Ngan Ayuw Ko Pi Tamachib Ni Goo Bogi Ban’en!

“Bay yib i m’ug e tamachib ni goo bogi ban’en u fithik’med.”​—2 PETER 2:1.

1. Mang e ke lemnag Jude ni nge yoloy u morngaagen ko som’on, ma mang fan ni ke yol u morngaagen yugu reb e ban’en?

BAARAM ban’en ni ngan gin ngay! Ya pi tamachib ni goo bogi ban’en e m’ug u lan e ulung ko Kristiano u nap’an e bin som’on e chibog! (Matthew 7:15; Acts 20:29, 30) Jude ni walagen Jesus e i nang u morngaagen e re n’em. Ye yog ni ke finey ni nge yoloy nga babyor “murung’agen kanawoen ni thapegdad Got ngak,” machane ke weliy ni gaar: “ma aram mu gu finey ni nggu yol ngomed nggog ngomed ni ngam athamgilgad nguum pired ko fare mich ni ke pi’ Got ngak girdien nri taab yay me par ni er rogon.” Mang fan ni thingari thiliyeg Jude e n’en ni nge yoloy morngaagen? Ke weliy “ya boch e girdi’ ndariy fan Got u wun’rad e kar bad ra maathukgad nga fithik’dad ndad nanged, [nga lan e ulung] . . . kar pingeged e thin rok Got nga bayang, ni murung’agen e runguy rok, ya nge yib e tawey rorad ko ngongolen e darngal ni yad be rin’.”​—Jude 3, 4.

2. Mang fan nib taareb e n’en ni bay ko 2 Peter guruy ni 2 nge Jude?

² Be m’ug riy ni ke yoloy Jude e babyor rok boch nga tomren ni yoloy Peter e bin l’agruw e babyor rok. Ma dabi siy ni i nang Jude e n’en ni bay ko re ke babyor rok Peter nem. Dabi siy ni ke weliy boch ban’en ntaareb rogon ngay u lan e babyor rok ni be pi’ e fonow nib gel. Ere nap’an ni ngad yaliyed e thin ko 2 Peter guruy ni  2, ma gad ra guy ko uw rogon nib taareb rogon ko fa birok Jude e babyor.

Wenegan e Machib Ngoogsur

3. Mang e buch kafram me yog Peter ni ku ra buch biyay?

³ Tomren ni yog Peter ko pi walag ni ngar tedan’rad ko pi thin ko profet me gaar: “Pi profet ni goo bogi ban’en e m’ug u fithik’ e piin ni kakrom [u Israel], ma ku aram rogon ni bay yib i m’ug e tamachib ni goo bogi ban’en u fithik’med.” (2 Peter 1:14–​2:1) Immoy e tin riyul’ e thin ko profet ni ka nog ko girdi’ rok Got kakrom, machane ki immoy e machib ngoogsur ko pi profet ni goo bogi ban’en. (Jeremiah 6:13, 14; 28:1-3, 15) I yoloy Jeremiah ni gaar: “Pi profet nu Jerusalem e kug guyrad ni kab gel e kireb ko tin ni yad be ngongliy, yad be par e ppin ni gathi mabgol rorad ma yad be lifith l’ugunrad.”​—Jeremiah 23:14.

4. Mang fan ni ba puluw ni ngan gechignag e pi tamachib ni goo bogi ban’en?

⁴ I weliy Peter ko mang e ra rin’ e pi profet ni goo bogi ban’en u lan e ulung ko Kristiano ni gaar: “Bay ra feked i yib ngomed e machib nra kirebnigey, ni machib nde riyul’, ma bay ra mitheged murung’agen e re Masta [Jesus Kristus] ni ir e ke biyuliyrad, ma aram mi yad girngiy e riya’ nib tomgin nga dakenrad.” (2 Peter 2:1; Jude 4) Ma wenegan e re n’em u nap’an e bin som’on e chibog e sum Kristendom riy ko ngiyal’ ney. I dag Peter ko mang fan ni bay rogon ni ngan gechignag e pi tamachib ni goo bogi ban’en ni gaar: “Ma boor e girdi’ ni bay ra folgad u ngongolen e pi cha’ nem, ni ngongol nib kireb ni ke thum’ nga wuru’; ma bayi weliy e girdi’ e thin nib kireb nib togopuluw ko fare Kanawo’ nib riyul’ ni bochan e pi n’en ni be rin’ e pi cha’ nem.”​—2 Peter 2:2.

5. Mang e rin’ e pi tamachib ni goo bogi ban’en?

⁵ Mu lemnag e re n’em! Bochan e pi profet ni goo bogi ban’en ni yad ra suwey laniyan’ e girdi’ ma boor e girdi’ u lan e ulung e ra un ko ngongol nib kireb. Fare bugithin ni Greek ni piliyeg ni “ngongol nib kireb” e ma sor fan ko ngongol nde yalen, ara ngongol ndariy e tinna’ riy, ara ngongol nib puwlag, ara ngongol ndarngal nib elmirin, ara ngongol ndariy e tamra’ riy. Yog Peter faram ni pi Kristiano e kar “thaygad ko ar’ar ni ma kirebnigey ni bay u roy u fayleng.” (2 Peter 1:4) Machane boch e girdi’ e ra sul ko re ar’ar nem ni ma kirebnigey, ma pi tamachib ni goo bogi ban’en u lan e ulung e ur k’aringed e re n’em! Ere yira t’ar e thin nga daken kanawoen e thin riyul’. Rib gel e kireban’ riy! Dabi siy ni ereray ban’en ni susun ni nge tiyan’ urngin e Pi Mich Rok Jehovah ngay. Susun ndabda paged talin ni rogon ni gad ma ngongol e ra pining e sorok ku Jehovah Got nge girdi’ rok fa ran kirebnag thiyrad.​—Proverbs 27:11; Roma 2:24.

Machib ni Googsur Nni Fek I Yib

6. Mang e ma k’aring e ngongol ko pi tamachib ni goo bogi ban’en, ma uw rogon ni yad ma guy rogon nge yog e tin ni yad ba adag ngorad?

⁶ U fithik’ e gonop ma gad ma tiyan’dad ko uw rogon ni yad ma fek iyib e pi tamachib ni goo bogi ban’en e lem rorad nib kireb nga lan e ulung. Yog Peter ni som’on ma yad ma rin’ nde lingagil. Miki gaar: “Pi tamachib nem ni goo bogi ban’en e yad ba chogow ni salpiy, ma bay yoor e salpiy rorad ni puluwrad ko machib ni yad be yog ngomed ni machib ni yad e sum rorad.” Ar’ar nib siin e ma k’aring e pi tamachib ni goo bogi ban’en, ya arrogon ni be tamilangnag fare ke Bible ni The Jerusalem Bible: “Yad ra guy rogon ni ngar chuw’iyed gimed ko thin rorad nib sasalap.” Ku arrogon fare ke Bible ni James Moffatt ni be gaar: “Bochan e ar’ar rorad ma yad ra kirebnagem ko pi thin nib sasalap.” (2 Peter 2:1, 3) Pi n’en ni ma yog e pi tamachib ni goo bogi ban’en e ra m’ug riy nib fel’ u wan’ be’ ni gathi rib gel rogon ni be tiyan’ ko tirok Got ban’en, machane thin rorad e ba sasaliyeb ni fan e nge “chuw’iy” e girdi’, mi yad waliyrad ngar rin’ed e tin ni ba adag e pi girdi’ nem nib sasalap.

7. Mang lem fa machib ni ke garer u nap’an e bin som’on e chibog?

⁷ Dariy e maruwar riy ni pi tamachib ni goo bogi ban’en u nap’an e bin som’on e chibog e ke suwey lanin’rad e lem ko fayleng ko ngiyal’ nem. Nap’an ni yoloy Peter e pi thin nem ma immoy e machib ni Gnostic ni ke garer iyan. Piin ni yad e Gnostic e ke mich u wan’rad ni urngin ban’en e goo ba kireb ma kari mus ni pi n’en nib l’ag ko spirit e ba manigil. Ere, yog boch i yad ni demtrug ko mang e ra rin’ be’ ko dowef rok. Ya ur rogned ni ra munmun ma ra chuw be’ ko dowef rok. Me ere ur rogned ni pi denen ni ma rin’ e girdi’ nga dowrad​—nib muun ngay e ngongol ndarngal​—e de ga’ fan. Be m’ug riy ni lem ni aram rogon e ke suwey laniyan’ e piin ni ur rogned ni yad e Kristiano.

8, 9. (a) Mang lem nib kireb ni yib ko boch e tin som’on e Kristiano? (b) Rogon ni yog Jude ma mang e rin’ boch e girdi’ u lan e ulung?

⁸ Be’ ni ir e Bible scholar e ke yog ni “immoy boch girdien e Galesiya ni ur kirebnaged fare machib ko grace,” ara “runguy ndariy mat’awun be ngay.” (Efesus 1:5-7) Ke yog ni boch e girdi’ e kar gaargad: “Ga be yog ni [runguy] rok Got e baga’ ma boor ma ba gaman ni nge upunguy urngin e denen fa? . . . Me ere nguuda denengad iyan ya rayog ni nge chuweg e [runguy ndariy mat’awdad ngay] urngin e denen. Ma rriyul’, ni rogon fene yoor e denen ni gad ma rin’ ma aram e ra yoor yay ni ra dag Got e [runguy ndariy mat’awdad ngay] ngodad.” Kaamu rung’ag e thin ni kab kireb rogon ni kan lelepey ko bin baaram e thin fa?

⁹ Weliy apostal Paul u morngaagen e lem nib kireb u morngaagen e runguy rok Got faani fith ni gaar: “Nge lungudad e nguud pired ni gadad be denen nge yog ni ga’ e runguy rok Got ngodad?” Miki fith ni gaar: “Gur nguud denengad ni bochan e dad moyed u tan e motochiyel ya gadad ba’ u tan e runguy rok Got?” Ra reb e deer ni fith Paul me fulweg ni gaar: “Ri danga’!” (Roma 6:1, 2, 15) Rogon ni yog Jude ma boch e girdi’ e be “pingeg e thin rok Got nga bayang, ni murung’agen e runguy rok, ya nge yib e tawey rorad ko ngonglen e darngal ni yad be rin’.” Machane yog Peter ni ‘En ni nge pufthinnagrad e ke fal’eg rogon ke par, ma En ni nge kirebnagrad e be par ni be od.’​—Jude 4; 2 Peter 2:3.

Pi N’en ni Ma Ginangey

10, 11. Mang dalip i n’en ni yog Peter ni ma ginangey?

¹⁰ Ni nge tamilangnag ni ra rin’ Got ban’en ngak e piin ni ma rin’ ban’en nib kireb ni ke m’agan’rad ngay ma ma weliy Peter dalip e thin ko Bible ni ma ginangey. Som’on me yoloy ni gaar: “De tinna’ Got ni nge gechignag fapi engel nra denengad.” Yog Jude ni pi engel ney e “ra thum’gad nga wuru’ i mat’awrad ni pi’ Got ngorad, mi yad pag e gin ni yad ma par riy” u tharmiy. Ur bad nga fayleng u m’on ni yib fare Day mar feked downgin e girdi’ ni aram e rayog ni ngar uned ko ngongol ndarngal ko pi ppin ni fak e girdi’. Ma kan gechignagrad nib puluw ko ngongol rorad nde yalen mab puwlag, min nin’rad nga “Tartarus,” fa rogon ni weliy Jude ma kan “tayrad u fithik’ e lumor u ar ni ke m’agrad ko chen ndabi m’ay biid yad be sonnag fare Rran ni baga’ ni ir e bay ni gechignagrad riy.”​—2 Peter 2:4; New World Translation, Jude 6; Genesis 6:1-3.

¹¹ Bin migid me weliy Peter morngaagen e girdi’ u nap’an Noah. (Genesis 7:17-24) Ke weliy ni nap’an Noah ma “Got e de pag e piin ni kakrom nde gechignagrad, yi pag e ran nge tharey e nam ni tafen e girdi’ ni kireb.” Ma bin tomur me weliy Peter ni ke dag Got “ngak e piin ni kireb e n’en nra rin’ ngorad” ya ke “gechignag e binaw nu Sodom nge Gomorrah ya ni urfiy e gali binaw nem.” Miki weliy Jude ni “ur ngongliyed e ngongol ko darngal nib elmirin, mar uned ko boch e ngongol nib puwlag.” (2 Peter 2:5, 6; Jude 7) Boch e pumoon e ur uned ko ngongol ndarngal ko piin ppin ma boch e ur ar’arnaged yugu boch e pumoon, ma sana boch i yad e ur pared e gamanman.​—Genesis 19:4, 5; Levitikus 18:22-25.

12. Rogon ni yog Peter ma uw rogon ni ran taw’athnag e ngongol nib mat’aw?

¹² Machane ki yog Peter ni ra taw’athnag Jehovah e piin ni ma yul’yul’ ko pigpig ngak. Susun, ke weliy ni piin ni ayuwegrad Got ndar uned ko yam’ e “Noah, ni i machibnag e tin nib mat’aw, nge ku medlip e girdi’” u nap’an ni yib fare Day ni tharey e fayleng. Miki weliy u morngaagen rogon ni thapeg Jehovah “Lot ni be’ nib mat’aw” u nap’an Sodom, me gaar: “Ere Jehovah e manang rogon ni nge ayuweg e piin ni yad ma fol rok ko gafgow ni ma yib ngorad, nge rogon ni nge tay e piin nib kireb u tan e gechig rok nge yan i mada’ ko Chirofen ni bayi pufthinnagrad Got.”​—2 Peter 2:5, 7-9, New World Translation.

Ngongol ni Bay Rogon ni Ngan Pufthinnag

13. Pi mini’ e kan tayrad ni fan ko pufthin, ma uw rogon e tin ni bay u laniyan’rad?

¹³ I tamilangnag Peter e piin ni ri bay rogon ni nge pufthinnagrad Got ni aram e “piin ni yad be fol ko tin nib golong e ngongol ni be yim’ e dowef rorad ni bochan, ma dariy fan u wun’rad e gagiyeg ni be tay Got ngak e girdi’.” Rayog ni ngad lemnaged fene damumuw Peter faani gaar: “Pi tamachib nem ni goo bogi ban’en e darir tamdaggad ma yad ba uf, ma darir tiyed fan e piin ni kan tayrad nib baga’ lungurad ni yad ba flaab; ya n’en ni yad ma rin’ e yad ma yog e thin nib kireb ngorad.” Yoloy Jude ni “tin ni baaray e girdi’ ni bay e tin ni yad be lemnag u lanin’rad e ir e be waliyrad ngar denengad nib togopuluw ko dowef rorad . . . ma yad be yog e tin nib kireb ni fan ngak e piin ni yad ba flaab.” (2 Peter 2:10; Jude 8) Tin ni yad be lemnag u lanin’rad e ba l’ag ko ngongol ndarngal ni be k’aringrad ni ngar uned ngay nge tin nib puwlag ni yad be ar’arnag. Machane uw rogon ni “darir tiyed fan e piin ni kan tayrad nib baga’ lungurad ni yad ba flaab” mi yad “yog e tin nib kireb ni fan ngak e piin ni yad ba flaab”?

14. Uw rogon ma pi tamachib ni goo bogi ban’en e “darir tiyed fan e piin ni kan tayrad nib baga’ lungurad ni yad ba flaab” mi yad “yog e tin nib kireb ni fan ngak e piin ni yad ba flaab”?

¹⁴ Yad ma yodorom ya yad ma dariy fannag e piin ni dugliy Got. Pi piilal ni Kristiano e yad owchen Jehovah Got nge Fak, ma aram e yad ba flaab. Rriyul’ ni yad ma oloboch, ni bod Peter, machane be yog e Bible ko girdien e ulung ni ngar folgad rok e pi girdi’ nem ni yad ba flaab. (Hebrews 13:17) Bay thibngirad machane gathi aram tapgin ni ngan nog boch e thin nib kireb u mornaagrad. Yog Peter ni pi engel e “darir rogned e thin nib kireb ngak e pi cha’nem [pi tamachib ni goo bogi ban’en] u p’eowchen Somol,” ni yugu aram rogon ni bay rogon ni ngan rin’. Ma ke ul’ul’ Peter ngay ni gaar: “Machane pi girdi’ ney e yad be ngongol ni n’en ni yad be ar’arnag e ir e be gagiyegnagrad, ni bod rogon e gamanman ni maloboch ni kan gargelegrad ni nge kolrad e girdi’ ngan li’rad; ma pi girdi’ nem e yad ma yog e thin nib kireb nga bogi ban’en dar nanged fan. Ma bay nli’rad ngar m’ad ni bod rogon e gamanman ni maloboch; puluwon ni bay ni pi’ ngorad e gafgow, ni bochan e gafgow ni kar tiyed ko girdi’.”​—2 Peter 2:10-13.

“Ngiyal’ Ni Yad Ma Un Ngomed . . . Ko Abich”

15. Uw rogon ni ma bannag e pi tamachib ni goo bogi ban’en e girdi’, ma u uw e yad ma guy rogon ni ngar waliyed e girdi’ riy?

¹⁵ Pi girdi’ nem nib kireb e “rogon e falfalan’ ni yad ma tay e ngar ngongliyed u lan e tamilang e tin ni ir e be ar’arnag e dowef rorad nge tin ni ir e yad be yim’ ni bochan” ma yad ma “girngiy e tamra’ nge ngachal nib kireb i yib,” maku yad ba sasalap. Yad ma rin’ boch ban’en nib “mith,” mi yad yog e “machib ni yad e sum rorad,” ya arrogon ni yog Peter faram. (2 Peter 2:1, 3, 13) Ere sana dabi gagiyel e togopuluw ni yad be tay ko piin piilal ni yad be guy rogon ni ngan fol ko motochiyel rok Got ma dabi tamilang ni yad be lek e tin ni yad be ar’arnag ko ngongol ndarngal. Ya yog Peter ni “ngiyal’ ni yad ma yib ra uned riy ngomed ko muulung nge abich, ma yad be falfalan’ ko pi ngongol ni yad be rin’ ni ir e yad be bannag e girdi’ ngay.” Miki yoloy Jude ni gaar: “Yad bod bochi malang ni bay u maday ni be par nib mith ko ngiyal’ ni kam tiyed bochi abich ko t’ufeg.” (Jude 12) Arrogon, bod rogon e pi malang u maday ni rayog ni nge kirebnag tanggin e barkow, me n’igin nge limach e sala, maku arrogon e pi tamachib ni goo bogi ban’en ni rayog ni ngar kirebnaged e girdi’ ni yad be dake yad ba t’uf rorad u nap’an e “abich ko t’ufeg” ni ur ted.

16. (a) Mang fapi “abich ko t’ufeg,” ma u uw e rayog ni nge waliy e piin nib kireb e girdi’ riy ko ngiyal’ ney? (b) Pi tamachib ni goo bogi ban’en e yad ma guy rogon ni ngar waliyed mini’, me ere mang e thingara rin’ed e piin ni aram rogon?

¹⁶ Pi “abich ko t’ufeg” ney e aram fa yu ngiyal’ ni ra muulung e pi Kristiano u nap’an e bin som’on e chibog u taabang ngar abichgad mar chaggad. Ku arrogon e Pi Mich Rok Jehovah ni ku yad ma rin’ boch ban’en u taabang, ku yad ma madenomnag e m’ag pa’, fa yad ma yan ko fafel nga bang, fa yad ma yan nga bang ko balayal’. Uw rogon nrayog ko girdi’ nib kireb ni ngar waliyed yugu boch e girdi’ ko fa yu ngiyal’ i n’em? Yoloy Peter ni gaar: “Ke mus ni ppin nib darngal e yad ba adag ni ngar changargad ngorad . . . , ma yad ma waliy e piin nib meewar e lem rorad ngar awgad ko wup rorad.” Ma “lanin’rad ni ke ilal nga fithik’ e chogow” e yad ma waliy e piin ni yad meewar ko tirok Got ban’en ni dawori gel e michan’ rorad. Ere mu fil ban’en ko n’en ni buch u nap’an Peter ma ga par nib od! Mu togopuluw ko pi n’en nib kireb, ma dab mu pag ni nge waliyem be’ nib fel yaan fa bfel’ e thin rok ni be guy rogon ni ngam un ngak ko ngongol nib kireb!​—2 Peter 2:14.

“Fare Pa’ i Kanawo’ ni Lek Balaam”

17. Mang fare “pa’ i kanawo’ ni lek Balaam,” ma uw rogon ni ke yib wenegan ko 24,000 e girdi’ nu Israel?

¹⁷ Pi girdi’ ney ni yad ba’ u “tan e gechig rok Got” e kar nanged e thin riyul’ nib n’uw boch nap’an. Ma sana be m’ug riy ni ka yad ba passig u lan e ulung. Machane gaar Peter: “Kar paged fare pa’ i kanawo’ nib k’iy kar olobochgad; ma kar leked fare pa’ i kanawo’ ni lek Balaam ni be’ nib moon ni Beor e chitamangin, mi Balaam e t’uf rok e salpiy ni yira pi’ ngak ni faanra ngongliy e tin nib kireb.” (2 Peter 2:14, 15) Fare pa’ i kanawo’ ni lek Balaam ni ir e profet e ke yog ni ngan waliy e girdi’ ko ngongol ndarngal ni fan ni nge yog e salpiy ngak. I yog ku Balak ni Pilung nu Moab ni ra kirebnag Got waathan yu Israel nfaanra ran waliyrad ngar uned ko ngongol ndarngal. Ma wenegan riy e boor e girdi’ rok Got e ke waliyrad e pi ppin nu Moab, ma kan li’ 24,000 i yad kar m’ad ni bochan e kar uned ko ngongol ndarngal.​—Numbers 25:1-9; 31:15, 16; Revelation 2:14.

18. Uw fene gel e athamgil ni tay Balaam, ma mang e buch ngak ni aram e n’en nra buch ko pi tamachib ni goo bogi ban’en?

¹⁸ Yog Peter ni kan taleg Balaam faani non fare gamanman ni donkey ngak machane Balaam “e t’uf rok e salpiy ni yira pi’ ngak ni faanra ngongliy e tin nib kireb” ma aram ma de tal ko “ngongol ko balyang ni ke yan ni nge ngongliy.” (2 Peter 2:15, 16) Rib kireb e re n’em! Ra gafgow e piin ni yad bod Balaam mi yad guy rogon ni ngar kirebnaged e girdi’ rok Got min waliyrad ngar uned ko ngongol ndarngal! I yim’ Balaam ni bochan e kireb rok, ma aram e n’en nra buch ko urngin e piin ni ma lek kanawoen.​—Numbers 31:8.

Rogon ni Yad ma Waliyey ko Ngongolen e Moonyan’

19, 20. (a) Piin ni yad bod Balaam e yad taareb rogon ko mang, ma mang fan? (b) Yad ma waliy mini’ ma uw rogon? (c) Mang fan nrayog ni nga dogned ni rogon ni yad ma waliy e girdi’ e bod rogon moonyan’, ma uw rogon nrayog ni ngad ayuwgad rok nge yugu boch e girdi’ rorad?

¹⁹ Weliy Peter u morngagen e piin ni yad bod Balaam ni gaar: “Pi girdi’ nem e yad bod e alublub [ara, luwed] ndakir yib e ran riy, ma yad bod e manileng ni be yannagrad e nifeng nib gel.” Rayog ni nge yim’ be’ ni be yan u lan e gin ndariy e ran riy nfaanra dakuriy e ran ko luwed. Aram fan ni “Got e ke tay tagil’rad ko gin nrib talumor” ni fan ko piin ni aram rogon! Ke ul’ul’ Peter ngay ni gaar: “Yad ma yog e thin nib ufanthin nge thin ko balyang, ma yad be maruwel nga ngongolen e darngal ni be ar’arnag e dowef rorad ni fan e nge aw ko wup rorad e piin ni ka fini chuw u fithik’ e girdi’ ni ke oloboch.” Miki gaar Peter ni yad ma waliy e girdi’ mi yad yog ni yad e girdi’ ni “ba puf rogorad ni ngar rin’ed e tin ni yad ba adag,” machane “kar pired ni kar manged sib ko ngongol ni ma kirebnigey ni ke mecham ngorad.”​—2 Peter 2:17-19; Galatia 5:13.

²⁰ Pi tamachib nem e ma ngongol ni bod moonyan’ ni ngar waliyed e girdi’. Susun, sana yad ra gaar: ‘Goo manang Got ni bay thibngidad ma gad meewar ko tin ni gad ma ar’arnag. Ere faanra gad ra un ko pi n’em ni gad be ar’arnag ma gad felan’ riy, ma aram e ra runguydad Got. Ma faanra gad ra weliy e pi n’en ni kad denengad riy ngak, ma ra n’ag fan rodad ni bod rogon ni ke rin’ u nap’an ni ka fin da uned ko taufe.’ Mu lemnag ni aram rogon ni yog fare Moonyan’ ngak Efa, ni ke micheg ngak ni rayog ni nge denen ndabni gechignag. Ma ke yog ku Efa ni faanra ra denen nib togopuluw ku Got ma aram me tamilangan’ ma ra puf rogon ni nge rin’ e tin ni ba adag. (Genesis 3:4, 5) Faanra bay be’ u lan e ulung ni aram rogon ma mil fan ngodad ni ngad ayuwgad rok ma gad yog ko piin ni ma tay morngaagen e ulung ko Kristiano.​—Levitikus 5:1.

Tamilangan’ nib Riyul’ E Ra Ayuwegey

21-23. (a) Mang wenegan e dan fol ko tamilangan’ nib riyul’? (b) Ku mang reb e magawon ni weliy Peter morngaagen ni yira weliy ko bin migid e thin?

²¹ Tin tomur e thin ni yog Peter ko babyor rok e be weliy ko mang wenegan e dan fol ko tamilangan’ ni ir e tamilangan’ ni ba t’uf ko “yafas nge pigpig ku Got.” (2 Peter 1:2, 3, 8) Ke yoloy ni gaar: “Ya faanra chuw e girdi’ u fithik’ e tin nib kireb e ngongol u roy u fayleng ni ir e ma kirebnigey ni bochan e kar nanged e Somol rodad i Jesus Kristus ni ir e ma thapegdad ngak Got, mi ki kolrad e kireb bayay nge gel ngorad, ma aram e pi girdi’ nem e yad ra par ni ke gel boch e kireb rorad ko som’on.” (2 Peter 2:20) Rib gel e kireban’ riy! Girdi’ ni aram rogon u nap’an Peter e kar n’aged e athap ko yafas ndariy n’umngin nap’an u tharmiy ni fan ni ngar felan’gad ko ar’ar ko ngongol ndarngal nib ngoch nap’an.

²² Ere gaar Peter: “Ya kab fel’ ni faan mang e ur pired ndar nanged kanawoen e mat’aw ko bin ni kar nanged mi yad pi’ keru’rad ko fare motochiyel nib thothup ni kan pi’ ngorad! Ya n’en ni kar rin’ed e ke m’ug riy ni fare bugithin ni yima yog e ba riyul’ ni faani ke lunguy: ‘Pilis e ma sul ko n’en nike sul u l’ugun nga but’, ma ba babiy ni kan luknag downgin ke beech e ma sul nge yan i pig u fithik’ e bar.’”​—2 Peter 2:21, 22; Proverbs 26:11.

²³ Ku reb e magawon ni yib ko tin som’on e Kristiano e aram ban’en ni ma magawonnag boch e girdi’ ko ngiyal’ ney. Ngiyal’ nem ma immoy boch e girdi’ ni yad be gun’gunnag ni dawori taw ko ngiyal’ nra sul Kristus. Ngad yaliyed ko mang e yog Peter u morngaagen e re n’ey.

Ka Ga Manang?

◻ Mang dalip i n’en ni weliy Peter mornaagen ni ma ginangey?

◻ Uw rogon ma pi tamachib ni goo bogi ban’en e “darir ted fan e piin ni kan tayrad nib baga’ lungurad”?

◻ Uw rogon fare pa’ i kanawo’ ni lek Balaam, ma uw rogon nrayog ko piin ni be lek e re kanawo’ nem ni ngar waliyed e girdi’?

◻ Mang wenegan e dan fol ko tamilangan’ nib riyul’?

[Sasing ko page 23]

N’en ni buch ku Balaam e ma ginangey