Pi Magawon ni Ma M’ug ko Stepfamily

RAYOG NI NGE FALFALAN’ E PI STEPFAMILY! UW ROGON?

Ngiyal’ ney ma bay boor e stepfamily u gubin yang u fayleng. Pi stepfamily nem e bay boor e magawon nra sum. Bin ni th’abi mo’maw’ riy e ngan chugliy e bitir. Ra dag e gali article ney ni bay u roy ko uw rogon nrayog ni ngan chugliy e bitir ko stepfamily nge yib angin.

Baga’ ni yina yog e thin nib kireb u murung’agen e stepfather nge stepmother. Nap’an ni ka gad ba bitir, kad rung’aged fre yat u murung’agen Cinderella, ni ke gafgow u pa’ e stepmother rok nib kireb. Mus ko bitir u Europe ma yima fil fre yat u murung’agen Snow White and the Seven Dwarfs ngorad. Stepmother rok Snow White e reb e witch nib kireb!

Pi yat nem e ma dag e tin riyul’ u murung’agen e stepfamily fa? Gubin e stepfamily e ba kireb fa? Danga’. Baga’ ni yiba adag e tin th’abi fel’ ko bitir ni kan fakay ni bochan e mabgol. Machane bay boch e magawon nib mo’maw’ ko pi stepfamily.

Pi Magawon ni Ngan Chugliy Bitir

Nap’an nra dar ba wu’ e mabgol ko yay ni som’on, ma baga’ nra war ni bochan ndawori ilal laniyan’ fre wu’ i mabgol. Ma nap’an e mabgol ko bin l’agruw yay, magawon ni ngan ayuweg e bitir e rayog ni nge kirebnag e fel’ thilin fa wu’ i mabgol. Be dag boch e report ni aningeg e mabgol nib stepfamily u fithik’ ragag e ma war nge dar u m’on ni nge gaman lal’ e duw.

Dawori bung rogon ba wu’ e mabgol ko pi magawon ko emotion, nge mini’ ni ngan yul’yul’ ngak, nge awan’ ni ma yib nga laniyan’ e bitir ni bochan e labthir nib biech. Pi bitir nem e ma lemnag ni labthir nib biech e kab t’uf rok e labthir rorad. Maku, ra mo’maw’ u wan’ e labthir ni ke chuw e ani mabgol rok ni kab t’uf e ani mabgol rok u wan’ e bitir rok. Reb e pagal e ke guy rogon ni nge weliy murung’agen e fel’ thilrow e chitamangin ni be gaar: “Nina, gu manang ni ke rin’ Papa e tin kireb ngom, machane ke rin’ e tin nib fel’ ngog!” Yugu aram rogon ni ba yul’yul’ e pi thin nem, machane rayog ni nge k’aring e awan’ u wan’ e nina’ ngak chitamangin e bitir.

Yog reb e stepfather ni gaar: “Dawor gu nang rogon ni nggu pithig e pi magawon nib m’ag i chugliy e bitir ni stepchildren. Kug lemnag ni bochan e kug leay e nina rorad ma kug mang e chitamangirad. Kug lemnag ndariy e magawon riy! Kargu oloboch ya dagu lemnag ni kab t’uf e chitamangirad.”

Ri rayog ni nge sum e magawon ko ngiyal’ nib t’uf ni ngan gechignag e bitir. Ba t’uf ni ngan gechignag e bitir u fithik’ e t’ufeg, machane baga’ ni yad ma togopluw ni mus ko ngiyal’ nra gechignagrad e gallabthir rorad. Kab mo’maw’ rorad ni nge gechignagrad e stepparent rorad! Faan yira gechignagrad, ma baga’ nra yog e bitir, “Gathi gur e chitamag!” Pi thin nem e ri rayog ni nge kirebnagan’ e stepparent ni baadag ni nge ayuweg e bitir!

Rayog ni nge yib angin i chugliy bitir u lan e stepfamily fa? Rayog ni nge ubung e stepparent e tabinaw nge yib angin riy? Fulweg ko gali deer ney e arrogon nfaanra gubin e girdi’ nib l’ag ngay e ra fol ko fonow u Bible ni Thin Rok Got.

[Sasing ko page 3]

“Gathi gur e chitamag!”