GURUY NI 56
Mu Ayuweg e Ulung ni Nga i Par ni Bay e Taareban’ Riy
Nap’an ni gad bay e pi walag u taabang ma gad ma lem ni bod David ni Pilung ni faani gaar: “Rib fel’ mab manigil, ni ngi i par e girdi’ rok Got u taabang nib taareb lungurad!” (Psalm 133:1, BT) Taareban’ ni bay u thildad e gathi ban’en ni yugu ma buch ndan lemnag, ya ra bagadad mab t’uf ni nge rin’ e n’en nib milfan ngak ya nge yag ni par ni bay e taareban’ u thildad.
1. Mang e yira ngat ngay u rarogon e girdi’ rok Got?
Faanra kam un ko muulung u reb e nam, ma rayog ndamur nang fan e n’en yibe yog, machane ba puf rogom ni ngam un ko tin yibe rin’. Mang fan? Ya taa bogi babyor e gad ma fanay ni ngad filed e Bible riy u gubin yang. Ku gad ma guy rogon ni ngad t’ufeged gadad. Demtrug e gin gad ma par riy, ma gad gubin ni gad ma “pining fithingan Jehovah ni bochan e ngad liyorgad ngak nib taareban’dad.”—Zefaniah 3:9, NW, footnote.
2. Uw rogon ni ngam mon’ognag e taareban’ ni bay u thiliy?
“Ra bigimed ma ngari t’uf rok bigimed u polo’ i laniyan’.” (1 Peter 1:22) Uw rogon ni ngam fol ko re fonow ney? Um sap nga fel’ngin yugu boch e girdi’ ko bin ngaum sap nga thibngirad. Mu guy rogon ni ngam nang e pi walag nib thil rarogon e gin kar bad riy ko bin ni yigoo piin taareb e n’en gimed baadag e ngaum chag ngorad. Ku rayog ni ngad athamgilgad u rogon nrayog rodad ni ngad chuweged e laniyan’ u gum’ircha’dad.—Mu beeg e 1 Peter 2:17.a
3. Mang e ga ra rin’ u nap’an ni gimew ra luag reb e walag e thin?
Ba taareban’dad, machane dawor da flontgad. Yu ngiyal’ e rayog ni ngad rin’ed ban’en nra kirebnag laniyan’ bagadad. Ere aram fan ni be yog e Thin rok Got ni ‘nge bagadad mi i n’ag fan u wan’ e n’en ni manga ke kirebnag bagadad u laniyan’.’ Ku be gaar: “Thingar um n’iged fan u wun’med e n’en ni ke rin’ bigimed ngak bigimed ni bod rogon ni ke n’ag Somol fan u wan’ e tin ni kam rin’ed nib togopluw ngak.” (Mu beeg e Kolose 3:13.) Boor yay ni kad kirebnaged laniyan’ Jehovah, machane ke n’ag fan rodad. Ere ku baadag ni ngad n’aged fan e kireb rok pi walagdad. Faanra kam nang ni kam kirebnag laniyan’ be’, mag guy rogon ni ngam pithig e magawon ni ke sum u thilmew.—Mu beeg e Matthew 5:23, 24.b
KUM FIL BOCH BAN’EN U MURUNG’AGEN
Mu lemnag boch e kanawo’ nrayog ni ngam mon’ognag e taareban’ nge gapas u lan e ulung.
Mang e ga ra rin’ ya nge yag nim awnag e gapas?
4. Mu siyeg e laniyan’
Gad baadag ni ngad t’ufeged gubin e walag. Machane rayog ni nge mo’maw’ ni nge fel’ be’ u wan’dad nib thil rarogodad. Ere mang e rayog ni nge ayuwegdad? Mu beegew e Acts 10:34, 35, mi gimew weliy e fulweg ko gal deer ni baaray:
Baadag Jehovah ni nge mang gubin mit e girdi’ boch e Pi Mich rok. Ere uw rogon nrayog ni ngam folwok rok u rogon ni ga ma lemnag e piin nib thil rarogon e gin kam bad riy?
Mang boch ban’en ni ma k’aring e laniyan’ ko girdi’ ko gin ga ma par riy ni ga baadag ni ngam siyeg?
Mu beegew e 2 Korinth 6:11-13, mi gimew weliy e fulweg ko re deer ni baaray:
Uw rogon ni ga be lemnag nrayog ni ngam chugur ngak e pi walag nib thilthil rarogon e gin kar bad riy?
5. Um n’ag fan e kireb ma ga be awnag e gapas
Ma n’ag Jehovah fan e kireb rodad ni yugu aram rogon ndariy ba ngiyal’ nra t’uf ni ngad n’aged fan e kireb rok. Mu beegew e Psalm 86:5, mi gimew weliy e fulweg ko pi deer ni baaray:
Uw rogon ni ma n’ag Jehovah fan e kireb?
Mang fan ni gab felfelan’ ngay ni ma n’ag Jehovah fan e kireb?
Mang boch ban’en ni ma buch nrayog ni nge mo’maw’nag ni ngad pared ni bay e gapas u thildad yugu boch e girdi’?
Uw rogon nrayog ni ngad folwokgad rok Jehovah ma gad par pi walagdad nib taareban’dad? Mu beegew e Proverbs 19:11, mi gimew weliy e fulweg ko re deer ni baaray:
Nap’an nra k’aring be’ e kankanan’ ngom ara ke rin’ ban’en ni ke kirebnag lanin’um, ma uw rogon nrayog ni ngam pithig e re magawon nem?
Yu ngiyal’ e gad ma kirebnag laniyan’ yugu boch e girdi’. Ere mang e susun ni ngad rin’ed u nap’an nra buch e re n’ey? Mu yaliyew e re VIDEO ney, mi gimew weliy e fulweg ko re deer ni baaray.
Mang e rin’ fare walag nib pin ya nge yag ni awnag e gapas?
6. Um sap nga fel’ngin pi walagem
Nap’an nra yoor ban’en nda nanged u rarogon pi walagdad, ma aram e gad ra nang pi fel’ngirad nge pi meewar rorad. Ere uw rogon ni ngaud sapgad nga fel’ngirad? Mu yaliyew e re VIDEO ney, mi gimew weliy e fulweg ko re deer ni baaray.
Mang e rayog ni nge ayuwegem ni ngaum sap nga fel’ngin pi walagem?
Ma sap Jehovah nga fel’ngidad. Mu beegew e 2 Kronicles 16:9a, mi gimew weliy e fulweg ko re deer ni baaray:
Uw rogon u wan’um ni kam nang ni ma sap Jehovah nga fel’ngim?
Yugu aram rogon ni ke magur yu yang u ba luwaw ni kan ngongliy u ban’en nib tolang puluwon, machane ri kab tolang puluwon fare luwaw. Ku arrogon pi walagdad ndawor ra flontgad, machane ba ga’ farad u wan’ Jehovah
MA GAAR BOCH E GIRDI’: “Faan gu ra n’ag fan rok ni ka chingiyal’ nem, ma dabi nang gelngin ni kari kirebnag lanin’ug.”
Mang fan nsusun e nge m’agan’dad ngay ni ngad n’aged fan e kireb rok yugu boch e girdi’?
N’EN KAN FIL
Rayog ni ngad ayuweged e ulung ni nga i par ni bay e taareban’ riy ni aram e ngaud n’aged fan e kireb ma gad be t’ufeg pi walagdad.
Ngan Sul u Daken
Uw rogon nrayog ni ngam siyeg e laniyan’?
Mang e ga ra rin’ ni faanra kam luagew reb e walag e thin?
Mang fan ni ga baadag ni ngam folwok rok Jehovah u rogon ni ma n’ag fan e kireb?
MU GAY MURUNG’AGEN
Mu fil rogon nrayog ni nge ayuwegdad reb e fanathin rok Jesus ni nge dab ud turguyed rarogon yugu boch e girdi’ u wan’dad.
Gur, ba t’uf ni ngad weniggad ni faanra gad be lemnag ndariy ban’en nib kireb ni kad rin’ed?
“Apologizing—A Key to Making Peace” (The Watchtower, November 1, 2002)
Mu guy rogon ni ke fil boch e girdi’ rogon ndab kur laniyan’gad ngak yugu boch e girdi’.
Mu fil rogon nrayog ni ngam pithigew be’ e magawon ni ke sum u thilmew u m’on ni nge magawonnag e gapas u lan e ulung.
“Mu Pithig e Magawon ni Ke Sum u Thilmew Be’ u Fithik’ e T’ufeg” (Fare Wulyang ko Damit, May 2016)
a Yugu Boch e Thin 6 e be weliy rogon ni ma k’aring e t’ufeg e piin Kristiano ndab ra afweged ba mit e m’ar ni bay rorad ngak be’ nrayog ni nge af.
b Yugu Boch e Thin 7 e be weliy rogon ni ngan pithig e magawon ni ma sum ni bay rogon ko siyobay nge boch ban’en ni bay rogon ko motochiyel ko am.