“Fre Tempel” Nge “Ani Baga’ Lungun” Ko Ngiyal’ Ney

“Ma rogon e n’en nra rin’ e en ni baga’ lungun u fithik’rad e nap’an ni yad ra yib ma thingari yib; ma nap’an ni yad ra yan, ma thingari yan.”​—EZEKIEL 46:10, New World Translation.

1, 2. Mang thin riyul’ e ma aywegdad ngad nanged fan e n’en ni guy Ezekiel u murung’agen fre tempel?

BOCH e tamachib ko motochiyel e gathi ri yad ba adag fre babyor ku Ezekiel. Rogon ni yog fre babyor ni Talmud, ma boch i yad e ur adaged ni ngan chuweg e re ke babyor nem ko Bible. Ya mo’maw ni ngar weliyed fan e n’en ni guy Ezekiel u murung’agen fre tempel ma ur gaargad ni dabiyog ko girdi’ ni nga ur weliyed. Ma yugu boch e girdi’ ni ma fil e Bible e dar nanged fan e n’en ni guy Ezekiel u murung’agen fre tempel rok Jehovah. Ma gadad?

² Ka nap’an e ngiyal’ ni kan sulweg e bin machalbog e liyor nga rogon, ma ke flaabnag Jehovah e girdi’ rok ya ke tamilangnag boch ban’en ngorad, ma ke tamilangnag ngorad ko mang fan fre tempel nib spiritual rok Got​—ni aram e yaram rok Jehovah ni bod e tempel ni fan ko liyor nib machalbog.a Re thin riyul’ ney e ma aywegdad ngad nanged fan e n’en ni guy Ezekiel u murung’agen fre tempel. Ngad lemnaged fa aningeg i n’en ni baga’ fan ko re n’en ney ni i guy Ezekiel​—fre tempel, pi prist, fa an ni baga’ lungun, nge fre binaw. Mang fan e pi n’ey ko ngiyal’ ney?

Fre Tempel nge Rogon ni Gab L’ag Ngay

3. Mang e gad be fil ko fre chigiy nib tolang nga lang, nge yaan ban’en ni kan yoloy nga dow e rungrung ni ma sor iyan ko fre tempel?

³ Mu lemnag ni ga be yan ni ngam guy e re tempel ney. Gad ra yib ko medlip e tawo’ ni be yan nga lang nga reb e garog nib ga’. Mu lan e re yoror ney ma gad ra sap nga lang ma gad ra ngat ngay. Ya fre chigiy e 100 fit tolngin! Re n’ey e ma tamilangnag ni rib tolang e pi motochiyel rok Jehovah ni fan ni ngan un ko yaram ko liyor ngak. Be yib e tamilang ko winda nga daken dow i rungrung ni kan yoloy yaan e gek’iy ni palm ngay, ni be yip’ fan e mat’aw. (Psalm 92:12; Ezekiel 40:14, 16, 22) Gin n’ey nib thothup e fan ko piin nib mat’aw e gafarig rorad nge par rorad ko tirok Got ban’en. Ere gad ba adag ni ngad pared nib mat’aw ni aram e ra falan’ Jehovah ko liyor ni gad be tay.​—Psalm 11:7.

4. Mini’ e dabiyog ni ngar uned nga lan fre tempel, ma mang e gad be fil ko re n’em?

⁴ Bay e kanawo’ ara passageway, ma ra baraba’ ma bay dalip e singgil riy ni fan ko matanag. Ra pagdad e pi matanag ni nga darod nga lan fre tempel? Yog Jehovah ku Ezekiel ni dariy be’ nu bang ni rayog ni nge yan ngaram nfaanra dawor ni maadad nga laniyan’ nge nga downgin.” (Ezekiel 40:10; 44:9) Mang fan e re n’em? Ke mus ni ma felan’ Got ko piin ni ba t’uf e pi motochiyel rok rorad ma yad ma par nib puluw ngay. (Jeremiah 4:4; Roma 2:29) Ma pining e girdi’ ni aram rogon nga lan e tento rok nib spiritual, ni aram e naun rok ni fan ko liyor. (Psalm 15:1-5) Ka nap’an e ngiyal’ ni kan sulweg e bin riyul’ e liyor nga rogon ko duw ni 1919, ma fre ulung rok Jehovah u fayleng e ke tay tanggin e pi motochiyel rok nib sor fan ko gafarig. Piin ni dubrad ni ngar folgad e dabkun piningrad ni ngar uned ko girdi’ rok. Ngiyal’ ney ma ke par e liyor rodad nib biech mab machalbog ni bochan e kan fol ko Bible ni be yog ni ngan tharbog ko ulung e piin ni kar rin’ed e kireb ma dar kalgadngan’rad.​—1 Korinth 5:13.

5. (a) Uw rogon nib taareb rogon e n’en ni guy Ezekiel nge n’en ni guy John u Revelation 7:9-15? (b) Rogon e n’en ni guy Ezekiel ma mini’ e be yip’ fan fa 12 e ganong ni yad be liyor ku Got u lan e gin’en u wuru’ fre tempel ni outer courtyard?

⁵ Fre pa’ i kanawo’ ni ma yan nga wuru’ e yoror ni aram e gin ni ma liyor e girdi’ ku Jehovah riy mi yad pining e sorok ngak. Re n’ey e taareb rogon ko n’en ni guy John faani pig e changar rok me guy fre “ulung ni baga’” ni be liyor ku Jehovah ni “rran nge nep’ u lan e tempel rok.” Fagali n’en nem ni kan guy e bay e gek’iy ni Palm riy. Ke guy Ezekiel e pi gek’iy nem ni kan yoloy yaan nga daken dow e rungrung ko wo’ nga naun. Ma ke guy John e pi gek’iy nem ni bay u pa’ e piin ni be liyor ku Jehovah ni be yip’ fan ni yad be pining e sorok ngak Jehovah ma yad be n’uf Jesus ni ir e Pilung rorad. (Revelation 7:9-15) Rogon ni guy Ezekiel ma fa 12 e ganong nu Israel e be yip’ fan girdien “yugu boch e saf.” (John 10:16; mu taarebnag ko Luke 22:28-30.) Gur bagayad e piin ni ma falfalan’ ni ngan n’uf Jehovah min wereg e thin u murung’agen Gil’ilungun fa?

6. Mang fan e pi singgil ko abich u lan e gin’en u wuru’ fre tempel ni outer courtyard, ma re n’ey e be tamilangnag e mang taw’ath ko girdien yugu boch e saf?

⁶ Nap’an ni gad be yan nga lan e gin’en ni outer courtyard, ma gad be guy 30 e singgil ni fan ko abich mu rom e ma kay e girdi’ boch ban’en riy ko maligach ni kar pied ni ayuw. (Ezekiel 40:17) Ngiyal’ ney ma girdien yugu boch e saf e dar pied e maligach ni gamanman, machane gathi yad ma yib ko tempel nib spiritual ni dariy ban’en u pa’rad ni ngar pied ni maligach. (Mu taarebnag ko Exodus 23:15.) I yoloy apostal Paul ni gaar: “Ere nguud pininged e magar ngak Got u gubin ngiyal’ nge mang maligach rodad ngak u daken Jesus; ni aram e gubin ngiyal’ ni nguud pininged e magar nga fithingan u lungudad nga dogned ni ir e Somol. Dab mpaged talin ni ngam rin’ed e tin nib fel’ ma nge bigimed mi i ayweg bigimed, ya ereray e pi maligach nib m’agan’ Got ngay.” (Hebrews 13:15, 16; Hosea 14:2) Ri gad ba taw’ath ni rayog ni ngad pied e maligach ni aram rogon ku Jehovah.​—Proverbs 3:9, 27.

7. Rogon ni kan foleg fre tempel e be micheg e mang ngodad?

⁷ Be guy Ezekiel reb e engel ni be foleg fre tempel. (Ezekiel 40:3) Ku aram rogon ni ka nog ngak apostal John ni gaar: “Mu sak’iy ngam foleg e tempel rok Got nge fare altar, ma ga theeg e piin ni yad be meybil u lan e tempel.” (Revelation 11:1) Mang fan e re n’ey? Aram e pow ni be micheg ni dariy ban’en nrayog ni nge taleg Jehovah ni nge lebuguy e n’en nke m’agan’ ngay ni fan ko liyor nib machalbog. Ku arrogon e ngiyal’ ney ma thingari mich u wan’dad ni dariy ban’en​—ni mus ko togopuluw nib gel ni ma yib ko pi am​—nrayog ni nge taleg ni nge dabi sul e bin machalbog e liyor nga rogon.

8. Mini’ e ma yib ko pi garog nga lan e tempel ni inner courtyard, ma pi garog ney e be yip’ fan e mang?

⁸ Nap’an ni gad be th’ab fre outer courtyard, ma gad be guy ni bay dalip e garog ni be sor iyan ko fre inner courtyard; ma pi garog nem u langgin e ba k’af ko pi garog u wuru’ mab taareb ga’ngin. (Ezekiel 40:6, 20, 23, 24, 27) Kari mus ni piin ni prist e rayog ni nga ranod nga lan e inner courtyard. Pi garog nge lan e yoror e be yip’ fan ni girdien fachi ulung e thingara puluwnaged yad ko pi motochiyel rok Got, ma ku aram e pi motochiyel ni ma pow’iy urngin e Kristiano. Machane mang e maruwel ko piin prist, ma mang fan ko ngiyal’ ney?

Ba Ulung i Prist nib Yul’yul’

9, 10. Uw rogon kar pied e fonow nib spiritual e “pi prist ni yad e pilung” ni be yip’ fan e pi prist ni ke guy Ezekiel?

⁹ Nap’an e ngiyal’ u m’on ko Kristiano, ma ba gel e maruwel ni tay e pi prist u lan e tempel. Ya kar lied e pi gamanman ni fan ko maligach, min tay nga daken e altar, ma ku yad ma pigpig ko yugu boch e prist nge girdi’, ma ba gel e marwel riy. Machane ka bay boch e marwel rorad nib ga’ fan. I tay Jehovah chilen ko pi prist ni gaar: “Thingara filed ko girdi’ rog ngar nanged ko uw rogon nib thil ban’en nib thothup ko ban’en nib golong; mi yad nang e thil u thilin ban’en nde klin nge ban’en nib klin.”​—Ezekiel 44:23, NW; Malaki 2:7.

¹⁰ Ga ma tay fan e marwel nib gel nge pigpig ni ma tay girdien fachi ulung ni yad “ba ulung i prist nib tolang” ni fan ko liyor nib machalbog fa? (1 Peter 2:9) Bod rogon e pi prist nu Levi kakrom, ma kar pow’iyed e girdi’ mar filed e tin nib spiritual ban’en ngorad, ma yad ma ayweg e girdi’ ngar nanged ko mang e tin nib klin mab fel’ u wan’ Got ma mang e danga’. (Matthew 24:45) Pi fonow ney e bay ko pi babyor ni ma tamilangnag e thin ko Bible, nge pi muulung ko Kristiano, nge pi convention, ma kan ayweg bokum milyon e girdi’ nge fel’ thilrad Got.​—2 Korinth 5:20.

11. (a) Uw rogon ni be tamilangnag e n’en ni guy Ezekiel ko uw fene ga’ fan ni nge par e pi prist nib klin? (b) Nap’an e tin tomren e rran, ma uw rogon ni kan biechnag girdien fachi ulung ni fan ko tirok Got ban’en?

¹¹ Machane pi prist e gathi ke mus ni thingara filed ngak e girdi’ ni ngar pared nib klin; ya ku yad e thingara pared nib klin. Ere ke guy Ezekiel ni kan biechnag e pi prist nu Israel. (Ezekiel 44:10-16) Ku arrogon ni buch ko duw ni 1918, ya ke par Jehovah ni “bod be’ ni ma rannag e silber ko nifiy nge par ndaki maathuk ban’en ngay” u lan e tempel rok nib spiritual, ni be yaliy girdien fachi ulung ni yad ba ulung i prist. (Malaki 3:1-5) Piin ni ka nog ni yad ba klin ko tirok Got ban’en fa kar kalgadngan’rad ko liyor ngoogsur ni kar uned ngay faram e kan pagrad ni nguur ul’ul’gad ko pigpig u lan fre tempel nib spiritual. Machane bod yugu boch e girdi’ ma girdien fachi ulung e rayog ni ngar manged e piin de klin​—ko tirok Got ban’en nge gafarig rorad. (Ezekiel 44:22, 25-27) Thingara athamgilgad nib elmirin ni ngar pared ni “dabi kirebnag[rad] e kireb nu fayleng.”​—James 1:27; mu taarebnag ko Mark 7:20-23.

12. Mang fan nsusun ni ngad ted fan e marwel ni be tay girdien fachi ulung?

¹² Ra bagadad ma nge fith ni gaar, ‘Gu ma tay fan e kanawo’ ni ma tay girdien fachi ulung u lan in e duw ni kar pigpiggad nib yul’yul’ fa? Gu ma folwok rorad u rogon fene gel e michan’ rorad fa?’ Manigil ni dabi pag talin girdien fre ulung ni baga’ ni dabi par girdien fachi ulung rorad u roy u fayleng u gubin ngiyal’. I guy Ezekiel ni be yog Jehovah u murung’agen e pi prist ni gaar: “Dariy bangi binaw ni ngam pi’ ngorad ni ngar tafanayed u Israel: I gag e nggu aywegrad.” (Ezekiel 44:28) Ku aram rogon girdien fachi ulung e dariy taferad ni manemus u fayleng. Ya yad ra yan nga tharmiy, ma girdien fre ulung ni baga’ e ma lemnag nib taw’ath ni ngar aywegrad mar pied e athamgil nga lanin’rad u nap’an ni ka yad bay u fayleng.​—Matthew 25:34-40; 1 Peter 1:3, 4.

Fa An ni Baga’ Lungun​—Ir Mini’?

13, 14. (a) Mang fan nka nog ni fa ani baga’ lungun e bang ko girdien yugu boch e saf? (b) Mini’ e be yip’ fan fa ani baga’ lungun?

¹³ Ere chiney ma bay e deer nib ga’ fan. Mini’ e be yip’ fan fa ani baga’ lungun? Kan weliy murung’agen ni ir taabe’ maku ka nog ni aram ba ulung i girdi’, ere bpuluw ni ngad lemnaged ni be yip’ fan ba ulung i pumoon. (Ezekiel 44:3; 45:8, 9) Ma yad mini’? Dabi siy ni gathi girdien fachi ulung. Ya n’en ni guy Ezekiel ma re moon nem e ma ayweg e piin prist machane gathi ir bagayad. Ma gathi bod fre ulung i prist ya kan pi’ bangi binaw ngak me ere ra par u roy u fayleng, ma gathi tharmiy. (Ezekiel 48:21) Miki weliy ko Ezekiel 46:10 ni gaar: “Ma fa ani ga’ lungun u fithik’rad e thingari yib nga lan e [outer courtyard] u nap’an nra yib e [pi ganong ni gathi yad e prist]; ma nap’an ni yad ra yan, ma thingari yan.” Ere der ma yan nga lan e inner courtyard ya ma liyor u lan e outer courtyard, ma be un ko girdi’ u nap’an ni yad ra yib ko tempel nge nap’an ni yad ra chuw riy. Pi n’en ney e be tamilangnag ni fa ani baga’ lungun e bang ko fre ulung ni baga’ ko yugu boch e saf.

¹⁴ Ba tamilang ni bay boch ban’en nib mil fan ngak e ani baga’ lungun ni fan ko girdi’ rok Got. U gin’en ni outer courtyard, ma ma par ko beranda ko Garog u Ngek. (Ezekiel 44:2, 3) Aram e be yip’ fan ni be gagiyegnag ban’en, ni bod rogon e pi piilal nu Israel ni kar pared ko garog ko mach ni yad e tapuf oloboch. (Ruth 4:1-12; Proverbs 22:22) Mini’ u fithik’ girdien yugu boch e saf ni yad be yog e thin u lan e ulung ko ngiyal’ ney? Aram e piin piilal ni ke l’agan’rad ko par u fayleng ma kan ni thothup e ke dugliyrad ngar manged piilal ko ulung. (Acts 20:28) Ere fre ulung i girdi’ ni be yip’ fan fa ani ga’ lungun e yibe skulnagrad e chiney ma yibe fl’eg rogorad ni rayog ni ngar rogned e thin u lan e bin nib biech e fayleng.

15. (a) Uw rogon ni ma tamilangnag e n’en ni guy Ezekiel rogon thilin e piin piilal ni yad bang ko fre ulung ni baga’ nge girdien fachi ulung ni yad e prist? (b) Uw rogon ni ke pow’iy e pi piilal ni kan dugliyrad e ulung rok Got u fayleng?

¹⁵ Machane uw rogon thilin girdien fachi ulung ni yad e prist nge pi piilal ni yad bang ko fre ulung ni baga’ ni yad be pigpig ni yad be yog e thin? N’en ni guy Ezekiel e be tamilangnag ni pi piilal ni yad bang ko fre ulung ni baga’ e yad ma tay tanggin girdien fachi ulung ma yad ma fol rorad, ma girdien fachi ulung e ma yog e thin ni fan ko tirok Got ban’en. Uw rogon? Mu lemnag, pi prist ni guy Ezekiel e kan pi’ mat’awrad ni ngar filed ko girdi’ e tirok Got ban’en. Ma kun nog ngorad ni ngar manged e pi tapuf oloboch. Maku kan dugliy piyu Levi ni “ngar pared ni yad be gagiyeg” ko pi garog ko tempel. (Ezekiel 44:11, 23, 24) Ba tamilang ni fa ani baga’ lungun e thingari fol ko pi prist. Ere bpuluw ni ngiyal’ ney ma girdien fachi ulung e yad be yog e thin ni fan ko liyor nib machalbog. Baaray rogon, kan dugliy boch e girdi’ ko girdien fachi ulung ngar manged fre Governing Body ko Pi Mich Rok Jehovah. Pi piilal ney ni kan dugliyrad e kar skulnaged e girdi’ ni baga’ lungurad u lan bokum e duw, ma be fl’eg rogorad nge bung rogorad ko ngiyal’ nra taw ngay ni ran pi’ mat’awrad ni ngar rogned e thin u lan e bin nib biech e fayleng rok Got nga m’on.

16. Rogon ni yog u Isaiah 32:1, 2, ma uw rogon ni thingari ngongol urngin e piin piilal?

¹⁶ Ma uw rogon e pi piilal ney ni rayog ni ngar manged e piin ni ma yog e thin ni bod e ani baga’ lungun? Fre thin ko profet ni bay ko Isaiah 32:1, 2 e be gaar: “Ba’ reb e rran ni bay yib ba pilung nib mat’aw, nge piin ni bay urogned e thin ko nam ma ba yal’uw e gagiyeg ni bay ur tiyed. Ra bagayad ma bayi par ni bod ba manaf ni ngan naf ngay ko nifeng nge yoko’. Yad ra bod e yu pa’ i lul’ ni bay u daken bangi ted nder tugul ban’en riy, ma yad bod e tagalul’ u ba war ni ba ga’ ni ba ga’ ni bay u daken bangi ted nder tugul ban’en riy.” Re thin ko profet ney e be lebug e chiney u daken e pi piilal ni Kristiano​—ni yad girdien fachi ulung nge girdien yugu boch e saf​—ma yad be ayuweg fa yu ran’ i saf ko ‘yoko’’ ni be yip’ fan e togopluw nge mulan’.

17. Susun uw rogorad u wan’rad e pi tachugol saf ni Kristiano, ma susun uw rogorad u wan’ girdien e yu ran’ i saf?

¹⁷ Fagali thin ni “fak e pilung” nge “ani baga’ lungun” e ba chugur ni taareb fan ko thin ni Hebrew, ma gathi aram e liw ni fan ni ngan n’uf be’. Ya aram e maruwel ko pi pumoon ni be ayweg e pi saf rok Got. I pi’ Jehovah e ginang ni gaar: “Ka yog lammed, gimed e girdi’ nu Israel ni baga’ lungumed! Mu chuweged e wadmang nge kireb u fithik’med ma ngam ngongolgad nib yal’uw mab mat’aw.” (Ezekiel 45:9) Fel’ ni nge lemnag urngin e piin piilal ko ngiyal’ ney e pi thin nem. (1 Peter 5:2, 3) Ma fa yu ran’ i saf e yad manang ni ke pi’ Jesus e pi tachugol saf ni yad e “taw’ath.” (Efesus 4:8) Ma Thin Rok Got e be weliy ko uw rarogon be’ ma rayog ni nge mang reb e piilal. (1 Timothy 3:1-7; Titus 1:5-9) Ere piin Kristiano e ma fol ko piin piilal.​—Hebrews 13:7.

18. Mang boch ban’en nib mil fan ngak e piin ni yad be athapeg ni ngar manged e piin ni baga’ lungurad, ma mang e ra mil fan ngorad ni ngar rin’ed nga m’on?

¹⁸ Nap’an e ngiyal’ ko Bible ma boch e girdi’ ni baga’ lungurad e kab boor ban’en nib mil fan ngorad ngak yugu boch e girdi’. Ngiyal’ ney ma pi piilal ko fre ulung ni baga’ e ba thil thil e tin nib mil fan ngorad. Boch i yad e ma pigpig u lan reb e ulung; ma boch e ma pigpig ni fan ko boor e ulung ni yad e pi piilal ni ma lekag e ulung; ma boch e yad ma pigpig ni fan ko reb e nam ni yad e girdi’ ko Branch Committee; ma boch e ma ayweg e pi committee ara ulung ko fre Governing Body. U lan e bin nib biech e fayleng, ma ra dugliy Jesus e “pi fak e pilung u ga’ngin e fayleng” ni ngar pow’iyed e piin ni ma liyor ku Jehovah u fayleng. (Psalm 45:16) Dabi siy ni ra mel’eg e pi girdi’ ney u fithik’ e piin ni yad e piin piilal ko ngiyal’ ney. Pi pumoon ney e yad be micheg e chiney ni rayog ni ngar uned ko re marwel nem, ma aram e ra turguy Jehovah ni nge dugliyrad ni nga rogned e thin nga m’on u nap’an ni ra tamilangnag ko mang e marwel ko piin ni baga’ lungurad u lan e bin nib biech e fayleng.

Fre Binaw ko Girdi’ Rok Got ko Ngiyal’ Ney

19. Mang e be yip’ fan fre binaw ni ke guy Ezekiel?

¹⁹ Miki guy Ezekiel fre binaw nu Israel ni kan sulweg nga rogon. Mang e be yip’ fan? Yugu boch e thin ko profet ni aram rogon e kan yiiynag ni fre binaw nu Israel e ra bod fre paradis u Eden. (Ezekiel 36:34, 35) Ngiyal’ ney ma gad be par ko reb e “binaw” ni kan sulweg nga rogon, ni ba dake Eden. Ya gad ma weliy u murung’agen rarogondad e paradis nib spiritual. Fare babyor ni Wulyang Ntagil’ e Damit e ke weliy ni fre “binaw” rodad aram e “pi n’en ni ma rin’” e girdi’ rok Got.b Demtrug e gin ni bay reb e girdi’ rok Jehovah riy, ma bay ko re binaw nem ni kan sulweg nga rogon ni faanra be athamgil ni nge tay tanggin e bin riyul’ e liyor ma be lek luwan’ ay Kristus Jesus.​—1 Peter 2:21.

20. Mang e gad be fil ko “fre ayuw nib thothup ni kan pi’” u lan e n’en ni guy Ezekiel, ma uw rogon nrayog ni ngad folgad riy?

²⁰ Ma uw rogon fa gin’en ko re binaw nem ni ka nog “fa gin’en nib thothup ni kan pi’ ni ayuw” ngay? Aram e ayuw ni pi’ e girdi’ ni fan ni ngar ayweged e pi prist nge fre binaw. Maku “urngin e girdi’ u lan e binaw” e thingara pied bangi binaw ni ayuw ni fan ko fa ani baga’ lungun. Mang fan e re n’em ko ngiyal’ ney? Gathi be yog ni girdi’ rok Got e ngar pied puluwon e girdi’ ni yad e tamachib ko ulung. (2 Thessalonika 3:8) Ya rogon e ayuw ni ngan pi’ ko piin piilal e ba sor fan ko ayuw nib spiritual. Ba muun ngay ni ngan aywegrad ko marwel, min fol rorad. Ma bod rogon nap’an Ezekiel ma re ayuw ney e “fan ku Jehovah” ma gathi girdi’.​—Ezekiel 45:1, 7, 16.

21. Mang e rayog ni ngad filed ko n’en ni ke guy Ezekiel nge rogon ni kan yu guruynag fre binaw?

²¹ Gathi ke mus ni en ni baga’ lungun nge pi prist e bay tagil’rad u lan fre binaw ni kan sulweg nga rogon. Ya rogon ni kan yu guruynag fre binaw e be dag ni ra reb fa 12 e ganong ma bay tagil’ nib mudugil. (Ezekiel 47:13, 22, 23) Ere girdien fre ulung ni baga’ e bay tagil’rad u lan fre paradis nib spiritual ko ngiyal’ ney ma ku yira pi’ tagil’rad u nap’an ni yad ra un nga tan Gil’ilgungun Got u fayleng.

22. (a) Mang e be yip’ fan fre mach ni ke guy Ezekiel? (b) Mang e rayog ni ngad filed ko fre mach ni ra baraba’ ma bay e garog riy?

²² Bin tomur, ma mang e be yip’ fan fare mach ni ke guy Ezekiel? Gathi aram ba mach u tharmiy, ya bay u fithik’ e binaw nib “alit” (de thothup). (Ezekiel 48:15-17) Ere ma sor fan nga ban’en u fayleng. Ere mang e mach? Aram ba ulung i girdi’ ni yad ma par u taabang ma yad ba yaram fa? Arrogon. Ere fre mach e be yip’ fan e yaram nu fayleng ni ma ayweg urngin e piin nib mat’aw u fayleng. Ra maruwel nge mus rogon u lan e “bin nib biech e fayleng.” (2 Peter 3:13) Ra baraba’ e re mach nem ma bay e garog riy, ni fan nga ra reb e pi ganong, ma be yip’ fan e puf rogoy. Ngiyal’ ney ma girdi’ rok Got e gathi yad be par nib mith. Pi walag ni pumoon e thingara pared ni rayog ni nge yib e girdi’ ngorad; ma pi n’en ni be gagiyegnagrad e susun ni ba tamilang ko urngin e girdi’. Girdi’ ko urngin ganong e ma ayweg fre binaw ni fan ko fre mach ma aram e be yip’ fan ni girdien yugu boch e saf e ma ayweg e yaram ko girdi’ rok Got u ga’ngin e fayleng nib muun ngay e salpiy ni ayuw.​—Ezekiel 48:19, 30-34.

23. Mang e gad ra fil ko bin migid e article?

²³ Ma uw rogon fre lul’ ni be yib ko tempel? Be yip’ fan ban’en ko ngiyal’ ney iyan nga m’on ma aram e n’en ni ran weliy ko bin dalip e article.

[Boch e Thin nra Tamilangnag Murung’agen]

Boch Ban’en ni Ngan Sul nga Daken

◻ Mang e be yip’ fan fre tempel ni ke guy Ezekiel?

◻ Mini’ e be yip’ fan e pi prist ni be pigpig u lan e tempel?

◻ Mang fre ulung ni be yip’ fan fa ani baga’ lungun, ma mang boch ban’en nib mil fan ngorad?

◻ Mang e be yip’ fan fre binaw ni ke guy Ezekiel, ma rogon ni kan yu guruynag ko fa 12 i ganong e be yip’ fan e mang?

◻ Mang e be yip’ fan fre mach?

[Yaan Boch Ban’en/​Map ko page 13]

(Mu guy e re ke babyor ney ni ngam nang rogon yaan e re n’ey)

Rogon ni ke guy Ezekiel ni kan yu guruynag fre binaw

FA RAGAG I GANONG

Fre Day ni Great Sea

Fre Day nu Galilee

Fre lul’ ni Jordan

Fre Day ni

DAN

ASHER

NAPHTALI

MANASSEH

EPHRAIM

REUBEN

JUDAH

FA ANI BAGA’ LUNGUN

BENJAMIN

SIMEON

ISSACHAR

ZEBULUN

GAD

[Yaan Boch Ban’en]

KAN GA’NAG YAAN E GIN’EN NI AYUW NIB THOTHUP

A. “Bay Jehovah u Rom (Jehovah-Shammah); B. Milay’ ni fan ko fre mach

Tagil’ piyu Levi

Gin’en nib thothup rok Jehovah

Tagil’ e pi Prist

B A B