Yan U Taabang Ku Got—Aram E Yam Ndariy N’umngin Nap’an

“Gadad . . . e bay darod u daken fithingan Jehovah ni Got rodad ndariy n’umngin nap’an.”​—MIKAH 4:5, New World Translation.

1. Mang fan nrayog ni ngan pining “Pilung ko yafas ni manemus” ngak Jehovah?

JEHOVAH GOT e dariy tabolngin. Kan pining “Faanem ni kab kakrom i yib ni immoy,” ngak, ya dariy tabolngin. (Daniel 7:9, 13) Ku ra par Jehovah iyan ni manemus. Yigoo ir e “Pilung ko yafas ni manemus.” (Revelation 10:6; 15:3) Ma “biyu’ i duw e bod taareb e rran” u wan’; ra yan i aw u puluwon ni bod e fowap ni ke chuw, bod feni ngoch ba awa ko nep’.”​—Psalm 90:4.

2. (a) Mang e mm’agan’ Got ngay ni fan ko girdi’ ni ma fol? (b) Susun mang e nge l’agan’dad ngay ma gad lemnag?

² Fa An ma pi’ e yafas e ma par ndariy n’umngin nap’an, ma aram fan nrayog ni nge pi’ ku Adam nge Efa e yafas ndariy n’umngin nap’an u Paradis. Machane bochan e dar folgow, ma ke mul e yafas ni manemus u pa’ Adam me afuweg e denen nge yam’ ngak pi fak. (Roma 5:12) Machane gathi kan thiliyeg e n’en ni ke m’agan’ Got ngay ko som’on. I m’agan’ Jehovah ngay ni ra par e piin ma fol rok ndariy n’umngin nap’an, mab mudugil ni ra lebuguy e re bugithin nem. (Isaiah 55:11) Ere rib puluw ni nge l’agan’dad ngay ni ngad pigpiggad ku Jehovah ndariy n’umngin nap’an. Gad ba adag ni ngad pared ni gad be sonnag fare “Rran rok [Jehovah], me ere ba t’uf ni dabda paged talin ni gad be nameg ni nga darod Got u taabang ni manemus.​—2 Peter 3:12.

Ma Rin’ Jehovah Ban’en ko Ngiyal’ ni ke Dugliy

3. Uw rogon ni gad manang ni Jehovah e bay e “ngiyal’ ni ke dugliy” ni nge lebuguy e tin nib m’agan’ ngay?

³ Gad be yan Got u taabang ere gad ba adag ni ngad rin’ed e tin mm’agan’ ngay. Gad manang ni Jehovah e An ma Gagiyegnag e Tayim, ma ke mich u wan’dad ni gubin ngiyal’ ma ma lebuguy e n’en ni ke m’agan’ ngay ko ngiyal’ ni ke dugliy. Susun, “faani taw nga nap’an e ngiyal’ ni dugliy Got, me pi’ Got Fak nge yib.” (Galatia 4:4) Ka nog ngak apostal John ni bay e “ngiyal’ ni kan dugliy” ni nge lebug e pi n’en ni kan yiiynag ni ke guy. (Revelation 1:1-3) Bay e ngiyal’ ni kan dugliy ni “ngan pufthinnag e piin ni kar m’ad.” (Revelation 11:18) Boor ko 1,900 e duw faram ma kan thagthagnag nga laniyan’ apostal Paul ni nge yog ni “ke turguy [Got] reb e rran ni ir e nge pufthinnag riy e fayleng ni polo’ nrogon nib mat’aw.”​—Acts 17:31.

4. Uw rogon ni gad manang ni ba adag Jehovah ni nge thang e re m’ag nib kireb ney?

⁴ Ra yibnag Jehovah e tomur ko re m’ag nib kireb ney, ya yibe t’ar e thin nga daken e ngochol rok u lan e re fayleng ney. Ke yoor e piin kireb. (Psalm 92:7) Girdi’ e ma og tharan Got u daken e thin nge ngongol rorad, ma ma kireban’ Got ni nge guy e pi tapigpig rok ni yibe togopuluw ngorad ma yibe gafgownagrad. (Zekariah 2:8) Aram fan ni ke turguy Jehovah ni ran thang e ulung rok Satan ni polo’! Ke m’ay i dugliy ku Got e ngiyal’ nra buch e re n’ey, ma pi thin ko profet u lan e Bible e be tamilangnag ni gad be par ko “ngiyal’ ko tomur.” (Daniel 12:4) Dabki n’uw nap’an ma ra rin’ ban’en ni fan ko urngin e piin nib t’uf Got rorad.

5. Uw rogon u wan’ Lot nge Habakkuk e pi n’en ni be buch u toobrow?

⁵ Pi tapigpig rok Jehovah nkakrom e ur adaged ni ngar guyed e ngiyal’ nra thumur e kireb. Lot ni ir be’ nib mat’aw e “i kireban’ ko ngongol ndarngal ni be ngongliy e girdi’ ni dariy fan e motochiyel u wun’rad.” (2 Peter 2:7) I kireban’ Habakkuk ni profet ko pi n’en nib kireb ni be buch ko ngiyal’ nem me gaar: “[O Jehovah], uw n’umngin nap’an nthingar gu wenig ngom ni ngam ayuwegmad mfin mu rung’ag lungug ngam chuwegmad u fithik’ e gafgow ni yibe tay ngomad? Mang fan ni kam gagiyegnigeg ni ngug guy e gafgow nge kireb ni yibe rin’? Gafgow ni yibe tay ngak e girdi’ nge cham e gu be guy u toobeg i yan, ma gubin yang ni be yo’yoor lungun e girdi’ riy ma yad be tugthin.”​—Habakkuk 1:2, 3.

6. Mang fulweg ni pi’ Jehovah ko meybil ni tay Habakkuk, ma mang e rayog ni ngad filed riy?

⁶ Ke pi’ Jehovah e fulweg ngak Habakkuk ni gaar: “Dawori taw nga nap’an ni nge yib i m’ug. Machane ngal’an e be yib nib machreg, ma n’en ni ku gog ngom e bay yib i m’ug. Bay mu lemnag nib sowath ni be yib, machane ngam sonnag; ya ra yib i m’ug ko ngiyal’ ni kug dugliy, ma dabi sowath.” (Habakkuk 2:3) Ere ke tamilangnag Got ni ra rin’ ban’en ko “ngiyal’ ni ke dugliy.” Yugu aram rogon ni be m’ug riy ni ke sowath, machane ra lebuguy Jehovah e tin nke m’agan’ ngay​—nib mudugil!​—2 Peter 3:9.

Pigpig nib Pasig Ndariy e Magar riy

7. Yugu aram rogon ni de nang Jesus ko ri wuin e ngiyal’ ko rofen rok Jehovah, machane uw rogon e machib ni ke tay?

⁷ Ba t’uf ni ngad nanged e ngiyal’ ni ke dugliy Jehovah ni fan ni nga u darod u taabang Got u fithik’ e pasig fa? Danga’. Mu lemnag boch e thin. Ri ba adag Jesus ni nge nang morngaagen e ngiyal’ ni yira rin’ e tin nib m’agan’ Got ngay u roy u fayleng ni bod ni yibe rin’ u tharmiy. Arrogon, ya fil Kristus ko pi gachalpen ni ngar meybilgad ni gaar: “Chitamangimad ni ga bay u tharmiy: Ngan tay fan fithingam nib thothup, ma ga par ni gur e ga be gagiyegnagmad, min’ rin’ e tin nib m’agan’um ngay u roy u but’ ni bod ni yibe rin’ u tharmiy.” (Matthew 6:9, 10) I nang Jesus ni ran fulweg taban e re meybil nem, machane de nang ko ri wuin ni ra lebug. Ya ke yiiynag u morngaagen e tin tomren e rran ko re m’ag ney ni gaar: “Machane re rran nem nge re awa nem e dariy be’ ni manang e ngiyal’ nra taw riy​—ni mus ko pi engel ni yad bay u tharmiy, ara en ni Fak Got; ya ke mus ni en ni Chitamangiy e manang.” (Matthew 24:36) Jesus Kristus e ir e ra lebuguy e tin nib m’agan’ Got ngay, me ere ir e ra pufthinnag e pi toogor rok e Chitamangin nu tharmiy. Machane, nap’an ni immoy u fayleng, ma de nang Jesus e ngiyal’ ni ra rin’ Got e pi n’en nem ni ke finey. Ere ke par ni gathi rib pasig ko pigpig ku Jehovah fa? Ri danga’! Nap’an ni guy e pi gachalpen Jesus ni be klinnag fare tempel “me yib ngan’rad ni ba’ ko babyor nib thothup ni ke gaar, ‘Rogon ni gu be tiyan’ug ko naun rom, i gur Got e be yik’ u fithik’ag ni bod ba nifiy.’” (John 2:17; Psalm 69:9) I par Jesus ni gubin ngiyal’ ma be rin’ e n’en ni kan l’og ni nge rin’, me rin’ nib pasig ma de magar. Miki pigpig ku Got ni be l’agan’ ko pigpig ndariy n’umngin nap’an.

8, 9. Nap’an ni fith e pi gachalpen Jesus u murung’agen e ngiyal’ nran sulweg fare Gagiyeg nga rogon, ma mang e kan nog ngorad, ma uw rogon e re n’em u wan’rad?

⁸ Ku aram rogon pi gachalpen Kristus. Kar nonad Jesus fin u m’on ni nge yan nga tharmiy. Be weliy e Bible ni gaar: “Faani muulung e pi apostel nge Jesus mi yad fith ngak ni lungurad, ‘Somol, ra taw ko re ngiyal’ i n’ir ma aram ma ga fulweg e nam nu Israel nga rogon?’” Bod rogon e Masta rorad, ma ur sonnaged Gil’ilungun Got. Machane yog Jesus ni gaar: “Ngal’an nge pi rran e ke dugliy e Chitamag u daken mat’awun, ma dariy rogon ni ngam nanged. Machane bay yib gelngimed ko ngiyal’ ni bay yib fare kan ni thothup riy nga dakenmed, ma aram mi gimed weliy murung’ageg u lan yu Jerusalem, ngu lan yu Judea ni polo’, ngu lan yu Samaria, nge yan i mada’ ko yungi n’en ni yan i mus e fayleng ngay.”​—Acts 1:6-8.

⁹ De m’ug riy ni ke kireban’rad fapi apostal ko re fulweg nem. Ya kar pasiggad i wereg e machib. In e wik nga tomren ma ke wer e machib nga lan yu Jerusalem. (Acts 5:28) Ma de gaman 30 e duw nga tomren mar wereged e machib iyan nib mus rogon ma aram me yog Paul ni kan machibnag fare thin nib fel’ “ngak urngin e girdi’ u fayleng.” (Kolose 1:23) Ngiyal’ nem ma dawori ‘sul yu Israel nga rogon’ ni yugu demtrug ni ba oloboch rogon ni lemnag e pi gachalpen, maku dan dugliy Gil’ilungun Got u tharmiy u nap’rad, machane kar pigpiggad ku Jehovah ni yad ba pasig, me l’agan’rad ko pigpig ndariy n’umngin nap’an.

Ngad Yaliyed e N’en ni Be K’aringdad

10. Bochan ni dad nanged e ngiyal’ nra thang Got e m’ag rok Satan ma mang e rayog ni ngad micheged?

¹⁰ Pi tapigpig rok Jehovah ko ngiyal’ ney e ku yad ba adag ni ngar guyed e tomur ko re m’ag nib kireb ney. Machane n’en nib baga’ fan e gathi ngad thapgad nga lan e fayleng nib biech rok Got. Ya gad ba adag ni ngad guyed fithingan Jehovah ni ngan thothupnag, min nog e sorok ngak. Ma aram fan ni de yog Got ngodad e ‘rran fa awa’ ni ke dugliy ni nge thang e m’ag rok Satan. Aram e rayog ni ngad micheged ni ke mudugilan’dad ni nga darod Got u taabang ni dariy n’umngin nap’an ni bochan e ba t’uf Got rodad ma gathi bochan ni gad be lemnag e n’en nrayog ngodad riy.

11, 12. Uw rogon ni kan skengnag e yul’yul’ ku Job, ma uw rogon ni gad ba l’ag ngay?

¹¹ Ngad pared nib yul’yul’ ku Got e ku ra micheg ni ke ban Moonyan’ faani yog ni Job ni be’ nib mat’aw​—nge girdi’ ni bod ir​—e ke mus ni ma pigpig ku Got ni bochan e n’en nrayog ngorad. I weliy Jehovah ni Job e tapigpig rok nib mat’aw ma dariy e kireb ni ngongliy, ma ma par ni bay madgun Got u wan’, ma aram me yog Satan ni gaar: “Gur ra i par Job ni ba’ madgum u wan’ ni faanra der yib e fel’ riy ngak? Kam par ni ga be yoror rok nge girdi’ nu tabinaw rok nge urngin ban’en ni ba’ rok. Ga be fal’eg waathan u urngin e tin ni be ngongliy, ma urngin e garbaw ni kam pi’ ngak e ke yoor u daken e ted i yan. Machane ga ra fek rok urngin e tin i ba’ rok, ma ra yog nga owchem e thi nib togopluw ngom.” (Job 1:8-11) I par Job nib yul’yul’ ku Got u fithik’ e skeng ma aram me micheg ni googsur e pi thin nem.

¹² Ku arrogon gadad ni faanra gad ra par nib yul’yul’ ma rayog ni ngad micheged ni googsur e n’en ni yog Satan ni ke mus ni gad be pigpig ku Got ni bochan e taw’ath ni bayi pi’ ngodad. Ere bochan ni dad nanged e ngiyal’ ni ra thang Got e piin kireb ma rayog ni ngad micheged ni ri ba t’uf Jehovah rodad ma gad ba adag ni nga darod u kanawo’ rok ni manemus. Aram e be dag ni gad ba yul’yul’ ku Got ma ke pagedan’dad ngak ko urngin ban’en ni ma rin’. Maku bochan ndad nanged e re rran fa awa nem, ma gad ma par nib od ko tirok Got ban’en ya gad manang ni rayog ni nge taw ko chirofen nem ndemtrug e ngiyal’, ni bod ba mororo’ ni ma yib nnep’. (Matthew 24:42-44) Faan gad ra yan Jehovah u taabang u gubin e rran, ma gad ma felan’nag gum’erchaen ma gad be pi’ e fulweg ngak Moonyan’, ni ir e be moningnag Got.​—Proverbs 27:11.

Ngan Fl’eg Rogoy ni Fan ko Par ni Manemus!

13. Mang e be yog e Bible u murung’agen e ngan fl’eg rogoy ko gabul nge langleth?

¹³ Piin ni ma yan u taabang ku Got e yad manang ni bay e gonop riy ni ngan tafinaynag boch ban’en ni fan ko gabul nge langleth. Boor e girdi’ e yad manang ni ra yoor e magawon rorad u nap’an i ngar pillibthirgad, me ere yad ma athamgil ko ngiyal’ ni ka yad pagal mab gel gelngirad ni ngar fl’eged rogorad nge yoor e salpiy rorad me gaman ko ngiyal’ ni kar pillibthirgad. Ere uw rogon e ngiyal’ nga m’on rodad ni fan ko tirok Got ban’en? Proverbs 21:5 e be gaar: “Ra yib angin ngak e en nib madangdang ni be fl’eg rogon ban’en, machane piin ni ma rin’ ban’en nib pay e ra par ni de gaman e tirorad ban’en.” Ba angin ni ngan fl’eg rogoy ni fan ko par nga m’on ndariy n’umngin nap’an. Dada nanged e ngiyal’ nran chuweg e re m’ag ney, me ere ba t’uf ni ngad lemnaged e tin nib t’uf rodad nga m’on. Machane ngad pared nib mudugil lanin’dad ma ngad m’oneged e tirok Got ban’en ko yafas rodad. Girdi’ ni dariy e michan’ rorad e yad ma lemnag ni de puluw ni ngan m’oneg e tin nib m’agan’ Got ngay. Machane er rogon fa?

14, 15. (a) Mang fanathin ni yog Jesus u murung’agen e fl’eg rogoy ni fan ko gabul nge langleth? (b) Mang fan ni de puluw e lem rok fare moon ni boor ban’en rok ni fan ko gabul nge langleth?

¹⁴ I weliy Jesus reb e fanathin ni be tamilangnag e re n’em. I gaar: “Be’ nib moon ni boor ban’en rok e immoy e binaw rok ni boor e ggan ni be yib ko woldug ni ba’ riy. Me gaar u wan’, ‘Dakuriy bayang ni gu ra chaariy urngin e ggan rog ngay. Ere mang e nggu rin’?’ Me gaar u wan’, ‘Baaray e n’en ni ir e nggu rin’; nggu buthug e pi naun rog ni baaray ni tafen e ggan nggu toy boch ni ka ba ga’ ko tiney, ni ir e nggu chaariy urngin e ggan rog ngay nge urngin e tin ni ka bay e chugum rog. Ma aram mu gog ngog u lanin’ug ni lungug, ‘Ba fel’ waatham! Ke yog ngom urngin e tin nib fel’ ni ba’ fan ngom nra par ni boor e duw. Mpagan’um, nguum abich ma ga be garbod, ma ga be rin’ e tin ni gab adag!’ Machane me gaar Got ngak, ‘Ri gab balyang! Nep’ ney e ra aw e fan rom; me mini’ e bayi fek urngin e pi n’ey ni kam tay ni fan ngom?’ Me gaar Jesus ngorad, ‘Ereray rogon e piin ni boor ban’en ni kar kunuyed ke yoor ban’en rorad, machane de yoor ban’en rorad u p’eowchen Got.”​—Luke 12:16-21.

¹⁵ Ere be yog Jesus ni susun ndabi athamgil fare moon ni boor ban’en rok ni nge ayuweg ir ko ngiyal’ nga m’on me par nib pagan’ fa? Danga’ ya be yog e Bible ni susun ni ngan maruwel nib gel. (2 Thessalonika 3:10) N’en ni ke olobochiy fare moon ni boor ban’en rok riy e de rin’ e n’en nib t’uf ni nge “yoor ban’en rok u p’eowchen Got.” Mus ni ra par in e duw ni be falfalan’ ko chugum rok, machane munmun ma ra yim’. De lemnag e yafas ndariy n’umngin nap’an.

16. Mang fan nrayog ni ngad pagedan’dad ku Jehovah ni fan ko gabul nge langleth?

¹⁶ Ba gonop ni ngan yan u taabang ku Jehovah min lemnag e par ndariy n’umngin nap’an. Ya aram e bin th’abi fel’ e kanawo’ ni rayog ni ngan fl’eg rogoy ko gabul nge langleth. Ba puluw ni ngan fl’eg rogon boch ban’en ni fan ko skul, nge maruwel, nge tabinaw, machane susun dabda paged talin ni der ma n’ag Jehovah e pi tapigpig rok nib yul’yul’. I yin’ David ni Pilung e tang ni gaar: “Chiney e kug pillibthir, ni gathi ku gub pagel, machane dawor gguy be’ nib fel’ ni gomanga ke pag Somol faanem, ara gguy pi fak ni yad be man ggan.” (Psalm 37:25) Miki micheg Jesus ni ra ayuweg Got e piin ni ra m’oneg Gil’ilungun Got mi yad yan u kanawoen Jehovah nib mat’aw.​—Matthew 6:33.

17. Uw rogon ni gad manang ni ke chugur ko ngiyal’ ni tomur?

¹⁷ Gad ma pigpig ku Got ni ke l’agan’dad ko par ni manemus, machane ka gad be lemnag e rran rok Jehovah. Rogon ni be lebug e thin ko profet u lan e Bible e be micheg ni rofen nem e kari chugur. Re chibog ney e ba lingagil ya ke yoor e mahl, nge misilpig ni ma af, nge durru’, nge uyungol, nge togopluw ngak e tin riyul’ e Kristiano, ma yibe machibnag fare thin nib fel’ ko Gil’ilungun Got. (Matthew 24:7-14; Luke 21:11) Ke yoor e girdi’ u fayleng ni “ke mus ni yad e yad be lemnagrad, ma kari gel e chogow rorad, ma kar ufanthingad, ma ke tolangan’rad ni yad be lemnag nri baga’ farad; ma bay urogned e thin nib kireb ngak e girdi’, ma bay dab kur folgad rok e gallabthir rorad, ma bay dab kur pininged e magar ngak be’ u lanin’rad, ma bay dab kur liyorgad ngak Got; ma bay dab kur golgad, ma bay dab kur runguyed e girdi’, ma bay ur t’ared e thin nga daken e girdi’, ma dariy fan ban’en u wan’rad; ma yad ba damumuw; ma bay ra dabuyed e tin nib fel’; ma dabiyog ni nge pagan’uy ngorad, ma dariy fan e girdi’ u wan’rad, ma yad ba uf; ma bayi t’uf e fafel rorad me tomur Got u wun’rad.” (2 Timothy 3:1-5) Ngiyal’ ney ni tin tomren e rran e mo’maw e par ko pi tapigpig rok Jehovah. Ri gad be sonnag e ngiyal’ nra yib Gil’ilungun Jehovah me chuweg urngin e kireb! Ma chiney e nge mudugilan’dad ni nga darod Got u taabang ni ke l’agan’dad ko par ndariy n’umngin nap’an.

Ngan Pigpig ni Kan L’agan’uy ko Yafas ni Manemus

18, 19. Mang e be dag ni piin nib yul’yul’ nkakrom e ur pigpiggad ku Got mi yad lemnag e par ndariy n’umngin nap’an?

¹⁸ Nap’an ni gad be yan Jehovah u taabang ma ngad lemnaged e michan’ rok Abel, Enok, Noah, Abraham, nge Sarah. Tomren ni weliy Paul u murung’agrad me yoloy ni gaar: “Ma urngin e pi girdi’ ney nra m’ad nib mich Got u wun’rad; nde yog ngorad ko biney e tamilang e pi n’en ni yog Got ni bayi pi’ ngorad, machane ra changargad u urel mi yad guy e tin ni ke yog Got ni bayi pi’ ngorad mi yad falfalan’ ngay, mu ur daged ko ngongol rorad ni yad e girdi’ nu bayang ma yad e milekag ni yad be par u roy u fayleng.” (Hebrews 11:13) Pi girdi’ nem nib gel e michan’ rorad e “reb e nam ni kab fel’ e ir e yad be nameg, ni aram e fare nam ni tharmiy.” (Hebrews 11:16) U daken e michan’ rorad mu ur sapgad nga yugu reb e nam u tan e gagiyeg ko Gil’ilungun Got nge fare Messiah. Rayog ni nge mich u wan’dad ni ra taw’athnagrad Got ko yafas ndariy n’umngin nap’an u reb e nam nib fel’​—aram fare Paradis u fayleng u tan e gagiyeg rok Gil’ilungun Got.​—Hebrews 11:39, 40.

¹⁹ I weliy Mikah ni profet u morngaagen e girdi’ rok Jehovah ni ke mudugilan’rad ni ngar liyorgad ku Got ndariy n’umngin nap’an. I yoloy ni gaar: “Ra reb e nam ma yad be meybil ma yad be fol rok e birorad e kan, machane gadad e bay darod u daken fithingan Jehovah ni Got rodad ndariy n’umngin nap’an.” (Mikah 4:5, NW) Nge mada’ ko ngiyal’ ni yim’ me pigpig Mikah ku Jehovah nib yul’yul’. Ma dabi siy ni nap’an ni ran faseg ko yam’ u lan e bin nib biech e fayleng ma ra ul’ul’ e re profet nem ni nga ranow Got u taabang ndariy n’umngin nap’an. Rib fel’ e kanawo’ ni dag ni fan ngodad ni gadad e piin ni be par ko ngiyal’ ko tomur!

20. Susun mang e nge mudugilan’dad ngay?

²⁰ Ma tay fan Jehovah rogon nib t’uf rodad e ngochol rok. (Hebrews 6:10) Manang ni mo’maw ni ngad pared nib yul’yul’ ngak u lan e re fayleng ney ni be suwey Moonyan’. “Re fayleng ney e bayi m’ay,” machane, “en nra rin’ e tin nib m’agan’ Got ngay e ra par nib fos ndariy n’umngin nap’an.” (1 John 2:17; 5:19) Ra ayuwegdad Jehovah ngad k’adedan’dad u fithik’ e skeng ni ma yib ngodad u gubin e rran. Yafas rodad nge lem rodad e nge par nib puluw ko pi flaab ni bayi pi’ e Chitamangidad nu tharmiy. Rayog e re n’ey nfaanra nguud darod u taabang Got ma nge l’agan’dad ko par ndariy n’umngin nap’an.​—Jude 20, 21.

Uw Rogon ni Ga Ra Fulweg?

◻ Mang e mm’agan’ Got ngay ni fan ko piin ni ma fol rok?

◻ Mang fan ndawori rin’ Jehovah ban’en ni nge chuweg e fayleng ney ni dar folgad rok Got?

◻ Mang fan nsusun dabi war e pasig rodad ko machib ni bochan ndad nanged e ngiyal’ nra rin’ Got ban’en?

◻ Mang boch angin nra yib ni ngan yan u taabang Got min lemnag e par ndariy n’umngin nap’an?

[Sasing ko page 15]

N’en nib t’uf ni ngan yan u taabang Got e ngad pigpiggad ku Got u fithik’ e pasig ni bod ni rin’ pi gachalpen Kristus