GURUY NI 27

Uw Rogon ni Nge Yib Angin e Library u Kingdom Hall Ngodad?

Reb e pumoon ni be yaliy boch e babyor ko library u Kingdom Hall — Israel

Reb e Pi Mich Rok Jehovah ni be ayuweg reb e pagel u rogon ni nge gay murung’agen boch ban’en u boch e babyor rodad — Czech Republic

Bochi buliyel ni be yoloy fithingan ko babyoren e tang rok — Benin

Reb e pumoon ni be gay murung’agen boch ban’en ko fare Watchtower Library — Cayman Islands

Ga baadag ni ngam fal’eg i gay boch ban’en ya nge yoor e tamilangan’ rom u Bible, fa? Ga baadag ni ngam nang fan reb e thin nu Bible, ara ngam nang murung’agen be’, ara bang, ara ban’en ni be weliy e Bible murung’agen, fa? Kaam lemnag ko rayog ni nge ayuwegem e Thin rok Got ko magawon rom, fa? Faanra arrogon, ma rayog ni ngam fanay e pi babyor u lan e library u Kingdom Hall.

Boor ban’en riy nrayog ni nge ayuwegem ni ngam fal’eg i gay boch ban’en. Dabisiy ma boor e pi babyor nib puluw e thin riy ko thin nu Bible ni ke fal’eg e Pi Mich Rok Jehovah ndariy ko thin rom. Machane, fare library u Kingdom Hall e boor e pi babyor nib beech ni bay riy. Maku bay boor ken e Bible ni kan piliyeg u boor mit e thin riy, nge dictionary nrayog ni ngan fanay, nge ku boch ban’en. Rayog ni ngam fanay e library u m’on ngu tomuren e muulung. Faanra bay e computer u rom ma dabisiy ni bay fare Watchtower Library riy. Ireray reb e ban’en ni bay murung’agen e pi babyor riy ni ma fal’eg e ulung, ma ra ga baadag ni ngam gay murung’agen ban’en, ara ngam nang fan bbug e thin, ara thin nu Bible, ma rayog ni ngam fanay ban’en riy ni ka nog e search feature ngay ni bay ko computer.

Ra yib angin ngak e piin ni yad ma pi’ e welthin u nap’an fare muulung ni kenggin e Pi N’en ni Ma Rin’ e Piin Kristiano nge Machib ni Yad Ma Tay. Rayog ni ngam fanay e library u Kingdom Hall u nap’an ni ga be fal’eg e welthin rom. En ni ma yarmiy e re muulung ney e ir e ba milfan ngak ni nge ayuweg e library. Ir e ma yarmiy e pi babyor ni bay riy, ma ma guy rogon ni nge gubin e babyor nib beech ma bay riy. En nib milfan ngak ni nge ayuweg e library ara en ni gimew ma fil e Bible e rayog ni nge dag ngom rogon ni ngam pirieg e n’en ni ga be gay. Machane, pi babyor ni ma par u library e dabiyog ni ngan fek nga wuru’ e Kingdom Hall. Maku thingar ni ayuweg e pi babyor ney ndab ni yoloy langgin.

Be weliy e Bible ni faanra ngan pirieg e “tamilangan’ rok Got,” mab t’uf ni ngan gay ni bod e “machaf nib mith.” (Proverbs 2:1-5) Fare library u Kingdom Hall e rayog ni nge ayuwegem ni ngam tabab i gay murung’agen boch ban’en.

Mang boch ban’en ni bay ko fare library u Kingdom Hall nrayog ni nge ayuwegem u nap’an ni ga be fal’eg i gay murung’agen ban’en?
Mini’ e rayog ni nge ayuwegem u rogon ni ngam gay boch ban’en ko library u Kingdom Hall?