Mang Fan ni Nge Yog e Library Ngom?

Ba ga’ fan nra reb e tapigpig rok Jehovah ma bay ba ngiyal’ ni ke tay ni nga i fil e Bible ni goo ir. (John 17:3) Ere ba fel’ ni faanra bay e Library ara tagil’ e babyor rom u tabinaw ma rayog ni ngam fanay ni ngam fl’eg i gay boch ban’en riy mag gay e fulweg u boch e deer, mag fl’eg rogom ni fan ko muulung. Susun ndab da darifannaged e re n’ey, ya ireray kanawoen nra mom ngodad ni ngad pirieged boch ban’en riy nib puluw ko Bible.

Ku reb i fan nib fel’ ni bay e Library u tabinaw e bochan ni nge reb e Kristiano ma “bay gilban ni be fek” ni aram e tin nib mil fan ngak. (Gal. 6:5) Nap’an nra sum e deer u boch ban’en mab fel’ ni som’on e ngam fl’eg i gay e fulweg riy ni goo gur ma ra ba t’uf mfin mu fith be’. Rayog ni ngad salapgad i gonopiy ban’en ni faan gad ra fil e Thin Rok Got ni gubin ngiyal’ ma gad guy ko Library rodad.—Heb. 5:11-14.

Ba t’uf rodad gelngin Jehovah nge pi talin e maruwel ni ma pi’ e ulung rok, ya nge yog nda nanged fan e Thin Rok Got. (Acts 8:30, 31) Reb e talin e maruwel nib ga’ fan e aram fare babyor ni Wulyang Ntagil’ E Damit. Susun ni ngan chaariy taareb ko pi babyor ney nga library rodad u tabinaw. Ma nap’an ni gad be fil e pi babyor rodad nge boch e thin nu Bible, ma rayog ni ngad yoloyed ko Bible rodad e babyor nge namba ko page ni bay murung’agen riy ma aram e rayog ni nge mom ni ngad pirieged ko ngiyal’ nib t’uf.

Boch e gallabthir e kar ayuweged e bitir rorad ni ngar fal’eged e Library rorad ni fan ko chiney nge boch nga m’on. Rayog ni ngan fl’eg reb ara l’agruw e shelf min tay e pi babyor ngay ni yima fanay ko fol Bible u tabinaw. Rib ga’ fan ni bay e Library u tabinaw ko piin Kristiano.