Ngan Pi’ E Ayuw U Fithik’ E Tin Ni Kan Gothey

DABI SIY ni yima tay fan e maruwel ni ke tay e girdi’ ni ngar ayuweged yugu girdi’ ko ngiyal’ ni bay e yoko, durru’, ara yugu reb e magawon. Boor e ayuw ni kan pi’ ni fan ni nge ayuweg i toy e naun rok e girdi’, min sulweg girdien e tabinaw nga taabang biyay, maku bin ni baga’fan riy e kan ayuweg e pogofan rok e girdi’.

Faani m’ug reb e magawon, Pi Mich Rok Jehovah e yad ma tay fan e ayuw ni yima pi’​—ma yad ma fanay e ayuw ni ma pi’ e am. U taab ngiyal’, be weliy e Bible nib mil fan ngorad ni ngar “ngongliyed e ngongol nib fel’ ngak . . . e piin ni kad manged girdien e tabinaw rok Got u fithik’ e mich u wan’uy ngak Kristus.” (Galatia 6:10) Arrogon, ma lemnag e Pi Mich Rok Jehovah ni yad taareb e girdi’; ya yad ma lemnag ni yad girdien taareb e “tabinaw.” Aram fan ni ra bagayad ma ra yog ngak bagayad e “brother” ara “sister.”​—Mu taarebnag ko Mark 3:31-35; Filemon 1, 2.

Ere faani m’ug e yoko’ ara yugu reb e magawon me gafgownag e girdi’ u lan e binaw, ma ra athamgil e piin ni piilal ko Pi Mich Rok Jehovah ni ngar nanged salpen ra reb girdien e congregation rorad mar nanged e tin nib t’uf rorad mar yarmiyed rogon ni ngan pi’ e ayuw ngorad. Aram rogon u Accra, Ghana; u San Angelo, U.S.A.; ngu Kobe, Sapan.

Accra​—“Bod Nap’an Noah”

Ke tabab ni nge aw e n’uw ni gonap’an 11 o’klok ni nep’, me aw nib gel ko in e awa. Ke yog John Twumasi, ni ir reb e Mich Rok Jehovah u Accra ni gaar: “Kari aw e n’uw ni rib gel ni de yog rok gubin girdien e tabinaw rog ni nge mol.” Ke yog e Daily Graphic ni ngiyal’ nem e “Bod Nap’an Noah.” Me ulul John ni gaar: “Kug guyed rogon ni nggu feked boch e chugum nib tolang puluwon ko thal ni lang e naun, machane faan gu bing e mab ko tawo’ ni nggu warod ngaram, ma aram me yib e ran riy.”

Ke ginang girdien e am ni nge chuw e girdi’ ko tabinaw rorad machane boor e girdi’ ni dar folgad, ya kar rusgad ni faanra dariy be’ u lan e naun​—ni mus ni ke sug e naun ko ran​—ma ra yib e moro’ro’. De yog ni nge chuw boch e girdi’ ni yugu aram rogon ni m’agan’rad ngay. Ke yog reb e ppin ni Paulina fithingan ni gaar: “De yog ni nggu bingew e chitinag e mab. Ki yib e ran nga lang, me ere kug sak’iygow u daken e drom kang ni kan ngongliy ko ren mu gu kolew e ren u tan e chigiy. Munmun, ma gonap’an lal e klok ni kadabul, me yib e girdi’ ni ma par ni migid ko tabinaw romow ni ngar ayuweged gamow.”

Ngiyal’ nrayog me tabab e Pi Mich Rok Jehovah ni ngar maruwelgad. Ke weliy reb e Kristiano ni ppin ni Beatrice fithingan ni gaar: “Ke yib e piin ni piilal ni ngar gayed gamad, ma kar pirieged gamad u reb e tabinaw ko yugu reb e Mich Rok Jehovah, ni aram e gin ndariy e riya’ riy. Dalip e rran u tomren ni ke tharey e ran e binaw, me yib e piin ni piilal nge boch e piin ni fel’ yangaren ko congregation mar chuweged e bar ni immoy u wen nge u lan e naun romad. Ke pi’ e Watch Tower Society e sop, falay, machaw, bet, gulgul, mad, nge mad ko bitir ngomad. Me pi’ e pi walagmad e ggan ngomad nge gaman in e rran. Kari k’aring e pi n’en ney e falfalan ngog!

Me reportnag John Twumasi ni gaar: “Kug gog ngak e girdi’ ni ku yad ma par u lan e naun ni gu ma par riy ni ke pi’ e Society romad e sop nge falay ngomad​—ni ba gaman ni ngan biechnag ga’ngin e naun romad. Gonap’an 40 e girdi’ ni kar ayuweged gamad ko klin. Ere kug pi’ boch e sop ngak e girdi’ ni yad ma par u lan e naun ni gu ma par riy, nib muun reb e pumoon ni ir reb e prist ko galesiya rok. Ke oloboch e tafinay ko girdi’ ni gamad ma maruwel u taabang u tabon e maruwel ya kar lemnaged ni ma dag e Pi Mich Rok Jehovah e t’ufeg ngak go’ girdi’ rorad.”

Ri ke pining e pi Kristiano ni pumoon nge ppin e magar ko ayuw ni kan pi’ ngorad. Ke gaar brother Twumasi: “Yugu aram rogon ni kab tolang puluwon e tin ni ke mul u pa’mad ko ayuw ni kan pi’ ngomad, machane bochan e t’ufeg ni ke dag e Society ni ke pi’ e ayuw ngomad, gamad e tabinaw rog e gamad be lemnag ni kab boor ban’en ni ke yog ngomad ko pi n’en ni ke mul u pa’mad.

San Angelo​—“Bod Lingan Tomuren e Fayleng”

Ke gel e nanyor u San Angelo ko May 28, 1995, ma aram me thig e pi gek’iy, me thig e pole ko gamig, me par e seng ni ka bay e gamig riy u but’. Gelngin e nifeng e ke gaman 100 miles per hour, me kirebnag tafen e gamig. Ke pag 20,000 e tabinaw ndariy e gamig riy. Ke aw e ice nga but’. Ke reportnag e National Weather Service ni ga’ngin e ice e bod e bat ni kan nog e “golf ball” ngay, ma aram me aw e ice ni ga’ngin e “softball” nge mu’ me aw e ice ni bod ga’ngin e gurgur ni kan nog e “grapefruit” ngay. Ri ba gel lingan e ice ni ke mul nga but’ ndabiyog ni ngan rung’ag ban’en. Yog reb e girdi’ u lan e binaw ni gaar; “Bod lingan tomren e fayleng.”

Nge m’ay e lang ma aram me mocha’ gubin ban’en ndariy lingan’ ban’en riy. Ke yib e girdi’ nga wen ni sasagaal ni fan ni ngar guyed e n’en ni ke buch. Pi gek’iy ni ka bay e dakuriy yuwan. Pi naun ni ka bay e bod yaan e gamanman ni kan chuweg keru’. U yu yang e binaw me aw e ice ni ke gaman dalip e feet toarngin. Boor ni boor e winda ko naun nge karro e ke pil u nap’an e lang, me ere rayog ni ngan guy e therek ni pilpil ni be galgal ramaen u fithik’ e ice u but’. Yog reb e ppin ni gaar: “Faan gu taw ko naun rog, kug par u lan e karro rog mu gu yor. Kari kireb e magothgoth ni kug guy ni ke magawonnag lanin’ug.

Papey ni ke pi’ e ulung ni kan nog e relief program ngay nge aspital e ayuw ko salpiy, taflay, palang ko naun, nge fonow ni fan ko girdi’. Yugu aram rogon ni ke gafgow boor e girdi’ ni bochan e lang machane kar athamgilgad ni ngar ayuweged yugu boch e girdi’.

Maku ke maruwel e pi congregation ko Pi Mich Rok Jehovah nib papey. Ke reportnag Aubrey Conner ni ir reb e piilal u San Angelo ni gaar: “Chi ngiyal’ nem ni ke m’ay e lang, ra bagamad ma ke dengwanag bagamad ni nggu nanged salpen e girdi’. Kug ayuweged e girdi’ romad nge yugu girdi’ ngathi yad e Pi Mich Rok Jehovah ni ngar ted e palang ko winda rorad, mar ted e plastic ni nge opunguy e naun, mar guyed rogon ni dabi yib e n’uw nga lan e naun u rogon nrayog rorad. Ma aram kug fl’eged e report ko ra reb e girdi’ ko congregation ni kan kirebnag e naun rorad. Gonap’an raay e naun ni ba t’uf ni ngan fl’eg, ma de gaman e palang nge chugum ni ke pi’ e ulung ni kan nog e relief agency ngay. Ere kug chuwiy’ed e palang nge boch e chugum ni fan ko naun mu gu yarmiyed e maruwel. Gonap’an 250 e Pi Mich Rok Jehovah ni kar bad ni ngar ayuweged e maruwel u gubin e Sabado nge Madenom ni ke gaman 1,000 e girdi’ ni gubin. Boch i yad e kar milekaggad ko 460 e mayul. Ma yad gubin e kar maruwelgad nib el mirin ko yafang ni 100 e degree gawelngin. Mus ko reb e walag ni ppin ni 70 e duw rok e ke ayuwegmad u gubin e wik, ni ke mus taareb e wik ni de yib, ya aram e ngiyal’ ni kan fl’eg e naun rok. Rofen nem me yan nga daken e chigiy ko naun rok me ayuweg e maruwel riy!

“Baga’ ni kugu rung’ag e thin ni bod e tiney, ‘Gathi ra fel’ ni faanra yugu reb e teliw e ra yodor ni fan ko girdi’ rorad?’ Kan pug e tafinay rok e girdi’ ko binaw ya kar guyed ni ke yib 10 ara 12 e girdi’ (nib muun ngay e pi ppin) nga reb e tabinaw rok e Pi Mich Rok Jehovah ni kakadabul ni Biernes ni fan ni ngar fl’eged e naun ara mus ni ngar thiliyeged e chigiy ni polo’ ni yugu aram rogon ndariy puluwrad. Baga’ ni ke m’ay e maruwel ko reb e Sabado nge Madenom. Yu ngiyal’ ma be maruwel girdien e business ni ngar thiliyeged e chigiy ko reb e naun ma ra yib e pi walagmad nga reb e naun ni migid ko re naun nem. Gamad ra chuweg e chigiy ni immoy u daken e naun mu gu ted e tin biech ngay maku gamad ra klinnag e dow u but’ ma ra m’ay e maruwel romad u m’on rorad. Yu ngiyal’ ma yad ra pag e maruwel rorad ni fan ni ngar guyed gamad ni gamad be maruwel!”

Mi yog Brother Conner ni gaar: “Ra kireban’mad ko maruwel nge sabethin ni kug ted u taabang ko ngiyal’ nra m’ay e maruwel. Ra bagamad ma ke chugur ngak bagamad ya kan dag e t’ufeg u fithik’ e pi walag u rogon ndan rin’ biyay. Gamad be lemnag ni aram rogon u lan e bin nib biech e fayleng rok Got, ya ra reb e walag ni pumoon nge ppin e ra ayuweg bagayad ni bochan ni ba riyul’ ni yad baadag.”​—2 Peter 3:13.

Kobe​—“Kan Kirebnag e Ren, Plaster nge Dowef ko Girdi’”

Susun ni ke par e girdi’ u Kobe ni kar ted talperad. Ya gubin e duw ko September 1 ma yima fl’eg reb e madenom ni kan nog e Disaster Prevention Day ngay. Pi bitir u skul e yad ma practicenag rogon e n’en ni ngar rin’ed ni faanra m’ug reb e durru’, ma ma practicenag e salthaw rogon ni ngar fanayed e helicopter ni ngar ayuweged e girdi’, ma girdien e fire department e ma fanay reb e masin ni ma rurug reb e naun ni bod rogon e durru’, ma ra par e girdi’ u lan e re naun nem ni ngar practicenaged rogon ni ngar rin’ed ko ngiyal’ ni ra m’ug e durru’. Machane faani m’ug e durru’ ko January 17, 1995, me m’ug ni ke m’ay fan urngin e practice. Bokum biyu’ e chigiy ko naun e ke mul nga but’​—ni aram ban’en nde buch u lan e naun ni ke rurug e masin. Kan pingeg e pi train; yu yang e kanawo’ ko karro ke yan nga bang; ke pil e pi pipe ko gas nge ran; ke puth e pi naun ni bod ni kan toy ko kes. Ke weliy e Time magazine ni aram e gin ni “kan kirebnag e ren, plaster nge dowef ko girdi’.”

Ma aram me yib e nifiy. Ke yik iyan e pi naun ko ngiyal’ ni ke kankanan’ girdien e fire department ya dabiyog ni ngar tawgad ngaram ya kar pired u fithik’ boor e karro u kanawo’ ma de yog e yan rorad. Girdi’ ni ke taw ko nifiy e baga’ ni kar pirieged ndariy e ran ya ke kireb e pipe ko mach. Yog girdien e am ni gaar: “Ba marus e bin som’on e rran. Dariy ba ngiyal’ ni kug par ni aram rogon ndabiyog ni nggu ayuweg e girdi’, ya kug nang ni ke par boor e girdi’ u lan e pi naun rorad ni ke puth ma be yik. Maku gu nang ndariy ban’en nrayog ni nggu rin’ ni nggu ayuwegrad.”

Gonap’an 5,000 e girdi’ ni kar m’ad, ma gonap’an 50,000 e naun ni ke puth. Ke mus ni immoy taareb guruy u dalip guruy e ggan nib t’uf rok e girdi’ u Kobe. Ra nge yog ngak e girdi’ boch e ran ma kar linged e ran nib alit u but’ ni ke map’ ko pi pipe ni ke ming. Boor e girdi’ ni kar ranod nga tafen e ayuw ma kan pi’ boch e ggan ngorad, ni ra be’ ma ke mus taareb e musubi ni kan pi’ ngak u gubin e rran. De n’uw nap’an ma de felan’ e girdi’ ngay. Ke gungun reb e pumoon: “De rin’ e am ban’en ni fan ni nge ayuwegdad. Faanra ud pagedan’dad ngorad ma gad ra yim’ ko bilig.”

Ke yarmiy e pi congregation ko Pi Mich Rok Jehovah u Kobe nge boch e congregation nib chuchugur ko re mach nem e ayuw. Reb e pilot ko helicopter ni ke guy e maruwel ni kar ted e ke gaar: “Kug wan e ngaram ko fa bin som’on e ran ni ke m’ug e durru’, mu gu par u rom ko taareb e wik. Faan gu taw nga tafen e ayuw, ma kug guy ni ba wagey gubin ban’en. Dariy e ayuw ni kan pi’ riy. Ke mus e Pi Mich Rok Jehovah e ke yan nib pay me ayuweg reb i ban’en nge reb.”

Immoy boor e maruwel ni thingar ni rin’. Kan reportnag ni ke kireb ragag e Kingdom Hall, ma ke pag 430 e pi Mich Rok Jehovah ndariy e naun rorad. Maku immoy 1,206 e naun ni ba t’uf ni ngan fl’eg. Ma dawori m’ay e magawon riy ya ba t’uf ni ngan fl’eg laniyan’ girdien e tabinaw ko 15 e Pi Mich Rok Jehovah ni kar m’ad.

Gonap’an 1,000 e Pi Mich Rok Jehovah ko re nam nem ni kar ranod ni ngar ayuweged e maruwel u rom. Ke yog reb e walag ni gaar. “Faan gu fl’eged e naun ko pi Bible study ndawor ni taufenagrad ma baga’ ni yad ra fith, ‘Susun in puluwon e maruwel ni gimed be tay?’ Faan gu weliyed ngorad ni be pi’ e pi congregation puluwon e maruwel, kar pininged e magar ngomad ni ke lungurad, ‘Pi n’en ni kan fil ngomad e ke riyul’ e chiney!’”

Kan pug e tafinay rok boor e girdi’ ya ba papey ni ke maruwel e Pi Mich Rok Jehovah. Yog reb e pilot ni gaar: “Kari pug e tafinay rog. Ra bagamed ma ma pining e ‘brother’ nge ‘sister’ ngak bagamed. Kug guy rogon ni gimed ma ayuweg gimed; ri gimed taareb e tabinaw!’”

Ke fil e Pi Mich Rok Jehovah ban’en ni baga’fan ko re durru’ nem. Ya ke yog reb e walag ni ppin ni gaar: “Gubin ngiyal’ ni kug lemnag ni ra ga’ iyan reb e ulung ma ra mo’maw’ ni ngan ayuweg e girdi’ riy.” Machane ayuw ni kan pi’ ngak e ke thiliyeg e lem rok. Ya i gaar: “Chiney e kug nang ni be ayuwegdad Jehovah ma gathi ke mus e ulung ni be ayuweg machane ku be ayuweg ra reb e girdi’.” Machane, ka bay e bin riyul’ e ayuw ko gafgow nra yib nga m’on.

Dabi N’uw Nap’an ma Ra Yib e Bin Riyul’ e Ayuw!

Be sap e Pi Mich Rok Jehovah nga m’on ko ba ngiyal’ ndabi ngoch e pogofan nge par ko girdi’ ni bochan e yoko’, durru’, nge yugu boch e magawon. U lan e bin nib biech e fayleng rok Got, ran fil rogon ngak e girdi’ ni ngar maruwelgad u fayleng u taabang. Faani pag e girdi’ e ngongol nib siin, ma ra lich e magawon nra m’ug ngorad.

Maku, Jehovah Got​—ni Ani Sunumeg gelngin e fayleng​—e ra dugliy ni nge dabi par e girdi’ nge tin ni sunumeg u fithik’ e riya’ ni ke sum u gelngin e fayleng. Aram ba ngiyal’ ni ri ra paradis e fayleng. (Isaiah 65:17, 21, 23; Luke 23:43) Ma aram e ra lebug e pi thin ko Revelation 21:4 ni be gaar: “Bayi n’ag urngin e lu’ u owcherad. Ma aram e dab ku unim’, ma dab ki i kireban’uy, ma dab ku un yor, ma dab ku un amith. Ya tin kakrom ban’en e ke m’ay.”

[Sasing ko page 5]

Be dag Beatrice Jones (ba gilay) rogon ni kar koled pa’rad ni fan ni nga ranod u fithik’ e ran ni ke tharey e but’

[Sasing ko page 6]

Kan maruwel ni ngan pi’ e ayuw u tomren e nanyor