikah 4:5 e be dag ni ra lebug ko ngiyal’ ni be liyor girdien e pi nam ko pi got ngoogsur. Ma rriyul’ ni ngiyal’ ney ni “tin ni bay fini yib e rran” ma ke tolang e bin riyul’ e liyor, ma kan sulweg nga rogon ya pi tapigpig rok Got e be mon’eg ko yafas rorad.

17. Uw rogon ni ma aywegdad e thin ko profet u Malaki 3:1-5 ni ngad nanged ko wuin ni kan biechnag fre tempel ni ke guy Ezekiel?

¹⁷ Mang e ke buch ni ke yog ni ngan sulweg e liyor nib machalbog nga rogon? N’en nth’abi ga’ fan ko n’en ni guy Ezekiel e ke yib Jehovah nga tempel rok me yog ni ngan biechnag min chuweg e liyor ko liyos riy. Wuin ni kan klinnag fre tempel rok Got nib spiritual? U Malaki 3:1-5, me yiiynag Jehovah u murung’agen ba ngiyal’ ni “ra yib nga tempel Rok” ma ra l’og e “mol’og rok,” ni Jesus Kristus. Mang fan? “Ra bod ba nifiy ni ma rannag e wasey nge par ndaki maathuk ban’en ngay, ma bod e sop nib gel.” Re klin ney e ke tabab u nap’an e bin som’on e mahl ko fayleng. Ma mang wenegan ni yib riy? Ke par Jehovah u naun rok ma ke flaabnag fre binaw nib spiritual ko girdi’ rok ni ka nap’an e 1919 iyib ngaray. (Isaiah 66:8) Ere rayog ni ngad lemnaged ni ra lebug e n’en ni yiiynag Ezekiel u murung’agen fre tempel u nap’an e tin tomren e rran.

18. Wuin ni ra lebug e n’en ni guy Ezekiel u murung’agen fre tempel ko yay ntomur?

¹⁸ Bod rogon yugu boch e thin ko profet u murung’agen ban’en ni kan sulweg nga rogon, ma n’en ni guy Ezekiel e ka bay ba ngiyal’ nga m’on ni ra lebug, ko yay ntomur, u lan e Paradis. Kari mus ni ngiyal’ nem ma ra yib angin e yaram ko tempel rok Got ko girdi’ nge ni mus rogon. Me Kristus e ra pi’ puluwon e maligach ni biyul’ nge mus rogon, ni yad e pi prist rok ni yad 144,000 u gubin. Urngin e girdi’ ni bay u tan pa’ e gagiyeg rok Kristus e ran aywegrad ngar flontgad. (Revelation 20:5, 6) Machane, fre Paradis e gathi ir e ngiyal’ nth’abi ga’ fan ni ra lebug e n’en ni guy Ezekiel. Mang fan?

N’en ni Guy Ezekiel e Ba Sor Fan ko Ngiyal’ ney

19, 20. Mang fan ni ra lebug e n’en ni guy Ezekiel ko ngiyal’ ney ma gathi nap’an e Paradis?

¹⁹ I guy Ezekiel e tempel nib t’uf ni ngan biechnag min chuweg e liyor ko liyos riy nge ngongol ndarngal nib spiritual ni yibe rin’ riy. (Ezekiel 43:7-9) Ma dabi siy ni re n’ey e de sor fan ko liyor ku Jehovah u Paradis. Maku pi prist ni ke guy Ezekiel e be yip’ fan girdien fachi ulung ni ka yad bay u fayleng, ma gathi tomren ni kan fasegrad ko yam’ ma ranod nga tharmiy ma gathi nap’an fre Biyu’ e Duw. Mang fan? Ya kan guy e pi prist ni yad be pigpig u mit fre tempel ni inner courtyard. Boch e thin ko Wulyang Nt’agil’ e Damit faram e kan weliy ni gin n’em e be yip’ fan e liw nib spiritual ko pi prist rok Kristus u nap’an ni yad bay u fayleng.c Ku mu lemnag ni fre n’en ni guy Ezekiel e be tamilangnag rarogon e pi prist ni dar flontgad. Ya ka nog ngorad ni ngar pied e maligach ni fan ko denen rorad. Kan ginangrad ni bay e riya’ riy ni ngar manged nde klin​—u rogon nib spiritual nge gafarig rorad. Ere gathi be yip’ fan e piin ni kan dugliyrad ma kan fasegrad ko yam’, ya ke yog apostal Paul u murung’agrad ni gaar: “Bay non e bin tomur e rappa’ riy. Ya nap’an nra non, mi ni faseg e yam’ ma ra ngal’gad ni girdi’ ndabki wod biid.” (1 Korinth 15:52; Ezekiel 44:21, 22, 25, 27) Pi prist ni guy Ezekiel e ma chag ko girdi’ mi yad maruwel u taabang. Ma gathi aram rogon u lan fre Paradis, ya pi prist e goo yad bay u tharmiy. Ere n’en ni guy Ezekiel e be dag ko uw rogon ni ma maruwel girdien fachi ulung u taabang ko fre “ulung ni baga’” u fayleng ko ngiyal’ ney.​—Revelation 7:9; Ezekiel 42:14.

²⁰ Ere fre tempel ni guy Ezekiel e be sor fan ko rogon ni yibe biechnag ban’en nib spiritual ko ngiyal’ ney. Ma mang fan ngom? Biney e gathi ke mus ni thin ni ran weliy murung’agen min lemnag. Ya n’en ni guy Ezekiel e bay fan ko liyor ni ga ma tay ku Jehovah u gubin e rran ni ir e bin riyul’ e Got. Bin migid e thin e ra weliy ko uw rogon.

[Boch e Thin nra Tamilangnag Murung’agen]

Ka Ga Manang?

◻ Uw rogon ni ke lebug ko yay nsom’on e n’en ni guy Ezekiel u murung’agen fre tempel nge pi prist?

◻ Uw rogon ni ke lebug faram e n’en ni guy Ezekiel u murung’agen fre binaw nge rogon ni kan yu guruynag?

◻ Nap’an ni kan sulweg yu Israel nga rogon, ma mini’ e yad e piin baga’ lungurad nib yul’yul’, ma mini’ e yad e “yu ke gek’iy ni baga’ kenggin ma ra bagayad ma bayi rin’ e tin nib mat’aw”?

◻ Mang fan nthingari lebug e n’en ni guy Ezekiel u murung’agen fre tempel ko ngiyal’ ni tin tomren e rran?