“Chiney e Ka Rug Adag e Machib!”

DA KUG FELFELAN’ KO PIGPIG NI UG TAY

Ba gel e kireban’ riy, ya nap’an ni ke gaman sogonap’an ragag nge dalip e duw rog, ma aram me tabab ni nge palog e tha’ u thilmow Jehovah. Piin gamad nga skul e gowa ba puf rogorad ni ngar rin’ed e tin yad baadag. Ere gu baadag ni ngki puf rogog ni bod yad. Ug lemnag ni pi motochiyel ni ke tay e gallabthir rog ni nggu fol riy, nge tin be fol e piin Kristiano riy e be talegeg u boch ban’en. Ug lemnag ni pigpig nug be tay ngak Jehovah e ba gel e maruwel riy. Yugu aram rogon ni gu manang ni bay Jehovah, machane daki chugur thilmow.

Ug guy rogon ni nge munmun mug un ko machib ni bochan e nge dab rug tal nib polo’. Da gur ma fal’eg rogog u m’on ni nggu wan ko machib, ere ba mo’maw’ ni nggu tababnag e numon ngak be’ ara gu ulul ni nggu machibnag. Bochan e re n’ey, ma aram e dariy be’ nug mada’nag ni ug sul ngak, ara ug filew e Bible. Ere dakiyog ni nggu felfelan’ ko machib nug be tay, ma aram e n’en ni k’aringeg ni nggu dabuy e machib. Gu ma fitheg ni ma lungug, ‘Uw rogon ni nge par be’ ni yugu be machib?’

Nap’an ni gaman 17 e duw rog, ma aram mug adag ni nggu chuw u tan pa’ e gallabthir rog. Ere gu kunuy e chugum rog nggu chuw u tabinaw, ma aram mug wan gu par nga Australia. Ri kireban’ e gallabthir rog u nap’an nug chuw u tabinaw. I magafan’row ngog, machane ra lemnagew nug ra ulul ko pigpig ngak Jehovah.

Nap’an ni ug moy u Australia, mi ri lich e tin ug rin’ ni fan ko pigpig rog ngak Jehovah. Ere gu tabab ni ngaug pag e muulung. Kug ma chag ngak boch e fel’ yangaren ni ku yad bodeg nreb e nep’ e yad ra un ko muulung, ma reb e nep’ e yad ra yan ko chingaw nge churu’ ko yungi n’en ntagil’ e unum. Gu ra sul nggu lemnag e re ngiyal’ i n’em, ma kug nang ni yugu aram rogon nug bay ko tin riyul’ machane kug be ngongol ni bod rogon e girdi’ ko fayleng. Ug par ndariy reb e gali n’ey ni gub dugil ngay.

BAN’EN NIB GA’ FAN NUG FIL NDAG NANG

Sogonap’an l’agruw e duw nga tomuren mug mada’nag reb e walag nib pin ni ayuwegeg ni nggu lemnag e gin be sor e yafos rog ngay. Re n’ey ni rin’ e ban’en nde nang. Ngiyal’ nem e gag nge lal e walag nib pin ni gamad ma par u lan taareb e naun. Ere gu pininged e en ma lekag e ulung nge ppin rok ni ka nog Tamara ngak ni ngar parew romad u lan reb e wik. Ra nap’an ni be rin’ figirngin Tamara boch ban’en ni fan ko ulung, ma aram e gamad ma rin’ boch ban’en u taabang ni nggu felfelan’gad ngay. Gu baadag e re n’ey. Tamara e ir be’ nib gonop mab mom ni ngan non ngak. Rug ngat ngay ni be’ nri ma tiyan’ ko pigpig rok ngak Jehovah e rayog ni ngkur rin’ed boch e girdi’ boch ban’en u taabang ni ngar felfelan’gad ngay.

Tamara e ir be’ nib pasig. Rogon nib t’uf e tin riyul’ rok nge rogon ni baadag e machib e rayog ni nge k’aringem ni ngki t’uf e tin riyul’ rom mu kum adag e machib. Rib felfelan’ ni be pi’ e tin th’abi fel’ rok ngak Jehovah, me gag e da gur felfelan’ ni bochan e rib lich e tin gu be rin’ ni fan ngak Jehovah. Rogon ni ma sap nga fel’ngin ban’en nge rogon e felfelan’ rok e rib ga’ angin ni yib ngog. Tin ni i rin’ e k’aringeg ni nggu lemnag ban’en nib riyul’ mab ga’ fan ni aram e: Jehovah e baadag ni nge pigpig urngin e girdi’ ngak “u fithik’ e felfelan’” mu kur tanggad “u fithik’ e felfelan’!”​—Ps. 100:2.

ROGON NUG ADAG E MACHIB BAYAY

Gu baadag ni nggu felfelan’ ni bod rogon Tamara, machane gu manang ni bay boch ban’en nib t’uf ni nggu thilyeg u rogon e par rog. De yag ni nggu thilyeg e pi n’em ni ka chingiyal’ nem. Machane gu tabab ni nggu thilyeg ni buchuuw ma buchuuw. Som’on e, ug tabab ni nggu fal’eg rogog ni fan ko machib, ma yu ngiyal’ e ug un ko pioneer ni ayuw. Re n’ey e ayuwegeg ni nge war boch e marus rog miki pagan’ug u nap’an e machib. Bochan ni boor yay nug ma fanay e Bible rog u nap’an e machib, ma aram fan nug tabab ni nggu adag e machib. De n’uw nap’an nga tomuren, ma aram mu ug un ko pioneer ni ayuw ni gubin e pul.

Gu tabab ni nggu mel’eg boch e fager u lan e ulung nib thilthil yangarrad ni yad be pi’ e tin th’abi fel’ rodad ngak Jehovah ma yad ba felfelan’ ko pigpig ni yad be tay ngak. Pi n’en nib fel’ ni yad be rin’ e ayuwegeg ni nggu fal’eg i lemnag e n’en nth’abi ga’ fan u lan e yafos rog, miki yag ni nggu tabab i beeg e Bible ni gubin e rran. Ki tabab ni nga rug adag e machib, ere munmun mug mang reb e regular pioneer. Rib gel e felfelan’ nug tay, ma gu baadag ni kug sul ko ulung.

KUG PIRIEG BE’ NI NGGU PIONEERGOW U TAABANG

Reb e duw nga tomuren mug mada’nag Alex ni ir be’ nrib sumunguy, ma rib t’uf Jehovah rok, maku baadag e machib. Ma pigpig ni ir reb e ministerial servant ma ke gaman nel’ e duw ni be pioneer. Ka i pi’ e ayuw ko gin nib t’uf e ayuw riy ko machib u Malawi u lan sogonap’an medlip i yan ko meruk e pul. Pi missionary ni i chag ngorad u rom e rib manigil e kanawo’ nra daged ngak nrayog ni nge folwok riy, mu kur pied e athamgil nga laniyan’ ni nge ulul ni nge m’oneg e pigpig rok ngak Jehovah.

Nap’an e duw ni 2003 mug mabgolgow Alex, ma ka aram nap’an i yib ni gamow ma machib u polo’ e tayim romow. Boor ban’en ni kug filew nrib manigil, ma boor e kanawo’ ni ke tow’athnagmow Jehovah riy.

KI YAG BOCH E TOW’ATH NGOMOW

Nap’an e duw ni 2009, me taw e thin ngomow ni nggu warow nga reb e nam ni ka nog yu Timor-Leste ngay ni nggu pigpiggow u rom ni gamow l’agruw e missionary. Rug gingow ko n’en ka nog ngomow, machane gamow baadag ni nggu rin’ew ni yugu aram rogon ni gamow be rus. Lal e pul nga tomuren mug tawgow nga Dili ni aram e tochuch ko re nam nem.

Rib thil rogon e par romow u rom. Ya ba t’uf ni nggu mechamgow ko yalen, nge thin, nge ggan, nge rogon e par ko binem e nam. Nap’an ni gamow ra yan ko machib, mab ga’ ni gamow ma guy boch e girdi’ nri yad ba gafgow, nge boch ndariy e skul rorad, nge boch ni yibe gafgownagrad. Kug guyew boch e girdi’ nra maad’adgad u tan e mahl nge cham ni un tay ko nam rorad, ma kki par e pi n’em u lanin’rad.a

Rib manigil e machib u rom! Bay bayay nug mada’nag bochi pin ni 13 e duw rok ni ka nog Mariab ngak. Chi pin nem e ma par nib kireban’ ni bochan e ke yan in e duw ni ke yim’ e chitiningin, ma gathi ri yow ma mada’ e chitamangin. De nang Maria e n’en ni nge rin’ ko yafos rok ni bod rogon e pi taab yangar rok. Ka be yib ngan’ug ba ngiyal’ ni i weliy rogon laniyan’ ngog ma be yor. Machane der yag ni nggu nang fan e n’en be yog ni bochan e ngiyal’ nem e dawor gu salap ko thin rok. Ere gu meybil ngak Jehovah ni nge ayuwegeg ni nggu pi’ e athamgil nga laniyan’, ma aram mug tabab ni nggu beeg boch e thin nu Bible ni nge fal’eg laniyan’. U lan e pi duw nga tomuren, mug guy ni ke thil rogon e lem, nge munmad, nge yafos rok Maria ni bochan e tin riyul’. Ere un ko taufe, ma chiney e bay e girdi’ ni ma fil e Bible ngorad. Chiney e ke yag reb e tabinaw ngak Maria u lan e ulung, ma be guy nrib t’uf rorad.

Be tow’athnag Jehovah e maruwel ni yibe rin’ u Timor-Leste. Yugu aram rogon ni yooren e pi tamachib u rom e ka fin nra uned ko taufe u lan fa ragag i duw ni ke yan, machane boor i yad e ma pioneer, ma boch e ke mang ministerial servant, ara piilal. Ma boch e ma pi’ e ayuw ni ngan pilyeg e pi babyor nib puluw e thin riy ko Bible ko thin ko re nam nem. Rug ma felfelan’ u nap’an nug ra rung’ag ni yad be tang u nap’an e muulung, mug guy nri yad ba felfelan’, mu kug guy rogon ni yad be mon’og ko tirok Got ban’en.

RUG BAADAG ROGON E PAR ROG

Yugu aram rogon nib thil e par romow u Timor-Leste nga Australia, machane kug baadag rogon e par rog u rom. Yu ngiyal’ e gamow ma un ko milekag u reb e bus nib achig nib chichir e girdi’ u langgin, ma bay boch i yad ni ke fek e nig ni kan fangfangnag, nge yasay ni kar chuw’iyed u boch e kantin ni yima pi’ e pi n’ey riy nchuway’. Bay boch e rran ni gamow ma fil e Bible ngak boch e girdi’ u lan boch e naun nib achig nrib gel e gowel riy ndariy e faraf riy, ma bay e nimen ni be wagagey u toobey. Yugu aram rogon ni ug mada’nagew e magawon, machane ba ga’ ni ma lungug u wan’ug, ‘Rib manigil e par rog!’

Nap’an nug ra lemnag e tin i buch rog kafram, ma rug be pining e magar ko gallabthir rog ni kar rin’ew urngin e tin rayog rorow ni ngar filew e pi motochiyel rok Jehovah ngog, ma yow be ayuwegeg ngki mada’ ko ngiyal’ ni ke lich e tin gu be rin’ ni fan ko pigpig rog ngak Jehovah. Rib puluw fapi thin ko Proverbs 22:6 ngog. Rib felfelan’ e chitinag nge chitamag ngomow Alex ni bochan e gamow be pigpig ngak Jehovah. Ka nap’an e duw ni 2016, ma gamow ma lekag e pi ulung ni bay u tan e branch u Australasia.

Ba mo’maw’ ni nge mich u wan’ug ni bay ba ngiyal’ nug dabuy e machib, ya chiney e ka rug adag e machib! Kug nang ndemtrug e n’en nra buch u lan e yafos rodad, ma bin riyul’ e felfelan’ e ma yib ko pigpig ni gad be tay ngak Got u polo’ i gum’ircha’dad. Arrogon, ke yan 18 e duw ni kug pigpiggow Alex ngak Jehovah u taabang. Ma rib gel e felfelan’ ni kug tay u lan e pi duw ney. Kug nang nriyul’ fapi thin ni yog David nreb e psalmist ngak Jehovah ni gaar: “Piin yad ma naf ngom e bay ra felfelan’gad; rayog ni gubin ngiyal’ ni nguur tanggad ni yad ba felfelan’. . . . Ya bocham e aram fan ni yad ba felfelan’.”​—Ps. 5:11, BT.