Ngari Gel E Pagan’ Rodad Nga Mat’awun Got

“Kug pi’ e tamilangan’ ngom ni nge pagan’um ngak Jehovah.”​—PROVERBS 22:19.

1, 2. (a) Mang fan ni ma pagan’ e Pi Mich Rok Jehovah ku Jehovah? (Proverbs 22:19) (b) Mang e be dag ni ba t’uf ko boch e girdi’ ni ngar gelnaged e pagan’ rorad ku Jehovah?

TIN riyul’ e Kristiano e yad ba taw’ath ya ke tamilangan’rad u morngaagen Jehovah nge tin nib m’agan’ ngay. Fare “tapigpig nib yul’yul’ mab gonop” e ma pi’ e ggan nib spiritual ngorad ko “ngiyal’ nib puluw.” (Matthew 24:45) Tamilangan’ rorad e ma ayuwegrad nge mudugil e michan’ rorad ngak Got. Ere Pi Mich Rok Jehovah e ma dag ni ke pagan’rad ni Jehovah e mmat’aw.

² Machane be m’ug riy ni boch e Pi Mich Rok Jehovah e ba t’uf ni nge gel e pagan’ rorad. Yu ngiyal’ ma ma yib e babyor ngak fare Society ni be yog ni ke maruwaran’uy ko boch ban’en ni kan weliy u lan e pi babyor ni kar fl’eged. Ya sana ba t’uf ni nge thiliyeg be’ e lem rok u morngaagen ban’en, fa bay ban’en nib m’ag ko facha’ ma be wageynag laniyan’.​—Mu taarebnag ko John 6:60, 61.

3. Mang e rayog ni nge buch ko pi tapigpig nib yul’yul’ ngak Jehovah, ma mang fan?

³ Mus ko pi tapigpig rok Jehovah e bpuluw ngorad fare thin ni bay ko Eklesiastes 9:11 ni be gaar: “Kug guy u tan e yal’ ni piin nib machreg e gathi aram e mmutrug ni yad ra m’on ko sagreng, ma piin nib yargel e gathi mmutrug ni yad ra gel ko cham, ma piin nib gonop e gathi aram e mmutrug ni ra magay e ggan rorad u gubin ngiyal’, ma piin nib llowan’ e gathi mmutrug ni yad ra par nib fel’ rogorad, ma piin ni ke tamilangan’rad e gathi mmutrug ni yira felan’ ngorad; ya yugu ma buch boch ban’en ngorad ni yad gubin ndan nang u ngalan.” Uw rogon nrayog ni nge riyul’ e re n’ey u rogon nib spiritual? Sana gad manang boch e Kristiano nib papey ni kar folgad ko thin ko Bible, ma dar rusgad ni ngar weliyed e thin riyul’ ko girdi’, ma ba gonop u rogon ni yad ma puluwnag e motochiyel ko Bible ko yafas rorad, ma yad ba pasig i fil boch ban’en. Machane, bochan ni “yugu ma buch boch ban’en ngorad,” ma boch i yad e ke magawon ni bochan e maadad ara kan pillibthir. Sana yad be lemnag ko rayog ni ngar uned nga lan e bin nib biech e fayleng rok Got ndabra m’ad u m’on riy.

4, 5. Mang fan ni dariy tapgin ko pi Kristiano ni nge war e pagan’ rorad ni Jehovah e mmat’aw?

⁴ Nap’an ni ra yim’ e ani mabgol rok e Kristiano mab gel e gafgow rok. Ya sana boor e duw ni ur pigpiggow ku Jehovah u taabang. Fa ani kab fas e manang ni yam’ e ke museg e motochiyel ko mabgol.a (1 Korinth 7:39) Ma chiney e thingari athamgil nge gelnag laniyan’ ni nge par nib mudugil e michan’ rok.​—Mu taarebnag ko Mark 16:8.

⁵ Bay e gonop riy ni ngan lemnag ni nap’an ni ra yim’ e ani mabgol ara llabthir, ara bitir, ara Kristiano ni fager rom ma aram e ngiyal’ ni ngan dag ni ngan pagan’uy ku Jehovah ni ir e ba mat’aw! Ya mus ni ke yim’ be’ nib t’uf rodad ma rayog ni nge mich u wan’dad ni gathi de mat’aw Jehovah. Rayog ni nge pagan’dad ni urngin e piin ni ra un ko yafas ni manemus​—ndemtrug ko tin nra magay nib fas ara tin nran faseg ko yam’​—ma yad ra par nib falfalan’. Be weliy u morngaagen Got u Psalm ni gaar: “Ba gaman urngin ni be pi’ ngorad nge yan i aw ni ke fel’ u wun’rad ni yad gubin e tin ni ke yog ngorad. I [Jehovah] e mmat’aw urngin e tin ni ma rin’, ma ma runguy e girdi’ u fithik’ urngin e ngongol rok. Ma ba chugur ngak urngin e piin ni yad ma non ngak, ni yad be non ngak u fithik’ e yul’yul’. Piin ni bay madgun u wan’rad e ma pi’ ngorad e tin ni nge yog ngorad; ma rung’ag e tin ni yad ma wenignag ngak me ayuwegrad.”​—Psalm 145:16-19.

Lem ni ke Gafgow ni Yugu Dariy Fan

6, 7. (a) Mang fan ni ke gafgow boch e Pi Mich faram, ma chiney e ke thil e lem rorad? (b) Mang fan nsusun ndabda lemnaged ni de mat’aw Jehovah ya ke pag ni nge un e girdi’ rok ko gafgow faram?

⁶ Kafram ma i gafgow boch e Pi Mich ni bochan e dar uned nga boch ban’en nib kireb ko nangan’ rorad. Susun, sana aram e n’en ni ur rin’ed faram ni fan ngab mit e pigpig ko am ni civilian service. Ma chiney e rayog ni nge lemnag reb e walag ni rayog ni un ko re maruwel nem ma gathi be togopuluw ko motochiyel ko Kristiano ni nge par u mathilin e pi am u lan e re m’ag ney.

⁷ Ere de mat’aw Jehovah ya ke pag ni nge gafgow faram ko boch ban’en nrayog ni nge rin’ e chiney ndariy wenegan nib kireb nra yib riy fa? Boor e girdi’ ni ke buch e re n’em rorad e gathi aram rogon ni yad ma lemnag. Ya yad ba falfalan’ ni ke yog ni ngar daged u fithik’ e yoor ni ke mudugilan’rad ni ngar pared nib yul’yul’ ku Got. (Mu taarebnag ko Job 27:5.) Mang fan nra kireban’ be’ ni bochan e ke fol ko nangan’ rok me par nib yul’yul’ ku Jehovah? Bochan ni kar pared nib yul’yul’ mar folgad ko motochiyel ko Kristiano u rogon ni kar nanged fan, mi yad fol ko nangan’ rorad, ma aram e kar micheged ni bay rogorad ni ngar m’ag fagergad ngak Jehovah. Dabi siy ni bay e gonop riy ni ngan siyeg e kanawo’ ni ra kirebnag e nangan’ ku be’ ara nge kirebnag e michan’ ko yugu boch e girdi’. Aram rogon e kanawo’ ni tay apostal Paul.​—1 Korinth 8:12, 13; 10:31-33.

8. Mang fan ni dariy tapgin ko pi Kristiano ni Jew ni kar folgad ko fare Motochiyel ni nge maruwaran’rad ni Jehovah e mmat’aw?

⁸ Thingari fol yu Jew ko fa Ragag i Motochiyel nge ku 600 e motochiyel ni nge felan’ Jehovah ngorad. Munmun ma kan fl’eg e yaram ko Kristiano, me ere daki t’uf ni ngan fol ko pi motochiyel nem ni fan ko pigpig ku Jehovah, ni mus ko piyu Jew. Pi motochiyel ni daki m’ag e ba muun ngay e maadad ni ngan tay ngak e piin pumoon nge, Sabbath, nge gamanman ni nga un pi’ ni maligach, nge miti n’en ni dabni kay. (1 Korinth 7:19; 10:25; Kolose 2:16, 17; Hebrews 10:1, 11-14) Piyu Jew​—nge pi apostal​—ni kar manged Kristiano e kan pithigrad ndabkura folgad ko pi motochiyel ni ur folgad riy u nap’an ni yad bay ko fare m’ag ko Motochiyel. Kar gun’gun’gad ni bochan e de mat’aw e n’en ni ke yarmiy Got ya kafram e boor ban’en nib t’uf ni ngar folgad riy ma chiney e daki t’uf fa? Danga’, ur falfalan’gad ya kan tamilangnagan’rad ko tin nib m’agan’ Jehovah ngay.​—Acts 16:4, 5.

9. Mang e ke buch ko boch e Pi Mich machane mang fan ni de kireban’rad ngay?

⁹ Ngiyal’ ney ma boch e Pi Mich e ba gel e motochiyel rorad ko tin ni yad ra rin’ nge tin ndabra rin’ed. Ma aram e kab gel e gafgow rorad ngak yugu boch e girdi’. Munmun ma ke gel e tamilangan’ rorad me ayuwegrad ni ngar lemnaged boch ban’en nib puluw. Machane dariy tapgin ni nge kireban’rad ko ngongol rorad faram nib puluw ko nangan’ rorad, ni mus ni faanra kar gafgowgad ni bochan. Rib fel’ ni kar daged ni ke m’agan’rad ngay ni ngar uned ko gafgow ni fan ni ngar pared nib yul’yul’ ku Jehovah, ma “urngin e pi n’ey ni kar rin’ed e yigoo fan ko thin nib fel’ ni yib rok Got.” Ma taw’athnag Jehovah e yul’yul’ ni aram rogon. (1 Korinth 9:23; Hebrews 6:10) I yoloy apostal Peter e pi thin ney u fithik’ e gonop ni gaar: “Faanra mu k’adedan’med ko gafgow ni mus ko ngiyal’ nib mat’aw e tin ni kam ngongliyed, ma ra fal’eg Got waathmed riy.”​—1 Peter 2:20.

Ngan Fil Ban’en Rok Jonah

10, 11. Uw rogon ni ke dag Jonah ni de pagan’ ngak Jehovah (a) u nap’an ni ka nog ngak ni nge yan nga Nineveh? (b) nge nap’an ni de thang Got e girdi’ nu Nineveh?

¹⁰ Nap’an ni kan nog ngak Jonah ni nge yan nga Nineveh, me dag ni dariy fan u wan’ ni be pagan’ Jehovah ngak. Ma bochan ni de fol ma ke un ko gafgow, ma aram me llowan’ ma ke nang ni ke oloboch, me ere rin’ e n’en ni ka nog ngak, me ginang yu Nineveh ko fare magothgoth ni bay yib. Ma aram me buch ban’en ndan lemnag: Ke kalngan’ yu Nineveh ma aram me turguy Jehovah ndabki thangrad.​—Jonah 1:1–​3:10.

¹¹ Ma uw rogon e re n’em u wan’ Jonah? Ke dabuy me gun’gun’nag Got u fithik’ e meybil. Gowa ke gaar: ‘Kug lemnag ni aram rogon nra buch. Ar fan ni kug dabuy ni nggu wan nga Nineveh ko som’on. Ma chiney e ba gel e athamgil ni kug tay ma kug un ko marus ya kug wan nga l’ugun e nig, ma kug maruwel nib elmirin ni nggu ginang yu Nineveh ni bay ni gotheyrad, ma chiney e ke aw ni aray rogon! Urngin e maruwel nge gafgow ni kug tay e mm’ay fan! Ffel’ ni nggum’!’​—Jonah 4:1-3.

12. Mang e rayog ni ngad filed rok Jonah?

¹² Bay tapgin Jonah ni nge gun’gun’ fa? De mat’aw Jehovah ni bochan ni ke runguy e pi girdi’ nem ni kar kalgadngan’rad fa? Susun ni nge falfalan’ Jonah; ya bokum biyu’ e girdi’ e dabkun li’rad ngar m’ad! (Jonah 4:11) Machane lem rok ni dariy e tay fan riy ma be gun’gun’ e ke dag ni de pagan’ ku Jehovah ni ir e ba mat’aw. Kari mus ni be lemnag ir ma de lemnag yugu boch e girdi’. Ngad filed ban’en rok Jonah ma dabda m’oneged gadad nge lem rodad. Ngad pagedan’dad ku Jehovah me mich u wan’dad ni ba mat’aw ni ngad folgad rok e ulung rok ma nge fel’ u wan’dad e pi n’en ni ke turguy. Nge pagan’dad ni “ra yib angin ngak e piin ni bay madgun e bin riyul’ e Got u wan’rad.”​—Eklesiastes 8:12.

Ereray e Ngiyal’ ni Ngad Gelnaged e Pagan’ Rodad!

13. Uw rogon nrayog ni ngad gelnaged e pagan’ rodad ngak Jehovah?

¹³ Bay e gonop riy ni ngad gelnaged e pagan’ rodad ku Jehovah. (Proverbs 3:5-8) Ma gathi ke mus ni ngad yibilayed ni ra ayuwegdad Jehovah ni nge gel e pagan’ rodad ngak. Ya pagan’ e ma gel iyan u daken e tamilangan’, ere thingarda filed e Bible nge pi babyor ni ma tamilangnag e thin ko Bible u gubin e rran. Ma baga’ fan ni ngan un ko pi muulung ko Kristiano u gubin ngiyal’, ma ngad fl’eged rogodad u m’on ko muulung mad uned ko pi n’en ni yibe rin’. Nge mang wok rodad ni ngad wereged e thin riyul’ ko Bible ngak yugu boch e girdi’, ma ngad guyed rogon ni ngad gelgad ko thin rorad nib togopuluw ma gad rin’ nib fel’ nifengin l’ugundad, ma aram e ra gel rogon ni gad ma pagan’ ku Jehovah nge Thin Rok. Me ere gubin e rran ma gad be rin’ boch ban’en u taabang rok Got.

14. Mang fan ni dabki n’uw nap’an ma thingari dag e girdi’ rok Jehovah ni kari pagan’rad ngak ni ke mus rogon?

¹⁴ Dabki n’uw nap’an ma ra yib nib tomgin e bin th’abi gel e gafgow nga daken e girdi’. (Matthew 24:21) Ma nap’an nra buch ma ba t’uf ko pi tapigpig rok Got ni nge pagan’rad ni Jehovah e mmat’aw mar pagedan’rad ko thin nra pi’ u daken e ulung rok. Ma aram e yad be fol ko n’en ni yog Got ni gaar: “Gimed e girdi’ rog, mmarod nga lan e singgil romed, mi gimed ning e mab. Mpared nib mith ko chi ngiyal’ nem ni nge yib fare gafgow me lukafmed. (Isaiah 26:20, NW) Ma chiney e ka ranod nga lan e gin ni yad ra par riy nib mith ni aram e pi ulung nib boor ko 85,000 u 232 e binaw. Ma demtrug ko ku mang e thingar nrin’ ni ngan yan “nga lan e singgil,” ma rayog ni nge pagan’dad ku Jehovah ni ra ayuwegdad ngad rin’ed.

15. Uw rogon ni kan tamilangnag fene ga’ fan e pagan’uy u nap’an e duw ni 1998, ma mang fan nib puluw?

¹⁵ Ba t’uf ni ngad gelnaged e pagan’ rodad e chiney. Ya ra dabda pagedan’dad ko pi walagdad ni Kristiano, nge ulung rok Jehovah, nge Jehovah, ma dabiyog ni ngad magaygad nib fas. Ere rib puluw ni kan puguran ngak e Pi Mich Rok Jehovah u nap’an e duw ni 1998 ni “en nra pining fithingan Jehovah ni nge ayuweg e ra fos ni ke thap ngak Got”! (Roma 10:13) Thingari mich u wan’dad ko re n’em. Faanra ke maruwaran’dad riy ma susun ni ngad athamgilgad ngad yal’uweged e re n’em e chiney, arrogon, ka daba’.

Ba Mat’aw e N’en nra Turguy Jehovah

16. Mang e rayog ni nge buch ko pagan’ rodad nfaanra dan ayuweg nge gel ma uw rogon nrayog ni ngad siyeged ni nge buch e re n’em?

¹⁶ Kan ginang e pi Kristiano ni kan dugliyrad u Hebrews 3:14 ni gaar: “Ya gadad gubin ni gadad Jesus nga bayang ni faanra da pired ni ke pagan’dad ngak Got nge yan i mada’ ko tomur ni bod ni ud pired ko som’on.” Pi thin nem e ku ma sor fan ko pi Kristiano ni ke l’agan’rad ko par u fayleng. Rayog ni nge war e pagan’ nfaanra dan ayuweg ni nge gel. Ri baga’ fan ni nguuda filed e tamilangan’, ni ra gelnag e def ko pagan’ rodad!

17. Mang fan nrayog ni nge pagan’dad nib yal’uw rogon nra turguy Jesus ko mini’ e ra par nib fas?

¹⁷ Dabki n’uw nap’an ma ra yaliy Kristus urngin e pi nam ni aram e rayog ni nge “weregrad ngar l’agruw ulunggad, ni bod rogon e en ni ma gafaliy e gamanman ni ma fek e saf nge chuwegrad u fithik’ e kaming.” (Matthew 25:31-33) Rayog ni nge pagan’dad nib mat’aw rogon nra pufthinnag Kristus e girdi’ me turguy ko mini’ e ra par nib fas. Ye pi’ Jehovah e gonop ngak, nge llowan’, nge tin nib t’uf ni nge “pufthinnag e fayleng ni polo’ nrogon nib mat’aw.” (Acts 17:30, 31) Nge mudugil e michan’ rodad ni bod Abraham ni ke gaar: “Rib mudugil [Jehovah] ndab mu thang e fan rok e piin ndawor ra ngongliyed e kireb ngam chagiyrad ko piin ni yad ba kireb. Dabiyog! Dabiyog ni ngam rin’ ni er rogon. Ya ra yodor, me ere bay ni gechignag e piin ndawor ra ngongliyed e kireb ntaareb rogon ngak e piin ni kar ngongliyed e kireb. Dabiyog ni nge dor. Tapufthin ko fayleng ni polo’ e nge ngongol nib yal’uw?”​—Genesis 18:25.

18. Mang fan ni susun dabi magafan’dad ko tin ndawori tamilang u wan’dad e chiney?

¹⁸ Faanra pagan’dad nib mat’aw Jehovah, ma dabi magafan’gad ko pi deer ney ni: ‘Uw rogon nran pufthinnag e madway nge bitir? Ma gathi ra moy boor e girdi’ ni dawora rung’aged fare thin nib fel’ u nap’an nra taw ko Armageddon fa? Ma uw rogon e piin nib m’ar lolugrad? Ma uw rogon . . . ?’ Rriyul’, ma dada nanged ko mang e ra rin’ Jehovah ko pi cha’ nem. Machane ra rin’ u rogon nib mat’aw ngu fithik’ e runguy. Susun ndabi maruwaran’dad riy. Ma sana gad ra ngat nga rogon ni ra pithig Jehovah e pi magawon nem u rogon ndada lemnaged nra rin’.​—Mu taarebnag ko Job 42:3; Psalm 78:11-16; 136:4-9; Matthew 15:31; Luke 2:47.

19, 20. (a) Mang fan ni de kireb ni ngan fith boch e deer? (b) Wuin ni ra pi’ Jehovah e fulweg ko boch e deer?

¹⁹ Ulung rok Jehovah e der ma puwan’ ko piin ni ma fith boch e deer, ni bod ni be yog boch e piin ta togopuluw. (1 Peter 1:10-12) Machane be yog e Bible ni ngan siyeg e maluag thin ndariy fan, nge tugthin. (Titus 3:9) Rayog ni nge yoor e tamilangan’ rodad ni ngad fithed boch e deer nib puluw ma ngad fl’eged i gay e fulweg riy u lan e Thin Rok Got nge yugu boch e babyor ko Kristiano ma rayog ni nge gelnag e pagan’ rodad ku Jehovah. Ma fol e ulung ko kanawo’ ni tay Jesus. Ya de yog e thin u morngaagen boch e deer ni dawori taw ko ngiyal’ ni ngan nang e fulweg riy. I weliy ni gaar: “Ka boor ban’en ni nggu weliy ngomed, machane yugu ra yoor ngomed e chiney.” (John 16:12) Miki yog ni bay boch ban’en ni mus ngak ma de nang ngal’an.​—Matthew 24:36.

²⁰ Ka bay boor ban’en ni ra tamilangnag Jehovah. Bay e gonop riy ni ngad sonnaged ma nge pagan’dad ngak ni ngiyal’ nra dag e tin nib m’agan’ ngay e ra m’ag ko tin nib t’uf ko ngiyal’ nem. Rayog ni ngad pared nib pagan’dad ni nap’an ni ke taw ko ngiyal’ nib m’ag ma ra tamilangnag Jehovah boch ban’en ngodad. Arrogon, ran taw’athnagdad nfaanra pagan’dad ku Jehovah nge ulung rok. Proverbs 14:26 e be micheg ngodad ni gaar: “Ba gel e pagan’ ko en ni bay madgun Jehovah u wan’, ma ran ayuweg pi fak ko gin ni ngar nafgad ngay.”

[Boch e Thin nra Tamilangnag Murung’agen]

Uw Rogon U Wan’um?

◻ Mang fan ni dariy e gonop riy ni ngan pag lanin’uy nge n’igin nge war e pagan’ ku Jehovah?

◻ Mang e rayog ni ngad filed rok Jonah?

◻ Mang fan ni ri baga’ fan ni nga un fil e Bible ma ngan un ko muulung?

[Sasing ko page 14]

Mus u nap’an ni kad gafgowgad ma rayog ni nge pagan’dad ni Jehovah e mmat’aw

[Sasing ko page 16]

Ke mudugilan’um u rogon ni be pagan’um ku Jehovah fa?