Reference ko Fare Babyor ni Tin Gad Ma Rin’ nge Machib Rodad
© 2024 Watch Tower Bible and Tract Society of Pennsylvania
SEPTEMBER 2-8
TIN NIB GA’ FAN KO THIN ROK GOT | PSALMS 79-81
Mu Dag nib T’uf e Ngachal rok Jehovah Rom
Fare Biyul e Ba “Tow’ath” ni Ke Yib Rok e Chitamangidad u Tharmiy
5 Uw rogon nrayog ni ngad daged nib ga’ fan e ngachal rok Jehovah u wan’dad? Thingari m’ug ko ngongol rodad. Baadag Jehovah ni ngad pared ni gad ba thothup. (Mu beeg e 1 Peter 1:15, 16.) Re n’ey e be yip’ fan ni kemus ni yigoo ir e ngaud liyorgad ngak ma gad be fol rok u polo’ i gum’ircha’dad. Mus nga nap’an ni yira gafgownagdad, ma gad ma athamgil ni ngad ngongolgad u rogon nib puluw ko pi kenggin e motochiyel nge motochiyel rok. Maku reb e, ngongol nib fel’ ni gad ma rin’ e aram ramaedad ni be gal u p’eowchen e girdi’ ma yibe pining e sorok riy nga fithingan Jehovah. (Matt. 5:14-16) Bochan ni gad boch e girdi’ ni gad ba thothup, ma gad ma micheg u rogon ni gad ma par nib fel’ e pi motochiyel rok Jehovah ma de riyul’ e pi n’en ni ke yog Satan. Ma nap’an ni gad ra oloboch, ni ka ban’en ni ma buch, ma aram mad kalgadngan’dad ma gad digey e ngongol ni ud rin’ed ni be darifannag Jehovah.—Ps. 79:9.
ijwbv 3 ¶4-5
Roma 10:13—“Pining Fithingan Somol”
Fare thin ni “ngan pining fithingan Jehovah” ni kan fanay u Bible e gathi kemus ni be yip’ fan ni ngan nang fithingan Got mu un fanay ni fan ko liyor ni yibe tay. (Psalm 116:12-14, NW) Ya ba muun ngay ni ngan pagan’uy ngak Got min sap ngak ni nge ayuwegey.—Psalm 20:7; 99:6.
Ba ga’ fan fithingan Got u wan’ Jesus Kristus. Tin som’on e thin ni yog ko fare kenggin meybil ni fil ngak pi gachalpen e be gaar: “Chitamangimad ni ga bay u tharmiy: Ngan tay fan fithingam nib thothup,” ara ngan thothupnag fithingan. (Matthew 6:9) Ki tamilangnag Jesus ni faanra nge yag e yafos ni manemus ngodad ma thingar da nanged e En be fek e re ngachal ney, ma gad fol rok, me t’uf rodad.—John 17:3, 6, 26.
Ngan Fil Ban’en Riy
Tin Ga’ Fan ko Ken Dalip nge Aningeg e Babyor ko Psalms
79:9. Jehovah e ma motoyil ko meybil rodad, ni baga’ ni faanra bay rogon ko ngan thothupnag fithingan.
SEPTEMBER 9-15
TIN NIB GA’ FAN KO THIN ROK GOT | PSALMS 82-84
Nge Ga’ Fan u Wan’um e Maruwel ni Kan Pi’ Ngom
wp16.6 8 ¶2-3
N’en Yira Fil ko Arche’
Girdi’ ni yad ma par u Jerusalem e yad manang fapi arche’ ni ka nog e swallow ngorad ni yad ma toy taferad nga tan e bagbag ko naun. Bay boch e pi arche’ ney ni kar toyed taferad nga lan e tempel rok Solomon. Dabisiy ni ma toy e pi arche’ nem taferad u lan e yoror ko tempel ni gubin e duw ni bochan e be pagan’rad ndariy ban’en nra buch rorad u rom ma rayog ni ngar ayuweged pi fakrad ni ngar ilalgad ndariy ban’en nra magawonnagrad.
Bay reb fapi pumoon ni fak Korah ni ir e yoloy e Psalm 84 ni ma pigpig u tempel u lan reb e wik u gubin e nel’ e pul ni guy reb e pi tafen e arche’ nem u lan e yoror ko tempel. Baadag ni nge bod reb e arche’ ni swallow ni ke toy tafen nga lan e naun rok Jehovah. Aram fan ni gaar: “I gur Got ni Gubin ma Rayog Rom, e rib t’uf e tempel rom rog! Kari gu tawrengnag! Kug tawrengnag lan e yoror ko tempel rok Somol . . . Mus ko arche’ ni sparrow ni ra reb ma ke toy tafen, ma arche’ ni swallow e ba’ taferad; yad ma tay pi fakrad nib chugur ko pi altar rom i gur Somol ni Gubin ma Rayog Rom, ni gur e pilung rog nge Got rog.” (Psalm 84:1-3) Gad baadag pi fakdad ma kub ga’ fan u wan’dad ni ngaud muulunggad e girdi’ rok Got nga taabang ni gubin ngiyal’ ni bod faen ni yoloy e Psalm, fa?—Psalm 26:8, 12.
w08 7/15 30 ¶3-4
Mu Lemnag e Tin Nrayog Rom Mag Felfelan’
Nap’an ni gad ra pilibthir ara kad m’argad ma rayog ni nge lich e tin gad be rin’ ni fan ko pigpig rodad ngak Jehovah. Faanra gur reb e gallabthir, ma rayog ni ngam lemnag ni gathi ri be yib angin ngom e fol Bible ni ga ma tay ni yigoo gur ara muulung ni ga ma un ngay ni bochan e ga be fanay yooren e tayim rom nge gelngim ni ngam ayuweg pi fakam ni ka yad ba achichig. Machane gur, gathi fan nder yag ni ngam nang boch ban’en nrayog rom e bochan ni yig ga be par ni ga be lemnag e tin ndabiyog rom?
Bokum biyu’ e duw ni ke yan, ma bay reb e Levite ni yog ni bay ban’en ni baadag ni nge rin’ machane dabiyog rok. L’agruw e wik u lan reb e duw ni ma pigpig u lan e tempel. Yugu aram rogon me yog ni baadag ni nge par nib chugur ko altar rok Got ndariy n’umngin nap’an. (Ps. 84:1-3) Ere mang e ayuweg e re pumoon ney nib yul’yul’ ni nge fel’ u wan’ e tin nrayog rok? I nang ni taareb e rran nra par u lan e yoror ko tempel rok Got, ma aram reb e tow’ath nrib manigil. (Ps. 84:4, 5, 10) Ere ku arrogodad nsusun e ngad guyed rogon ni ngad nanged miki ga’ fan u wan’dad e tin nrayog rodad ko bin ngaud lemnaged e tin ndabiyog rodad.
Ba Ga’ Fam u Wan’ Jehovah ni Got Rom!
12 Faanra kam m’ar ma nge pagan’um ni manang Jehovah e n’en ni ga be yan u fithik’. Mu wenig ngak ni nge ayuwegem ya nge yag ni puluw rogon ni ngam lemnag e magawon rom. Ngemu’ mag gay boch e thin rok Jehovah ni bay u lan e Bible nrayog ni nge fal’eg lanin’um. Mu tiyan’um ko pi thin ni bay riy ni be weliy rogon feni ga’ fan u wan’ Jehovah e pi tapigpig rok. Faan ga ra rin’ ni aray rogon, ma ga ra guy ni Jehovah e ba gol ngak e piin yad be pigpig ngak u fithik’ e yul’yul’.—Ps. 84:11.
Ngan Fil Ban’en Riy
it-1 816
Piin Ka Nim’ Rorad
Bochan nib mom ni ngan pagtalin e pi cha’ney ni ke kireban’rad ma dabiyog ni ngar ayuweged yad, ma aram fan ni fanay Jehovah fare thin ni “piin ka nim’ rorad” u nap’an ni be weliy rogon feni mat’aw piyu Israel nge rogon ndar mat’awgad. Nap’an nib fel’ e tha’ u thilin e re nam nem nge Jehovah, ma un ayuweg e piin ka nim’ rorad. Faanra nda ku nir rin’ e tin nib mat’aw u lan e re nam nem, ma aram e ba mudugil ndab kun ayuweg e piin ka nim’ rorad ma ireray e pow riy ni ke gel e kireb ko girdi’ ko re nam nem. (Ps 82:3, BT; 94:6; Isa 1:17, 23; Jer 7:5-7; 22:3; Eze 22:7; Zek 7:9-11; Mal 3:5) Ma bucheg Jehovah waathan e piin yad ma gafgownag e piin ka nim’ rorad. (De 27:19; Isa 10:1, 2) Be yog Jehovah ni ir e Ta Biyul (Pr 23:10, 11), nge Taayuw (Ps 10:14), nge Chitamangin (Ps 68:5) e piin ka nim’ rorad. Ir e ra pufthin ni fan ngorad (De 10:17, 18), me runguyrad (Ho 14:3), me ayuwegrad (Ps 146:9), me tayrad ni yad ba fos.—Jer 49:11.
Reb e pow ko tin riyul’ e Kristiano e rogon ni yad ma lemnag e piin ke yim’ figirngirad ara gallabthir rorad. I yol James ngak e piin Kristiano ni gaar: “Baaray e n’en ni be finey Got ni Chitamangiy ni ir e bin nib machalbog ma ba riyul’ e liyor ngak, ni aram e ngan ayuweg e bitir ndariy e gallibthir rorad nge piin ni ppin ni ke yim’ e pumoon rorad ma yad be gafgow, mu un ayuwegey nge dabi kirebnigey e kireb nu fayleng.”—Jas 1:27.
SEPTEMBER 16-22
TIN NIB GA’ FAN KO THIN ROK GOT | PSALMS 85-87
Ma Ayuwegdad e Meybil ni Ngad Athamgilgad
Be Gal Ramaen Jehovah Rom, Fa?
10 Faanra nge gal ramaen Got rodad ma kub t’uf ni ngaud “meybilgad ni gubin ngiyal’.” (Rom. 12:12) Rayog maku susun ni ngad meybilgad ngak Jehovah ni nge ayuwegdad ngad pigpiggad ngak nrogon nib m’agan’ ngay. Rayog ni ngad ninged gelngin nib thothup, ma gad wenig ngak ni nge ayuwegdad nge gel e michan’ rodad, ma gad siyeg e pi n’en ni yibe waliydad ngay. Ku rayog ni ngad weniggad ngak ni nge ayuwegdad ni ngad ‘machibnaged e thin rok nrogon.’ (2 Tim. 2:15; Matt. 6:13; Luke 11:13; 17:5) Ba t’uf ni nge pagan’dad ngak Jehovah ni ir e Chitamangidad ni bay u tharmiy, ni bod rogon reb e bitir ni ma pagan’ ko chitamangin. Faan gad ra yog ngak ni nge ayuwegdad ngad mon’oggad ko pigpig ni gad be tay ngak, mab mudugil nra ayuwegdad. Dariy e ngiyal’ ni ngad lemnaged ni gad be magawonnag! Ere, ngaud meybilgad ngak ni gad be pining e sorok nge magar ngak, ma gad ning e ayuw ngak nib ga’ nu nap’an ni ke yib e skeng ngodad. Ku rayog ni nga dogned ngak ni nge ayuwegdad ya nge yog ni gal ramaen rodad ko pigpig ni gad ma tay ngak.—Ps. 86:12; Jas. 1:5-7.
Rogon ni Ma Fulweg Jehovah Taban e Meybil Rodad
17 Mu beeg e Psalm 86:6, 7. Ba pagan’ David ngay ni ir e yoloy e Psalm ni i rung’ag Jehovah e meybil rok ma be fulweg taban. Ku rayog ni nge pagan’um ko re n’ey. Fapi girdi’ ni kan weliy murung’agrad ko re article ney e be micheg ngodad nrayog ni nge pi’ Jehovah e gonop ngodad nge gelngidad ya nge yag nda athamgilgad. Ku rayog ni nge fanay pi walagdad ara piin darur pigpiggad ngak e chiney ni ngar ayuweged gadad u boch e kanawo’.
18 Yugu aram rogon ni gathi gubin ngiyal’ nra fulweg Jehovah taban e meybil rodad u rogon kanawoen ni gad be lemnag, machane gad manang nra fulweg taban. Ra pi’ e n’en nib t’uf rodad ko ngiyal’ nib t’uf ni nge pi’ riy. Ere mu ulul ko meybil me pagan’um nra rung’ag Jehovah e meybil rom me ayuwegem e chiney ma kub gaman urngin ban’en nra pi’ ngodad u lan e bin nib beech e fayleng nge yan i aw ni ‘ke fel’ u wun’dad ni gad gubin e tin ni ke yog ngodad.’—Ps. 145:16.
Ngan Fil Ban’en Riy
“Mu Ayuweg Gum’irchaeg Ya Nge Yib Madgun Fithingam u Wan’ug”
17 De fel’ ni nge yoyoor lanin’um. Mu susunnag ni bay reb e team ko gosgos nde taareban’ girdien. Boch e girdi’ ko fare team e yad baadag ni nga nog e sorok ngorad, ma bay in u fithik’ ndubrad ni ngar folgad ko motochiyel ko fa miti gosgos ni yibe tay, ma yooren i yad e be darifannag e en be fil e gosgos ngorad. Reb e team ni aray rogon e dabiyog ni ngar gelgad. Machane reb e team nib taareban’ gothon e ba mudugil ni yad ra gel. Gum’irchaem e ku rayog ni nge bod e re team ko gosgos ney ni faanra ba puluw e lem rom, nge tin ga baadag, nge tin ga be ar’arnag ko tin nib m’agan’ Jehovah ngay. Dab mu pagtalin ni baadag Satan ni nge k’aringem ndab kum par nib gab yul’yul’ ngak Got u polo’ i gum’irchaem. Baadag ni nge yoyoor e tafinay rom nda kum nang ko ngam rin’ e tin ga manang ni baadag Jehovah ni ngam rin’, fa ngam rin’ e tin nib kireb ni ga be ar’arnag. Machane, faanra nge yag nim pigpig ngak Jehovah nib fel’ rogon mab t’uf ni ngam par ni yigoo tin nib fel’ ban’en e ir e kam yiluy e tafinay rom ngay ni ngam rin’. (Matt. 22:36-38) Dab mu pag Satan ni nge yoyoornag lanin’um!
18 Mmeybil ngak Jehovah ni bod rogon David ni faani meybil ni gaar: “Mu ayuweg gum’irchaeg ya nge yib madgun fithingam u wan’ug.” Mu nameg ni ngam fol ko thin ni bay ko re meybil ney. Mu dugliy u wan’um ni nge gubin e rran, ma pi n’en ni ga be dugliy ni ngam rin’ ndemtrug ko ban’en nib ga’ fa ba achig ma be m’ug riy ni ga be tayfan fithingan Jehovah nib thothup. Faan ga ra rin’ ni aray rogon, ma aram e rayog ni ngam tayfan e re ngachal nem ni gur reb e Pi Mich Rok Jehovah. (Prov. 27:11) Maku reb e, gad gubin nrayog ni nga dogned fapi thin ni yog Mikah ni profet ni faani gaar: “Gadad e bay ud meybilgad ngak Somol ni Got rodad [“bay ud ngongolgad nib puluw nga fithingan Jehovah ni Got rodad,” NW] ma gadad be fol rok ndariy n’umngin nap’an.”—Mik. 4:5.
SEPTEMBER 23-29
TIN NIB GA’ FAN KO THIN ROK GOT | PSALMS 88-89
Rib Fel’ e Gagiyeg rok Jehovah
Mu Tayfan Mat’awun e Gagiyeg rok Jehovah!
5 Ku reb i fan ni Jehovah e ir e bay mat’awun ni nge Gagiyeg e bochan nib mat’aw rogon ni ma maruwel nga mat’awun. Ke yog ni gaar: “Gag Somol e gub gol, ma gu ma rin’ e tin nib yal’uw nge tin nib mat’aw u fayleng. Ereray e pi n’en ni gub adag.” (Jer. 9:24) Der ma fanay Jehovah e motochiyel ni ke ngongliy e girdi’ ndawor ra flontgad ni nge ayuweg u rogon ni nge dugliy e n’en nib mat’aw mab yal’uw ni nge rin’. Ya bin riyul’ riy e, ir e ma dugliy rogon e tin nib mat’aw ban’en ma aram e n’en ni ma fanay ni nge ngongliy e motochiyel ni fan ko girdi’. “Tin nib mat’aw nge tin nib yal’uw e ke mang def ko gagiyeg [rok],” ere rayog ni nge pagan’dad ni gubin e motochiyel, nge kenggin e motochiyel, nge pi n’en ni ma dugliy e ba mat’aw. (Ps. 89:14; 119:128) Ere, yugu aram rogon ni ke yog Satan nib kireb rogon e gagiyeg ni be tay Jehovah, machane dabiyog rok ni nge gagiyegnag e re fayleng ney nge par nib mat’aw gubin ban’en riy.
Mu Tayfan Mat’awun e Gagiyeg rok Jehovah!
10 Ku der ma gafgownag Jehovah e piin ni yad bay u tan e gagiyeg rok. Ya bin riyul’ riy e, gagiyeg rok Jehovah e ma pi’ e puf rogon ko girdi’ ma ma k’aring e felfelan’ ngorad. Baaray rogon ni weliy David murung’agen Jehovah. I yog ni gaar: “Malup’lup’ rok [Got] nge feni rir e ke liyeg, gel nge felfelan’ e ba suguy e Tempel rok.” (1 Kron. 16:7, 27, BT) Ki yoloy reb e psalmist ni ka nog Ethan ngak ni gaar: “Ba felfelan’ e piin ni yad ma ta’ fam ko tang ni yad ma yin’, ni yad be par u fithik’ ramaen fanam gol. Polo’ e rran ni yad ba felfelan’ ni bocham ma yad be pining e sorok ngom ni bochan e tin nib fel’ ni ga be rin’ ngorad.”—Ps. 89:15, 16.
11 Faanra ud fal’eged i lemnag feni fel’ Jehovah, ma aram e rayog ni ngari pagan’dad ni gagiyeg rok e aram e bin th’abi fel’ e gagiyeg ni bay. Re n’ey e ku ra ayuwegdad ni ngad lemgad ni bod fare psalmist ni faani gaar: “Taareb e rran ni yira par u tempel rom ma kab fel’ nga bbiyu’ e rran nni par u yugu bang.” (Ps. 84:10) Jehovah e Ir e Ke Sunmiydad, ere manang e tin nib t’uf rodad nra yibnag e felfelan’ ngodad, ma gubin ngiyal’ ni ma pi’ nge yan i pag e fol riy. Pi n’en ni ma yog ni ngad rin’ed e gadad e fan ngodad. Yugu aram rogon ni bay yu ngiyal’ nib t’uf ni ngad paged fadad ni fan e ngad folgad ko pi n’en ni ke yog ngodad, machane faan gad ra fol rok ma gubin ngiyal’ nra yib e felfelan’ riy ngodad.—Mu beeg e Isaiah 48:17.
Ngari Mich Gil’ilungun Got u Wan’um
14 Am lemnag e n’en ni micheg Jehovah ngak David ni ir e Pilung nu Israel kakrom. Re n’em e yima yog fare m’ag rok David ngay. (Mu beeg e 2 Samuel 7:12, 16.) I ngongliy Jehovah e re m’ag nem u thilrow David u nap’an ni ir e pilung u Jerusalem, me micheg ngak nra yib fare Messiah ko tabinaw rok. (Luke 1:30-33) Aray rogon ni tamilangnag Jehovah ko kun tabinaw e ra yib fare Messiah riy. I yog ni bay be’ nra yib ko tabinaw rok David ni ir e ‘ke mel’eg’ ni nge mang pilung u Gil’ilungun fare Messiah. (Ezek. 21:25-27) Ra par e gagiyeg rok David “ndabi m’ay” u pa’ Jesus, ni ir e en nra yib ni owchen David. Ma ra par e gagiyeg rok Jesus “u n’umngin nap’an ni bay e yal’ ni be mat ramaen.” (Ps. 89:34-37) Arrogon, dabi kireb e gagiyeg rok fare Messiah, ma ra par angin ndariy n’umngin nap’an!
Ngan Fil Ban’en Riy
“Ba Mich nib Yul’yul’ u lan e Lang”
Fare pul ni ba mudugil ni ma liyeg e fayleng u lan 27.3 e rran. Arfan ni n’en ni ma rin’ fare pul nib mudugil e rayog ni nga nog ni yima pagan’uy ngay. Machane, sana ka bay ban’en ni ka ba ga’ fan ni be lemnag fare psalmist. Ke yog ni fare pul e “ba mich nib yul’yul’” u lan e tang rok ni yiiy u murung’agen fare Gil’ilungun ni ir e ke fil Jesus ngak pi gachalpen ni ngar yibilayed.—Matthew 6:9, 10.
Ke pag 3,000 e duw ni ke yan, ni fal’eg Jehovah e m’ag ni fan ngak nge David ni Pilung rok piyu Israel kakrom. (2 Samuel 7:12-16) Kan ngongliy e re m’ag n’em ni fan ni ngan bing e kanawo’ ngak Jesus Kristus ni aram ke yog mat’awun ni nge mang pilung ndariy n’umngin nap’an ni yib ko tabinaw rok David. (Isaiah 9:7; Luke 1:32, 33) I tang fare psalmist ni murung’agen faen ‘owchen’ ni gaar: “Ra par ndariy n’umngin nap’an ni bod rogon fare pul, me mang mich nib yul’yul’ u lan e lang.”—Psalm 89:36, 37.
Fare ‘tamilang ni nge tamilangnag e nep’’—ni aram fare pul—e ba puluw ni nge puguran feni mudugil e gagiyeg rok Kristus. (Genesis 1:16) Daniel 7:14 e be yog murung’agen Gil’ilungun ni gaar: “Ma mat’awun ko gagiyeg ni nge tay e bay i par ndariy n’umngin nap’an, ma gagiyeg rok e dabi mus.” Fare pul e be puguran ngodad murung’agen e re Gil’ilungun nem nge pi tow’ath nra yibnag ni fan ko girdi’.
SEPTEMBER 30–OCTOBER 6
TIN NIB GA’ FAN KO THIN ROK GOT | PSALMS 90-91
Ra Nge N’uw Nap’an e Yafos Rom Ma Nge Pagan’um Ngak Jehovah
Yibe Guy Rogon Ni Nge N’uw Nap’an E Yafos Ko Girdi’
Boor e girdi’ ni llowan’ ni yad be yog ni yugu aram rogon ni boor mit e falay ni kan ngongliy nrayog ni nge taleg e girdi’ ndab kur pilibthirgad, machane dabiyog ni ngki n’uw boch nap’an e yafos ko girdi’ nga rogon ni bay e chiney. Riyul’ ni ke yag ni nge n’uw boch nap’an e yafos ko girdi’ ni ka nap’an e bin 19 e chibog. Machane fan e re n’ey e bochan ni be guy e girdi’ rogon ni ngaur pared ni yad bbeech, ma kkun pirieg boch e falay ni be ayuweg e girdi’ ndab kur m’argad, nge ku boch ni be golnag boor mit e m’ar. Bay boch e girdi’ ni llowan’ ni yad ma fil rogon ni ma af boch ban’en u rarogon reb e gallabthir ko bitir rok ni ke mich u wan’rad ni ke yan i mus nap’an e yafos ko girdi’ ndabkiyog ni ngki n’uw boch nap’an nga rogon ni bay e chiney.
Sogonap’an 3,500 e duw ni ke yan, ma Moses ni ir e yoloy boch e babyor u Bible e gaar: “Ke mus ni medlip i ragag e duw n’umngin nap’an, ma be mada’ ko meruk i ragag ni faanra ba gel fithik’ i downgin bagamad; machane ke mus ni n’en ni be fek e pi duw nem i yib ngomad e magafan’ nge gafgow; der ma n’uw nap’an me chuw e biney e tamilang u owchemad, ni aram e da kug moyed.” (Psalm 90:10) Yugu aram rogon ni be guy e girdi’ rogon ni ngar n’uwnaged nap’an e yafos ko girdi’, machane ka be par e yafos rodad ni bod rogon ni weliy Moses.
Machane bay boch ban’en ni kan sunmiy ni bod rogon ba mit e yo’ u maday nib rowrow nge ba mit e girdan’ ni bod yaan e yungwol nrayog ni nge par nib fos nib pag 200 e duw. Ku bay yu ken e gek’iy ni bod rogon ba mit e gek’iy ni ka nog e giant sequoia ngay nrayog ni nge par nib fos u lan bokum biyu’ e duw. Yugu aram rogon, ma nap’an ni gad ra taarebrogonnag n’umngin nap’an e yafos rodad ko pi n’ey nge ku yugu boch e yafos, ma gathi gad ra lemnag fare deer ni be gaar, ‘Re yafos rodad ney ni kemus ni 70 i yan ko 80 e duw n’umngin nap’an e kemus chi rogon e yafos aray, fa?’
wp19.1 5, kahol
Mini’ Fithingan Got?
Ireray reb e deer ni boor e girdi’ ni ma lemnag murung’agen. Rayog ni ku arrogom. Ku rayog ni ngan fith e re deer ney ni gaar: Faanra re palpalth’ib ney nge gubin ban’en ni bay riy e ba mudugil ni bay ban’en ni buch me sum ara Got e sunmiy, me ere uw e ke yib Got riy?
Ba puluw u wan’ e pi scientist nre palpalth’ib ney e bay tabolngin. Ma re n’ey e ba puluw ko bin som’on e thin nu Bible ni be gaar: “Aram ko tabolngin ni tabab Got i sunmiy e fayleng nge urngin ban’en ni bay u lan e lang.”—Genesis 1:1, BT.
Dabiyog ni nga yigi par e palpalth’ib me sum rok, ya dabiyog ni nge sum ko dariy. Ya gad manang ndabiyog ni nge sum ban’en ko dariy. Ere faanra immoy ndariy ban’en u m’on ni nge sum e palpalth’ib, me ere dariy e palpalth’ib e ngiyal’ ney. Yugu aram rogon nib mo’maw’ ngodad ni ngad nanged fan nib fel’ rogon ni bay ban’en ni kab kafram i yib ni immoy, ma gathi bang ko palpalth’ib, machane ba mudugil nre n’em e aram e n’en ni k’aring ni nge sum e palpalth’ib. Jehovah Got ndariy e gin nra mus gelngin riy mab gonop ndabiyog ni ngan guy e ir e Som’on ni Sunmiy gubin ban’en.—John 4:24.
Be weliy e Bible murung’agen Got ni gaar: “U m’on ndawor mu sunumeg e pi burey, u m’on ndawor mu sunumeg e fayleng, ma ga ba’ ni gur e Got ndabi math biid, nda mu sum ma dariy e rofen ni ga ra mus.” (Psalm 90:2) Ere Got e kab kakrom ni immoy me ir e sunmiy e palpalth’ib “aram ko tabolngin.”—Revelation 4:11.
Rogon Nra Ayuwegdad e T’ufeg ni Ngad Gelgad ko Marus
16 Manang Satan nib ga’ fan e yafos rodad u wan’dad. Machane ma yog ni gad ra pag fan gubin ban’en nib muun ngay e tha’ u thildad Jehovah ya nge yag nda ayuweged e yafos rodad. (Job 2:4, 5) De puluw e n’en ma yog Satan! Machane bochan ni ir e en “bay e yam’ u pa’,” ma aram fan ni ma guy rogon ni nge fanay e re n’ey ni gad ma rus ni ngad m’ad ni nge k’aringdad ni ngad digeyed Jehovah. (Heb. 2:14, 15) Piin yad bay u tan gelngin Satan e bay yu ngiyal’ ni yad ma yog ni yad ra thang e fan rodad ni faanra dab ddigeyed e michan’ rodad. Ma yu ngiyal’ e faanra kad m’argad ara kad maad’adgad nib tomgin, ma rayog ni nge fanay Satan e re n’ey ni nge k’aringdad ni ngad rin’ed ban’en nib togopuluw ko michan’ rodad. Rayog ni nge towasariydad e togta ara girdi’ rodad ndar nanged e tin riyul’ ni ngad fanayed e racha’ ni ban’en nib togopuluw ko motochiyel rok Got. Fa reb e rayog ni nge k’aringdad be’ ni nge m’agan’dad ngab mit e tafalay nib togopuluw ko pi kenggin e motochiyel u Bible.
17 Yugu aram rogon ni dubdad ni ngad m’ad, machane gad manang ni ka gad ra par ni gad ba t’uf rok Jehovah ni yugu aram rogon ni kad m’ad. (Mu beeg e Roma 8:37-39.) Nap’an nra yim’ e pi fager rok Jehovah, ma ma tayrad u laniyan’ ni gowa ka yad ba fos. (Luke 20:37, 38) Ma athapeg ni nge fasegrad ko yam’. (Job 14:15) Ba ga’ puluwdad ni ke pi’ ya nge “yog e yafos ndariy n’umngin nap’an” ngodad. (John 3:16) Gad manang nri gad ba t’uf rok Jehovah. Ere nap’an ni gad ra m’ar ara buch ban’en rodad nrayog ni ngad m’ad riy, ma gad ma taga’ ngak Jehovah ni nge fal’eg lanin’dad, me pi’ e gonop ngodad, nge gelngidad ko bin ngad digeyed. Ireray e n’en ni rin’ Valérie nge pumoon rok.—Ps. 41:3.
Ngan Fil Ban’en Riy
wp17.5 5
Bay Reb e Engel ni Ma Matanagiyem, Fa?
Der yog e Bible nra bagadad ma bay reb e engel ni ma matanagiy. Riyul’ ni bay ba ngiyal’ ni gaar Jesus: “Mu guyed rogon nge dab mu darifanniged u wun’med bagayad e pi bitir ney [pi gachalpen Kristus]. Ya nggog ngomed ni pi engel rorad nu tharmiy e gubin ngiyal’ ni yad ba’ rok e Chitamag nu tharmiy.” (Matthew 18:10) Kemus ni be yog Jesus ni ma lemnag e pi engel e n’en ma buch rok reb i gachalpen nge reb ko bin nge yog nra be’ ma bay reb e engel ni ma matanagiy. Ere tin riyul’ e tapigpig rok Got e darur rin’ed boch ban’en ndariy e gonop riy ma bay e riya’ riy ni bochan e yad be lemnag nra ayuwegrad e pi engel rok Got ndabi buch ban’en rorad.
Gur, re n’ey e be yip’ fan nder ayuweg e pi engel e girdi’? Danga’. (Psalm 91:11) Bay boch e girdi’ ni kar lemnaged ni ke pi’ Got reb e engel ni nge ayuwegrad ndabi buch ban’en rorad miki pow’iyrad. Kenneth ni faan kan weliy murung’agen ko bin som’on e article e aram rogon e lem rok. Yugu aram rogon ndabiyog ni ngar da micheged, machane rayog nib puluw e n’en ke yog. Boor yay ni ke guy e Pi Mich Rok Jehovah e mich riy ni ke ayuwegrad e pi engel u nap’an ni yad be machib. Machane dabiyog ni ngar dogned rogon ni ma fanay Got e pi engel ni ngar ayuweged e girdi’ u boch ban’en ni bochan e dabiyog ni ngad guyed yad. Yugu aram rogon mab puluw ni ngad pininged e magar ngak e En Gubin Ma Rayog Rok ko ayuw ni ma pi’ ngodad.—Kolose 3:15; James 1:17, 18.
OCTOBER 7-13
TIN NIB GA’ FAN KO THIN ROK GOT | PSALMS 92-95
Ngan Pigpig Ngak Jehovah e Aram e Bin Th’abi Fel’ Kanawoen e Yafos!
Piin Fel’ Yangaren, Gimed Be Tedan’med ko Tin ni Gimed Be Nameg ni Fan ko Tirok Got, Fa?
5 Bin th’abi ga’ i fan ni ngan nameg boch ban’en ni fan ko tirok Got e bochan ni gad baadag ni ngad daged ngak Jehovah nib ga’ fan u wan’dad e t’ufeg ni ma dag ngodad, nge tin ni ma rin’ ni fan ngodad. I yog fare psalmist ni gaar: “Somol, rib manigil ni ngan pining e magar ngom . . . A Somol pi maruwel rom nib thum’ ngaru’ e gu ba felan’ ngay; ma bochan e n’en ni kam rin’, mug tangnag e felfelan’.” (Ps. 92:1, 4, BT) Ere gimed e piin fel’ yangaren e ba t’uf ni ngam lemnaged urngin ban’en ni ke rin’ Jehovah ni fan ngomed ni bod rogon e yafos romed ni ke pi’, nge michan’ romed, nge Bible, nge ulung rok ni gimed bay riy, nge athap romed nrib manigil ni fan ko gabul nge langlath. Pi n’ey e bay rogon ni ngam pininged e magar riy ngak. Faan gimed ra m’oneg e tirok Got u lan e yafos romed, ma aram e gimed be dag ngak nib ga’ fan e pi tow’ath ney u wan’med, ma re n’ey e ra chugurnagmed ngak.
Mini’ e Be Gagiyegnag e Lem Rom?
8 Jehovah e bod reb e gallabthir ni baadag ni nge felfelan’ pi fak me fel’ e par rorad. (Isa. 48:17, 18) Ere aram fan ni be fil ngodad boch e kenggin e motochiyel u rogon e ngongol rodad nib fel’ nge rogon e ngongol rodad ngak e girdi’. Baadag ni ngad filed rogon ni ma lemnag boch ban’en ma gad fol ko pi n’en ni be fil ngodad. Re n’ey e dabi talegdad u boch ban’en ni gad baadag. Ya ra ayuwegdad ni ngad gonopgad ma gad dugliy boch ban’en nib fel’ rogon. (Ps. 92:5; Prov. 2:1-5; Isa. 55:9) Rayog ni ngad rin’ed e tin ni gad baadag, machane ngad dugliyed boch ban’en nib fel’ rogon nra yibnag e felfelan’ ngodad. (Ps. 1:2, 3) Nap’an nra ud lemnaged boch ban’en nrogon ni ma lemnag Jehovah, ma boor e kanawo’ nra yib angin ngodad!
Ba Ga’ Fam u Wan’ Jehovah ni Got Rom!
18 Nap’an ni gad ra pilibthir i yan, ma rayog ni nge pagan’dad ni ka bay e maruwel nra pi’ Jehovah ngodad ni ngad rin’ed. (Ps. 92:12-15) I fil Jesus ni yugu aram rogon ni gad be lemnag nde ga’ fan e tin gad be rin’, machane Jehovah e rib ga’ fan u wan’ e tin rayog ni ngad rin’ed ni fan ko pigpig rodad ngak. (Luke 21:2-4) Ere mu lemnag e tin rayog ni ngam rin’. Bod nrayog ni ngam weliy murung’agen Jehovah ko girdi’, mag yibilay pi walagdad, mu kum pi’ e athamgil nga laniyan’ e pi walag ni ngar pared ni yad ba yul’yul’. Ma sap Jehovah ngay ni gimew be maruwel u taabang ni gathi bochan e tin be yag ni ngam rin’, ya bochan rogon nib m’agan’um ngay ni ngam fol rok.—1 Kor. 3:5-9.
Ngan Fil Ban’en Riy
cl 176 ¶18
“Ri Ba . . . Toar e Gonop rok [Got]!”
18 Mu tay fanam i yan u rogon ni weliy apostal Paul rogon nib thil e gonop rok Jehovah. I gaar: “Ri ba ga’ e flaab rok Got! Ma rib toar e gonop rok nge llowan’ rok! Mini’ e rayog ni nge weliy rogon ni ma turguy Got ban’en? Mini’ e manang rogon kanawoen ni ma maruwel?” (Roma 11:33) Fare bugithin ni “Ri” ni yog Paul u tabolngin e re verse ney e be dag ni kari ngat. Fare bugithin ni Greek ni ke fanay ni fan ko fare thin ni “toar” e ba chugur fan ko fare thin ni “low nib toar.” Ere thin ni yog e ra k’aringdad ni ngad susunnaged yaan ban’en u lanin’dad. Ra ngad fal’eged i lemnag rogon feni gonop Jehovah ma bod ni gad be sap nga lan ban’en nrib toar ndariy e gin nra mus e sap rodad riy, ma dabiyog ni ngad nanged e gin nra mus riy. (Psalm 92:5) Ere gathi ra k’aringdad e re n’ey ni ngad sobut’naged lanin’dad?
OCTOBER 14-20
TIN NIB GA’ FAN KO THIN ROK GOT | PSALMS 96-99
“Ngam Weliyed Ngak e Girdi’ Fare Thin nib Fel’”!
Mang fare Thin nib Fel’?
PIIN Kristiano e ngar machibnaged fare “thin nib fel’” ni murung’agen Gil’ilungun Got ma yad be weliy ngak e girdi’ ni ireray e re am nib mat’aw nra gagiyegnag e fayleng ni ga’ngin boch nga m’on. Machane u lan e Bible e kan fanay fare bugithin ni “thin nib fel’” u boor e kanawo’. Bay reb e re thin nem ni gaar, “fare thin nib fel’ ni murung’agen ni ke ayuwegdad” (Psalm 96:2); nge fare “Thin Nib Fel’ ni yib rok Got” (Roma 15:16); nge fare “Thin Nib Fel’ ni murung’agen Jesus Kristus.”—Mark 1:1.
Fare thin nib fel’ e ba muun ngay urngin e tin riyul’ ni ke yog Jesus me yoloy pi gachalpen nga babyor. U m’on ni yan Jesus nga tharmiy me yog ngak pi gachalpen ni gaar: “Ere mmarod ngak girdien e pi nam u gubin yang ngam pingeged yad ngar manged pi gachalpeg, mi gimed taufenagrad nga fithingan e Chitamangiy nge Fak nge fare [“gelngin Got nib thothup,” NW], mi gimed fil ngorad rogon ni nguur folgad u gubin e tin ni ku gog ngomed ni nguum rin’ed.” (Matthew 28:19, 20) Ere fare maruwel ni ma rin’ e tin riyul’ e Kristiano e gathi kemus ni ngar weliyed ngak e girdi’ murung’agen Gil’ilungun Got ya thingar ra athamgilgad ngar pingeged e girdi’ ngar manged pi gachalpen Jesus.
Mang e Ra Buch u Nap’an fare Rran ko Pufthin?
Rogon ni bay ko re gi sasing ney u baan mat’aw, e boor e girdi’ ni yad be lemnag nnap’an fare Rran ko Pufthin, ma bokum bilyon e girdi’ e yad ra sak’iy u p’eowchen Got ni ngan pufthinnagrad u rogon e ngongol ni ur rin’ed. Boch i yad e ran pi’ e tow’ath ngorad ni aram e yad ra un ko yan nga tharmiy, ma boch i yad e ran gafgownag u fithik’ e nifiy u infierno. Machane, rogon ni be tamilangnag e Bible e fare Rran ko Pufthin e ran chuweg e piin nib mat’aw u fithik’ e ngongol nib kireb. (Psalm 96:13) Ke mel’eg Got Jesus ni ir e nge mang e Ta Pufthin ni ir e ra sulweg e tin mat’aw e ngongol nga rogon.—Mu beeg e Isaiah 11:1-5; Acts 17:31.
Gapas u Lan Biyu’ e Duw nge Tomuren!
18 Ke kireb e tha’ u thilrad u nap’an ni ke un e girdi’ ngak Satan ngar togopuluwgad ngak Jehovah. Machane, ka nap’an e duw ni 1914 ma be maruwel Gil’ilungun Got nge yag ni nge yibnag e gapas nge taareban’ u thilin Got nge girdi’ bayay. (Efe. 1:9, 10) Nap’an e Gagiyeg rok Got u Lan Biyu’ e Duw, ma pi n’en nib fel’ “ndanir guy nga owchey” e ra riyul’. Ma aram e “bayi taw ko tungun,” ni aram e nge m’ay fare Gagiyeg rok Kristus u Lan Biyu’ e Duw. Mang e ra buch? Yugu aram rogon ni kan “pag fan urngin ban’en” ngak Jesus u tharmiy ngu but’, ma de tolangan’. Der lemnag ni nge yan nga lon Jehovah. Ma ra pi’ “urngin ban’en ni be gagiyegnag ngak Got ni Chitamangiy” u fithik’ e sobut’an’. Ra fanay e liw rok nge mat’awun ni nge yag ni nge pining e “sorok riy ngak Got.”—Matt. 28:18; Fil. 2:9-11.
19 Ngiyal’ nem, ma urngin e piin ni yad bay u tan Gil’ilungun Got e yad ra flont. Yad ra fol ko n’en ni i rin’ Jesus. Ma bochan ni yad ba sobut’an’, ma ra m’agan’rad ngay ni Jehovah e ra mang pilung rorad ni th’abi tolang. Ma yad ra gel ko bin tomur e skeng ni faanra yad baadag ni Jehovah e ra gagiyegnagrad. (Rev. 20:7-10) Tomur riy, ma urngin e girdi’ nge engel nra togopuluw ko gagiyeg rok e yira thangrad ni manemus. Rib gel e felfelan’ riy! Urngin chon e tabinaw rok Jehovah e yad ra pining e sorok ngak, ni ir e ra “gagiyegnag urngin ban’en.”—Mu beeg e Psalm 99:1-3.
Ngan Fil Ban’en Riy
it-2 994
Tang
Fare thin ni “ba tang nib beech” e gathi kemus ni yigoo Psalms e ke m’ug riy ya ku bay ko thin ni yoloy Isaiah nge apostal John. (Ps 33:3; 40:3; 96:1; 98:1, BT; 144:9; 149:1; Isa 42:10; Re 5:9; 14:3) Yira fal’eg i yaliy e thin u m’on ngu tomuren e re thin ney ni “tang nib beech” ma yooren e ngiyal’ e be m’ug riy ni ka non’ e re tang ney ni bochan ban’en nib beech ni ke buch ni bay rogon nga mat’awun e gagiyeg rok Jehovah. Be gaar e Psalm 96:10: “I Somol e ir e pilung!” Ere bod ni biney e “tang nib beech” e be weliy murung’agen boch ban’en ni be thil u ga’ngin e gin be gagiyeg Jehovah riy nge rogon nib l’ag rogon ko tharmiy nge fayleng.—Ps 96:11-13; 98:9; Isa 42:10, 13.
OCTOBER 21-27
TIN NIB GA’ FAN KO THIN ROK GOT | PSALMS 100-102
Nge Ga’ Fan u Wan’um e T’ufeg rok Jehovah u Fithik’ e Yul’yul’
Rogon ni Ngam Fal’eg Rogom ni Fan ko Taufe
18 T’ufeg rom ngak Jehovah e aram e re fel’ngin nth’abi fel’ ni bay rom. (Mu beeg e Proverbs 3:3-6.) Faanra rib t’uf Got rom, ma aram e rayog ni ngam athamgil u fithik’ e pi magawon ni ga ma mada’nag u lan e yafos rom. Ba ga’ ni ma weliy e Bible murung’agen e t’ufeg ni ma dag Jehovah ko pi tapigpig rok u fithik’ e yul’yul’. Bochan ni ma t’ufeg e pi tapigpig rok u fithik’ e yul’yul’, ma aram e be yip’ fan ndariy ba ngiyal’ nra digeyrad ara tal ndab ki t’ufegrad. (Ps. 100:5) Kan sunmiyem ni ga bod yaan Got. (Gen. 1:26) Ere uw rogon nrayog ni ngam dag e mit ney e t’ufeg?
19 Som’on e ngaum pining e magar. (1 Thess. 5:18) Gubin e rran ni ngaum fithem ni nge lungum, ‘Uw rogon ni ke dag Jehovah e t’ufeg ngog?’ Ngemu’ mag meybil ngam pining e magar ngak, mag weliy ngak boch ban’en ni ke rin’ ni fan ngom. Kum guy rogon ni nge tamilang u wan’um ni be rin’ boch ban’en nib manigil ni fan ngom ni bochan e gab t’uf rok ni bod rogon e n’en ni tamilang u wan’ apostal Paul. (Mu beeg e Galatia 2:20.) Mu fithem ni nge lungum, ‘Gu baadag ni ngkug dag ngak Jehovah nib t’uf rog, fa?’ T’ufeg rom ngak Jehovah e ra ayuwegem ni ngam ulul i siyeg e pi lumel ni ma yib ngom mag athamgil u fithik’ e pi magawon ni ga ma mada’nag. Ra k’aringem ni ngam ulul ni ngam pigpig ngak Jehovah ni gubin ngiyal’, mag dag ngak ni gubin e rran nib t’uf rom.
“Mu Tedan’med mi Gimed Ayuwegmed!”
10 Boch ban’en nthingar da siyeged e ba muun ngay ni ngaun ngongol i dawol ngak be’, nge unum nib pag rogon, nge abich nib pag rogon, nge nga unog e thin nra kirebnag laniyan’ be’, nge ngaun yaliy yaan e cham nge ngongol ni puwlag, nge ku boch e ngongol ni aray rogon. (Ps. 101:3) Gubin ngiyal’ ni be guy Moonyan’ ni toogor rodad rogon ni nge kirebnag e tha’ u thildad Jehovah. (1 Pet. 5:8) Ere faanra dab da kol ayuwgad ma rayog ni nge yung Satan nga lanin’dad nge gum’ircha’dad boch e lem nib kireb ni bod e awan’, nge sasalap, nge chogow, nge fanenikan, nge tolangan’, nge damumuw. (Gal. 5:19-21) Som’on e sana gathi rib gel e pi lem ney rodad. Machane faanra dab da rin’ed ban’en ngay ni ka chingiyal’ nem, ma ra ulul ni nge ilal u lanin’dad ni bod ba woldug ni bay e yub riy me k’aring e magawon nga puluwdad.—Jas. 1:14, 15.
Ga Ra Fol ko Pi Fonow rok Jehovah, Fa?
7 Mang e ba muun ko ngan par u orel ko pi tamachib ney? Susun ndab ud nonad ngorad, ara da pininged yad nga tabinaw rodad. Ku dab ud beeged e babyor rorad, ara ud yaliyed yaarad u TV, ara u darod ko Web site rorad ko Internet, ara u dogned lanin’dad ko thin ni yad ma tay nga Internet. Mang fan ni kad dugliyed u wan’dad ni ngad pared u orel rorad? Bochan nib t’uf e “bin rriyul’ e Got” rodad. Ere dubdad ni ngad motoyilgad nga boch e machib ni googsur nib togopuluw ko tin riyul’ ni bay ko Thin rok. (Jer. 10:10; John 17:17) Kub t’uf e ulung rok Jehovah rodad ni bochan e aram e gin ni kad filed e tin riyul’ riy nib muun ngay fithingan Jehovah nge fan e ngachal rok, nge tin nib m’agan’ ngay ni fan ko fayleng, nge rarogon e piin ni kar m’ad, nge athap ko fas ko yam’. Ka ga manang gelngin e felfelan’ nim tay u nap’an nim fil e pi machib nriyul’ ney? Ere mang ni ngam pag e pi tamachib ni goo bogi ban’en ngar pingeged gur ngam togopuluw ko fare ulung ni ir e ke fil e pi machib nriyul’ ney ngom?—John 6:66-69.
8 Demtrug ko mang e ra yog e pi tamachib ni goo bogi ban’en, ma dab da motoyilgad ngay! Dariy tapgin ni ngad motoyilgad ko girdi’ ni yad bod e luwed ndariy e ran riy. Ma piin nra motoyil ngorad e rra kireban’rad. Ngad dugliyed u wan’dad ni ngad pared ni gad ba yul’yul’ ngak Jehovah nge ulung rok, ya kemus e gin ni bay e tin riyul’ riy ni taareb rogon ko ran nib machalbog.—Isa. 55:1-3; Matt. 24:45-47.
Ngan Fil Ban’en Riy
Rogon ni Ngaud Pigpiggad ngak Jehovah ni Gad Ba Felfelan’
20 Yugu aram rogon, ma ka rayog ni nge pining faen ni yoloy e Psalm e sorok ngak Jehovah. (Mu beeg e Psalm 102:19-21.) Rogon ni kad filed ko Psalm 102, e ki mada’ ko piin nib mich Got u wan’rad ma rayog ni nge gafgow lanin’rad me mo’maw’ rorad ni ngkur lemnaged yugu ban’en. I par fare psalmist ni gowa ke “bod ba arche’ ni goo ir u daken e chigiy ko naun,” ya be lemnag ndariy be’ nrayog ni nge weliy e magawon rok ngak. (Ps. 102:7, BT) Faan ga ra mada’nag e magawon ni aray rogon ba ngiyal’, ma ga weliy lanin’um ngak Jehovah ni bod ni rin’ faen ni yoloy e Psalm. Meybil ni ga ra tay e rayog ni nge ayuwegem ni ngam felfelan’. Ke micheg Jehovah nra “motoyil ko meybil rok e piin ni dariy ban’en rorad, ma dabi aw ni dariy fan e meybil rorad u wan’.” (Ps. 102:17, BT) Nge pagan’um ko pi thin ney.
OCTOBER 28–NOVEMBER 3
TIN NIB GA’ FAN KO THIN ROK GOT | PSALMS 103-104
Manang ni “Gadad e Fiyath”
Nge Puluw Rogon ni Ngaum Lemnag Boch Ban’en ni Bod Jehovah
5 Bochan nib sobut’an’ Jehovah ma ma runguy e girdi’, ma aram e n’en ma k’aring ni nga i lemnag boch ban’en nib puluw rogon. Bod ni dag gelngin feni sobut’an’ u nap’an ni be n’en ni nge thang piyu Sodom. I yog ngak Lot u daken e engel rok ni nge mil nga daken e burey, machane i rus Lot ni nge yan ngaram. Ere wenig ngak Jehovah ni nge pagrad chon e tabinaw rok ni nga ranod nga Zoar nreb e binaw nib achig ni ke dugliy Jehovah ni nge gothey. Rayog ni nge yog Jehovah ngak Lot nthingari rin’ e n’en ke yog ngak. Machane i pag Lot ni nge yan nga Zoar ma daki gothey e re binaw nem. (Gen. 19:18-22) Boch e chibog nga tomuren miki runguy Jehovah piyu Nineveh. I l’og Jonah ni profet ni nge yan i yog ko girdi’ u rom ni bayi gothey e re mach nem nge girdi’ riy nib kireb. Machane nap’an nra kalgadngan’rad, ma aram me runguyrad Jehovah ma daki gothey e re mach nem.—Jonah 3:1, 10; 4:10, 11.
Mu Taga’ Ngak Jehovah ni Bod Samson
16 Yugu aram rogon nib gel e gafgow ni tay Samson ni bochan e oloboch ni rin’, machane de tal i guy rogon ni nge rin’ e n’en nib m’agan’ Jehovah ngay. Mus ni faanra kad olobochgad mab t’uf ni ngan ginangdad ara ke mul reb e tow’ath u pa’dad, ma thingar dab da talgad ko pigpig ngak Jehovah. Dab mu pagtalin nder ma mulan’ Jehovah u puluwdad. (Ps. 103:8-10) Yugu aram rogon ni gad ma oloboch, ma ka rayog ni nge fanaydad Jehovah ni bod Samson.
17 Am lemnag e n’en ni buch rok reb e walag nib pagel ni ka nog Michael ngak. Boor ban’en ni i rin’ ni fan ko pigpig rok ngak Jehovah, ya ir reb e ministerial servant maku ma regular pioneer. Machane ba gel e kireban’ riy ya rin’ reb e oloboch me mul u pa’ e tow’ath rok u lan e ulung. I yog ni gaar: “U m’on ni nge buch e re n’ey, ma boor ban’en nug be rin’ ni fan ko pigpig rog ngak Jehovah. Machane nap’an ni buch e re n’ey, mug lemnag ndakuriy ban’en nrayog ni nggu rin’ ni fan ko pigpig rog ngak Jehovah. Dariy ba ngiyal’ nug lemnag nra digeyeg Jehovah, machane ug lemnag ko ka ra sul rogon e tha’ u thilmow nge bod kafram ara ku rayog ni nggu sul nggu pigpig ngak u lan e ulung ni bod ni ug rin’ kafram fa dabkiyog.”
18 Ba manigil e n’en ni rin’ Michael ya de tal ko pigpig ni i tay ngak Jehovah. Ki yog ni gaar: “Ba gel e athamgil nug tay ni nggu chugur ngak Jehovah bayay ni aram e ug meybil ngak ni gubin ngiyal’, ma gu be fil e Bible rog, ma gu be fal’eg i lemnag.” Munmun mu kun sulweg e tow’ath rok Michael ngak. Chiney e ma pigpig ni ir reb e piilal maku ir reb e regular pioneer. I gaar: “Ayuw nge athamgil ni un pi’ ngog nib ga’ ni tin ni i yib ko piin piilal e ayuwegeg ni nggu nang ni ku gub t’uf rok Jehovah. Chiney e rayog ni nggu pigpig bayay u lan e ulung ndakuriy ban’en ni be magawonnag e nangan’ rog. Re n’ey ni buch rog e kug fil riy nra n’ag Jehovah fan e kireb rok be’ ni faanra riyul’ ni ke kalngan’.” Ku rayog ni nge pagan’dad ni faan gad ra rin’ urngin e tin nrayog rodad ni ngad yal’uweged e oloboch rodad ma gad ulul ni ngad taga’gad ngak Jehovah, ma ra fanaydad miki tow’athnagdad ni yugu aram rogon ni kad olobochgad.—Ps. 86:5; Prov. 28:13.
Rayog ni Ngam Rin’ e Tin Ga Be Nameg ni Fan ko Tirok Got Ban’en
2 Faanra bay ban’en ni ga be nameg e chiney ndawori yag ni ngam rin’, ma dabi mulan’um. Mus nga ban’en nib achig ni ga be nameg ni ngam rin’, mab ga’ nib t’uf e tayim nge maruwel nib gel ya nge yag nim rin’ fare n’em. Re n’ey ni ga baadag ni ngam rin’ e n’en ga be nameg e be dag nib ga’ fan u wan’um e tha’ u thilmew Jehovah ma ga baadag ni ngam pi’ e tin th’abi fel’ rom ngak. Ere ba ga’ fan u wan’ Jehovah e athamgil ni ga be tay. Machane der lemnag ni ngam rin’ ban’en ndabiyog rom. (Ps. 103:14; Mik. 6:8) Ere susun e ngam nameg ban’en nrayog ni ngam rin’. Ma nga tomuren, ma uw rogon nrayog ni ngam rin’ fare n’em? Chiney e ngad weliyed boch ban’en nra ayuwegem.
Ngan Fil Ban’en Riy
cl 55 ¶18
Gelngin ni Nge Sunmiy Ban’en nib Beech Mab Thil—“Ir e Sunmiy Lan e Lang, nge Fayleng”
18 Mang e gad be fil u rogon ni ma fanay Jehovah gelngin ni nge sunmiy boch ban’en nib beech mab thil? Gad be ngat nga rogon nib thilthil e pi n’en ke sunmiy. I yog reb e psalmist ni gaar: “Somol, ri pire’ ban’en ni kam sunumeg! . . . Ke sug e fayleng nga urngin e tin ni kam sunumeg!” (Psalm 104:24) Rriyul’ e pi thin ney! Ba pag reb e milyon urngin ban’en nib fos ni ke pirieg e girdi’ ni llowan’ ni ma fil murung’agen e pi n’en nib fos u roy u fayleng. Yugu aram rogon ma yibe lemnag ni ka bokum milyon mit e yafos ni ka bay, machane ra be’ mab thil rogon ni be lemnag. Girdi’ ni ma ngongliy yaan boch ban’en e sana bay yu ngiyal’ nra taw ngay ma dakur nanged e n’en ngar ngongliyed yaan. Machane Jehovah e ba thil ya ba tamilang nder ma m’ay gelngin ni nge sunmiy boch ban’en nib beech mab thilthil.