Flaab Ni Be Pi’ Jehovah Ko “Binaw” Rodad

“Gin nra yib fre ran riy e ra fas gubin ban’en.”​—EZEKIEL 47:9, New World Translation.

1, 2. (a) Uw fene ga’ fan e ran? (b) Mang e be yip’ fan fre ran ni bay ko fre lul’ ni ke guy Ezekiel?

RAN e ban’en ni rib manigil. Ya ba t’uf ko urngin ban’en nib fas. Dariy bagadad nrayog ni nge par nib fas nfaanra dariy e ran. Maku gad ma fanay e ran ni ngan klinnag ban’en, ya ma chuweg e alit. Ere gad ma luknag dowdad, nge mad rodad, nge ggan rodad ko ran. Ma re n’em e rayog ni nge ayweg e yafos rodad.

² Be weliy e Bible murung’agen e ran ni nge yip’ fan e pi n’en nib spiritual ni pi’ Jehovah ni fan ko yafos. (Jeremiah 2:13; John 4:7-15) Pi n’ey e ba muun ngay ni ngan biechnag e girdi’ rok u daken e biyul’ ni pi’ Kristus ni maligach nge fre tamilangan’ u murung’agen Got ni bay ko Thin Rok. (Efesus 5:25-27) Nap’an ni piliyeg e changar rok Ezekiel me guy fre tempel ma fre lul’ ni yib riy e be yip’ fan e pi flaab ni aram rogon ni ma pi’ e yafos. Ma wuin nra yib e re lul’ nem, ma mang fan ngodad ko ngiyal’ ney?

Ba Lul’ ni ma Yan Nga Lan e Binaw ni kan Sulweg nga Rogon

3. Mang e ke buch ngak Ezekiel ni kan weliy ko Ezekiel 47:2-12?

³ Girdi’ rok Ezekiel e ur moyed ni yad e kalbus u Babylon ere rib t’uf rorad e ayuw rok Jehovah. Ere kan pi’ e athamgil nga laniyan’ Ezekiel ni nge guy e ran ni be yib ko sanctuary me yib u tempel! Reb e engel e ke foleg e re lul’ nem ma reb e interval ma 1,000-cubit. Ma toarngin e yan i taw ko richib u ayiy me yan i taw nga buguy me yan i taw nga luknguy ma ke toar iyan nge mada’ ko ngiyal’ ni ba t’uf ni ngan nong. Fre lul’ e yibnag e yafos nge yangol. (Ezekiel 47:2-11) Kan nog ku Ezekiel ni gaar: “U baraba’ fre lul’ nge baraba’ ma ra tugul urngin mit e gek’iy ni bay wom’engin riy.” (Ezekiel 47:12a) Ma nap’an ni ma yan fre lul’ nge taw ko fre Day ni Yam’​—ni aram e day ni dariy e yafas riy​—ma ra sum e yafas riy! Ra yoor e nig. Ma ra fel’ rogon e folchuway’ ko fita’.

4, 5. Uw rogon nib taareb rogon e thin ko profet rok Joel u murung’agen ba lul’ nge fa bin ni guy Ezekiel, ma mang fan ni baga’ fan e re n’ey?

⁴ Re thin ko profet ney ni rib fel’ e ke puguran ngak piyu Jew ko yugu reb e thin ko profet ni kan yoloy nga but’ l’agruw e chibog faram ma be gaar: “Ba’ ba lul’ ni bay yan u tempel rok [Jehovah], nge tarannag fare loway i gek’iy ni akacia.”a (Joel 3:18) Re thin ko profet nem rok Joel e bod e n’en ni guy Ezekiel ya kan yiiynag u murung’agen ba lul’ ni ra yib ko naun rok Got, ni fre tempel, ma ra yibnag e yafos ko gin nder tugul ban’en riy.

⁵ Kan weliy u lan fre babyor ni Wulyang Ntagil’ e Damit ni be lebug e thin ni yiiynag Joel ko ngiyal’ ney.b Ere dabi siy ni ku aram rogon e n’en i guy Ezekiel. Kan sulweg e binaw ko girdi’ rok Got ko ngiyal’ ney ma ke flaabnag Jehovah e girdi’ rok ni bod yu Israel kakrom.

Boor e Flaab ni Yib

6. Fre racha’ ni kan atngiy nga daken fre altar e susun ni nge pugurannag piyu Jew ko mang?

⁶ Mang tapgin e pi flaab ni yib ko girdi’ rok Got ni kan sulwegrad nga rogon? Mu lemnag ni fre ran e ma yib u tempel rok Got. Ere ngiyal’ ney ma pi flaab e ma yib rok Jehovah u daken fre tempel rok nib spiritual​—ni aram e yaram ko bin machalbog e liyor. Ma ka bay ban’en ni baga’ fan ni guy Ezekiel. U lan e gin’en ni inner courtyard, ma fre lul’ e ma yib u charen fre altar, u le’luch. (Ezekiel 47:1) Ma fre altar e bay u lukngun fre tempel. Ma ke weliy Jehovah u murung’agen ngak Ezekiel nib mus rogon ma ke tay chilen ni ngan atangiy e racha’ ko maligach nga daken. (Ezekiel 43:13-18, 20) Baga’ fan e re altar nem ko piyu Israel. Ya kan dugliy e m’ag u thilrad Jehovah kafram u nap’an ni atangiy Moses e racha’ nga daken ba altar u pe’ening ko fre Burey ni Sinai. (Exodus 24:4-8) Fre racha’ ni kan atangiy nga daken fre altar e susun ni nge puguran ngorad ni nap’an ni kar sulod ko binaw rorad, ma ra yib e flaab rok Jehovah ngorad n’umngin nap’an ni yad ra tay fan fre m’ag u thilrad Jehovah.​—Deuteronomy 28:1-14.

7. Mang fan ko pi Kristiano ko ngiyal’ ney fre altar ni be yip’ fan ban’en?

⁷ Ku aram rogon e girdi’ rok Got ko ngiyal’ ney ni yad ba flaab u daken ba m’ag​—ni reb e m’ag ni kab fel’ ko fa binem, ni aram e bin nib biech e m’ag. (Jeremiah 31:31-34) Bod rogon fa binem ma kan dugliy u daken e racha’, ni rachaen Jesus Kristus. (Hebrews 9:15-20) Ngiyal’ ney ma demtrug ko gad girdien fachi ulung ni gadad bang ko re m’ag nib biech nem, ara gad girdien “yugu boch e saf” ni ra yib angin ngodad u daken e re m’ag nem, ma gad gubin ma rib ga’ fan ngodad e re altar nem ni be yip’ fan ban’en. Ya be yip’ fan e tin nib m’agan’ Got ngay nib peth ko maligach ni pi’ Kristus. (John 10:16; Hebrews 10:10) Bod rogon fre altar ni bay u lukngun fre tempel nib spiritual ma maligach ni pi’ Kristus ni biyul’ e aram kenggin e bin machalbog e liyor. Aram tapgin ni ngan n’ag fan e denen rodad ma aram e rayog ni nge l’agan’dad ko gabul nge langleth. (1 John 2:2) Ere gad ma athamgil ni ngad pared ko fre motochiyel ko fa bin nib biech e m’ag ni “motochiyel rok Kristus.” (Galatia 6:2) N’umngin nap’an ni gad ra yodor, ma ra yib angin ngodad e pi n’en ni pi’ Jehovah ni fan ko yafas.

8. (a) Mang ban’en ni dariy ko gin’en ni inner courtyard ko fre tempel ni guy Ezekiel? (b) Uw rogon ni yad ma biechnagrad e pi prist u lan fre tempel ni guy Ezekiel?

⁸ Reb i angin ni ra yib e aram e par nib biech u p’eowchen Jehovah. U lan fre tempel ni guy Ezekiel ma bay ban’en ndariy u lan e gin’en ni inner courtyard ni ba’ u gin’en ni wuru’ ko fre tabernacle nge tempel rok Solomon​—aram ba tafen e ran ni baga’ ara tarai ni ka nog e day ngay, ni fan ni nge maluk e piin prist riy. (Exodus 30:18-21; 2 Kronicles 4:2-6) Mang e rayog ni nge fanay e pi prist ko tempel ni guy Ezekiel ni ngar biechgad? Fre lul’ nib maangang ni yib u lan fa gin’en ni inner courtyard! Arrogon, ra flaabnagrad Jehovah me ayuwegrad ni ngar pared nib biech, ara thothup.

9. Uw rogon nrayog ni nge par girdien fachi ulung nge girdien fre ulung ni baga’ ni yad ba klin u p’eowchen Got ko ngiyal’ ney?

⁹ Ku arrogon e ngiyal’ ney ni girdien fachi ulung e yad be par nib biech u p’eowchen Jehovah. Yad ba thothup, mab mat’aw u wan’ Jehovah. (Roma 5:1, 2) Ma uw rogon fre “ulung ni baga’” ni be yip’ fan e pi ganong ni gathi yad e prist? Yad ma liyor ko gin’en u wuru’ fare yoror, ma re lul’ nem e ku ma yib ngaram u lan fre tempel ni guy Ezekiel. Ere rib puluw ni ke guy apostal John fre ulung ni baga’ ni kar chuwgad ko mad nib wechwech u nap’an ni yad be liyor u gin’en u wuru’ fre yoror ko fre tempel nib spiritual! (Revelation 7:9-14) Demtrug ko uw rogon ni kan ngongol ngorad u lan e re fayleng ney nib kireb, ma rayog ni nge mich u wan’dad ni n’umngin nap’an ni ra michan’rad ko maligach ni pi’ Kristus, ma yad be par nib biech mab machalbog u p’eowchen Jehovah. Uw rogon ni yad ma ngongliy e michan’ rorad? Yad ma lek luwan ay Jesus, me michan’rad ko maligach ni pi’ ni biyul’.​—1 Peter 2:21.

10, 11. Mang ban’en ni baga’ fan u murung’agen fre ran ni be yip’ fan ban’en, ma re n’ey e ma tor ko rogon ni be ga’ iyan fre lul’?

¹⁰ Kan weliy faram ni ka bay ban’en nib baga’ fan ko re ran ney ni be yip’ fan ban’en​—aram e tamilangan’. Nap’an ni kan sulweg yu Israel nga rogon, ma ke flaabnag Jehovah e girdi’ rok ko fonow ko Bible u daken e pi prist. (Ezekiel 44:23) Ku aram rogon e ngiyal’ ney ni ke flaabnag Jehovah e girdi’ rok ya ke fil ngorad e Thin riyul’ Rok, u daken e “pi prist nib thothup.” (1 Peter 2:9) Ngiyal’ ney ni tin tomren e rran e ke yoor e tamilangan’ u murung’agen Jehovah Got, nge tin nib m’agan’ ngay ni fan ko girdi’, nge murung’agen Jesus Kristus nge Gil’ilungun. Rib fel’ ni ke ga’ fre lul’ ko tirok Got ban’en ni be yib ngodad be pi’ e toffan ngodad!​—Daniel 12:4.

¹¹ Bod rogon fre lul’ ni ke foleg fre engel e ke toar iyan, ma ke yoor e flaab ni ma pi’ e yafas ni yib rok Jehovah ni fan ni nge ayuweg e girdi’ ni boor ni be un ko binaw rodad nib spiritual. Ka bay reb e thin ni kan yiiynag u murung’agen e sul nga rogon ni be gaar: “Mus ko re tabinaw nib th’abi lich e girdi’ riy ma ba sobut’ ni bay ra pired ni bod ba nam ni ba ga’ ma ba gel. Bayi taw nga nap’an mu gu gagiyegnag ni nge doro’ nib gur. Yi gag [Jehovah]!” (Isaiah 60:22) Ke riyul’ e pi thin ney​—bokum milyon e girdi’ ni kar uned ngodad ko liyor nib machalbog! Ma ke pi’ Jehovah e “ran” ni boor ni fan ko urngin e piin ni ma yib ngak. (Revelation 22:17) Ma ma guy rogon ni ulung rok u fayleng e ma wereg e Bible nge pi babyor ni ma weliy e Bible u ga’ngin e fayleng, u bokum miriay mit e thin. Ku aram rogon e pi muulung ko Kristiano nge pi convention e kan yarmiy u fayleng ni ga’ngin ni rayog ni nge pi’ e ran ko thin riyul’ ngak gubin e girdi’. Mang angin ni ma yib ko pi girdi’ nem?

Fre Ran e ma Pi’ e Yafos!

12. (a) Mang fan ni pi gek’iy ni guy Ezekiel e rayog ni nge yib wom’engirad ni pire’ ni aram rogon? (b) Mang e be yip’ fan e pi gek’iy nem ko ngiyal’ ni tin tomren e rran?

¹² Fre lul’ ni guy Ezekiel e ma pi’ e yafos nge fel’ fithik’ i dowey. Nap’an ni kan weliy ngak Ezekiel murung’agen e pi gek’iy ni ra tugul u baraba’ fre lul’ min gaar ngak: “Dabi mororoy yuwan’, ma dabi kireb wom’engin . . . Ma wom’engin e ra kay e girdi’ me mang ggan rorad, ma yuwan e ra golnag e liliy.” Mang fan ni aram rogon e pi gek’iy nem? “Ya ran ni be yib ngorad​—e be yib ko fre sanctuary.” (Ezekiel 47:12b) Pi gek’iy ney e be yip’ fan urngin e pi n’en ni ma pi’ Got ni nge sulweg e girdi’ nga rogon ngar flontgad u daken e maligach ni pi’ Jesus. Ngiyal’ ney u fayleng ma girdien fachi ulung e ma pi’ e ggan nib spiritual ma yad ma golnag e liliy u rogon nib spiritual. Tomren ni ke yan urngin e 144,000 e girdi’ nga tharmiy ma yad ra pigpig ni yad e prist ma yad ra un ngak Kristus ko gagiyeg ma ra yib angin ngodad riy gabul nge langleth ma ra taw ko ngiyal’ ni kan gel ngak e yam’ ni af rok Adam.​—Revelation 5:9, 10; 21:2-4.

13. Uw rogon ni kan golnag e girdi’ ko ngiyal’ ney?

¹³ Fre lul’ ni guy Ezekiel e ma yan nga lan fre Day ni Yam’ ni dariy ban’en nib fas riy ma ma golnag urngin ban’en ni ke taw ngay. Fre day e be yip’ fan rarogon nib yam’ ko tirok Got ban’en. Machane ke fas urngin ban’en “u gubin yang ni ke yib fre lul’ riy.” (Ezekiel 47:9) Ku aram rogon ko ngiyal’ ney ni tin tomren e ran ma yibe faseg e girdi’ ko tirok Got ban’en u gubin yang ko gini ke taw fre ran ko yafos ngay. Tin som’on ni kan fasegrad ni aram rogon e yad girdien fachi ulung u nap’an e duw ni 1919. Kar fosgad ko yam’ u rogon nib spiritual ya ur moyed ni bod e yam’ ya dar rin’ed ban’en ni fan ko tirok Got ban’en. (Ezekiel 37:1-14; Revelation 11:3, 7-12) Ka aram ma pi ran nem e ke taw ngak yugu boch e girdi’ ni yad ba yam’ ko tirok Got ban’en, ma kan fasegrad mar manged bang fre ulung ni baga’ ko yugu boch e saf, ni yad e piin ni ba t’uf Jehovah rorad ma yad ma pigpig ngak. Dabki n’uw nap’an ma ku ran ayweg e piin ni kar m’ad ni aram rogon ya ran fasegrad ko yam’.

14. Rogon e shiyobay ko fita’ u lan fre Day ni Yam’ e be tamilangnag e mang ko ngiyal’ ney?

¹⁴ Ma yib angin nib fel’ ni aram e ngan par nib fas ko tirok Got ban’en. Aram rogon e shiyobay ko fita’ ni ke fel’ rogon ko fre day ni ke par nib yam’ faram. Yog Jesus ko pi gachalpen: “Mu un[ed] ngog, mu gu fil ngo[med] rogon i yognag e girdi’.” (Matthew 4:19) Ngiyal’ ney ni tin tomren e rran, ma ke tabab fre maruwel ko fita’ u nap’an ni kan tabab i kunuy e tin ni ka bay girdien fachi ulung, machane gathi ke mus. Ya fre ran ni ma pi’ e yafos ni ma yib u tempel rok Jehovah nib spiritual e ma pi’ e flaab ni tamilangan’, ma ma yib angin ngak girdien urngin e nam. Demtrug e gin ni ke taw e re rran nem ngay, ma wenegan ni yib e kan faseg e girdi’ ko tirok Got ban’en.

15. Mang e be dag ni gathi gubin e girdi’ ni ra adag ni ngar uned ko pi n’en ni ma pi’ Got ko yafos, ma mang wenegan nra yib ngorad?

¹⁵ Machane gathi gubin e girdi’ ma yad ba adag fre thin ni ma pi’ e yafos; maku ra aram rogon e piin ni ran fasegrad ko yam’ u nap’an fre Biyu’ e Duw ko Gagiyeg rok Kristus. (Isaiah 65:20; Revelation 21:8) Ya ke yog fre engel ni gathi gubin yang u lan fre day e ke fas. Yu gin’em nib yam’ e ‘goo sol e bay riy.’ (Ezekiel 47:11) Ma girdi’ ko ngiyal’ ney e gathi yad gubin e yad ba adag fre ran ko yafos rok Jehovah ni kan pi’ ngorad. (Isaiah 6:10) Nap’an Armageddon ma urngin e piin ni kar dugliyed ni ngar pared nib yam’ ko tirok Got ban’en ni yad ra par ni goo sol e bay rorad, ni aram e ran thangrad nib mus rogon. (Revelation 19:11-21) Machane, piin ni kar yul’yul’gad ma yad be unum e re ran ney e rayog ni nge l’agan’rad ni ngar guyed e ngiyal’ nra lebug e re thin ko profet ney ko yay ntomur.

Ma Yan Fre Lul’ Nga Paradis

16. Wuin nge uw rogon ni ra lebug e n’en ni guy Ezekiel u murung’agen fre tempel ko yan tomur?

¹⁶ Bod rogon yugu boch e thin ko profet u murung’agen e sul nga rogon, ma n’en ni guy Ezekiel u murung’agen fre tempel e ra lebug u nap’an fre Biyu’ e Duw. Ngiyal’ nem ma dakuriy e piin ni prist u fayleng. “Bay ra manged pi prist rok Got nge Kristus, ma bay ra uned ngak ko gagiyeg [u tharmiy] u lan bbiyu’ e duw.” (Revelation 20:6) Pi prist ney u tharmiy e ra un ngak Kristus mi yad yarmiy urngin ban’en nge yib angin e biyul’ ni pi’ Kristus. Ere ran ayweg e piin mat’aw, mi yad par nib flont!​—John 3:17.

17, 18. (a) Mang e be weliy ko Revelation 22:1, 2 u murung’agen ba lul’ ni ma pi’ e yafos, ma wuin nra lebug e re thin nem? (b) U lan e Paradis ma mang fan nra ga’ fre lul’ ni ma pi’ e yafos nib mus rogon?

¹⁷ Ma aram ma fre lul’ ni ke guy Ezekiel e ke yib e ran riy ni bin th’abi gel e ran ko yafos. Aram e ngiyal’ nra lebug fre thin ko profet ni bay ko Revelation 22:1, 2 ni be gaar: “Mi ki dag fare engel ngog fare lul’ ni bay e ran ko yafos riy, ni be galgal ramaen ni bod e krystal, ni yib u tagil’ Got nge fare Fak e Saf, nge yan u lulukngun e kanawo’ ko fare binaw. Ma ra baraba’ fare lul’ ma ba’ e gek’iy ko yafos riy, ni ragag nge l’agruw yay ni ma k’uf u reb e duw, nra reb e pul ma taab yay; ma yuwan e ma chuweg e liliy rok e pi nam.”

¹⁸ Nap’an fre Biyu’ e Duw, ma urngin e m’ar​—u dowey nge lanin’uy​—e ran golnag. Aram e n’en ni be yip’ fan ko pi gek’iy ni ra “chuweg e liliy rok e pi nam.” Ke magar Kristus nge fapi 144,000, e girdi’ ya “dariy be’ ni be par u lan e nam rodad ni bayi ki yog nib m’ar.” (Isaiah 33:24) Ma aram e ngiyal’ nra ga’ e re lul’ nem nge mus rogon. Ya thingari ga’ nge toar ni fan ni nge ayuweg bokum milyon e girdi’, ma sana bokum bilyon, e piin ni ran fasegrad ko yam’ ma yad ra unum e re ran ney nib machalbog ni ma pi’ e yafos. Fre lul’ ni ke guy Ezekiel e ke golnag fre Day ni Yam’, me pi’ e yafos u gubin yang ni ke taw ngay. Ere aram rogon u Paradis, ma piin pumoon nge piin ppin e yad ra fos nib mus rogon, ya yira golnagrad ko yam’ ni af rok Adam nfaanra ra mich fre biyul’ u wan’rad. Revelation 20:12 e be yiiynag ni ra moy boch e “babyor” ma ran pithig ko ngiyal’ nem, ma ra pi’ e tamilang ni ra ayweg e piin ni kan fasegrad ko yam’. Bay e kireban’ riy ya boch e girdi’ e ra dabuy ni ngan golnagrad, ni mus u Paradis. Pi tatogopluw ney e ran ‘pi’ ko sol’ ni aram e ran thangrad ngar m’aygad.​—Revelation 20:15.

19. (a) Uw rogon nra lebug e n’en ni kan guy u murung’agen fre binaw ni kan f’otheg? (b) Fre mach e be yip’ fan e mang u lan fre Paradis? (c) Mang e yibe tamilangnag ni bochan e gin’en ni bay fre mach riy nib mal’af nga orel ko tempel?

¹⁹ Ngiyal’ nem ma ku ra lebug e n’en ni guy Ezekiel u murung’agen fre binaw ni kan f’otheg. Ke guy Ezekiel ni kan yu guruynag fre binaw; maku aram rogon ra reb e Kristiano nib yul’yul’ ma rayog ni nge pagan’ ni bay tafen u Paradis. Dabi siy ni ran rin’ u rogon nib yaram ma ran pi’ ko girdi’ e n’en ni yad ba adag me yog e naun ngorad ni ngar ayweged. (Isaiah 65:21; 1 Korinth 14:33) Fre mach ni guy Ezekiel e be yip’ fan e yaram ni ra tay Jehovah ni fan ko fa bin nib biech e fayleng. Ma piin ni yad e prist e dakur pared ko girdi’ u fayleng. Aram rogon ni be tamilangnag e n’en ni guy Ezekiel ya kan dag yaan fre mach ni bay u lan e binaw nib “alit” u bang nib mal’af nga orel ko fre tempel. (Ezekiel 48:15) Nap’an ni be gagiyeg Kristus nge fapi 144,000 e girdi’ u tharmiy, ma gathi dariy e piin owchen fre Pilung u fayleng. Ya piin ni yad bod e ani ga’ lungun e ra pow’iy e girdi’ u fayleng u fithik’ e t’ufeg. Machane, bin riyul’ e gagiyeg e bay u tharmiy, ma gathi fayleng. Ma gubin e girdi’ u fayleng nib muun ngay girdien fa ani baga’ lungun, e ra par u tan pa’ Gil’ilungun fre Messiah.​—Daniel 2:44; 7:14, 18, 22.

20, 21. (a) Mang fan nib puluw fre ngochol ni kan tunguy ko re mach nem? (b) Mang boch e deer ni susun ni ngad fithed gadad riy ni bochan e ke tamilangan’dad ko n’en ni ke guy Ezekiel?

²⁰ Mu tiyan’um ko bin tomur e thin ni yog Ezekiel ni gaar: “Fithingan e re mach nem ko rofen nem i yan nga m’on e Jehovah e Ir e Bay u Rom.” (Ezekiel 48:35) Re mach nem e gathi ra par ni fan ni nge pi’ gelngin ngak e girdi’ ngar gelgad ko yugu boch e girdi’; ma gathi fan ni ngan rin’ e tin nib m’agan’ e girdi’ ngay. Ya aram e mach rok Jehovah, ma ra m’ug fiti laniyan’ riy nge kanawo’ rok nib t’ufeg mab mat’aw. (James 3:17) Re n’ey e ma pi’ e athamgil nga lanin’dad ni ra flaabnag Jehovah e “bin nib biech e fayleng” rok me ayweg e girdi’ iyan ndariy n’umngin nap’an.​—2 Peter 3:13.

²¹ Gathi gad ba falfalan’ ni ngad lemnaged e n’en ni bay nga m’on rodad fa? Ere bpuluw ni ra bagadad me fith ni gaar: ‘Uw rogon u wan’ug e pi flaab ni kan dag ko n’en ni guy Ezekiel? Gub yul’yul’ ma gu ma ayweg fare maruwel ni be rin’ e piin piilal, nib muun ngay girdien fachi ulung nge girdien fa ani baga’ lungun? Fa bin machalbog e liyor aram kenggin e yafos rog fa? Gu ma fanay fre ran ni be yib ngodad ko ngiyal’ ney ni kari yoor fa?’ Nguuda ul’ul’gad iyan ko pi n’ey ma aram e gad ra falfalan’ ndariy n’umngin nap’an ko pi n’en ni pi’ Jehovah!

[Boch e Thin nra Tamilangnag Murung’agen]

Uw Rogon ni Ga Ra Fulweg?

◻ Mang e be yip’ fan e pi ran ni yib u lan fre tempel?

◻ Uw rogon ni ke fanay Jehovah fre lul’ ni nge golnag e girdi’, ma mang fan ni ke gel fre lul’ ke ga’?

◻ Mang e be yip’ fan e yu ke gek’iy u ra baraba’ fre lul’?

◻ Fre mach e sor fan ko mang u nap’an fre Gagiyeg ni Biyu’ e Duw, ma mang fan nib puluw e ngochol ni kan tunguy ngay?

[Sasing ko page 21]

Fre lul’ ni ma pi’ e yafos e be yip’ fan e pi n’en ni ma pi’ Got ni fan ni nge thapeg e girdi’ ngak