PI N’EN NI MA RIN’ E PIIN KRISTIANO

**Be Yib Angin Ngom e N’en ni Bay ko Fare Babyor ni Examining the Scriptures Daily, Fa?**

Ga ma beeg e thin nu Bible nge boch e thin ni bay ko fare babyor ni Examining the Scriptures Daily ni gubin e rran ya nge yag ni chugur e tha’ u thilmew Jehovah, fa? Faanra danga’, me ere gur rayog ni ngam guy rogon ni ngam rin’ e re n’ey? Boor e girdi’ ni yad ma rin’ e re n’ey ni kakadbul, ya nge ayuwegrad ni ngaur fal’eged i lemnag e pi n’en kar beeged u lan e re ke babyor ney u nap’an ni yad be rin’ boch ban’en e rorran nem. (Jos 1:8; Ps 119:97) Mang boch ban’en ni ku rayog ni ngam rin’ ya ngari yib angin ngom e thin nu Bible ni kam beeg u reb e rran? Mu beeg e thin ni bay u m’on ngu tomuren fare verse ya nge yag nim nang e n’en ni be weliy fare thin nu Bible. Kum guy rogon ni ngam lemnag reb e ban’en ni ke buch ni bay murung’agen u Bible ni be tamilangnag reb e fonow ni bay ko fare thin nu Bible. Ma aram mag lemnag boch e kanawo’ nrayog ni ngam fol ko re fonow nem. Ga ra pag e Thin rok Got ni nge pow’iy e pi n’en ga ma dugliy, ma rayog ni nge pow’iyem ko pi n’en ga ma rin’ me yib angin ngom.—Ps 119:105.

Pi walag u Bethel u ga’ngin yang e fayleng e yad ma beeg mar weliyed e pi thin nu Bible ni bay ko fare babyor ni Examining the Scriptures Daily u nap’an ni ngan abich ni kakadbul. U lan fapi duw ni ke yan ma boor ko pi thin nu Bible ney ni yima weliy murung’agen ni kan tay ko JW Broadcasting^® u tan fare thin ni kenggin e PROGRAMS AND EVENTS. Wuin e tomur nim yaliy reb ara boch ko pi video ney? Sana rayog ni bay boch ban’en ni kan weliy riy nib t’uf ni ngam nang. Bod ni faan ga ra lemnag e n’en ni buch rok Lot, ma uw rogon nra ayuwegem u nap’an ni ga be dugliy boch ban’en?

NGAN YALIY FARE VIDEO NI KENGGIN E DO NOT LOVE THE WORLD (1JO 2:15), NGEMU’ MIN PI’ E FULWEG KO PI DEER NI BAARAY:

Mang kenggin e motochiyel u Bible ni kan tamilangnag ko re Morning Worship ney?
Uw rogon ni be tamilangnag e n’en ni buch rok Lot ni bay riy’en nra yib ni faanra t’uf e re fayleng ney rodad nge pi n’en bay riy?—Ge 13:12; 14:12; 19:3, 12, 13, 24-26
Uw rogon ni ngad daged nib t’uf Jehovah rodad, ma gathi re fayleng ney nge pi n’en bay riy?

Bogi sasing ni bay u taabang: Reb e walag ni pumoon ni be fal’eg i lemnag e thin nu Bible ni ke beeg nge boch ban’en ni bay ko daily text u nap’an ni be rin’ boch ban’en u lan reb e rran. 1. Nap’an ni be beeg e thin nu Bible, ma be fal’eg i lemnag yaan fa gal engel ni yow be kol pa’ Lot nge chon e tabinaw rok ya nge yag ni ngar chuwgad u Sodom. 2. Nap’an ni be abich ko misiw’ u taban e maruwel rok, ma be fal’eg i lemnag e thin nu Bible ni ke beeg ni kakadbul. 3. Nap’an ni bay u tabinaw rok ni blayal’ ni be t’et’ar e mad rok, ma ka be ulul nga i lemnag e thin nu Bible ni ke beeg ni kakadbul. — Uw rogon ni nggu dag u reb e rran ngu reb nib ga’ fan e Thin rok Jehovah u wan’ug?