Ra Turguy Jehovah e “Tin ni Ir e Mmat’aw”

“Gimed be finey ma dabi turguy Got e tin ni ir e mmat’aw nra fel’ rogon e tirok e girdi’ riy ni piin ni yad be wenig ngak ni rran nge nep’?”​—LUKE 18:7.

1. Chon mini’ e ma pi’ e athamgil nga lanin’um, ma mang fan?

U FAYLENG i yan e ma felfelan’ e Pi Mich Rok Jehovah ni yad ma chag pi walagrad ni Kristiano, ni piin ni yad be pigpig ngak Jehovah u fithik’ e yul’yul’ ni ke bokum e duw. Ga manang boch e pi girdi’ nem, fa? Sana ra yib ngan’um reb e ppin ni pilibthir ni ke un ko taufe ni ke yoor e duw ma gathir ma pag e muulung u Kingdom Hall. Ara sana ra yib ngan’um reb e pumoon ni ke pilibthir ni bokum e duw ni ma un ko machib u mit e tabinaw ni gubin e wik. Sana boor e pi girdi’ ney ni yad ba yul’yul’ ni yad ra lemnag ni susun e chiney ma keb Armageddon ke chuw. Machane der meewar e michan’ rorad ni bochan e ka bay e re fayleng ney nib kireb, ma kab mich u wun’rad e pi n’en ni ke micheg Jehovah ma kab mudugil u wun’rad ni ngar ‘athamgilgad nge mada’ ko tomur.’ (Matthew 24:13) Fene gel e michan’ rok e pi tapigpig rok Jehovah ney ni yad ba yul’yul’ e ma pi’ e athamgil nga laniyan’ urngin girdien e ulung.​—Psalm 147:11.

2. Mang e ma kireban’dad ngay?

² Machane yu ngiyal’ ma gad ra guy ban’en nib thil ko re n’en ney. Boch e Pi Mich Rok Jehovah ni ma machib ni bokum e duw, machane munmun me meewar e michan’ rorad, mi yad tal ni dabkur uned ko ulung ni Kristiano. Ma kireban’dad ngay ni ma pag boch e girdi’ rodad Jehovah, ma ri gad ba adag ni ngada ayuweged urngin e “saf ni ke malog” ni ngar sulod ko ulung. (Psalm 119:176, NW; Roma 15:1) Gali ney nib thil​—ni boch e girdi’ e yad ba yul’yul’ ma boch e girdi’ e ke meewar e michan’ rorad—​e ma yibnag boch e deer nga lanin’dad. Mang e ma ayuweg bokum e Mich Rok Jehovah ni nge par nib gel e michan’ rorad ko pi n’en ni ke micheg Jehovah; ma boch e girdi’ e ma meewar e michan’ rorad? Ra bagadad ma mang e rayog ni nge rin’ ya ngii par e michan’ rok nib gel ni ra yib “fare rran rok Jehovah nib ga’”? (Zefaniah 1:14, NW) Ngada weliyed reb e fanathin ni bay ko Gospel rok Luke.

Ba Ginang ni Fan Ngak e Piin ni Ka Yad Ba Fas ko “Ngiyal’ Nra Yib e En ni Fak e Girdi’ Riy”

3. Chon mini’ e ba ga’ nra fel’ rogorad ko fare fanathin ni murung’agen fare pin nge fare tapuf oloboch, ma mang fan?

³ U Luke guruy ni 18, e bay ba fanathin rok Jesus riy u murung’agen be’ ni ppin ni ke yim’ e pumoon rok nge reb e tapuf oloboch. Taareb rogon ko fare fanathin ni murung’agen fare pumoon ni yib e milekag nga tafen ni kada weliyed murung’agen u lan fa bin som’on e article. (Luke 11:5-13) Machane fare thin u lan e re guruy nem ko Bible ni murung’agen fare pin ni kem’ e pumoon rok nge fare tapuf oloboch e ma tamilangnag ni re fanathin nem e ba ga’ ni fan ngak e piin ni kab fas ko ngiyal’ nra “sul e en ni Fak e Girdi’ riy” ni ke pilung ko Gil’ilungun, ni tabab e re ngiyal’ i n’em ko duw ni 1914.​—Luke 18:8.a

4. Mang e i weliy Jesus murung’agen u m’on ni weliy fare fanathin u Luke guruy ni 18?

⁴ U m’on ni weliy Jesus fare fanathin me yog ni ra gagiyel e pow ko wub rok ni ke pilung u Gil’ilungun Got, ma ra wod e “uluch ni ma mat u barba’ e lan nge yan nga barba’.” (Luke 17:24; 21:10, 29-33) Machane boor ko girdi’ nib fas ko ‘ngiyal’ ko tomur’ e dab ra tayedan’rad ko fare pow nib gagiyel. (Daniel 12:4) Mang fan? Ya yad bod e girdi’ u nap’an Noah nge Lot ni dar tayedan’rad ko ginang ni pi’ Jehovah. Ngiyal’ n’em e ‘un par ni yibe abich ma yibe garbod, ma be mabgol e pumoon nge ppin nge yan i mada’ ko re rran ni baaram nni li’rad ni yad gubin.’ (Luke 17:26-29) Kar m’ad ni bochan e kari l’agan’rad ko tin ni yima rin’ ko yu rran ma dar tayedan’rad ko n’en nib m’agan’ Jehovah ngay. (Matthew 24:39) Ku arrogon e ngiyal’ ney ni kari mit e girdi’ ko pi n’en ni yima rin’ ko yu rran ma darur guyed e pow ni ke chugur tomren e re m’ag nib kireb ney.​—Luke 17:30.

5. (a) Chon mini’ e i ginangrad Jesus, ma mang fan? (b) Mang tapgin ni ke meewar e michan’ rok boch e girdi’?

⁵ Ba tamilang ni ke magafan’ Jesus ngay ni nge mit pi gachalpen ko tin nu fayleng, ni tirok Satan ban’en, mi yad ‘sul ko tin ni kar paged nga tomur.’ (Luke 17:22, 31) Ma aram e n’en ni buch rok boch e Kristiano. Ur sonnaged e ngiyal’ ni ra thang Jehovah e re m’ag nib kireb ney. Machane ke mulan’rad ni bochan e de yib e Armageddon ko ngiyal’ ni ur lemnaged ni nge yib riy. Me meewar e michan’ rorad ko fare n’en ni ke chugur e rran rok Jehovah ni nge pufthinnag e girdi’ riy. Me lich i yan e machib ni ur ted mi yad mit ko tin ni yima rin’ ko yu rran me munmun ma ke achig e tayim rorad ni fan ko tirok Got ban’en. (Luke 8:11, 13, 14) Munmun ‘mi yad sul ko tin ni kar paged nga tomur’​—rib gel e kireban’ riy!

Feni T’uf e “Meybil ni Gubin Ngiyal’”

6-8. (a) Mu weliy fare fanathin u murung’agen fare pin ni ke yim’ e pumoon rok nge fare tapuf oloboch. (b) Mang e yog Jesus ni fan e re fanathin nem?

⁶ Mang e rayog ni ngada rin’ed ya nge dabi meewar e michan’ rodad ni ra lebug e tin ni ke micheg Jehovah? (Hebrews 3:14) I fulweg Jesus e re deer nem u tomren ni ginang pi gachalpen ni nge dab ra sulod ko m’ag rok Satan nib kireb.

⁷ I yog Luke ni i weliy Jesus “ngorad e re fanathin ni baaray ni be fil ngorad ni gubin ngiyal’ ma nguur meybilgad ma ri dabi ngochngochan’rad.” Me gaar Jesus: “Immoy ba tapuf oloboch u reb e binaw nder tamdag ngak Got ma dariy fan e girdi’ u wan’. Ma ba’ be’ ni ppin ni ke yim’ e pumoon rok u lan e re binaw nem ni yugu be sul ngak fare tapuf oloboch ngi i wenignag mat’awun ngak ni be gaar, Mu ayuwegneg rok e toogor rog! Ba n’uw nap’an ni par fare tapuf oloboch nde m’agan’ ngay ni nge rin’, machane me munmun me gaar u wan’, Yugu ara’ rogon ndagur tamdag ngak Got ma dariy fan e girdi’ u wan’ug, machane nggu pi’ mat’awun e re pin ney ni bochan e yugu be yib i magawon ngog; ya faanra danga’ ma yugu bay i sul ma ke chalbag ngak!”

⁸ Tomren ni weliy Jesus e re fanathin nem me weliy fan fare fanathin ni gaar: “Kam rung’aged e n’en ni yog e re tapuf oloboch nem ni be’ nde yul’yul’. Gimed be finey ma dabi turguy Got e tin ni ir e mmat’aw nra fel’ rogon e tirok e girdi’ riy ni piin ni yad be wenig ngak ni rran nge nep’ ni nge ayuwegrad? Gimed be finey ma ba sowath nra ayuwegrad? Nggog ngomed nra turguy ni nge ayuwegrad me rin’ ni papey. Machane ra sul e en ni Fak e Girdi’ ma gur ra pirieg e girdi’ nu fayleng ni yad be par ni kab michan’rad ngak?”​—Luke 18:1-8.

“Mu Ayuwegneg Rok e Toogor Rog”

9. Mang kenggin e thin ni ba gagiyel ko fare fanathin u murung’agen fare pin ni ke yim’ e pumoon rok nge fare tapuf oloboch?

⁹ Ri ba gagiyel kenggin e thin ko re fanathin ney. I weliy fagali cha’ ko fare fanathin e re thin nem miki weliy Jesus. I wenig fare pin ni gaar: “Mu ayuwegneg rok e toogor rog.” I gaar fare tapuf oloboch: “Nggu pi’ mat’awun e re pin ney.” I fith Jesus ni gaar: “Gimed be finey ma dabi turguy Got e tin ni ir e mmat’aw?” Me yog murung’agen Jehovah ni gaar: “Ra turguy ni nge ayuwegrad me rin’ ni papey.” (Luke 18:3, 5, 7, 8) Ri wuin ni ra “turguy Got e tin ni ir e mmat’aw”?

10. (a) Mingiyal’ e ni rin’ e tin nib mat’aw ko bin som’on e chibog? (b) Wuin nge uw rogon ni yira rin’ e tin nib mat’aw ni fan ko pi tapigpig rok Got e ngiyal’ ney?

¹⁰ Bin som’on e chibog me taw e “pi rran ko gechig” (ara, “pi rran ni ngan fulweg taban e kireb,” Kingdom Interlinear) ko duw ni 70 C.E. u nap’an nni gothey e Jerusalem nge tempel riy. (Luke 21:22) Ngiyal’ ney ma ra turguy Got e tin ni ir e mmat’aw ni fan ko girdi’ rok u nap’an e “rran rok Jehovah nib ga’.” (Zefaniah 1:14; Matthew 24:21) Ngiyal’ nem e ra rin’ Jehovah e ‘tin nib mat’aw: ni bayi fek e gafgow nga daken e piin ni yad be gafgownag’ e girdi’ rok, me Jesus Kristus e ra “gechignag e piin nde t’uf rorad ni ngar nanged murung’agen Got nge piin ndarir folgad ko Thin nib Fel’ ni yib rok Got ni murung’agen e Somol rodad i Jesus.”​—2 Thessalonika 1:6-8; Roma 12:19.

11. Uw rogon ni ra yib e gechig ni “papey”?

¹¹ Machane, uw rogon ni gad ra nang fan e thin rok Jesus ni be micheg ni ra rin’ Jehovah e tin ni ir e mat’aw nib “papey”? Ba tamilang u lan e Thin Rok Got ni yugu aram rogon ni ‘be gum’an’nag [Jehovah] ir u puluwdad’ ma ra pi’ e gechig u ngal’an. (Luke 18:7, 8; 2 Peter 3:9, 10) Nap’an Noah e ni gechignag e piin nib kireb ni papey u nap’an ni tharey e day e fayleng. Ku arrogon u nap’an Lot nni gechignag e piin nib kireb u nap’an ni yib e nifiy u lang nga but’. I gaar Jesus: “Ereram rogon nra yan i aw ko chirofen ni nge m’ug e en ni Fak e Girdi’ riy.” (Luke 17:27-30) Ngiyal’ nem e ku ra yib e magothgoth nib tomgin mi “yad da’da’ ni ke taw e riya’ ngorad.” (1 Thessalonika 5:2, 3) Rayog ni nge michan’dad ngay ni dabi pag Jehovah ni nge par e m’ag rok Satan ni reb e rran nge pag ngal’an ni ngan rin’ e tin nib mat’aw.

“Ra Turguy e Tin ni Ir e Mat’aw”

12, 13. (a) Mang e be fil fare fanathin rok Jesus ni fare tapuf oloboch nge fare pin ni ke yim’ e pumoon rok? (b) Mang fan nib mich u wun’dad ni ra motoyil Jehovah ko meybil rodad me rin’ e tin nib mat’aw?

¹² Fare fanathin rok Jesus u murung’agen fare pin ni ke yim’ e pumoon rok nge fare tapuf oloboch e ku ma tamilangnag boch e machib. I weliy Jesus fan fare fanathin ni gaar: “Kam rung’aged e n’en ni yog e re tapuf oloboch nem ni be’ nde yul’yul’. Gimed be finey ma dabi turguy Got e tin ni ir e mmat’aw nra fel’ rogon e tirok e girdi’ riy.” Gathi be yip’ Jesus fan ni ba taareb rogon Jehovah nge fare tapuf oloboch mab taareb rogon e ngongol rok ngak e piin nib mich u wun’rad ni bod e re tapuf oloboch nem. Danga’, ya be fil ngak pi gachalpen ban’en u murung’agen Jehovah ni be dag ni rib thil e ngongol ko re tapuf oloboch nem nge Got. Mang boch ban’en nib thil riy?

¹³ Fare tapuf oloboch ko fanathin rok Jesus e “be’ nde yul’yul’” machane Got e ir e Tapuf Thin ‘nib mat’aw.’ (Psalm 7:11; 33:5) Fare tapuf oloboch e de tay fan fare pin ni ke yim’ e pumoon rok, machane ma runguy Got e girdi’ ni be’ nge be’. (2 Kronicles 6:29, 30) De m’agan’ fare tapuf oloboch ni nge ayuweg fare pin, machane m’agan’ Jehovah ngay​—arrogon, ri ba adag—​ni nge ayuweg e piin ni yad ma pigpig ngak. (Isaiah 30:18, 19) Mang e gad be fil riy? Faanra motoyil fare tapuf oloboch ko fare pin me turguy e tin nib mat’aw ni fan ngak, ma ka ba ga’ e n’en ni ra rin’ Jehovah ni nge motoyil ko pi meybil rok e girdi’ rok ma ri mutrug ni ra rin’ e tin nib mat’aw nge fel’ rogorad riy!​—Proverbs 15:29.

14. Mang fan ni dabi maruwaran’dad ko ra yib e rran rok Jehovah ni nge pufthin fa?

¹⁴ Ere piin ni ke meewar e michan’ rorad ni ri ra yib e rran rok Jehovah ni nge pufthinnag e girdi’ riy e kari gel e oloboch rorad. Mang fan? Ya nap’an ni ke meewar e michan’ rorad ni ke chugur e “rran rok Jehovah nib ga’” ma ke maruwan’rad ko rayog ni nge pagan’uy ngak Jehovah ni rayog ni nge yul’yul’ nge lebguy e tin ni ke micheg. Dabiyog ni nge dabi yul’yul’ Got. (Job 9:12) N’en nib maruwar riy e gadad ko gad ra par nib yul’yul’, fa? Ma aram e n’en ni fith Jesus u tomren ni weliy fare fanathin u murung’agen fare pin ni ke yim’ e pumoon rok nge fare tapuf oloboch.

“Ma Gur, Ra Pirieg e Re Michan’ Ney u Fayleng?”

15. (a) Mang deer e fith Jesus, ma mang fan? (b) Mang e thingar da fithed gadad riy?

¹⁵ I fith Jesus e re deer ney: “Nap’an nra sul e en ni Fak e Girdi’ ma gur, ra pirieg e re michan’ ney u fayleng, fa?” (Luke 18:8, NW footnote) Nap’an ni yog Jesus e “re michan’ ney” ma gathi be weliy murung’agen urngin e michan’, ya be weliy murung’agen ba miti michan’​—ni aram e bod michan’ rok fare pin ni ke yim’ e pumoon rok. De pi’ Jesus e fulweg ko deer rok. Ya i fith e re deer nem ya nge lemnag pi gachalpen rarogon e michan’ rorad. Be meewar e michan’ rorad yad be sul ko pi n’en ni kar paged nga keru’rad, fa? Ara bay e michan’ rorad ni bod e michan’ ko fare pin, fa? Ku arrogodad e ngiyal’ ney ni thingar da fithed ko, ‘Ba miti mang michan’ e ra pirieg e en ni “Fak e Girdi’” u gum’irchaeg?’

16. Miti mang michan’ e bay rok fare pin ni ke yim’ e pumoon rok?

¹⁶ Ra ngad pared u fithik’ e piin ni ra turguy Jehovah e tin nib mat’aw ni fan ngorad ma thingar da folwokgad rok fare pin ni ke yim’ e pumoon rok. Miti mang michan’ e bay rok? I m’ug e michan’ rok ni “yugu be sul ngak [fare tapuf oloboch] ngi i wenignag mat’awun ngak ni be gaar, Mu ayuwegneg rok e toogor rog.” Yigi i wenig e re ppin nem ni nge yog ngak e tin nib mat’aw ni nge yib rok be’ nde mat’aw. Ku arrogon e pi tapigpig rok Got e ngiyal’ ney ni rayog ni nge michan’rad ngay ni ra turguy Jehovah e tin nib mat’aw ni fan ngorad​—ni yugu aram rogon ni ke pag nap’an u wun’rad. Maku yad be dag nib michan’rad ko pi n’en ni ke micheg Got ko meybil ni yugu yad ma tay​—arrogon, “yad ra wenig ngak ni rran nge nep’ ni nge ayuwegrad.” (Luke 18:7) Ma faanra tal be’ ni Kristiano i yibilay ni nge rin’ Got e tin ni ir e mat’aw, ma ra m’ug riy ni ke meewar e michan’ rok ni ra turguy Jehovah e tin nib mat’aw ni fan ko pi tapigpig rok.

17. Mang boch i fan ni nguuda meybilgad ma ngii par e michan’ rodad ni ri ra yib e rran rok Jehovah ko pufthin?

¹⁷ Rarogon fare pin ni ke yim’ e pumoon rok e ma tamilangnag ngodad ni ku bay yugu boch i fan ni nguuda meybilgad i yan. Amu lemnag boch ban’en nib thil u rarogon fare pin nge rarogodad. Yigi i sul fare pin ngak fare tapuf oloboch ni yugu aram rogon ni dariy be’ ni be pi’ e athamgil nga laniyan’ ni nge rin’, machane Thin Rok Got e ma pi’ e athamgil nga lanin’dad ni nguuda “meybilgad ni gubin ngiyal’.” (Roma 12:12) De mudugil u wan’ fare pin ni ra yog ngak e n’en ni be wenignag, machane ke micheg Jehovah ngodad ni ra turguy e tin nib mat’aw ni fan ngodad. I micheg Jehovah u daken e profet rok ni gaar: “Bay mu lemnag nib sowath ni be yib, machane ngam sonnag; ya ra yib i m’ug ko ngiyal’ ni kug dugliy, ma dabi sowath.” (Habakkuk 2:3; Psalm 97:10) Dariy be’ ni be ayuweg fare pin ni nge un ngak ko wenig nge yib angin e wenig rok. Machane bay e taayuw rodad ni Jesus Kristus ni “ke yan i par nga ba’ ni mat’aw rok Got. Be wenignagdad ngak Got!” (Roma 8:34; Hebrews 7:25) Yugu be sul fare pin ni be wenig ngak fare tapuf oloboch ni be athapeg ni nge ayuweg, ere susun e ka ba ga’ e michan’ rodad ni ri ra yib e rran rok Jehovah ni nge pufthinnag e girdi’ riy!

18. Uw rogon ni ra gelnag e meybil e michan’ rodad me ayuwegdad ko tin nib mat’aw?

¹⁸ Fare fanathin u murung’agen fare pin ni ke yim’ e pumoon rok e ma fil ngodad nib peth e meybil nge michan’, ma meybil ni gad be tay ni yugu gad be wenig e rayog ni nge gel ko pi n’en ni be togopluw ko michan’ rodad. Gathi be yip’ fan ni ra gel e michan’ rok be’ ni be dake modingnag ir u fithik’ e meybil. (Matthew 6:7, 8) Nap’an ni gad ra meybil ni ri ba tamilang u wun’dad ni rib t’uf Got rodad, ma meybil rodad e ra chugurnagdad ngak ma ra gelnag e michan’ rodad. Rib t’uf e michan’ ni fan e nge yog e yafos ngodad, ma aram fan ni yog Jesus ngak pi gachalpen “ni gubin ngiyal’ ma nguur meybilgad ma ri dabi ngochngochan’rad”! (Luke 18:1; 2 Thessalonika 3:13) Riyul’ ni dabi yib “fare rran rok Jehovah nib ga’” ni bochan e kada yibilayed​—ya ri ra yib ni yugu demtrug ko gad ra yibilay fa danga’. Machane tin nib mat’aw ni ra turguy Got ni fan ngodad ma ngada mageygad nib fos ko mahl rok Got e ra yan u rogon fene gel e michan’ rodad nge kanawoen e mat’aw ni gad ra yan riy u fithik’ e meybil.

19. Uw rogon nrayog ni ngad micheged nib mich u wun’dad ni ra ‘turguy Got e tin nib mmat’aw ni ngan rin’’?

¹⁹ Kada weliyed faram ni gaar Jesus: “Ra sul e en ni Fak e Girdi’ ma gur ra pirieg e girdi’ nu fayleng ni yad be par ni kab michan’rad ngak?” Mang e fulweg ko re deer rok Jesus ney? Ri gad ba felfelan’ ngay ni bay bokum milyon e tapigpig rok Jehovah ni yad ba yul’yul’ u fayleng i yan. Ma yad be micheg ko meybil rorad, nge gum’an’ ni yad be tay, nge athamgil ni yad be tay ni bay e michan’ rorad! Ere rayog ni ngan fulweg e deer rok Jesus. Arrogon ra moy e girdi’ ni bay e michan’ rorad. Yugu aram rogon ni be gafgownagdad Satan, ma rib mich u wun’dad ni ra “turguy Got e tin ni ir e mmat’aw nra fel’ rogon e tirok e girdi’ riy.”

[Footnote]

Ka Ga Manang?

• Mang fan ni ke meewar e michan’ rok boch e Kristiano?

• Mang fan nrayog ni ngari mich u wun’dad ni ri ra yib e rran rok Jehovah ko pufthin?

• Mang boch i fan ni nguuda meybilgad?

• Uw rogon ni nge dabi meewar e michan’ rodad ni bochan e gad ma tayan’dad ko meybil?

[Picture on page 14]

Mang e ke tamilang ko fare fanathin u murung’agen fare pin ni ke yim’ e pumoon rok nge fare tapuf oloboch?

[Pictures on page 17]

Bokum milyon e girdi’ e ngiyal’ ney nib mich u wun’rad ni ra “turguy Got e tin ni ir e mmat’aw nra fel’ rogon e tirok e girdi’ riy”