Ma Lebuguy Jehovah E Tin Ni Ke Micheg Nra Rin’ Ko Piin Nib Yul’yul’ Ngak
“Ba pagan’dad ngak Got nra rin’ e tin ni ke yog.”—HEBREWS 10:23.
1, 2. Mang fan nrayog ni ngad pagedan’dad ko n’en ni yog Jehovah nra rin’?
BA T’UF ku Jehovah ni nge mudugil e michan’ ko pi tapigpig rok ngak nge tin ni ke yog nra rin’. Ra michan’ be’ ni aram rogon ma ra pagan’ ngak Jehovah ni nge rin’ e n’en ni ke yog nra rin’. Thin Rok e be gaar: “I micheg Jehovah ko pi salthaw ni gaar: ‘Rogon ni kug lemnag ma aram rogon nra buch; ma fonow ni kug pi’ e ra riyul’.’”—Isaiah 14:24.
2 Pi thin nem ni “I micheg Jehovah ko pi salthaw,” e be dag ni kari mudugilan’ ni nge rin’ e tin ni ke micheg. Aram fan nrayog ni nge yog ko Thin Rok ni gaar: “Mu pagan’um ngak [Jehovah] u polo’ i lanin’um, ma ri dab mu tor ko tin ni ga be finey ni ga manang. Nguum lemnag [Jehovah] u fithik’ urngin ban’en ni ga be rin’, me dag ngom e bin nib mat’aw e kanawo’.” (Proverbs 3:5, 6) Nap’an ni gad ra pagan’ ngak Jehovah ma ngad paged e gonop rok ni nge pow’iydad, ma dabi siy ni gad ra sor iyan ko yafas ni manemus, ya gonop rok Got e bod rogon “ba ke gek’iy ni yugu be k’uf ma be pi’ e yafas ni manemus ko piin nra yan ngay.”—Proverbs 3:18, NW; John 17:3.
Bin Riyul’ e Michan’ Nkakrom
3. Uw rogon ni dag Noah ni ke michan’ ku Jehovah?
3 Pi n’en ni rin’ Jehovah ni fan ko piin nib riyul’ ni ke michan’rad ngak e be micheg ni rayog ni ngan taga’ nga daken. Susun, boor ko 4,400 e duw faram me yog Got ku Noah ni yira gathey e fayleng ko ngiyal’ nem ko ran. I yog ku Noah ni nge toy ba arke ni baga’ ni fan ni nge par e girdi’ nge gamanman riy mi yad magay nib fas. Mang e rin’ Noah? Hebrews 11:7 e be weliy ni gaar: “Michan’ rok Noah ngak Got e ir e ayuweg Noah nge motoyil ko tin ni yog Got ngak ni murung’agen e pi n’en ni bayi taw, ni bogi ban’en ndabiyog ni nge guy Noah e ngiyal’ nem. Me fol ko tin ni ke yog Got ngak ni nge rin’, me toy fare barkow ni ark fithingan, ni re ark nem e ir e faseg Noah nge girdi’ nu tabinaw rok.” Mang fan ni ke michan’ Noah nga ban’en ni dawori buch biyay, ni ban’en “daworni guy”? Ya ke nang u morngaagen e pi n’en ni rin’ Got ni fan ko girdi’ me nang ni yug demtrug e n’en ra yog Got ma ra riyul’. Ere ke mich u wan’ Noah ni ra yib fare ran ni nge tharey e fayleng.—Genesis 6:9-22.
4, 5. Mang fan ni kari pagan’ Abraham ku Jehovah?
4 Abraham e ku ir reb e girdi’ nib riyul’ e michan’ rok. Ke chugur ni 3,900 e duw faram me yog Got ngak ni nge pi’ Isak ni maligach, ni aram fak ni maagirag rorow Sarah. (Genesis 22:1-10) Ma mang e rin’ Abraham? Hebrews 11:17 e be gaar: “Michan’ rok Abraham ngak Got e ir e pow’iy Abraham nge pi’ Isak ni maligach ngak Got ko fa ngiyal’ nem ni faani skengnag Got gelngin e michan’ rok Abraham ngak.” Machane chi ngiyal’ nem ni be n’en Abraham ni nge pi’ Isak ni maligach me yib ba engel rok Jehovah ni nge taleg. (Genesis 22:11, 12) Ere mang fan ni ke lemnag Abraham ni nge rin’ e re n’em? Be weliy Hebrews 11:19 ni “ke pagan’ Abraham ngay nrayog rok Got ni nge faseg Isak ko yam’.” Machane uw rogon nrayog ni nge michan’ Abraham ko fas ko yam’ ndawori guy biid maku dariy e babyor ara thin ni be yog ni ngan faseg be’ ko yam’ u m’on faram?
5 Mu tay fanam iyan riy ni ke gaman 89 e duw rok Sarah ko ngiyal’ ni ke yog Got ni ra diyennag e bitir. Dabkiyog ni nge diyennag Sarah e bitir—ya bod nib yam’ e yal rok. (Genesis 18:9-14) Ke faseg Got yin’ Sarah ko yam’, ma aram me gargelnag Isak. (Genesis 21:1-3) I nang Abraham ni ke faseg Got yin Sarah, me ere rayog ni ngki faseg Isak ko yam’ faanra ba t’uf ni ngan rin’. Roma 4:20, 21 e be weliy u morngaagen Abraham ni gaar: “Ma de maruwar Got u wan’ ma ku de maruwar u wan’ e tin ni micheg Got ni bayi rin’ ngak; me yib gelngin u daken e michan’ rok ngak Got, me pining e magar ngak Got.”
6. Uw rogon ni ke dag Joshua ni ke pagan’ ku Jehovah?
6 Ke pag 3,400 e duw faram ko ngiyal’ nib pag raay e duw rok Joshua ma n’umngin nap’an e yafas rok ma ke guy nib yul’yul’ Got, ma aram me weliy ko mang fan ni ke pagan’ ngak ni gaar: “Ri gimed manang u fithik’ i gum’er’cha’med ni dariy taa bugithin nib fel’ ni yog Jehovah ni Got romed ngomed ni ke aw nde riyul’. Ke riyul’ urngin ban’en ni micheg ni fan ngomed. Dariy reb e thin ni micheg ni de m’ag.”—Joshua 23:14.
7, 8. Mang e rin’ e pi Kristiano nib yul’yul’ u nap’an e bin som’on e chibog ni ke ayuweg e yafas rorad ma mang fan ni ur rin’ed?
7 Sogonapan 1,900 e duw faram ma boor e girdi’ nib sobut’an’rad e ur daged e bin riyul’ e michan’uy. Ya ur nanged e thin ko profet u lan e Bible ni ke lebug ma aram mi yad nang ni Jesus e ir fare Messiah ma kar folgad rok. Ke mudugilan’rad ni bochan e pi n’en ni kar nanged nib riyul’ nge bochan ni kar filed e Bin ni Hebrew e M’ag ko Bible, ma aram me michan’rad ko n’en ni fil Jesus ngorad. Ere nap’an ni yog Jesus ni ra pufthinnag Got yu Judea nge Jerusalem ni bochan e dar yul’yul’gad, ma aram me mich u wan’rad ko re n’em. Ma nap’an ni yog ngorad e n’en ni ngar rin’ed ni ngar ayuweged e yafas rorad, ma kar folgad riy.
8 Yog Jesus ko pi gachalpen ni nap’an ni ke yib e pi salthaw mar longobiyed Jerusalem, ma aram e ngiyal’ ni ngar milgad riy. Ma riyul’ ni ke yib e pi salthaw nu Roma nga Jerusalem ko duw ni 66 C.E. Ma rib tomgin ni chuw e salthaw nu Roma, ni dan nang ko mang fan. Aram e pow ko pi Kristiano ni ngar chuwgad ko re mach nem ya yog Jesus ni gaar: “Faanra mu guyed yu Jerusalem ni ke longobiy yu raba’ i salthaw, ma aram e kam nanged ndabki n’uw nap’an min kirebnag. Ma aram e piin ni yad bay u lan yu Judea e thingar ra milgad nga daken e pi burey; ma piin ni yad bay u lan e binaw e thingar ra chuwgad riy, ma piin i yad bay u wuru’ e binaw e thingar dab ranod nga lan binaw.” (Luke 21:20, 21) Piin ni bay e bin riyul’ e michan’ rorad e kar chuwgad u Jerusalem nge pi binaw u charen mar milgad ko gin ni dariy e riya’ riy.
Wenegan Nde Michan’uy
9, 10. (a) Uw rogon ni dag e pi tayugang ko teliw ni de mich Jesus u wan’rad? (b) Mang wenegan ni yib ngorad ni bochan ni de michan’rad ku Jesus?
9 Mang e ke rin’ e piin ndariy rorad e bin riyul’ e michan’? Dar milgad u nap’an nrayog. Ur lemnaged ni pi tayugang rorad e ra ayuwegrad. Machane pi tayugang nem nge piin ni ur leked yad e kan pi’ e mich ngorad ni Jesus e ir fare Messiah. Ere mang fan ndar folgad ko n’en ni yog ni ngan rin’? Ya ba kireb rarogon gum’er’cha’rad. Kan tamilangnag e re n’ey u nap’an ni kar guyed e girdi’ ni boor ni ur bad ngak Jesus u tomren ni ke faseg Lazarus ko yam’. John 11:47, 48 e be weliy ni gaar: “Ma aram me yan fapi Farise nge pi tolang ko prist ngar puruy’gad girdien e muulung rorad me lungurad: ‘Mang e ngad rin’ed? Ya ke yoor e maang’ang ni ke ngongliy e re moon nem [Jesus]! Faanra da paged ngi i yodorom ma urngin e girdi’ ni bayi mich e cha’nem u wun’rad, ma aram me pig i chel e am nu Roma ngar kirebniged e [liw] nge nam rodad.’” Ma verse 53 e be gaar: “Ka chirofen nem i yan nga m’on e ur puruy’niged rogon e n’en nra rin’ me yog nli’ Jesus ngem’.”
10 Ke fl’eg Jesus reb e maang’ang ni rib manigil—ke faseg Lazarus ko yam’! Machane pi tayugang ko teliw e yad ba adag ni ngar li’ed Jesus ngem’ ni bochan. Ma kun gagiyelnag e kireb rorad ya ke “puruy’nag e pi tolang ko prist rogon e n’en nra rin’ mu kun li’ Lazarus ngem’; ya boor piyu Israel ni yad be chuw rorad be mich Jesus u wan’rad ni bochan Lazarus. (John 12:10, 11) Ka fini fas Lazarus ko yam’, ma pi prist nem e yad ba adag ni nge yim’ biyay! Gathi yad be lemnag e n’en nib m’agan’ Got ngay ara n’en nra ayuweg e girdi’. Yad ba siin, ma yad be lemnag e liw rorad nge par rorad nib fel’ rogon. “Ya kub t’uf rorad ni ngar fel’gad u laniyan’ e girdi’ ko bin ni ngar fel’gad u laniyan’ Got.” (John 12:43) Machane ke yib wenegan ngorad ni bochan ni de michan’rad ku Jesus. Nap’an e duw ni 70 C.E., ma pi salthaw nu Roma e kar sulod mar gotheyed fare binaw nge fare nam, ma boor e girdi’ e kar m’ad.
Kan Dag e Michan’uy ko Ngiyal’ Ney
11. U tabolngin e re chibog ney ma uw rogon ni kan dag e bin riyul’ e michan’?
11 Nap’an e re chibog ney ma boor e pumoon nge ppin ni bay e bin riyul’ e michan’ rorad. Bod rogon u tabolngin e pi duw ko 1900 ma baga’ ni be lemnag e girdi’ ni ra yib e gapas nge fel’ rogon ngorad gabul nge langleth. Machane piin ni ur pagan’rad ku Jehovah e ur wereged e thin ni baaray ni yibe n’en ni nge taw ko ba ngiyal’ ni th’abi gel e magawon riy. Aram e n’en ni kan yiiynag u lan e Bible ko Matthew guruy 24, 2 Timothy guruy 3 nge yu yang. Ma ke lebug e n’en ni yog e pi girdi’ nem, u nap’an e 1914 ya ke tabab e World War I. Riyul’ ni ke taw e fayleng ko ngiyal’ ni “tin tomren e rran” ma “mo’maw e par riy.” (2 Timothy 3:1) Mang fan ni i nang e pi tapigpig rok Jehovah e thin riyul’ u morngaagen rarogon e fayleng ma de nang e yugu girdi’? Ya bod Joshua, ma ke mich u wan’rad ni dariy reb fa yu bugithin ni yog Jehovah e dabi riyul’.
12. Ngiyal’ ney ma mang e ke yog Jehovah nra rin’ ni ke pagan’ e pi tapigpig rok ngak?
12 Ngiyal’ ney ma pi tapigpig rok Jehovah ni yad ma pagan’ ngak, e ke chugur ni nge gaman nel’ e milyon u ga’ngin e fayleng. Yad manang ni be lebug e thin ko profet ni bay ko Thin rok Got me ere yad manang ni dabki n’uw nap’an ma ra chuweg Got e re m’ag ney nib kireb mab sug ko ngongol ndarngal. Ere ke mich u wan’rad ni ke chugur ko ngiyal’ ni ra riyul’ e thin ko 1 John 2:17, ni be gaar: “Re fayleng ney nge urngin ban’en ni ba’ riy ni be yim’ e girdi’ ni bochan e bayi m’ay; machane en nra rin’ e tin nib m’agan’ Got ngay e ra par nib fos ndariy n’umngin nap’an.” Kari pagan’ e pi tapigpig rok Jehovah ngak ni ra lebuguy e n’en ni ke yog.
13. Uw fene gel nrayog ni ngam pagan’um ku Jehovah?
13 Uw fene gel nrayog ni mu pagan’ ku Jehovah? Rayog ni ngam tay e yafas rom nga pa’! Mus ni ngam mum’ e chiney ni bochan ni kam par nib yul’yul’ ngak ma ra pi’ e yafas ngom ni kab fel’ ko bin baaray e yafas ya ran faseg e yam’. Yog Jesus ni gaar: “Ba’ ba ngiyal’ ni be yib ni bayi taw ngay ma gubin e yam’ ni bay u lan e low [ni aram e yad bay u laniyan’ Got] ni bayi rung’ag laman, mi yad yib u lan e low rorad nga wuru’.” (John 5:28, 29) Ga manang reb e togta ara tayugang ko am, ara scientist, ara be ni ma fol chuway’, ara yugu be’ ni rayog ni nge rin’ e re n’em? Pi n’en ni ur rin’ed faram e be dag ni dabiyog rorad. Ma rayog rok Jehovah ma ra rin’!
Ra Fel’ e Gabul nge Langleth ko Piin nib Yul’yul’
14. Mang e ke yog Jehovah u morngaagen e gabul nge langleth ni fan ko piin nib yul’yul’?
14 I dag Jesus ni rib mutrug ni ra yib e bin nib biech e fayleng u tan pa’ Gil’ilungun Got u tharmiy faani gaar: “Nge felan’ e piin nib fel’ lanin’rad, ya [yad ra tafanay e fayleng].” (Matthew 5:5) Pi thin nem e ba puluw ko n’en ni yog Got u Psalm 37:29: “Piin ni yad mmat’aw e bay ra pired u daken e [fayleng] u fithik’ e gapas, me par ni taferad ni dariy n’umngin nap’an.” Ma nap’an ni ke chugur ko ngiyal’ nra yim’ Jesus ma reb e girdi’ nib kireb e ke michan’ ngak, ma aram me yog Jesus ngak ni gaar: “Nggog ngom e daba’, ni ga ra moy rog u Paradis.” (Luke 23:43, NW.) Arrogon, Jesus e ir Pilung ko Gil’ilungun Got ma ra guy rogon ni ran faseg e re moon nem u fayleng ma rayog ni nge par u Paradis ndariy n’umngin nap’an. Ngiyal’ ney ma piin ni ma pagan’rad ko Gil’ilungun Jehovah e rayog ni nge l’agan’rad ko par u Paradis ma ra “n’ag [Got] urngin e lu’ u owcherad. Ma aram e dab ku unim’ ma dab ki i kireban’uy, ma dab ku un yor, ma dab ku un amith.”—Revelation 21:4.
15, 16. Mang fan nra gapas e bin nib biech e fayleng?
15 Ngad susunnaged ni gowa kad tawgad ko re fayleng nib biech nem. Mu lemnag ni gowa gad be par riy e chiney. N’en ni gad be guy e gubin e girdi’ ma yad ba falfalan’ ma yad be par u taabang u fithik’ e gapas. Yad be par ni bod rogon ni be yog ko Isaiah 14:7 ni gaar: “Ke toffan e fayleng ni polo’ ma dariy e wagey riy. Be tolul e girdi’ u fithik’ e falfalan’.” Mang fan ni yad be yodorom? Ya dariy e lok ko mab ko pi naun. De t’uf ya dariy e bugel nge wadmang. Bod rogon ni yog e Thin Rok Got ni be gaar: “Gubin e girdi’ ni bayi be’ me par u fithik’ e gapas u tooben e woldug rok ni grapes nge woldug ni yu ke gek’iy ni fig, ma be par ndakuriy be’ nra k’aring e marus ngak.”—Mikah 4:4.
16 Maku dakuriy e mahl, ya kan tay chilen ni dabkun mahl u lan e re fayleng nib biech nem. Urngin e talin e cham e kan ngongliy e talin e gapas ngay. Ma ke lebug nib mus rogon e thin ko Isaiah 2:4 ni be gaar: “Bay ra pirdiiyed e pi sayden rorad ngar ngongliyed talin e maruwel riy ni ma gi’ e but’, mi yad yodoromnag e pi sarey rorad nge mang yar ni yima th’ab papa’ngin e woldug ngay. Pi nam e dab kur mahlgad biyay, ma dab kur fal’eged rogorad bayay ni fan ko mahl.” Machane goo gad manang ni ra aram rogon! Mang fan? Ya boor e girdi’ u lan e bin nib biech e fayleng e goo kar filed e re n’em u nap’an ni ur pigpiggad ku Got u lan fa binem e m’ag.
17. Ra uw rogon e par u tan e gagiyeg rok Got?
17 Maku kam guy ni dariy e par nib gafgow. Dariy be’ ni ma par u lan e naun nib kireb ara be chuw ko mad nib mogchoth ara dariy e tabinaw rorad. Ya gubin e girdi’ ma bay e naun rorad nib fel’ mab fel’ yaan e binaw ya bay e gek’iy nib fel’ yaan nge floras. (Isaiah 35:1, 2; 65:21, 22; Ezekiel 34:27) Ma dakuriy e uyungol ya ke lebuguy Got e n’en ni ke yog ni ra yoor e ggan ni fan ko urngin e girdi’: “Me par e nam nib sug ko grain; me sug daken yungi ted ko woldug, nge pire’ ni bod e woldug ni bay u Lebanon.” (Psalm 72:16) Riyul’, Gil’ilungun Got e ra garareg e paradis u ga’ngin e fayleng, ni bod ni ke finey Got ko tabolngin u Eden—Genesis 2:8.
18. U lan e bin nib biech e fayleng, ma mang boch ban’en ndabki magawon e girdi’ riy?
18 Ku ga ra guy nib gel urngin e girdi’. Aram rogon ya ke flont dowrad nge lanin’rad. Dakuriy e m’ar, nge amith, nge yam’. Dariy be’ ni bay ko wheelchair ara bay u aspital. Urngin e pi n’em e ke m’ay nga bayang. (Isaiah 33:24; 35:5, 6) Ma mus ko pi gamanman e dabkun rus ngorad, ya gelngin Got e ke n’igin ni ngar pared nib mongomor!—Isaiah 11:6-8; 65:25; Ezekiel 34:25.
19. Mang fan ni ra par e girdi’ nib “falfalan’” u gubin e rran u lan e bin nib biech e fayleng?
19 Rib fel’ e par ko girdi’ u lan e bin nib biech e fayleng ni yad e piin nib yul’yul’! Yad ma fanay gelngirad nge llowan’ rorad ni ngar rin’ed e pi n’en nib fel’, ma gathi tin nib kireb; ma yad ma maruwel u taabang, ma dariy e tagenging. Ma gubin e girdi’ ni ga ra mada’nag e aram be’ nrayog ni ngam pagan’um ngak ya ke yog Got ni “bayi machibnag e girdi’ [rok].” (Isaiah 54:13) Urngin e girdi’ e ra fol ko pi motochiyel rok Got, me ere ra sug e fayleng ko “tamilangan’ rok Jehovah ni bod rogon e ran ni bay u maday.” (Isaiah 11:9) Riyul’, ni gubin e rran u lan e re fayleng nib biech ney e bod rogon ni yog ko Psalm 37:11 ni “bay ra pired ni yad ba felfelan’.”
Rib Mutrug ni Ra Moy e Falfalan’ Gabul nge Langleth
20. Mang e thingarda rin’ed ni ngad uned ko par u fithik’ e gapas nga m’on?
20 Mang e thingarda rin’ed ma gad un ko re par nem nib falfalan’ nga m’on? Isaiah 55:6 e be yog ni gaar: “Mu chelgad ngak [Jehovah] nguum meybilgad ngak e chiney ni ba’ ni kab chugur ngomed.” Ma nap’an ni gad be pining ma susun ni nge puluw e lem rodad ko pi thin ko Psalm 143:10 ni be gaar: “Mu fil rogon ngog ni nggu rin’ e tin nib m’agan’um ngay yi gur e Got rog.” Piin ni ma yodorom e rayog ni nga ranod u p’eowchen Jehovah ko ngiyal’ ney ni tin tomren e rran mi yad athapeg e par nib fel’ nga m’on. “Mup’ owchem ngak e en nib fel’, mu um yaliy e tin ni be rin’ e en nib mat’aw; ya ra par e en ni aram rogon u fithik’ e gapas nga m’on. Machane piin ni ta denen e bay nthang owcherad; ma ran taleg e gabul nge langleth ni fan ko piin nib kireb.”—Psalm 37:37, 38.
21, 22. Mang e be fl’eg Got rogon e ngiyal’ ney, ma uw rogon ni yibe skulnag e girdi’?
21 Chiney ma be pining Jehovah e girdi’ u gubin e nam ni ngar bad ngak ni yad e piin ni ba adag ni ngar rin’ed e tin nib m’agan’ ngay. Be kunuyrad nga taabang ni yad e def ko ulung rok u fayleng, ya arrogon ni kan yiiynag u lan e Bible ni gaar: “Tin ni bay yib e rran nga m’on [ni aram e ngiyal’ ni gad bay riy] . . . ma girdi’ ko pi nam e bayi lungurad: ‘Nga darod ko fare burey [ni bin riyul’ e liyor nib tolang] rok [Jehovah] . . . Ya ra fil ngodad e n’en ni ba adag ni ngad rin’ed, mu udarod ko yu pa’ i kanawo’ ni ke turguy ni nga darod riy.’”—Isaiah 2:2, 3.
22 Revelation 7:9 e be weliy u morngaagen e pi girdi’ ney ni yad ba “ulung ni baga’ . . . Nra bad u gubin e nam nge ganong, nge gubin mit e girdi’, ngu gubin e thin.” Ma verse 14 e be gaar: “Pi cha’nem e fapi girdi’ ni kar thapgad ngaray u fithik’ fare gafgow ni baga’ ntay ngorad,” ni kar magaygad nib fas u nap’an nra thumur e re m’ag ney. Re def ney ko fa bin nib biech e fayleng e ke chugur ni nge gaman nel’ i milyon e girdi’, ma boor e girdi’ e ku be un ngorad u gubin e duw. Urngin e pi girdi’ ney ni yad e pi tapigpig nib yul’yul’ rok Jehovah e yibe skulnagrad e chiney ko par u lan e bin nib biech e fayleng. Yad be fil e pi n’en nib spiritual nge yugu boch ban’en nib t’uf ni ngar ngongliyed e paradis ko re fayleng ney. Ma kari pagan’rad ni ra riyul’ e Paradis ya “ba yul’yul’ e en ni ke micheg nra rin’.”—Hebrews 10:23.
Boch e Thin ni Ngan Sul Nga Daken
◻ Mang wenegan ni yib ko girdi’ ni de mich Jesus u wan’rad u nap’an e bin som’on e chibog?
◻ Uw fene gel nrayog ni nge pagan’ e pi tapigpig rok Got ngak?
◻ Mang e bay nga m’on ni fan ko piin nib yul’yul’?
◻ Mang e thingarda rin’ed ni nge mudugil ni ngad uned ko falfalan’ nga m’on u lan e bin nib biech e fayleng rok Got?