Mfolwok Rok Jehovah—Mu Rin’ E Tin Nib Yal’uw Nge Tin Nib Mat’aw
“I gag Jehovah e gub gol, ma gu ma rin’ e tin nib yal’uw nge tin nib mat’aw u fayleng. Ereray e pi n’en ni gub adag.”—JEREMIAH 9:24, New World Translation.
1. Mang flaab ni ke micheg Jehovah morngaagen?
I MICHEG Jehovah ni ra yib e ngiyal’ ni urngin e girdi’ e yad ra nang ko ir mini’. U daken Isaiah ni profet e gaar: “Zion nib thothup ni aram fare burey rok Got e ra par ndariy e kireb riy ara ban’en nra maad’ad ngak be’. Ma girdi’ ko nam e ri bayi tamilangan’rad u morngaagen [Jehovah] ni bod rogon lan e yungi day nib sug ko day.” (Isaiah 11:9) Rib fel’ e re n’em!
2. Uw rogon ni ngan nang Jehovah? Mang fan?
2 Machane uw rogon ni ngan nang Jehovah? I tamilangnag Jehovah ngak Jeremiah e n’en nib baga’ fan: “Faanra manang be’ ni gag [Jehovah] e gub gol, ma gu ma rin’ e tin nib yal’uw nge tin nib mat’aw u fayleng. Ereray e pi n’en ni gub adag. I gag [Jehovah] e ku gog e pi thin ney.” (Jeremiah 9:24) Ere rogon ni ngan nang Jehovah e ba muun ngay ni ngan nang rogon ni ma rin’ e tin nib yal’uw nge tin mmat’aw. Faanra gad ra folwok rok ko pi n’en nem ma aram e ra felan’ ngodad. Uw rogon nrayog ni ngad yodoromgad? U lan e Thin Rok ni bay ko Bible me weliy Jehovah rogon ni ke ngongol ngak e girdi’ u lan bokum e duw. Faanra gad ra fil ma rayog ni ngad nanged e kanawo’ rok Jehovah ko tin nib yal’uw nge tin nib mat’aw ma aram e rayog ni ngad folwokgad rok.—Roma 15:4.
Ba Yal’uw Maku Ma Runguy
3, 4. Mang fan nib puluw e n’en ni rin’ Jehovah u nap’an ni ke thang yu Sodom nge yu Gomorrah?
3 Rogon ni kan pufthinnag yu Sodom nge yu Gomorrah e be tamilangnag ko uw rogon ni ma rin’ Jehovah e tin nib yal’uw. Ke pi’ Jehovah e gechig ko ngiyal’ nib t’uf miki ayuweg e piin ni bay rogon ni ngan ayuwegrad. Ba rogon ni ngan gothey e gali mach nem fa? De lemnag Abraham ni arrogon, ya dawori nang rogon fene gel e kireb ko yu Sodom. Yog Jehovah ngak Abraham nfaanra bay ragag e girdi’ nib mat’aw u lan e re mach nem ma dabni thang. Ere ba tamilang ni rogon ni ma rin’ Jehovah e tin nib yal’uw e der rin’ ban’en nib gur ma der rin’ ban’en ndariy e runguy riy.—Genesis 18:20-32.
4 Yaliy l’agruw e engel e re mach nem ma bay e mich riy ni rib kireb e ngongol rorad. Faani nang e pi pumoon ko re mach nem ni yad e “tin ni pagal nge tin ni ke pillibthir” ni ke yib l’agruw e pumoon nga tafen Lot ma ranod ngaram ni fan ni ngar uned ko ngongol ndarngal ko gal moon nem u fithik’ e yargel. Rib gel e kireb rorad! Dariy e maruwar riy ni ba mat’aw e gechig ni pi’ Jehovah ko re mach nem.—Genesis 19:1-5, 24, 25.
5. Uw rogon ni ke ayuweg Got Lot nge tabinaw rok me chuwegrad u Sodom?
5 Tomren ni ke weliy apostal Peter u morngaagen yu Sodom nge yu Gomorrah ni kan thangrad me yoloy ni gaar: “[Jehovah] e manang rogon ni nge ayuweg e piin ni yad ma fol rok ko gafgow ni ma yib ngorad.” (2 Peter 2:6-9) Dabi yal’uw nfaan manga ke un Lot nge tabinaw rok ko magothgoth ko piyu Sodom. Ere engel rok Jehovah e ke ginang Lot u morngaagen e magothgoth ni be yib. Nap’an ni ke yooran’ Lot ma “aram rogon ma be runguy Jehovah Lot” me kol fagal engel pa’ Lot nge ppin rok nge fagali rugod ni fak ngar pow’iyew yad nga wuru’ fare binaw. (Genesis 19:12-16) Rayog ni nge mich u wan’dad ni ku ra runguy Jehovah e piin nib mat’aw u nap’an ran thang e re m’ag nib kireb ney.
6. Mang fan nsusun ni dabi magafan’dad ko ngiyal’ ni ran thang e re m’ag nib kireb ney?
6 Ngiyal’ ntungun e re m’ag ney e ba ngiyal’ ni aram e “pi rran ko gechig”, machane susun ndabi magafan’dad ngay. (Luke 21:22) Ya gechig ni ra pi’ Got u nap’an Armageddon e ra aw nib “yal’uw.” (Psalm 19:9) Bod rogon ni ke tamilang u wan’ Abraham ma rayog ni ngad pagedan’dad ku Jehovah ni nge rin’ e tin mat’aw, ma ra rin’ u rogon ni kab tolang ngodad. I fith Abraham ni gaar: “Tapufthin ko fayleng ni polo’ e nge ngongol nib yal’uw fa?” (Genesis 18:25; mu taarebnag ko Job 34:10.) Fa rogon ni yog Isaiah ni gaar, “mini’ e ke yan [Jehovah] ngak ni fan e nge nang ban’en me tamilangan’ riy me fil rogon i ngongliy ban’en?”—Isaiah 40:14.
Ban’en nib Mat’aw ni Kan Rin’ ni Fan ko Girdi’
7. Uw rogon nib peth e tin nib yal’uw ni ma rin’ Got ko runguy?
7 Tin nib yal’uw ni ma rin’ Got e gathi ke mus ni ma gechignag e piin nib kireb. Yog Jehovah ni ir “ba Got nib mat’aw ma ma ayuweg e girdi’.” (Isaiah 45:21, NW) Ma felngin Got nib mat’aw mab yal’uw e ba peth nga rogon ni ba adag ni nge ayuweg e girdi’ ni bochan wenegan e denen. Fare babyor ni The International Standard Bible Encyclopedia, 1982 Edition, e be weliy u morngaagen e re n’ey ni “Rogon ni ma rin’ Got e tin nib yal’uw e ma guy rogon ni nge dag e runguy ma nge ayuweg e girdi’.” Machane gathi nib t’uf ni nge puthuy Got e runguy ko tin nib yal’uw ni ma rin’ ya runguy e be tamilangnag felngin Got nib yal’uw. Ma fare biyul’ ni pi’ Got ni nge ayuweg e girdi’ e aram e n’en th’abi fel’ ni be dag e ngongol rok Got nib yal’uw.
8, 9. (a) Mang e ba muun ngay ko fare “ngongol nib mat’aw” ni kan rin’? Mang fan? (b) Mang e ba adag Jehovah ni ngad rin’ed?
8 Ba tolang puluwon fare biyul—ni aram e yafas ku Jesus Kristus ni ir Fak Got ni kari maagirag rok—ma aram rogon ya pi motochiyel rok Jehovah e fan ko urngin ban’en ma mus ngak ni ma fol riy. (Matthew 20:28) Ke mul e yafas nib flont u pa’ Adam, me ere ku ba t’uf reb e yafas nib flont ni ngan biyuliy e girdi’ ni yad pi fak Adam. (Roma 5:19-21) Yog apostal Paul u morngaagen e tin ni rin’ Jesus nib yul’yul’ nib muun ngay fare biyul ni pi’, me yog ni aram ba “ngongol nib mat’aw.” (Roma 5:18, footnote) Mang fan? Ya rogon u wan’ Jehovah e ba mat’aw mab yal’uw ni ngan pi’ e biyul ni fan ko girdi’ ni mus ni faanra thingari gafgow be’ ni nge rin’. Pi fak Adam e bod “baley i rouy ni ke m’ing,” ni dabun Got ni nge kirebnag, fa bod “ba magal ni be n’en ni nge math,” ma dabun Got ni nge thang. (Matthew 12:20) I mich u wan’ Got ni ra moy boch e pumoon nge ppin ni yad pi fak Adam ni yad ra par nib yul’yul’ ngak.—Mu taarebnag ko Matthew 25:34.
9 Susun uw rogon u wan’dad e re n’ey ni kan rin’ u fithik’ e t’ufeg nge rogon nib yal’uw? Reb e ban’en ni ba adag Jehovah ni ngad rin’ed e ngad “rin’ed e tin nib yal’uw.” (Mikah 6:8) Uw rogon nrayog ni ngad rin’ed?
Ngan Gay e Tin nib Yal’uw, Min Lek e Tin Mat’aw
10. (a) Mang reb e kanawo’ ni gad ma rin’ e tin nib yal’uw riy? (b) Uw rogon nrayog ni ngad mon’eged e tin nib mat’aw rok Got?
10 Som’on ma thingarda folgad ko pi motochiyel rok Got ni ma sor fan ko gafarig nib fel’. Pi motochiyel rok Got e ba yal’uw mab mat’aw, ere gad ra rin’ e tin nib yal’uw u nap’an ni gad ra fol riy. Aram e n’en ni ba adag Jehovah ni nge rin’ e girdi’ rok. Yog Jehovah ngak piyu Israel ni gaar: “Mi gimed fil rogon i rin’ e tin nib mat’aw. Mu guyed rogon ngan rin’ e tin nib yal’uw.” (Isaiah 1:17) Ku aram e n’en ni yog Jesus ngak e piin ni ur rung’aged fare welthin ni pi’ u daken fare Burey faani yog ni ngar ‘m’oneged u wan’rad e gagiyeg rok Got nge tin nib mat’aw rok.’ (Matthew 6:33, NW.) Yog Paul ku Timothy ni nge “athamgiliy e tin nib mat’aw.” (1 Timothy 6:11) Nap’an ni gad ma ngongol nib puluw ko pi motochiyel rok Got ma gad yin’ e bin nib biech i pangidad nga dakendad ni bod e munmad, ma aram e gad be lek e tin nib yal’uw nge tin nib mat’aw. (Efesus 4:23, 24) Ere rogon ni ngan gay e tin nib yal’uw e ngan ngongol u rogon ni ba adag Got.
11. Mang fan ma uw rogon nsusun ni ngad togopuluwgad ndabda paged e denen nge gel ngodad?
11 Goo gad manang ni gathi ba mom ko girdi’ ni ngar rin’ed e tin nib yal’uw nge tin nib mat’aw ya dar flontgad. (Roma 7:14-20) Yog Paul ko pi Kristiano nu Roma ni ngar togopuluwgad ko denen ndabra paged ni nge gel ngorad, ma aram e rayog ni ngar pied yad ngak Got ni bod e “talin e cham ni fan ko tin nib mat’aw,” ni ra fanay Got ni nge rin’ e tin nib m’agan’ ngay. (Roma 6:12-14) Ku arrogon gadad ni faanra gad ra fil e Thin Rok Got u gubin ngiyal’ ma gad fol riy ma aram e rayog ni nge “llowan’nagdad Jehovah” ma ngan ‘fonownagdad u rogon e ngongol nib mat’aw.’—Efesus 6:4; 2 Timothy 3:16, 17.
12. Mang e susun ni ngad siyeged ni ngad ngongolgad ngak e girdi’ u rogon ni gad ba adag ni nge ngongol Jehovah ngodad?
12 Bin l’agruw, ma gad ma rin’ e tin nib yal’uw u nap’an ni gad ma ngongol ngak e girdi’ u rogon ni gad ba adag ni nge ngongol Jehovah ngodad. Ba mom ni ngad fanayed l’agruw e motochiyel—reb ni fan ngodad ni ma pag ni ngad rin’ed boch ban’en ma reb nib gel ni fan ko yugu girdi’. Gad ma tawey ni fan ko tin ni gad ma rin’ nib oloboch, machane rib papey ni gad ma thibthibnag e yugu girdi’ ko boch ban’en ni sana ban’en ni kab achig nga thibngidad. I fith Jesus ni gaar: “Ere mang fan ni ga be sap nga ba tabyu’ ni bay u lan mit walagem, ma damur tiyan’um nga ba ley i gek’iy ni bay u lan owchem?” (Matthew 7:1-3) Susun ndabda paged talin ni dabiyog ni ngad pared nfaanra ra yaliy Jehovah e pi n’en ni kad rin’ed nib oloboch. (Psalm 130:3, 4) Faanra ngongol nib yal’uw rok Jehovah e ra pag ni nge n’ag fan e tin nib meewar ko pi walagdad, ma gad mini’ ni ngad turguyed e kireb ko pi cha’ nem?—Roma 14:4, 10.
13. Mang fan ni ra lemnag be’ nib mat’aw ni thingari wereg fare thin nib fel’ ko Gil’ilungun Got?
13 Bin dalip, gad ma rin’ e tin nib yal’uw u nap’an ni gad ma pasig ko machib. Yog Jehovah ngodad ni gaar: “Dab mu tel ni ngam rin’ e tin nib fel’ ngak e piin ni bay rogorad ni ngan rin’ ngorad, nfaanra rayog ni mu rin’.” (Proverbs 3:27) Dabi mat’aw ni ngad pared ni dabda wereged fare thin ni ma pi’ e yafas ko girdi’ ni ke pi’ Got ngodad ya ba gol. Rriyul’, boor e girdi’ e dubrad e thin ni gad ma wereg, machane n’umngin nap’an ni ke turguy Got ni nge runguy e girdi’ ma susun ni nge m’agan’dad ngay ni ngad ayuweged yad ngar “pied keru’rad ko urngin e denen ni yad be rin’.” (2 Peter 3:9) Ma bod Jesus ma gad ba falfalan’ u nap’an ni rayog ni ngad ayuweged be’ nge un ko tin nib yal’uw mab mat’aw. (Luke 15:7) Ereray e ngiyal’ ni ngad ‘yunged e awoch u rogon nib mat’aw.’—Hosea 10:12.
“Pi Fak e Pilung e Ra Gagiyeg u Rogon nib Yal’uw”
14. Mang e maruwel ko piin piilal ni fan ko tin nib yal’uw?
14 Gad gubin e thingar darod ko kanawoen e mat’aw, machane piin piilal u lan e ulung ko Kristiano e ri baga’ fan ni ngar rin’ed e re n’em. Gagiyeg rok Jesus e ‘mmat’aw ma ba yal’uw.’ Ere ku arrogon e piin piilal ni thingara pared nib yal’uw. (Isaiah 9:7) Yad ma lemnag fare thin ko profet ni bay ko Isaiah 32:1 ni gaar: “Ba’ reb e rran ni bay yib ba pilung nib mat’aw, nge piin ni pi fak e pilung e yad ra gagiyeg u rogon nib yal’uw.” Pi piilal e kan dugliyrad ko kan ni thothup, ni yad e ‘tapigpig rok Got’ me ere susun ni ngar rin’ed e tin nib puluw u wan’ Got.—Titus 1:7.
15, 16. (a) Uw rogon ni ma folwok e pi piilal rok fare tachugol saf ni bay ko fanathin rok Jesus? (b) Uw rogon u wan’ e pi piilal e piin ni kar maloggad ko tirok Got ban’en?
15 I dag Jesus ni ma rin’ Jehovah e tin nib yal’uw u fithik’ e runguy nge gol nge rogon nib puluw. Ma ke guy rogon ni nge ayuweg e girdi’ ni yad ba magawon ma “nge gay ma nge thapeg ngak Got e piin ni kar maloggad.” (Luke 19:10) Bod rogon fare tachugol saf ko fanathin rok Jesus ni ke gay fare saf ni ke yan nga bang nge mada’ ko ngiyal’ ni ke pirieg, ku aram rogon e pi piilal ni yad ma gay e piin ni kar maloggad ko tirok Got ban’en ma yad ma guy rogon ni ngar pow’iyed yad ngar sulod ko yu ran’ i saf.—Matthew 18:12, 13.
16 Piin piilal e dabra turguyed e kireb ko piin ni kar denengad nib ubchiya ya yad ba adag ni ngar ayuweged yad ngar kalgadngan’rad nfaanra rayog. Yad ba falfalan’ u nap’an nrayog ni ngar ayuweged be’ ni ke sor nga bang. Ma yad ma kireban’ u nap’an dabi kalngan’ be’ ko kireb ni ke rin’. Ma aram ma yad ra fol ko motochiyel rok Got nib mat’aw ma ran tharbog facha’ nde kalngan’ ko ulung. Machane bod fare matam ni ke chuw fak rok me yan nga bang ma yad ma athapeg ni ra reb e rran ma ra ‘sul ngak.’ (Luke 15:17, 18) Ere pi piilal e ma yan i guy e piin ni kan tharbog ko ulung ni ngan tamilangnag ngorad ni rayog ni ngar sulod ko ulung rok Jehovah.a
17. Mang e ma nameg e pi piilal u nap’an ni yad be puruynag e kireb ni ke rin’ be’, ma mang e ra ayuwegrad riy?
17 Pi piilal e ba t’uf ni ngar folwokgad rok Jehovah u rogon ni ma rin’ e tin nib yal’uw u nap’an ni ngar pithiged e magawon. Piin tadenen e “ur bad mar chugurgad” ngak Jesus ya ur nanged ni ra runguyrad ma ra ayuwegrad. (Luke 15:1; Matthew 9:12, 13) Machane de pag Jesus ni ngan rin’ e tin nib kireb. Zakeus e be’ ni ma fek e salpiy ko girdi’ u fithik’ e sabanban ma taab yay nra abichgow Jesus u taabang min k’aring ni nge kalngan’ ko kireb ni ke rin’ me yal’uweg e tin nib kireb ni ke rin’ ko girdi’. (Luke 19:8-10) Pi piilal ko ngiyal’ ney e yad ma guy rogon ni ngar rin’ed e re n’em u nap’an ni yad ma muulung ko judicial hearing—ni ngar pow’iyed e en ni ke oloboch ni nge kalngan’. Faanra ba adag e girdi’ ni ngar bad ngorad ni bod Jesus, ma boor e piin ni kar rin’ed ban’en nib kireb e ra mom rorad ni ngar gayed e ayuw rorad.
18. Mang e ra ayuweg e pi piilal ngar boded e “manaf ni ngan naf ngay ko nifeng”?
18 Faanra ra runguy e piin piilal e girdi’ ma ra ayuwegrad ngar ngongolgad u rogon nib yal’uw, ma dabra rin’ed ni kaygi gel ma dariy e runguy riy. I fl’eg rogon Ezra gum’ercha’en ma gathi ke mus ni laniyan’, ni nge yog ni nge fil e tin nib yal’uw ngak piyu Israel. (Ezra 7:10) Ba gum’ercha’ nib marunguy e ra ayuweg e piin piilal ni ngar leked e thin ko Bible mar lemnaged rarogon e girdi’. Nap’an ni golnag Jesus fare ppin ni ke m’ar ni molul ma ke dag ni rogon ni ma rin’ Jehovah e tin nib yal’uw e ngan nang ko mang fan fapi motochiyel nge rogon ni ngan fol riy. (Luke 8:43-48) Piin piilal ni ma rin’ e tin nib yal’uw u fithik’ e runguy e yad bod e “manaf ni ngan naf ngay ko nifeng” ni fan ko piin ni ke thoyrad nifengin thibngirad fa nifengin e re m’ag nib kireb ney.—Isaiah 32:2.
19. Uw rogon u wan’ reb e walag ni ppin rogon ni kan yal’uweg e magawon rok?
19 Reb e walag ni ppin ni ke denen nib ubchiya e ke nang rogon ni ma rin’ Got e tin nib yal’uw. Ke gaar: “Som’on ma kug rus ni nggu non ko pi piilal. Machane ur ngongolgad ngog u fithik’ e runguy nge tay fan. Pi piilal e yad bod e matam ma gathi bod e tapuf oloboch. Kar ayuweged gag ni nggu nang fan ni dabi n’ageg Jehovah nfaanra nggu yal’uweg e kanawo’ rog. Kug nang rogon ni ma fonownagdad ni bod e Matam ni ma t’ufeg e bitir rok. Ere kug bing gum’ercha’eg ngak Jehovah, me mich u wan’ug ni ra motoyil ngog. Ma chiney e kug sap nga tomur ma rayog ni nggog ni nap’an ni kug muulunggad e pi piilal medlip e duw faram ma aram ba taw’ath rok Jehovah. Ya ka aram ma ke gel e fel’ u thilmow.”
Mu Par nib Yal’uw ma Ga Rin’ e Tin nib Mat’aw
20. Mang angin ni ra yib ni ngan nang fan min rin’ e tin nib yal’uw nge tin nib mat’aw?
20 Rogon e tin nib yal’uw ni ma rin’ Got e gathi ke mus ni ma pi’ puluwon e girdi’ u rogon e ngongol rorad. Ya rogon ni ma rin’ Jehovah e tin nib yal’uw e ke k’aring ni nge pi’ e yafas ni manemus ngak e piin ni ke michan’rad ngak. (Psalm 103:10; Roma 5:15, 18) Ma ngongol Got ngodad ni aram rogon ya ma lemnag rarogodad nge salpedad ma ma guy rogon ni nge ayuwegdad ma gathi nge pufthinnagdad. Rriyul’ gad ra chugur ngak Jehovah ni faanra gad ra nang fan rogon ni ma rin’ e tin nib yal’uw. Ma nap’an ni gad ma athamgil ni ngad folgad rok ko re n’em ma ra flaab e yafas rodad nge yafas ko yugu boch e girdi’. Gad ra lek e tin nib yal’uw ma dabi siy ni ra guy e Chitamangidad nu tharmiy. I micheg Jehovah ngodad ni gaar: “Gimed e girdi’, mu pared ni gimed ba yal’uw, mi gimed rin’ e tin nib mat’aw. Ya ke chugur ko ngiyal’ ni gu ra thapeg e girdi’ ngog, ma gu ra ngongol u rogon nib mat’aw. Nge felan’ e en ni ma fol ko re n’ey.”—Isaiah 56:1, 2.
[Boch e Thin nra Tamilangnag Murung’agen]
a Mu guy The Watchtower, April 15, 1991, page 22-3.
Ka Ga Manang?
◻ Mang e kad filed ko fare magothgoth ni yib nga daken yu Sodom nge yu Gomorrah u morngaagen e tin nib yal’uw ni ma rin’ Jehovah?
◻ Mang fan ni be tamilangnag fare biyul e t’ufeg rok Got nge felngin nib yal’uw?
◻ Mang dalip e kanawo’ ni rayog ni ngad rin’ed e tin nib yal’uw riy?
◻ Uw rogon nrayog ko pi piilal ni ngar folwokgad rok Got mar rin’ed e tin nib yal’uw?