Nguun Lek E Gapas Rok Got U Lan E Tabinaw
“Gimed gubin e tabinaw ko girdi’, mu pininged e sorok ngak Jehovah, mpininged e sorok ngak nga feni flaab nge feni gel gelngin.”—PSALM 96:7, New World Translation.
1. Uw rarogon e tabinaw ni ke sunumiy Jehovah ko som’on?
NAP’AN ni ke m’ag Jehovah pa’row e bin som’on e pumoon nge ppin mar mabgolgow ni aram e ke tababnag e bin som’on e tabinaw u fithik’ e falfalan’ nge gapas. Ma rib falfalan’ Adam ma aram me yog e thin ni aram e bin som’on e poem ni gaar: “Ka fini yog be’ ni taareb rogomow, ni yil rok e ni fek ko yil rog. Ma ufin u dow e ni fek ko ufin u dowag. Ppin e nge mang fithingan, ya ni fek u fithik’ i dow e pumoon.”—Genesis 2:23.
2. Mang e ke finey Got ni fan ko mabgol ni gathi ke mus nra par pi fak ni girdi’ ni yad ba falfalan’?
2 Nap’an ni ke dugliy Jehovah e mabgol nge yaram ko tabinaw, ma gathi ke mus ni ke lemnag ni nge yog e falfalan’ ko girdi’. Ya ba adag ni ngar rin’ed e tin nib m’agan’ ngay. Yog Got ngak e gal nsom’on e girdi’ ni gaar: “Mu diyengow nge yoor pi fakmew, nge wer e piin ni owchemew nga gubin yang u fayleng ngar pired riy mi yad suwey. Nggu ta’mew ni gimew e ngam suweyew e nig, nge arche’, nge urngin e gamanman ni maloboch, ni tin ni baga’ nge tin ni ba achig.” (Genesis 1:28) Aram ba maruwel ni rib fel’. Faan manga ke rin’ e bin som’on e mabgol e tin nib m’agan Jehovah ngay ma aram e yad ra falfalan ni yad Adam, nge Efa, nge pi bitir ni yow ra diyennag!
3. Mang e ba t’uf ni nge rin’ e pi tabinaw ni ngar pared nib yul’yul’ ku Got?
3 Mus ko ngiyal’ ney ma baga’ e falfalan’ ko girdien e tabinaw u nap’an ni yad ma maruwel u taabang mi yad rin’ e tin nib m’agan’ Got ngay. Ma rib fel’ e n’en ni bay nga m’on ko pi tabinaw ni ma fol rok Got! Yoloy apostal Paul ni gaar: “Ngan yul’yul’ ku Got e ri baga’ fan u gubin ban’en, ya baga’ fan ko biney e tamilang nge binem e tamilang.” (1 Timothy 4:8) Pi tabinaw ni ma par nib yul’yul’ ku Got e yad ma fol ko thin rok Jehovah ma yad ma rin’ e tin nib m’agan’ ngay. Yad ma lek e gapas rok Got ma aram mi yad pirieg e falfalan’ ko “biney e tamilang.”
Ke Yib e Magawon u Lan e Tabinaw
4, 5. Mang fan ni ke magawon e tabinaw u gangin e fayleng?
4 Gathi gubin e tabinaw ma bay e gapas nge falfalan’ riy. Kan weliy e n’en ni fil ba ulung ni Population Council u lan fare The New York Times ni gaar: “U lan e pi binaw nib fel’ rogon nge pi binaw nib gafgow ma be thil iyan rogon e par u tabinaw.” Ma be’ ni ke yoloy boch e thin ko re ulung ney e ke gaar: “Yibe lemnag rogon e yaram ko tabinaw ma aram ba yaram ni en chitamangiy e ir e ma ayuweg e tabinaw ko tin nib t’uf rorad ma en ni chitinngiy e ma fl’eg laniyan’rad, machane aram ba lem ni bogi yat. Ya bin riyul’ riy e bay boor e chitinngiy ni dar mabgolgad, ma be yoor iyan e mabgol ni be dar, ma gubin yang u fayleng ma be lich iyan . . . oren e girdi’ u reb e tabinaw nge reb.” Bochan ni aram rogon ma bokum milyon e tabinaw e de mudugil, ma dariy e gapas riy, ma boor ni be dar. U Spain ma ke yoor oren e mabgol ni be dar ya 1 ko 8 e mabgol e be dar ni ka nap’an e tin ragag e duw ni tin tomren e duw ko fa bin 20 e chibog—ma 25 e duw faram ma ke mus 1 ko 100 e mabgol e ke dar. Yu England e tin th’abi yoor e mabgol ni be dar u Europe—ya 4 ko 10 e mabgol ni be dar. Ma ke yoor e tabinaw ni goo taareb e gallabthir ko re nam nem.
5 Ma boch e girdi’ e ri yad ba adag ni ngar dargad e ani mabgol rorad. Bay e tempel u Tokyo, Sapan ni ka nog e “Tempel ni Ngan Pithig e M’ag Pa’” ma boor e girdi’ ni be un ngay. Re tempel ney ni Shinto e ma ayuweg e piin ni yad ba adag ni ngar dargad ko mabgol rorad nge yugu boch e par ko girdi’. Ra yib be’ ni nge liyor ko re tempel nem ma ra yoloy e n’en ni ba adag nga daken bochi plang, min tining nga lang ko re tempel nem, ma ra yibilay ni ngan pi’ e fulweg ngak. Reb e simbung nu Tokyo e ke yoloy ni nap’an ni kan tababnag e re tempel nem raay e duw faram ma “pi leengin girdien e siyobay e ur yoloyed e meybil rorad nga but’ mi yad ning ni nge digey figirngiyrad e pi ppin ni yad be guy mar sulod ngorad.” Machane ngiyal’ ney ma baga’ ni yibe yibilay ni nge dar e mabgol, ma gathi ngan sulweg e mabgol nga rogon. Dariy e maruwar riy ni ke magawon e pi tabinaw u gangin e fayleng. Susun ni nge gin e pi Kristiano ko re n’ey fa? Danga’ ya be tamilangnag e Bible u morngaagen e magawon ko tabinaw e ngiyal’ ney.
Mang Fan ni Ke Magawon e Tabinaw?
6. Uw rogon nib l’ag e thin ko 1 John 5:19 ko pi magawon ni bay ko tabinaw e ngiyal’ ney?
6 Reb i fan ni ke magawon e pi tabinaw ko ngiyal’ ney e baaray ni: “Fayleng ni polo’ e ke suweyrad faanem nib kireb.” (1 John 5:19, NW) Mang e rayog ni ngad lemnaged nra rin’ faanem nib kireb ni Satan ni Moonyan’? Ir be’ nrib kireb, ma ta malulifith l’igin. (John 8:44) Aram fan ni ke sug e re fayleng ney ko sasalap nge ngongol ndarngal, ni aram e pi n’en ni ri ma kirebnag e par ko tabinaw! U wuru’ e ulung rok Got ma gelngin Satan e be guy rogon ni nge kirebnag e yaram ko mabgol me chuweg e gapas ko tabinaw ni aram e n’en ni sunumiy Jehovah.
7. Uw rogon nrayog ni nge kireb e tabinaw ko ngongol ko girdi’ ni be m’ug e ngiyal’ ney ko tin tomren e rran?
7 Ku reb i fan ni bay boor e magawon ko tabinaw ko ngiyal’ ney e bay ko 2 Timothy 3:1-5 (NW). Pi thin ni yiiynag Paul e be dag ni gad be par ko ngiyal’ ni “tin tomren e rran.” Dabiyog e gapas nge falfalan’ u lan e tabinaw nfaanra girdi’ riy e “ke mus ni yad e yad be lemnagrad, ma kari gel e chogow rorad, ma kar ufanthingad, ma ke tolangan’rad, ma yad ma yog e thin nib kireb ngak e girdi’, ma dab kur folgad rok e gallabthir rorad, ma dab kur pininged e magar ngak be’ u lanin’rad, ma dab kur yul’yul’gad, ma dab kur golgad, ma yad ba adag e tugthin, ma yad ma t’ar e thin nga daken e girdi’, ma dar k’adedan’rad, ma yad ba damumuw, ma yad ma dabuy e tin nib fel’, ma dabiyog ni nge pagan’uy ngorad, ma dariy fan e girdi’ u wan’rad, ma ba gelan’rad, ma yad ma lemnag ni baga’ farad, ma ba t’uf e fafel rorad me tomur Got u wan’rad; ma yad ma dake yad be liyor ngak Got, machane yad ma pi’ keru’rad nga gelngin.” Dabiyog ni nge falfalan’ e tabinaw nfaanra bagayad e der runguy e tin ni ka bay e girdi’ riy ara der yul’yul’gad ngorad. Ma uw rogon ni nge gapas e tabinaw nfaanra bagayad e ta damumuw ma ba adag e tugthin? Ma uw rogon ni nge gapas me falfalan’ e tabinaw nfaanra yad ba adag e fafel me tomur Got u wan’rad? Aram rogon e girdi’ ko re fayleng ney ni be gagiyegnag Satan. Aram fan ni dabiyog e falfalan’ ko tabinaw ko ngiyal’ ney ni tin tomren e rran!
8, 9. Mang wenegan e ngongol ko bitir ko falfalan’ u lan e tabinaw?
8 Maku reb i fan ni dariy e gapas nge falfalan’ ko tabinaw e bochan e ngognol ko bitir nib kireb. Nap’an ni weliy Paul u morngaagen rarogon e fayleng ko tin tomren e rran me yiiynag ni dabki fol e bitir ko gallabthir rorad. Faanra gur be’ ni gab fel’ yangaren, ma ga be ayuweg ni nge gapas ma nge falfalan’ e tabinaw rom ko ngongol rom fa?
9 Boch e bitir e de fel’ e ngongol rorad. Susun, reb e pagal e ke yoloy e babyor ngak e chitamangin ni gaar: “Faanra dab mu fekeg nggu un ngom nga Alexandria ma dab kugu yoloy e babyor ngom, ma dab kugu non ngom, ara gu fingichiyem, ma faanra ngam man nga Alexandria ma dab kugu kol paam ara gu pining e magar ngom biid. Aram e n’en nra buch nfaanra dab mu fekeg nggu un ngom. . . Machane wenig ngom mpi’ e [harp] ngog. Ra dab mu pi’ ma dab kuugu abich ma dab kuugu unum ban’en. Ri ra aram rogon!” Aram rogon ni ma non e bitir ko ngiyal’ ney fa? Machane re babyor nem e ke yoloy bochi pagal ngak e chitamangin u Egypt ni 2,000 e duw faram.
10. Uw rogon nrayog ni nge ayuweg e piin fel’ yangaren e tabinaw rorad ngar leked e gapas rok Got?
10 Rogon e lem ko re pagal nem nu Egypt e de ayuweg e gapas ko tabinaw rok. Machane kab kireb e pi n’en ni be buch ko pi tabinaw ko ngiyal’ ney ko tin tomren e rran. Machane gimed e piin fel’ yangaren e rayog ni mu ayuweged e tabinaw romed nguum leked e gapas rok Got. Uw rogon? Ngam fol ko re thin ko Bible ney: “Piin bitir, thingar um folgad ko thin rok e gallabthir romed ni gubin ngiyal’ nrogon girdien Kristus, ya ereray e n’en ni ba adag Got.”—Kolose 3:20.
11. Uw rogon nrayog ko pi gallabthir ni ngar ayuweged e bitir rorad ngar manged e pi tapigpig nib yul’yul’ ku Jehovah?
11 Ma uw rogon e piin gallabthir? Ngam ayuweg e pi bitir rom u fithik’ e t’ufeg ngar manged e pi tapigpig nib yul’yul’ ku Jehovah. Be yog ko Proverbs 22:6 ni gaar: “Mu fil ngak ba bitir rogon e ngongol ni ngi i tay, mi i par u wan’ u n’umngin nap’an e yafas rok.” Boor e piin pagal nge piin rugod e dar pied keru’rad ko kanawo’ nib mat’aw u nap’an ni kar ilalgad ya ke fil e gallabthir rorad e thin ko Bible ngorad mar ted e kanawo’ nib fel’. Machane baga’ fan ko uw fene fel’ nge uw urngin e fonow ko Bible ni yibe’ pi’ nge ku ma tor nga daken gumerchaen piin fel’ yangaren.
12. Mang fan ni susun ni ba gapas e tabinaw ko Kristiano?
12 Faanra urngin e girdi’ u reb e tabinaw e yad be athamgil ni ngar rin’ed e tin nib m’agan Jehovah ngay, ma susun ni bay e gapas rok Got rodad. Ba tabinaw ko Kristiano e susun ni ba sug ko ‘pi fager ko gapas.’ Luke 10:1-6 e be dag ni aram rogon ni be lemnag Jesus faani l’og fa 70 i gachalpen ngar machibnaged e girdi’ me gaar ngorad: “Ngiyal’ ni gimed ra yan riy nga lan reb e naun, e som’on e nge lungumed, ‘Nge yib e gapas ngak girdien e re naun ney.’ Ya faanra bay be’ riy nib t’uf e gapas rok, mi gimed pag e gapas ni ka mogned nge par u daken.” Nap’an ni be yan e pi tapigpig rok Jehovah u mit e tabinaw iyan u fithik’ e gapas mi yad wereg “fare thin nib fel’ u morngaagen e gapas,” ma aram mi yad gayiy e piin ni yad e fager ko gapas. (Acts 10:34-36; Efesus 2:13-18) Dabi siy ni susun ni ba gapas e tabinaw ko Kristiano ni bay e piin ni yad e fager ko gapas riy.
13, 14. (a) Mang e ke athapeg Naomi ni fan ku Ruth nge Orpah? (b) Susun miti mang tagil’ e toffan e tabinaw ko Kristiano?
13 Tabinaw e susun aram tagil’ e gapas nge toffan. Naomi e reb e pillibthir ni ke yim’ figirngin ma immoy l’agruw i fak ni kur m’ow ni ur leengiyew l’agruw e ppin ni Ruth nge Orpah, me athapeg ni ra flaabnagrow Got nge yog ngorow e mabgol nib fel’ min fl’eg lanin’row mi yow toffan u tabinaw rorow. I gaar Naomi: “Mi Jehovah e nge ayuwegmew nge bigimew me ki yog ni un nga reb e mabgol nge yog reb e tabinaw ngak.” (Ruth 1:9) Ke weliy be’ u morngaagen e n’en ni yog Naomi ni ra un Ruth nge Orpah ko tabinaw ni aram rogon ma ra “pithigrow ko wagey lanin’uy nge maga’fan’uy. Yow ra pat ko toffan. Aram e gin nrayog ni ngar parew riy, ma yira fl’eg lanin’row ko tin ni yow ba adag mi yow par nib pagan’. Rogon fene gel e re bugithin nem nu Hebrew . . .e be m’ug riy u yugu boch e thin ko [Isaiah 32:17, 18].”
14 Amu guy e re thin ney ko Isaiah 32:17, 18. Begaar: “Ra be’ ma bay i rin’ e tin nib mat’aw, ma aram fan ni bay un par u fithik’ e gapas nge pagan’ ni gubin ngiyal’. Pi naun rok e girdi’ rok Got e bay un par riy u fithik’ e gapas ma dabi buch ban’en rorad, ma ke m’ay e magafan’ rorad.” Tabinaw ko Kristiano e susun aram tagil’ e tin nib mat’aw ban’en, mab gapas nge pagan’, ma bay e gapas rok Got riy. Machane mang ni sum boch e skeng, nge magawon, nge gafgow ara yugu boch ban’en? Ma aram ma ba t’uf ni ngad nanged ko uw rogon ni nge yog e falfalan’ ko tabinaw.
Aningeg e Motochiyel nib T’uf
15. Uw rogon ni nge yog e falfalan’ ko tabinaw?
15 Bin riyul’ i fithingan urngin e tabinaw u fayleng e yib rok Jehovah Got ye ir e sunumiy e tabinaw. (Efesus 3:14, 15) Ere piin ni yad ba adag ni nge yog e falfalan’ ko tabinaw rorad e susun ni ngar gayed Got mar paged ni nge pow’iyrad mi yad n’uf, ni bod rogon ni yog u psalm ni gaar: “Gimed gubin e tabinaw ko girdi’, mu pininged e sorok ngak Jehovah, mpininged e sorok ngak nga feni flaab nge feni gel gelngin.” (Psalm 96:7, NW) Rogon nrayog e falfalan’ ko tabinaw e bay ko Thin Rok Got ni Bible, ma ngan fol riy. Ra falfalan’ e tabinaw ni ra fol ko pi motochiyel nem me yib e gapas rok Got ngorad. Ere ngad filed aningeg e pi motochiyel ney nib baga’ fan.
16. Uw rogon nib l’ag e t’ar laniyan’ ko par u tabinaw?
16 Ereray kenggin reb e pi motochiyel ney: Ba t’uf n ngan t’ar lanin’uy ni nge yog e gapas rok Got u lan e tabinaw. Gaar Solomon ni Pilung: “Ba moon ni der ma t’ar laniyan’ e bod ba mach ni kan kirebnag langgin ya dariy e yoror riy.” (Proverbs 25:28) Ba t’uf ni ngad gelnaged lanin’dad—ngad t’ared lanin’dad—ni nge yog e gapas nge falfalan’ ko tabinaw rodad. Yugu aram rogon ni dada flontgad, machane ba t’uf ni ngad t’ared lanin’dad ya aram ba waamangin e kan ni thothup rok Got. (Roma 7:21, 22; Galatia 5:22, 23) Ra ayuwegdad fare kan ni thothup ni ngad t’ared lanin’dad nfaanra gad ra yibilay e re felngin ney, ma gad fol ko thin ko Bible u morngaagen, ma gad chag ko piin ni be m’ug e re felngin ney rorad. Re kanawo’ ney e ra ayuwegdad ndabda “ngongliyed e ngongol ko darngal.” (1 Korinth 6:18) T’ar laniyan’ e ku ra ayuwegdad ngad paloggad ko cham, nge muun rrum, ma ngad pared nib mocha’ u fithik’ e magawon.
17, 18. (a) Uw rogon nib l’ag e pi thin ko 1 Korinth 11:3 ko par u lan e tabinaw ko Kristiano? (b) Uw rogon nra yog e gapas rok Got ko tabinaw nfaanra ran tay fan e liw ko an lolugen?
17 Ku reb e motochiyel e baaray: Ra ngan tay fan e liw ko an lolugen e tabinaw ma ra ayuwegdad nguuda leked e gapas rok Got. I yoloy Paul ni gaar: “Machane gub adag ni ngam nanged fan ni Kristus e ir e lolugen urngin e pumoon, ma pumoon e ir lolugen leengin, mi Got e lolugen Kristus.” (1 Korinth 11:3) Ere fa en pumoon e ma pow’iy e tabinaw rok, ma an leengin e ma tay tanggin, ma pi bitir e yad ma fol. (Efesus 5:22-25, 28-33; 6:1-4) Ngongol ni aram rogon e ra yibnag e gapas rok Got nga lan e tabinaw.
18 Figirngiy ni Kristiano e dabi pag talin ni maruwel rorad ni lolugen e tabinaw e ba puluw ko Bible ma gathi ir e tolang. Ya thingari folwok rok Jesus ni ir Lolugen. Yugu aram rogon ni ir e “nge mang Pilung ni ga’ u urngin ban’en,” machane de yib Jesus “ni ngan pigpig ngak, ye yib ni nge pigpig.” (Efesus 1:22; Matthew 20:28) Aram rogon ni nge gagiyegnag lolugen e tabinaw ni Kristiano e tabinaw rok u fithik’ e t’ufeg me ayuwegrad ko tin nib t’uf rorad. Ma dabi siy ni leengin ni Kristiano e ba adag ni nge ayuweg figirngin. Ya ir e “ta ayuw” nge “ta gamaneg,” me ere felngin e ma gamaneg e pi n’en ndariy rok figirngin ma aram rogon ni ma pi’ e ayuw nib t’uf rok. (Genesis 2:20; Proverbs 31:10-31) Faanra ra ngongol e en lolugen nib puluw ma ra ayuweg e pi figirngiy nge pi leengiy ni ngar ted farad ma ma ayuweg e bitir ngar folgad. Arrogon, ngan tay fan e liw ko en lolugen ma ra mon’og e gapas rok Got u lan e tabinaw.
19. Mang fan ni ba t’uf ni nge puf e thin u thilin girdien e tabinaw ni nge yog e gapas nge falfalan’ ngorad?
19 Ma bin dalip e motochiyel e baaray: Par nib puf e thin u thiliy e baga’ fan ni nge yog e gapas nge falfalan’ u lan e tabinaw. Be yog ko James 1:19 ni gaar: “Gubin e girdi’ ma thingar ra gurgad ko motoyil, machane dab ra gurgad ngar welthingad, ma dabra gurgad ngar damumuwgad.” Ba t’uf ko girdien e tabinaw ni ngar motoyilgad ngorad mar welthingad ngorad ya rogon nib puf e thin u thilin girdien e tabinaw e bay l’agruw raba’. Machane mus nib riyul’ e thin ni gad ra yog ma ra kirebnag thiliy ni faanra ran nog u rogon nib kireb ara tolangan’ ara dariy e runguy. Susun nge fel’ e welthin rodad ni bod ni kan tay e “sol ngay ni nge fl’eg lamen.” (Kolose 4:6, NW) Pi tabinaw ni ma fol ko thin nu Bible ma ma guy rogon ni nge puf e thin u thiliy e yad be lek e gapas rok Got.
20. Mang fan ni t’ufeg e baga’ fan ni faanra nge yog e gapas ko tabinaw?
20 Ma baaray e bin aningeg: Ba t’uf e t’ufeg ni nge yog e gapas nge falfalan’ u lan e tabinaw. T’ufeg u thilin e pumoon nge ppin e baga’ fan ko mabgol, maku bay e t’ufeg u thilin girdien e tabinaw. Machane bin nib baga’ fan e t’ufeg e a·gaʹpe ni aram bugithin ni Greek. Aram e t’ufeg ni gad ma athamgil nge yog ngodad u thildad Jehovah nge Jesus nge piin gadad buguli yoror. (Matthew 22:37-39) I dag Got e re t’ufeg ney ko girdi’ ya ke pi’ “Fak ni kari maagirag rok, ni fan e nge urngin e piin ni michan’rad ngak e aram e dab kur m’ad, ya ke yog e yafos ndariy n’umngin nap’an ngorad. (John 3:16) Uw fene rib fel’ ni rayog ni ngad daged e re t’ufeg ney ngak girdien e tabinaw rodad! Re t’ufeg ney nib tolang e ma “chugumiy urngin ban’en nga taabang nge par ni ke fel’ rogon.” (Kolose 3:14) Ma ma chugumiy ba wu’ e mabgol nga taabang me k’aringrow ni ngar rin’ew e n’en nib fel’ ni fan ngorow nge fan ko bitir rorow. Nap’an ni sum e magawon, ma t’ufeg e ma ayuwegrad ngar pithiged e magawon nib taab lanin’rad. Rib mudugil e re n’ey ya “t’ufeg e . . . der lemnag ir . . . ma ma k’adan’ u fithik’ urngin ban’en, ma ma michan’ ko urngin ban’en, ma ma l’agan’ ko urngin ban’en, ma ma gum’an ko urngin ban’en. T’ufeg e der aw nib m’ay fan.” (1 Korinth 13:4-8, NW) Ba gel e falfalan’ ko pi tabinaw ni bay e t’ufeg u fithik’rad ma ba t’uf Jehovah rorad!
Nguun Lek e Gapas rok Got
21. Mang e ra ayuweg ni nge yoor e gapas nge falfalan’ ko tabinaw rodad?
21 Fapi motochiyel nge ku boch e bay ko Bible ma yibe weliy morngaagen u lan e pi babyor ni ma pi’ Jehovah ngodad u daken “fare tapigpig nib yul’yul’ mab gonop.” (Matthew 24:45) Susun, aram boch e thin ni bay ko fare babyor ni 192-page riy ni The Secret of Family Happiness, ni kan pi’ u nap’an fare District Convention ko Pi Mich Rok Jehovah ni “Pi Ta Mol’og ko Gapas rok Got” u gangin e fayleng u nap’an e duw ni 1996/97. Ra fil girdien e tabinaw e re ke babyor nem nge Bible ni ra be’ ma goo ir ngu taabang ko tabinaw rorad ma ra yib angin ngorad. (Isaiah 48:17, 18) Arrogon, faanra ran fol ko fonow nu Bible ma ra yoor e gapas nge falfalan’ u lan e tabinaw.
22. Susun mang e nge mang kenggin e par ko tabinaw rodad?
22 Boor e flaab nra pi’ Jehovah ko pi tabinaw ni ma rin’ e tin m’agan’ ngay, ma bay rogon ni ngan n’uf min pigpig ngak. (Revelation 21:1-4) Ere nguum pared ni kenggin e tabinaw romed e aram e liyor ku fa bin riyul’ e Got. Ma nge flaabnagmed Jehovah ni Chitamangidad nu tharmiy mi gimed par u fithik’ e falfalan’ ya gimed be lek e gapas rok Got ko tabinaw romed!
Uw Rogon ni Ga Ra Fulweg?
◻ Mang e ba t’uf ni nge par e pi tabinaw nib yul’yul’ ku Got?
◻ Mang fan ni ke magawon e tabinaw ko ngiyal’ ney?
◻ Mang e ra yibnag e falfalan’ u lan e tabinaw?
◻ Mang boch e motochiyel ni ra ayuwegdad ngad mon’ognaged e gapas nge falfalan’ u lan e tabinaw?
[Sasing ko page 18]
Thin nib puf u thiliy e ma ayuwegdad nguuda leked e gapas rok Got u lan e tabinaw