Ngam Pired Ni Gimed Ba Thothup U Fithik’ Urngin E Tin Ni Gimed Be Rin’

“Ngam pired ni gimed ba thothup u fithik’ urngin e tin ni gimed be rin’ ni bod rogon Got nib thothup ni ir e ke piningmed. Ya be gaar e babyor nib thothup: ‘Thingar mpired ni gimed ba thothup, ya gub thothup.”​—1 PETER 1:15, 16.

1. Mang fan ni i pining Peter ko pi Kristiano ni ngar thothupgad?

MANG FAN ni yog apostal Peter e pi fonow nem? Ya ke guy ni ba t’uf ko ra reb e Kristiano ni nge ayuweg laniyan’ nge ngongol rok ni fan ni ngar pared nib puluw ku Jehovah nib thothup. Ere u m’on ni yog e pi thin nem u lang me gaar: “Mu fl’eged rogon lanin’med ni ngam ngongolgad, mi gimed par nib thabthabel lanin’med . . . Um folgad rok Got, ma tin nib kireb ni um m’ad ni bochan ko ngiyal’ ndawor mu nanged Kristus riy e dab kum paged nge mang ir e i gagiyegnag pangimed.”​—1 Peter 1:13, 14.

2. Mang fan nde thothup e tin ni ud adaged u m’on ni kad nanged e tin riyul’?

² Tin ni ud m’ad ni bochan faram e de thothup. Mang fan? Ya boor i gadad e kad leked e kanawo’ ko fayleng u m’on ko ngiyal’ ni kad uned ko tin riyul’ ko Kristiano. I nang Peter e re n’ey faani gaar: “Ke n’uw nap’an ni um pired ni gimed be rin’ e tin ni ba adag e piin ndar nanged Got. Ya rogon pangimed ni immoy e um puwlaggad, ma um rin’ed e tin ni gimed be yim’ ni bochan nde mat’aw u wan’ Got, ma gimed be balyang ko rrum’, ma gimed be un ko madenom ni yibe wagey riy, ma gimed be un ko mur ni yibe muun rrum riy, ma gimed be ta’ fan ma gimed be meybil ko liyos ni ma meybil boch e girdi’ ngay, ni ban’en nrib kireb ni ngan rin’.” Ma de weliy Peter u morngaagen e pi ngongol nde thothup ni bay ko ngiyal’ ney ya ngiyal’ nem ma dariy e pi n’em.​—1 Peter 4:3, 4.

3, 4. (a) Uw rogon nrayog ni ngad togopuluwgad ko ar’ar’ nib kireb? (b) Thingari par e Kristiano ni dar adaged ban’en fa? Mu weliy.

³ Kam tiyan’um ngay ni pi n’ey ni yibe ar’arnag e ma sor fan ko tin ba adag dowey, nge thamtham, nge lanin’uy fa? Faanra gad ra pag e pi n’ey nge gel ngodad, ma aram ma dabki thothup e lem rodad nge ngongol rodad. Ere ba t’uf ni ngad fanayed gelngin e tafinay rodad nge gagiyegnag e ngongol rodad. Aram e n’en ni yog Paul ni gaar: “Ere pi walageg, bochan e ri be runguydad Got, ma aram fan ni nggu wenig ngomed ni ngam pied gimed ngak Got, ngam manged maligach nib fas ngak, ni kam pied gimed ko maruwel rok ma gimed ba fel’ u wan’. Ereray e bin riyul’ e liyor ni susun e ngam pied ngak Got.”​—Roma 12:1, 2.

⁴ Faan gad ra pi’ ngak Got e maligach nib thothup ma thingarda paged gelngin e tafinay ni nge gagiyegnagdad ma gathi pi n’en ni gad ba adag. Boor e girdi’ e kar uned ko ngongol ndarngal ya kar paged e pi n’en ni yi ba adag nge gagiyegnagrad! Machane gathi aram e dabda paged gadad ni ngad adaged ban’en; ya ra danga’ ma uw rogon ni rayog ni ngad daged ni gad ba falfalan’ ko pigpig ku Jehovah? Machane faanra gad ba adag ni nge m’ug waamngin e kan ni thothup ngodad ma gathi pi n’en ni yima ar’arnag, ma aram e thingarda piliyeged e lem rodad nge puluw ko lem rok Kristus.​—Galatia 5:22, 23; Filippi 2:5.

Yafas nib Thothup, Puluwoy nib Thothup

5. Mang fan ni i nang Peter nib t’uf ni ngan par nib thothup?

⁵ Mang fan ni kari nang Peter ni ba t’uf ni nge par e Kristiano nib thothup? Ya ke nang ni kan pi’ puluwon nib thothup ni nge biyuliy e girdi’. I yoloy ni gaar: “Ya gimed manang e n’en ni kan pi’ nga puluwmed ni fan e ngan pithigmed u pangimed nib m’ay fan ni af ngomed rok pi chitamangimed ni kakrom. Gathi ban’en nrayog ni nge kireb, ni bod rogon e silber ara gol; rachaen Kristus ni map’ ni baga’ fan e ir ke pithigmed u pangimed nib m’ay fan, ni pi’ ir ni bod ba pifak e saf ndariy bang u dow nib kireb ara ba alit.” (1 Peter 1:18, 19) Arrogon, Jehovah ni ir Tapgin e tin nib thothup ban’en e ke l’og Fak ni maagirag rok, ni “fa En nib Thothup” nga fayleng ni nge pi’ puluwon fare biyul’ ni ra bing e kanawo’ ni nge fel’ thilin Got nge girdi’.​—John 3:16; 6:69; Exodus 28:36; Matthew 20:28.

6. (a) Mang fan nib mo’maw ni ngad ngongolgad nib thothup? (b) Mang e ra ayuwegdad ngad thothupgad?

⁶ Machane thingarda nanged ni de mom ni ngan par nib thothup u fithik’ e fayleng nib kireb rok Satan. Ya ma tay e wup ni fan ko tin riyul’ e Kristiano, ni yad be athamgil ni ngar pared u lan e re m’ag rok ney. (Efesus 6:12; 1 Timothy 6:9, 10) Pi n’en ni ma diliiy lanin’uy ni maruwel, nge togopuluw ko girdien e tabinaw, nge moning ni yibe tay u skul, nge towasar ko taab yangar, ma bochan e pi n’ey ma ba t’uf ni ngan par nib gel ko tirok Got ban’en ni fan ni ngan par ni yib thothup. Re n’em e ma ga’nag fan ni ngan fil e Bible ma ngan un ko pi muulung ko Kristiano u gubin ngiyal’. I fonownag Paul Timothy ni gaar: “Dab mpag fapi thin nib riyul’ ni kug fil ngom, ya ir e nguum fol riy, mu um par u fithik’ e michan’ nge t’ufeg ni ma yog ngodad ko taab girdi’ ni gadad ma tay Kristus Jesus.” (2 Timothy 1:13) Gad ma rung’ag e pi thin nem nib riyul’ u lan e Kingdom Hall ma nap’an ni gad ma fil e Bible. Rayog ni nge ayuwegdad ngad ngongolgad nib thothup u gubin e rran ngu boor ban’en ni ma buch.

Ngongol nib Thothup u Lan e Tabinaw

7. Susun uw rogon e par u tabinaw rodad ni bochan e thothup?

⁷ Faani weliy Peter e thin ni bay ko Levitikus 11:44 me fanay fare bugithin ni Greek ni hági·os ni ma sor fan ko “par nib dar ko denen me ere kan pi’ ngak Got mab machalbog.” (An Expository Dictionary of New Testament Words, by W. E. Vine) Susun uw rogon nib l’ag e re n’ey ngodad ko par ko Kristiano u tabinaw? Dabi siy ni susun ni nge par e tabinaw ni bay e t’ufeg riy ya “Got e t’ufeg.” (1 John 4:8) T’ufeg ni ma pag fan e wod e oil fa grease ni ma n’igin ni nge m’ur m’ur rogon thilin e piin mabgol nge thilin e piin gallabthir nge piin bitir.​—1 Korinth 13:4-8; Efesus 5:28, 29, 33; 6:4; Kolose 3:18, 21.

8, 9. (a) Uw rarogon boch e tabinaw ko Kristiano? (b) Mang fonow ni bay ko Bible u morngaagen e re n’ey?

⁸ Sana gad be lemnag ni t’ufeg ni aram rogon e mmutrug ni ba’ ko tabinaw ko Kristiano. Machane boch e tabinaw ko Kristiano e dariy e t’ufeg riy ni aram rogon. Sana be m’ug riy ni aram rogon u Kingdom Hall machane mom ni nge war e ngongol nib thothup u tabinaw. Ya sana yira pag talin ni ani leengiy e ir reb e walag ni ppin ni Kristiano fa ani figirngiy e ir e walag ni pumoon (nge sana ir e ministerial servant fa piilal) ni yibe tay fan u Kingdom Hall. Yima k’aring e damumuw u tabinaw, ma rayog ni nge sum e tugthin nib gel. Ma sana bay l’agruw mit e par rodad. Ma rayog ni nge aw ni rogon thilin e ani figirngiy nge an leengin e de puluw ko Kristiano ya yow be par u fithik’ e wagey. Kan pag talin ni susun ngan par nib thothup u tabinaw. Ma sana rogon ni yad ma non e bod e girdi’ ko fayleng. Rib mom ni rayog ni nge yib e thin nib kireb u l’uguney!​—Proverbs 12:18; mu taarebnag ko Acts 15:37-39.

⁹ Machane ke yog Paul ni gaar: “Dab umogned e thin nib kireb [Greek, lo΄gos sa·pros΄, “thin nib alit,” ere de thothup] ku be’. Ke mus ni thin nra ayuweg be’ e nggu mogned, ni fa mit nem e thin ni ma fonownag e girdi’ me yib fan ngorad, fan e tin ni nga mogned e nge rin’ e tin nib fel’ ban’en ngak e piin ni kar motoyilgad ngomed.” Ma pi thin nem e ma sor fan ko urngin e girdi’ ko tabinaw ni yad ma motoyil ngomed, nib muun ngay e piin bitir.​—Efesus 4:29; James 3:8-10.

10. Uw rogon nrayog ko piin bitir ni ngar thothupgad?

¹⁰ Ma re fonow ney u morngaagen e par nib thothup e ku bay fan ko piin bitir ko tabinaw ni Kristiano. Rib mom rorad ni ngar sulod u skul mi yad folwok rok e pi bitir nu fayleng ni yad ma yog e thin nib togopuluw ma der ma tay fan e gallabthir! Gimed e bitir e dam mu sor ko lem ko pi pagal ni ur t’ared e thin nga daken e profet rok Jehovah ma bay boch e girdi’ ni aram rogon ko ngiyal’ ney ni yad ma yog e thin nib kireb. (2 Kings 2:23, 24) Susun dab kum nongad ni bod e girdi’ ko ngiyal’ ney ni yad ma yog e thin nib kireb ya yad malmal ma dar tafinaynaged e yugu girdi’ ma ar fan ni dabra nonod nib fel’ rogon. Gadad e Kristiano e susun ni nga udogned e thin nib thothup, mab fel’, ma ma ubingey, mab gol, ma wod ni “kan fl’eg lamen ara kan ta’ e sol nga’.” Susun ni gad ba lingagil ni bochan.​—Kolose 3:8-10; 4:6.

Ngongol nib Thothup Ngak Girdien e Tabinaw ni De Taareb e Michan’ Rorad

11.Mang fan ni par nib thothup e dariy rogon ko ngongol nib mat’aw nib pag rogon?

¹¹ Gad ma tiyan’dad ni ngad ngongliyed e ngongol nib thothup, machane susun dabi pag rogon ni ra m’ug riy ni gad ba tolang mab mat’aw ko yugu boch e girdi’, ma ri aram rogon ko ngongol rodad ngak girdien e tabinaw ni de taareb e michan’ rorad. Ngongol ko Kristiano nib gol ngorad e susun ni nge ayuwegrad ngar guyed ni gad ba thil, ya gad ma dag e t’ufeg nge runguy, ni bod fa cha’ nu Samaria ni bay ko fanathin ku Jesus.​—Luke 10:30-37.

12. Uw rogon nrayog ko piin mabgol ni Kristiano ni ngar n’igined ni nge adag e ani mabgol rorad e tin riyul’?

¹² I tamilangnag Peter fene ga’ fan ni nge puluw e lem rodad ko girdi’ rodad ni de taareb e michan’ rodad ya ke yoloy ngak e pi Kristiano ni yad e piin leengiy ni gaar: “Ma ku er rogomed e pi leengiy nthingar um folgad rok pi figirngimed, ni fan e faanra ba’ boch i yad ndawori mich e thin rok Got u wan’rad ma rayog ni nge mich u wan’rad ni bochan pangimed. Ma aram e dakuriy fan bbugithin ni nga mogned ngorad, ya bay ra guyed rogon feni machalbog pangimed nge rogon ni gimed be ta’ farad.” An leengiy ni Kristiano (nge ku an figirngiy) e rayog ni nge n’igin nge adag e ani mabgol rok ni dawori mich e tin riyul’ u wan’ ni faanra ba machalbog e ngongol rok, ma ma lemnag e ani mabgol rok ma ma tay fan. Ere thingari m’ag e schedule rok ko tin ni theocratic ban’en ni fan ni dabi kireban’ e ani mabgol rok me lemnag ndan tafinaynag.a​—1 Peter 3:1, 2.

13. Uw rogon nrayog ko piin piilal nge piin ministerial servant ni ngar ayuweged e piin mabgol ndawori mich e tin riyul’ u wan’rad ni ngar adaged e tin riyul’?

¹³ Piin piilal nge pi ministerial servant e rayog ni ngar ayuweged e piin mabgol ni faanra yad ra mada’ e ani figirngiy ni dawori taareb e michan’ rorow. Aram rogon ma rayog ni nge guy ni Pi Mich e yad bogi girdi’, nib fel’ pangirad ma boor ban’en ni yad ba adag, ma gathi ke mus ni tin nu Bible e yad ma weliy morngaagen. Bay reb e piilal ni ke non ngak reb e figirngiy u morngaagen e fita’. Ma aram mar fagergow. Munmun ma re figirngiy nem e ke un ko publisher. Maku immoy reb e figirngiy ni dawori mich e tin riyul’ u wan’ ma ba adag e pi arche ni canary. Piin piilal e dar paged. Bagayad e ke fil morngaagen e re mit e arche nem ni fan ni nge sabethinnag e re pumoon nem u morngaagen! Ere ra nge par be’ nib thothup ma gathi be yog ni thingari par ni kari mus ni taa ban’en ni be lemnag u gubin ngiyal’.​—1 Korinth 9:20-23.

Uw Rogon Nrayog Ni Ngad Pared ni Gad Ba Thothup u Lan e Ulung?

14. (a) Mang e ma rin’ Satan ni nge kirebnag e ulung? (b) Uw rogon nrayog ni ngad siyeged e wup rok Satan?

¹⁴ Satan ni Moonyan’ e ir e tagathibthib, ya ngochol ku Moonyan’ nthin nu Greek e di·ábo·los ma fan e re thin nem e “en ni ma yog thibngin be’” fa “tagathibthib.” Rib salap e cha’ nem ni nge gathibthibnag be’ ma ma guy rogon ni n’igin e re n’em u lan e ulung. Ri ba adag e dugdugthin. Gad ma pag ni ngad rin’ed e tin ba adag ngad uned ko re ngongol ney nde thothup fa? Uw rogon nrayog ni nge buch? Faanra gad ra tabab e dugdugthin fa gad ra yog ngak be’ fa gad ra motoyil ngay. Bay e thin ni gonop ko proverb ni begaar: “Be’ ni ma sakathkath e ma k’aring e togopuluw, ma be’ ni tagathibthib e ma n’igin ni nge dar e girdi’.” (Proverbs 16:28) Mang e ra ayuweg ndabkun dugdugthin ma dabkun thibthibnag be’? Susun ni ngad guyed rogon ni pi n’en ni gad ma yog e ma ubingey, ma bay ko t’ufeg. Faanra gad ra gayiy felngin e pi walagdad ma gathi thibngirad, ma aram ma gubin ngiyal’ ma ra fel’ e sabethin rodad mab spiritual. Mom ni ngan t’ar e thin nga daken be’. Ma be’ ni ma weliy ngom u morngaagen yugu girdi’ e sana ku be weliy u morngaagem ngak e girdi’.​—1 Timothy 5:13; Titus 2:3.

15. Mang boch felngin Kristus e ra ayuweg urngin e girdi’ ko ulung ngar thothupgad?

¹⁵ Ra nge par e ulung nib thothup, ma ba t’uf laniyan’ Kristus rodad, ma goo gad manang ni bin th’abi ga’ felngin e t’ufeg. Ere i fonownag Paul yu Kolose ni ngar folgad rok Kristus mar runguyed e girdi’ me gaar: “Gimed girdien Got, ya gimed ba t’uf rok ma ke dugliymed ni ngam manged girdien; aram fan ni runguy, nge gol, nge sobut’an’, nge sumunguy, nge gum’an’ e thingar mon’ed nga dakenmed nge mang mad romed . . . , mu um n’igied fan u wan’med e n’en ni rin’ e bigimed ngak bigimed . . . Nge rogon nib t’uf Got nge girdi’ romed e ngam puthuyed nga urngin e pi n’ey, ni ir e ma chugumiy urngin ban’en nga taabang nge par ni ke fel’ rogon.” Miki gaar: “Ma gapas ni ma pi’ Kristus nga lanin’dad e nge mang ir e ngi i gagiyegnag gumercha’med.” Dabi siy ni faanra gad ra n’ag fan ni aram rogon, ma rayog ni nge par e ulung ni yib taareb mab thothup.​—Kolose 3:12-15.

Rogon ni Gad ba Thothup e Ma M’ug Riy u Lan e Binaw Fa?

16. Mang fan ni liyor nib thothup rodad e susun ni ku aram e liyor nib falfalan’?

¹⁶ Ma uw rogon e piin bugul yoror rodad? Uw rogodad u wan’rad? Gad ma dag e falfalan’ ko tin riyul’, fa be m’ug u owchedad ni kayigi tomal gilbadad? Faanra gad ba thothup ni bod Jehovah nib thothup, ma susun ni ba tamilang e re n’em ko thin nge ngongol rodad. Susun ni rib gagiyel ni liyor rodad nib thothup e aram e liyor nib falfalan’. Mang fan? Ya Jehovah ni Got rodad e aram e Got nib falfalan’, ma ba adag ni nge felan’ e piin ni ma liyor ngak. Ere ke yog e psalm u morngaagen e girdi’ rok Jehovah kakrom ni gaar: “Rib falfalan’ e piin ni Jehovah e Got rorad!” Gad ma dag e falfalan’ ni aram rogon fa? Ma bitir rodad e ma dag ni yad ba falfalan’ ni ngar uned ko girdi’ rok Jehovah u Kingdom Hall nge assembly fa?​—Psalm 89:15, 16; 144:15b.

17. Mang e rayog ni ngad rin’ed ni ngad pared nib thothup mab thabthabel?

¹⁷ Ku rayog ni ngad daged ni gad ba thothup rogon nib thabthabel ko ayuw ni gad ma pi’ nge gol ni gad ma dag ko girdi’ ni migid ngodad. Yu ngiyal’ ma ba t’uf ko girdien e binaw ni ngar maruwelgad u taabang ko klin, ma boch e nam ma yad ma fl’eg e kanawo’. Maku gad be dag ni gad ba thothup ni faanra gad ra ayuweg e milay’ rodad nge yard, nge yugu boch e binaw rodad. Faanra bay e dow u but’ fa gad ba lldo’ fa wagey yaan e tabinaw rodad, ma sana bay boch e karro ni ke kireb riy ma be guy e girdi’, ma rayog ni nga dogned ni gad be tay fan e piin bugul yoror rodad fa?​—Revelation 11:18.

Par nib Thothup u Tabon e Maruwel ngu Skul

18. (a) Mang e magawon ko piin Kristiano ko ngiyal’ ney? (b) Uw rogon nrayog ni ngad pared ni gad ba thil ko fayleng?

¹⁸ I yoloy apostal Paul ngak e pi Kristiano u Korinth ni fare mach nde thothup ni gaar: “U lan fa gi babyor ni kug yoloy ke yib ngomed e ku gog ngomed riy ndab um chaggad ngak e piin ni yad be ngongliy e ngongol ko darngal. Gathi piin ndar nanged Got e gu be yog morngaagrad ni yad be ngongliy e ngongol ko darngal, ara yad ba chogow, ara yad be th’ab e motochiyel ara yad be ta’ fan ma yad be meybil ngak e liyos ni ma meybil boch e girdi’ ngay. Ya faanra ngam guyed rogon ndab mu chaggad ngorad me ere ngam chuwgad u roy u fayleng.” (1 Korinth 5:9, 10) Aram ba magawon ko piin Kristiano ya gubin e rran ma thingara uned ko girdi’ ni ma un ko ngongol nde yalen. Re n’ey e ma skengnag e yul’yul’ ma baga’ ni aram rogon u yu yang ni dariy e kireb riy ni ngan un ko ngongol nib puwlag, nge sasalap, ma dariy e yul’yul’. U yu yang ni aram rogon ma dabda thiliyeged e gafarig rodad ni fan ni nge felan’ e girdi’ ngodad. Danga’ ya ngongol rodad ni Kristiano nib thil mab gol e susun ni nge taydad ni gad ba lingagil ngak e piin nib gonop ma ba t’uf rorad e tirok Got ban’en ma yad be gayiy e fel’.​—Matthew 5:3; 1 Peter 3:16, 17.

19. (a) Mang boch e skeng ni ma yib ngomed ni gimed e bitir u skul? (b) Mang e rayog ni nge rin’ e piin gallabthir ni ngar ted tanggin e pi bitir rorad nge ngongol rorad nib thothup?

¹⁹ Ku arrogon ni bay boor e skeng ni ma yib ko bitir rodad u skul. Gimed e gallabthir e gimed ma un ko skul ko bitir romed fa? Kam nang ko uw rogon e re skul nem? Ke puf e thin u thilmed e pi sensey fa? Mang fan nib baga’ fan e pi deer ney? Ya boor e mach u fayleng ma skul e aram e gin nib sug ko wadmang, nge drug, nge ngongol ndarngal. Ere uw rogon nrayog ko pi bitir romed ni ngar pared nib yul’yul’ mab thothup e ngongol rorad ni faanra gallabthir rorad e dar ted tanggirad? Ar fan ni i fonownag Paul e piin gallabthir ni gaar: “Gimed e gallabthir e yugu dabi pag rogon e puwan’ ni nguum tiyed ngak pi fakmed ngam k’aringed e damumuw ngorad, ya ri mulan’rad.” (Kolose 3:21) Rogon ni ma k’aring e gallabthir e puwan’ ko bitir e faanra dar athamgilgad ni ngar nanged fan e pi magawon nge skeng ni ma yib ngorad. Rogon ni ngan fl’eg rogon e bitir nge gel ko skeng ko pi n’en ni ma wawliyrad u skul e ngan par rogon e Kristiano u tabinaw min mon’eg e tirok Got ban’en.​—Deuteronomy 6:6-9; Proverbs 22:6.

20. Mang fan nib t’uf ni ngad thothupgad?

²⁰ Ere mang fan nib baga’fan ni ngad pared nib thothup? Ya ma ayuwegdad ko pi n’en ko fayleng rok Satan nge lem rok. Maku aram ba flaab e chiney iyan nga m’on. Ya ma ayuweg nge mudugil u wan’dad e yafas ni aram e bin riyul’ e yafas ni bay u lan e fayleng nib biech mab mat’aw. Ma ma ayuwegdad ngad pared ni gad e Kristiano nib thabthabel, ma nge adag e girdi’ dakendad, mab fel’ thildad yugu girdi’​—ma gathi kayigi pag rogon e ngongol rodad. Ere ma ayuwegdad ngad boded Kristus.​—1 Timothy 6:19.

[Boch e Thin nra Tamilangnag Murung’agen]

Ka Ga Manang?

◻ Mang fan ni ke fonownag Peter e pi Kristiano u morngaagen e thothup?

◻ Mang fan ni de mom ni ngan par nib thothup?

◻ Mang e rayog ni ngad rin’ed ni ngad mon’ognaged e thothup u lan e tabinaw?

◻ Ra nge par e ulung nib thothup, ma mang ngongol nde thothup ni thingarda siyeged?

◻ Uw rogon nrayog ni ngad pared nib thothup u tabon e maruwel ngu skul?

[Sasing ko page 26, 27]

Gad e Pi Mich Rok Jehovah ma susun ni ngad falfalan’gad ko pigpig ku Got nge yugu boch ban’en ni gad ma rin’