Ga Be Lek E Tin Nib Fel’ Fa?

“Ngam suguyed lanin’med ko pi n’en nib fel’, nge tin ni bay rogon ni ngan n’uf.”​—FILIPPI 4:8, New World Translation.

1. Be mang e tin nib kireb ban’en, ma mang fan ni de kireb e liyor ku Jehovah ni bochan?

NONGOL NIB KIREB e ma sor fan ko ngongol nib golong mab sasalap. Ma ke wer iyan nga gubin yang u fayleng. (Efesus 2:1-3) Machane dabi pag Jehovah Got ni ngan kirebnag e liyor nib machalbog rok. Pi babyor ko Kristiano nge pi muulung nge assembly nge convention e ma ginangdad ko ngongol nde mat’aw. Ma pi’ e Bible e ayuw ngodad ni ngad “chichiiyed pa’dad ko tin nib fel’” u p’eowchen Got. (Roma 12:9) Ere Pi Mich Rok Jehovah e yad ba ulung i girdi’ ni be athamgil ni ngar pared nib klin mab fel’ e ngongol rorad. Machane ra bagdad ma uw ra rogon? Me gur, ga be athamgil ni ngam ngongliy e ngongol nib fel’ fa?

2. Be mang e tin nib fel’ ban’en, ma mang fan nib t’uf e athamgil ni ngan par nib fel’?

² Ngongol nib fel’ e ma sor fan ko gafarig nib fel’ nge felngin nib fel’, nge ngongol nge lem nib mat’aw. Gathi aram ba felngin ni de t’uf ni ngan rin’ ban’en, ya aram ban’en ni ngan ngongliy. Ngan ngongol nib fel’ e gathi ke mus ni ngan siyeg e denen; ya ngan lek e tin nib fel’ ban’en. (1 Timothy 6:11) I yog apostal Peter ko pi Kristiano ni gaar: “Ngam puthuyed pangimed nib fel’ nga rogon ni ke michan’med ngak Kristus.” Uw rogon? “Ngam athamgiliyed [ni fan ko tin ni ke micheg Got].” (2 Peter 1:5) Bochan ni gadad e tadenen ma ba t’uf e athamgil nib gel ni ngan par nib fel’ e ngongol rodad. Machane piin ni bay madgun Got u wan’rad faram e ur yodoromgad ni mus u fithik’ e magawon nib baga’.

Ke Athamgil ni nge Ngongliy e Ngongol nib Fel’

3. Mang boch ban’en nib kireb ni rin’ Ahaz ni Pilung?

³ Bay boor e thin ko Bible ni be weliy u morngaagen e piin ni ur athamgilgad ni ngar ngongliyed e ngongol nib fel’. Susun, mu lemnag Hezekiah ni be’ nib fel’. Chitmangin e Ahaz ni Pilung nu Judah, ma ke liyor ngak Molek. “Ke reliw e duw rok Ahaz u nap’an ni ke tabab ko gagiyeg, ma ke gagiyeg u lan ragag nge nel’ e duw u Jerusalem; ma de rin’ e tin nib mat’aw u p’eowchen Jehovah ni Got rok ni bod ni rin’ David ni chitamangin. Ma ke lek kanawoen e pi pilung nu Israel, ni mus ngak fak ni pi’ ko nifiy ni bod rogon e ngongol nib kireb ni ma rin’ e pi nam ni chuwegrad Jehovah ni fan ko piyu Israel. Ma ki pi’ e maligach nge ath u daken e yu gin nib tolang ngu daken e pi burey nge angen e gek’iy.” (2 Kings 16:2-4, NW) Boch e girdi’ e ma yog ni fare thin ni ‘ke pi’ ko nifiy e be yip’ fan reb e yalen ni ngan machalbognigey ma gathi kan pi’ be’ ni maligach. Machane, fare babyor ni Molech​—A God of Human Sacrifice in the Old Testament, ni yoloy John Day e be gaar: “Bay boch ban’en ni classical nge Punic [Carthaginian] nge archaeology ni ma micheg ni yu Kanaan faram e ur pied e girdi’ ni maligach ma aram e dariy tapgin ni nge maruwaran’uy ko n’en ni weliy fa Bin Kakrom e M’ag [u morngaagen e girdi’ ni un pi’ ni maligach].” Ku be yog ko 2 Kronicles 28:3 ni “ke urfeg [Ahaz] e pi bitir rok u fithik’ e nifiy.” (Mu taarebnag ko Deuteronomy 12:31; Psalm 106:37, 38.) Uw fene rib kireb e re ngongol nem!

4. Uw rogon e ngongol rok Hezekiah ni be par u fithik’ e piin ni ma ngongliy e ngongol nib kireb?

⁴ Ma uw rogon Hezekiah ni ke par u fithik’ e ngongol nib kireb? Boch e girdi’ e ma lemnag ni ir e ke yoloy fa bin 119 e Psalm u nap’an ni dawori mang pilung. (Psalm 119:46, 99, 100) Ere rayog ni ngan guy ko uw rarogon e pi thin ney ni gaar: “Mus ko piin ni pi fak e pilung e kar pared nga but’; mar sabolgad ni yad be yog e thin nib togopuluw u morngaageg. Machane gag e tapigpig rom, ma gu be par ni gu be lemnag e pi motochiyel rom. Der yog ni nggu mol ni bochan ni kari gel e kireban’ rog.” (Psalm 119:23, 28) Bochan ni ke par Hezekiah u fithik’ e piin ni ma un ko liyor ngoogsur, ma sana girdien e pilung e ur moningnaged nib elmirin ni aram e de yog ni nge mol nib fel’ rogon. Machane ke par ni be athamgil ni nge ngongliy e ngongol nib fel’, ma munmun me mang pilung, ma “ke ulul ni nge rin’ e tin nib mat’aw u p’eowchen Jehovah. . . Ke pagan’ ku Jehovah ni Got nu Israel.”​—2 Kings 18:1-5.

Kar Pared ni Yad Ffel’

5. Mang boch e magawon ni yib ngak Daniel nge fa dalip e fager rok?

⁵ Daniel nge fa dalip i fager rok ni Hebrew ni Hananiah, nge Mishael, nge Azariah e ku yad e ur pared nib ffel’ e ngongol rorad. Kan chuwegrad ko binaw rorad min fekrad nga Babylon. Ma kan tunguy e ngochol nu Babylon ko re aningeg i pagal nem ni​—Belteshazzar, nge Shadrach, nge Meshach, nge Abednego. Ma kan pi’ ngorad “taab mit i ggan nge wain ni yibe pi’ ngak fa en ni pilung” nib muun ngay boch ban’en nib togopuluw ko motochiyel rok Got. Maku kan tay chilen ni ngan skulnagrad u lan dalip e duw ni “ngan fil ngorad rogon i beeg e babyor nge rogon ni yima yoloy e thin ko piyu Chaldea.” Gathi ke mus ni thingara filed yugu reb e thin ya fare thin rok “piyu Chaldea” e ma sor fan ko fare thal i girdi’ nib tolang. Ere, pi fel’ yangaren ney ni girdi’ ni Hebrew e kan fil ngorad e machib nib kireb nu Babylon.​—Daniel 1:1-7.

6. Mang fan nrayog ni nga dogned ni ke lek Daniel e tin nib fel’ ban’en?

⁶ Yugu aram rogon ni ba gel rogon ni kan diliiy laniyan’rad Daniel nge fa dalip i fager rok, machane ur mel’eged e ngongol nib fel’ ko ngongol nib kireb. Daniel 1:21 e be gaar: “Mi i par Daniel u rom nge mada’ ko ngiyal’ ni Cyrus e yib i mang pilung nu Babylon.” Arrogon, “ki i par” Daniel ni ir e tapigpig rok Jehovah nib fel’ u lan boor ko 80 e duw​—ko ngiyal’ u nap’an boch e pilung nib gel nge mada’ ko ngiyal’ ni kar wargad. Ke par nib yul’yul’ ku Got ni yugu demtrug ni fl’eg boch e tayugang ko am boch e makath nib sasalap maku kari wer e ngongol ndarngal ni bochan fare teliw nu Babylon. Ke ul’ul’ Daniel ni nge ngongliy e ngongol nib fel’.

7. Mang e rayog ni ngad filed ko kanawo’ ni tay Daniel nge fa dalip i fager rok?

⁷ Bay boor ban’en nrayog ni ngad filed rok Danniel nge fa dalip e fager rok ni bay madgun Got u wan’rad. Ya ur leked e tin nib fel’ ban’en ma dar paged yad ngar uned ko yalen ko yu Babylon. Yugu aram rogon ni kan tunguy e ngochol nu Babylon ngorad machane kar pared ni yad e pi tapigpig rok Jehovah. Ya sogonapan 70 e duw nga tomren ma fare pilung nu Babylon e ke tunguy e ngochol nu Hebrew ngak Daniel! (Daniel 5:13) N’umngin nap’an e yafas rok ma ke par nib yul’yul’ ko urngin ban’en ni mus ko tin ni ba achig ban’en. Nap’an ni kab fel’ yangaren “me dugliy Daniel u wan’ ndabi kay e ggan ma dabi unum e wain ni yibe pi’ ngorad u tafen e en ni pilung.” (Daniel 1:8) Bochan e re n’ey ni rin’ Daniel nge fa dalip e fager rok ma aram e kan gelnagrad ni ngar gelgad ko pi skeng ni yib ngorad ni ke chugur ni ngan thang e fan rorad.​—Daniel, guruy ni 3 nge 6.

Ngan Lek e Tin nib Fel’ ko Ngiyal’ Ney

8. Uw rogon me yog ko pi Kristiano ni fel’ yangaren ni ngar pared nib dar ko fayleng rok Satan?

⁸ Bod Daniel nge fa dalip e fager rok ma girdi’ rok Got ko ngiyal’ ney e dabra paged yad ngar uned ko pi n’en ko fayleng rok Satan nib kireb. (1 John 5:19) Faanra gur reb e Kristiano nib fel’ yangaren ma sana yibe diliiy lanin’um ni ngam lek e girdi’ ko munmad rorad nge rogon ni yad ma fl’eg rogon piyan lolugrad nge rogon e mit e musik ni yad ba adag. Machane dab mu lek e fad ara style ni ke garer ya ngam par nib mudugil ma dab mu pagem ni ngam “folgad ko ngongol ni yibe rin’ u roy u fayleng.” (Roma 12:2) “Ngad paged pangidad nge ngongol rodad nde m’agan’ Got ngay nge chogowen urngin ban’en u fayleng nde mat’aw u owchen Got ma gadad be par ni gadad be t’ar lanin’dad ko tin nde fel’ ma gadad ba yal’uw, ma gadad be rin’ e tin nib m’agan’ Got ngay u roy u fayleng.” (Titus 2:11, 12) N’en nib baga’ fan e ngad fel’gad u wan’ Jehovah ma gathi girdi’.​—Proverbs 12:2.

9. Mang boch ban’en ni rayog ni nge diliiy laniyan’ e pi Kristiano ni ma folchuway’, ma susun uw rogon ni ngar ngongolgad nib puluw?

⁹ Ku arrogon e pi Kristiano nib ilal e bay boor ban’en ni be diliiy lanin’rad ma thingar pared nib fel’ e ngongol rorad. Sana yibe wawliy e pi Kristiano ni ma un ko fol chuway’ ni ngar rin’ed boch ban’en ni gathi rib mat’aw ara ngar dariy fannaged e motochiyel ko am nge motochiyel ko tax. Machane yugu demtrug ko uw rogon e ngongol ko piin fol chuway’ ni ma tagening ngodad ara piin ni gad ma maruwel u taabang ma “gadad ba adag ni nguuda rin’ed e tin nib mat’aw ni gubin ngiyal’.” (Hebrews 13:18) Be tay e Bible chilen ngodad ni ngad ngonglgad rogon nib mat’aw ngak e piin ni ga’ ko maruwel, nge piin ni ma maruwel ni fan ngodad, nge piin ni ma yib ngodad ko chuway, nge pi am. (Deuteronomy 25:13-16; Matthew 5:37; Roma 13:1; 1 Timothy 5:18; Titus 2:9, 10) Ku ngad athamgilgad ni ngad yarmiyed nib fel’ rogon e pi n’en ni gad ma rin’ ko fol chuway. Ngad yoloyed nga but’ boch ban’en ma ngad fl’eged e m’ag u thildad e girdi’ ni kan tay nga but’, ma aram e rayog ni ngad siyeged e magawon.

Nguum Ayuw Riy!

10. Mang fan nib t’uf ni ‘nguun ayuw riy’ ni fan ko musik ni gad ba adag?

¹⁰ Psalm 119:9 e be tamilangnag rogon ni ngan par nib fel’ u owchen Got. Kan yon’ e tang ni gaar: “Uw rogon ni nge biechnag be’ ni fel’ yangaren e kanawo’ rok? Ra yodorom nfaanra par ni be ayuw riy ni nge fol ko thin rom.” Musik aram reb e talin e cham rok Satan ya bay gelngin ni nge suwey laniyan’ e girdi’. Bay e kireban’ riy ya boch e Kristiano e dar pared ni yad be ‘ayuw riy’ ko musik, ma aram mi yad adag e mit i musik nib pag rogon, ni bod e rap nge heavy metal. Boch e girdi’ e ma yog pi miti musik nem e dariy e kireb riy ma gathi yad ma tiyan’ ko pi thin ni yibe yon’ riy. Ma boch e girdi’ e ma yog ni n’en ni yad ba adag ko pi musik nem e fare beat ara lingan e talin e musik ni guitar. Machane piin Kristiano e dabra turguyed ban’en uw rogon ni nge yog e falfalan’ ngorad. Ya n’en ni baga’ fan u wan’rad e faanra “mm’agan’ Somol ngay.” (Efesus 5:10) Pi mit e musik ni heavy metal nge rap e ma mon’og e pi n’en nib kireb ni yaba nge ngongol ndarngal, nge liyor ku Satan​—aram e pi n’en ni dariy rogon ko girdi’ rok Got.a (Efesus 5:3) Demtrug ko ba fel’ yangardad ara kad ilalgad, ya ra bagadad ma susun ni ngad lemnaged e re deer ney ni, Gu be lek e tin nib fel’ ban’en fa tin nib kireb ban’en ko fa mit i musik ni gu ba adag?

11. Uw rogon nrayog ni nge ayuw e Kristiano ni fan ko pi n’en ni yima pag ko tv, nge video nge kachido?

¹¹ Pi n’en ni yima pag ko tv nge video, nge kachido e ma mon’ognag e tin nib kireb. Rogon ni yog reb e togta ko mental-health ma pi ngongol ni ‘hedonism, nge par ko pumoon nge ppin nge cham nge dogol nge siin’ e aram e pi n’en ni bay ko pi kachido ko ngiyal’ ney. Ere rogon ni nga un par ni yibe ayuw riy e ngan gonopiy ko mit i mang e kachido ni gad ra guy. Bay e meybil ko Psalm ni be gaar: “Mu n’igin lan owcheg ndabki guy e tin yugu dariy fan.” (Psalm 119:37) Reb e Kristiano ni fel’ yangaren ni Josef fithingan e ke fol ko re thin nem. Ere nap’an ni kan dag yaan e ngongol ndarngal nge cham ko reb e kachido ni be guy, me sak’iy me chuw u rom. Ke tamra’ ni nge rin’ e re n’em fa? Be gaar Josef: “Danga’, ya kug lemnag Jehovah ko som’on nge uw rogon ni nggu felan’nag.”

Baga’ Fan ni Ngan Fil e Babyor min Fl’eg i Lemnag

12. Mang fan nib t’uf ni ngan fil e babyor min fl’eg i lemnag ni fan ni nguun lek e tin nib fel’ ban’en?

¹² Gathi ke mus ni ngan siyeg e tin nib kireb. Ya ra ngan lek e tin nib fel’ ma kub muun ngay ni ngan fil e babyor min fl’eg i lemnag e pi n’en nib fel’ ni bay ko Thin Rok Got ni aram e rayog ni ngan fol ko pi motochiyel riy ko yafas rodad. Be yog ko Psalm ni gaar: “Rib t’uf rog e motochiyel rom! Gu ma par ni gu ma lemnag ni polo’ e rran.” (Psalm 119:97) Ere ga ma fil e Bible nge pi babyor ko Kristiano u gubin e wik fa? Rriyul’, mo’maw ni ngan pirieg e tayim ni ngan fil e Thin Rok Got min fl’eg i lemnag. Machane rayog ni ngan taleg yugu ban’en ndab kun rin’ me yog e tayim. (Efesus 5:15, 16) Sana kakadabul e aram e ngiyal’ nrayog ni ngam meybil, ma ngam fil e babyor, ma ga fl’eg i lemnag.​—Mu taarebnag ko Psalm 119:147.

13, 14. (a) Mang fan ni baga’ fan ni ngan fl’eg i lemnag ban’en? (b) Mang boch e thin ko Bible nib fel’ ni ngan fl’eg i lemnag ya ra ayuwegdad ngad faneikayed e ngongol ndarngal?

¹³ Baga’ fan ni ngan fl’eg i lemnag ban’en ya ma ayuwegdad ni nge mit nga laniyan’dad e tin ni kad filed. Ma rayog ni nge mon’ognag e lem rok Got u lanin’dad. Susun: Rayog ni ngan nang fan ni motochiyel rok Got e be yog nib kireb e ngongol ndarngal machane ku be yog ni ‘mu fanenikayed e tin nib kireb, mi gimed chichiiy pa’med ko tin nib fel’.’ (Roma 12:9) Rayog ni nge taab lanin’dad Jehovah ni fan ko ngongol ndarngal nfaanra gad ra fl’eg i lemnag boch e thin ko Bible ni bod u Kolose 3:5, ni be gaar: “Ere thingar mu lied ngem’ e ar’ar nu fayleng ni be maruwel u fithik’ e dowmed, ni aram e darngal, nge puwlag, nge ar’ar nib kireb ni ma waliy e girdi’ ko denen, nge chogow (ya chogow e mmit e ta’ fan nge meybil ni yibe tay ngak e liyos ni ma meybil boch e girdi’ ngay).” Mu fithem: ‘Miti mang e ar’ar ko par ko pumoon nge ppin e thingar gu li’ ngem’? Mang e susun ni nggu siyeg ya ra k’aring ni nggu ar’arnag ban’en nde klin? Ba t’uf ni nggu thiliyeg rogon ni gu ma ngongol ngak e piin ni opposite sex fa?’​—Mu taarebnag ko 1 Timothy 5:1, 2.

¹⁴ Ma pining Paul e pi Kristiano ni ngar paloggad ko ngongol ndarngal ma ngar t’ared lanin’rad ni aram e “dariy be’ ni nge ngongliy e kireb ngak be’ ni walagen ni girdien Kristus ara kirebnag mat’awun faanem ko re bugithin ney.” (1 Thessalonika 4:3-7) Mu fithem: ‘Mang fan nib kireb e ngongol ndarngal? Uw rogon ni ra kirebnageg fa ra kirebnag yugu be’ nfaanra kug denen ko re n’ey? Ma ra uw rogog ko tirok Got ban’en, nge rogon lanin’ug, nge rogon dowag? Ma uw rogon e girdi’ u lan e ulung ni kar th’abed e motochiyel rok Got ma dar kalgadngan’rad? Ke fel’ rogorad ni bochan fa?’ Ngan tay u gumerchaey e thin ko Bible ni be weliy u morngaagen e pi ngongol nem e rayog ni nge n’igin ngad fanenikayed e tin nib kireb u p’eowchen Got. (Exodus 20:14; 1 Korinth 5:11-13; 6:9, 10; Galatia 5:19-21; Revelation 21:8) Weliy Paul ni be’ nra un ko ngongol ndarngal e “gathi ke n’ag e girdi’, ya ke n’ag Got.” (1 Thessalonika 4:8) Mini’ arorad e tin riyul’ e Kristiano ni rayog ni nge n’ag e Chitamangin nu tharmiy?

Tin nib Fel’ nge Chag ko Girdi’

15. Uw fene ga’ fan e piin ni gad ma chag ngorad ni fan ni nguuda leked e tin nib fel’ ban’en?

¹⁵ Ku ban’en ni ma ayuwegey ni ngan par ni ngan ngongliy e tin nib fel’ ban’en e ngan chag ko piin nib fel’. Kan non’ e tang ko Psalm ni be gaar: “Gu ma chag ko piin ni bay madgum [Jehovah] u wan’rad, nge piin ni ma fol ko pi motochiyel rom.” (Psalm 119:63) Ba t’uf rodad ni ngad chaggad e piin ni ma un ko pi muulung ko Kristiano. (Hebrews 10:24, 25) Faanra gad ra par ni ra be’ me par rok ma gad ra par ni kari mus ni gad be lemnagdad, ma rayog ni nge gel e tin nib kireb ban’en ngodad. (Proverbs 18:1) Ma faanra gad ra chag ngak e pi Kristiano ma ra gelnag lanin’dad ni ngad ngongliyed e tin nib fel’. Machane ku thingarda ayuwgad riy ndabda chaggad e piin nib kireb. Rayog ni nge fel’ thildad e piin buguli yoror rodad, nge piin ni gad ma maruwel u taabang, nge piin ni gad ma skul u taabang. Machane faanra riyul’ ni gad be yan u fithik’ e gonop ma gad ra siyeg i chuchugur ko piin ni gathi yad be lek e tin nib fel’ ban’en ko Kristiano.​—Mu taarebnag ko Kolose 4:5.

16. Uw rogon nra ayuwegdad e pi thin ko 1 Korinth 15:33 ni ngad leked e tin nib fel’ ban’en ko ngiyal’ ney?

¹⁶ Yoloy Paul ni gaar: “Nchag ngak e girdi’ nib kireb me kireb pangiy nib fel’.” Ke yog e pi thin nem ya be ginang e girdi’ ni rayog ni nge war e michan’ rorad nfaanra yad ra chag ko piin ni yad ma yog ni yad e Kristiano machane ur togopuluwgad ko machib ko fas ko yam’. N’en ni be ginang Paul e ku ma sor fan ko piin ni gad ma chag ngak u wuru’ ngu lan e ulung. (1 Korinth 15:12, 33) Machane dubdad ni ngad siyeged e pi walagdad ni pumoon nge ppin nib spiritual ni bochan nib thil e lem rorad ngodad u morngaagen ban’en. (Matthew 7:4, 5; Roma 14:1-12) Machane ba t’uf ni ngan ayuw riy ya boch e girdi’ u lan e ulung ni be un ko boch ban’en nde fel’ fa yad be gun’gun’. (2 Timothy 2:20-22) Bay e gonop riy ni ngan par nib chugur ko piin ni “ra bagadad me pi’ e athamgil nga laniyan’ bagadad.” (Roma 1:11, 12) Re n’ey e ra ayuwegdad ngad pared ko tin nib fel’ ban’en ma ngad pared ko fre “pa’ i wo’ ni yan ko yafos.”​—Psalm 16:11.

Nguun Lek e Tin nib Fel’

17. Rogon ni yog ko Numbers guruy ni 25, ma mang gafgow ni yib ngak piyu Israel ma mang e rayog ni ngad filed riy?

¹⁷ Boch u m’on ni tafanaynag piyu Israel fare Binaw ni Kan Micheg ngorad, ma bokum biyu’ i yad e ur turguyed ni ngar leked e tin nib kireb ban’en​—me yib e gafgow ngorad. (Numbers, guruy ni 25) Ngiyal’ ney ma girdi’ rok Jehovah e yad be par u thatharen e bin nib biech e fayleng nib mat’aw. Ke mus ni piin ni ma pi’ keru’rad ko tin nib kireb ko re fayleng ney e yira taw’athnagrad nga ranod nga lan e bin nib biech e fayleng. Gad e girdi’ ni de flont, ere sana bay boch ban’en nib kireb ni gad ba adag, machane ra ayuwegdad Got ni ngad folgad ko kan ni thothup ni be pow’iyey ko tin nib mat’aw. (Galatia 5:16; 1 Thessalonika 4:3, 4) Ere nguuda folgad ko n’en ni yog Joshua ko piyu Israel: “Ere mu tiyed fan Jehovah mi gimed meybil ngak, mi gimed pigpig ngak u fithik’ e tiyan’ nge yul’yul’.” (Joshua 24:14, NW) Faan gad ra par ni gad be rus ni ngad kirebnagedan’ Jehovah ma aram e ra ayuwegdad ngad leked e tin nib fel’ ban’en.

18. Mang e susun ni nge mudugilan’ urngin e pi Kristiano riy ni fan ko tin nib kireb ban’en nge tin nib fel’?

¹⁸ Faanra ga ba adag ni ngam felan’nag Got ma nge mudugilan’um ni ngam fol ko n’en ni yog Paul ni gaar: “Ngam suguyed lanin’med ko fapi n’en nib fel’, ni yira yog e fel’ ngay; ni n’en nriyul’, nge n’en nib yal’uw, ma mmat’aw, ma mmachalbog, ma mmanigil, nge tin ndariy thibngin.” Faanra gad ra yodorom, ma mang wenegan nra yib riy ngom? I gaar Paul: “Mmaruwelgad ko pi n’en ney; ma Got ni ir e be pi’ e gapas nga lanin’dad e bay i par romed.” (Filippi 4:8, 9) Arrogon, u daken e ayuw rok Jehovah ma rayog ni ngam pi’ keruum ko tin nib kireb ma ga lek e tin nib fel’ ban’en.

[Boch e Thin nra Tamilangnag Murung’agen]

Boch Ban’en ni Ngan Sul nga Daken

◻ Mang e ba t’uf ni ngan lek e tin nib fel’ ban’en?

◻ Uw rarogon Hezekiah, nge Daniel, nge fa dalip i fager rok ni ur pared nib fel’ e ngongol rorad?

◻ Uw rogon nrayog ni ngad boded Daniel u rogon ni ke togopuluw ko pi n’en ni fanay Satan ni nge waliydad?

◻ Uw rogon ni fol babyor, nge fl’eg i lemnag, nge chag ko girdi’ e ra ayuwegdad ngad leked e tin nib fel’ ban’en?

[Sasing ko page 15]

I lek Hezekiah e tin nib fel’ ban’en u nap’an ni kab fel’ yangaren ni yugu aram rogon ni be par u fithik’ e piin ni ma liyor ku Molech

[Sasing ko page 17]

Piin Kristiano e thingara ayuwgad riy ko pi n’en ni yad ma guy