Kaygi Yoor E Tin Ni Ke Ning Jehovah Chilen Ngodad Ni Nguud Rin’ed?

“Tin ni ke yog Jehovah ngomed ni ngam rin’ed e nga mu rin’ed e tin nib yal’uw, mu um pired ni gimed ba gol ngak yugu boch e girdi’, mu um folgad rok Got u fithik’ e sobut’an?”​—MICAH 6:8, New World Translation.

1. Sana mang e tapgin ni yugu boch e girdi’ e der ma pigpig ku Jehovah?

KE ning Jehovah boch ban’en ngak girdien. Machane tomren ni kam bieg e pi thin ni bay u lang ni ir bang ko pi thin ni ke yiiynag Micah ni profet, ma rayog ni ngam mog ni de pag rogon e pi n’en ni be ning Got ngak e girdi’ ni ngar rin’ed. Yugu aram rogon, ma boor e girdi’ ni der ma pigpig ko Ani Ga’ ni ir fa en ni ke sunmiyrad, ma boch e girdi’ e kar pigpiggad ngak kafram ma munmun ma kar talgad. Mang fan? Ya yad be lemnag ni kaygi pag rogon e n’en ni be ning Got ni ngad rin’ed. Riyul’ ni aram rogon, fa? Ara sana de puluw e n’en ni be lemnag be’ ko tin ni baadag Jehovah ni nge rin’? Tin ni ke buch kakrom e rayog ni nge tamilangnag u murung’agen e re n’ey ngan nang.

2. Mini’ Naaman, ma mang e ke yog e profet rok Jehovah ngak ni nge rin’?

² I Naaman ni ir e ga’ ko pi salthaw nu Syria e ke daraw, machane kan nog ngak ni bay reb e profet rok Jehovah u Israel nrayog ni nge golnag. Ere ke yan Naaman nge girdien iyan nga Israel me munmun e kar tawgad nga tafen Elisha ni ir e profet rok Got. Machane de yib Elisha nga wen ni ngar nonow Naaman, ke mus ni ke l’og e tapigpig rok me yog ngak boch e thin ni nge yog ngak Naaman ni gaar: “Ngam man ngam maluk nga lan e lul’ u Jordan ni medlip yay, me chuw e daraw u dowam ngam sul nga rogom.”​—2 Kings 5:10.

3. Mang fan ni som’on me siyeg Naaman ni nge fol ko n’en ni ke yog Jehovah ni nge rin’?

³ Faan manga fol Naaman ko thin ni susun ni nge rin’ ni ke weliy e profet rok Got, ma ra golnag ko m’ar rok nrib kireb. Ere, kaygi pag rogon e n’en ni ke ning Jehovah ngak ni nge rin’? Ri danga’. Machane, ke dabuy Naaman ni nge fol ko mang e ke yog Jehovah ni nge rin’, me gaar: “Gathi kab manigil fagal lul’ ni Abanah nge Pharpar, ni bay u Damaskus, ko urngin e lul’ u Israel?” ke togopuluw. “Gathi kab fel’ ni nggu wan ni nggu maluk u rom ma ra yib angin ngog?” Nge mu, ke chuw Naaman ni ke damumuw.​—2 Kings 5:12.

4, 5. (a) Bochan ni ke fol Naaman ko pi thin ni kan nog ngak ma mang e taw’ath ni ke yib ngak, ma mang e ke rin’ ni bochan? (b) Mang e n’en ni ngad gonopiyed e chiney?

⁴ Ri mang e magawon rok Naaman? Gathi riyul’ ni kaygi mo’maw e n’en ni thingari rin’. Ma ke yog e pi tapigpig rok Naaman ngak u fithik’ e ta’fan ni gaar: “Kaygi mom’aw e n’en ni ke yog fare profet ngom ni ar fan ndab mu rin’? Ere uw fene fel’ e nen ni ke yog ngom ni, ‘Mman ngam maluk ngam gol’?” (2 Kings 5:13) Lem rok Naaman e aram e magawon rok. Ke lemnag ni n’en ni kan rin’ ngak e gowa kan ta’ ni ir be’ ndariy fan ma ku ke lemnag ni fare n’en ni kan nog ngak ni nge rin’ e dabi yib angin ma ra tamra’ ngay. Machane, ke fol Naaman ko fonow nib fel’ ni ke pi’ e pi tapigpig rok ngak u fithik’ e ta’fan me lith ni medlip yay nga lan e lul’ ni Jordan. Amu lemnag feni falfalan’ Naaman faani guy ni “ke m’ay e m’ar rok nge par downgin ni gowa downgin bochi tir ni ke biech”! Kari falfalan’ me pining e magar ni bochan. Maku, ke yog Naaman ni ka aram nap’an iyan nga m’on, ma dabki liyor ngak yugu boch e got ya ke mus ni goo Jehovah.​—2 Kings 5:14-17.

⁵ Ka nap’an u tabolngin, ma ke ning Jehovah ngak e girdi’ ni ngar folgad u boch e motochiyel rok nib thil thil. Gamad be piningem ni ngam tafinaynag boch ban’en ni bang ko pi motochiyel ney. Ma faanra ga be rin’, mu fithem ko mang e ga ra rin’ nfaanra ke yog Jehovah ngom ni ngam mu rin’ e pi n’en nem. Bayi taaboch, ma ngad yaliyed ko mang e be ning Jehovah ngodad ni ngad rin’ed e chiney.

Mang e Ke Ta’ Jehovah Chilen Kakrom

6. Mang e thin ni kan nog ngak fagal wu’ nsom’on e mabgol ni ngar rin’ew, ma susun mang e ga ra rin’ nfaanra kan nog e pi thin nem ngom?

⁶ Ke tay Jehovah chilen ngak gal wu’ i mabgol nsom’on, ni Adam nge Efa, ni ngar chuguliyew e bitir rorow, ma ngar gagiyegnaged e fayleng, ni mus ko gamanman ma ba muun ngay. Ku kan taw’athnagrow ya kan pi’ ngorow reb e binaw ni baga’ ni aram e paradis. (Genesis 1:27, 28; 2:9-15) Machane kan pi’ ngorow reb e motochiyel. Immoy reb e gek’iy ni dabiyog ni ngar kew wom’ngin, ma boor ken e gek’iy ni ma yib e wom’ngin u milay’ nu Eden machane ke mus ni taab ken e dabra kew. (Genesis 2:16, 17) De yoor e n’en ni kan nog ngorow ni ngar rin’ew, fa? Gathi bay e falfalan’ riy ni ngan maruweliy e maruwel, ma bay e athap ni rayog ni ngan par ni manemus u fayleng ni ffel’ fithik’ i dowey? Ra ke m’ug faanem ni ma wawliyey u milay’, mang fan ni dabmu siyeg e tin ke yog? De m’agan’um ngay ni Jehovah bay mat’awon ni nge pi’ e bin ba mom e motochiyel?​—Genesis 3:1-5.

7. (a) Mang e maruwel ni kan pi’ ngak Noah, ma mang e togopuluw ni ke yib ngak riy? (b) Uw rogon uwan’um e n’en ni ke yog Jehovah ngak Noah ni nge rin’?

⁷ Boor e duw ni ke yan nga tomren, me tay Jehovah chilen ngak Noah nge toy fare ark nge ayuwegrad ni dabra m’ad faani yib e ran ni nge tharey e fayleng. Bochan kaygi ga’ fare arke ni yira ngongliy, ma aram e de mom e re maruwel nem ma kan rin’ e re nem ko ngiyal’ni bay boor e girdi’ ni ma moningnag nge girdi’ nib damumuw. Machane, uw feni gel e falfalan’ ni yib riy ngak Noah nrayog ni nge ayuweg e tabinaw rok ni ngar magaygad nib fas, dabni weliy murung’agen e gamanman ni pire’! (Genesis 6:1-8, 14-16; Hebrews 11:7; 2 Peter 2:5) Faanra kan pi’ ngom e maruwel ni bod e binem, ma ga ra ra maruweliy nib gel ngam mu’nag fa? Ara ga ra lemnag ni kaygi pag rogon e n’en ni ke yog Jehovah ngom ni ngam mu rin’?

8. Mang e n’en ni kan nog ngak Abraham ni nge rin’, ma bochan ni ke fol ko thin ni kan nog ngak e be taarebrogonnag e binem ko mang?

⁸ Ke ning Got chilen ngak Abraham ban’en ni rib mo’maw, ma be gaar ngak: “Wenig ngom, fare pagal ni fakam ni Isak, ni kari maagirag rom, mab t’uf rom, e ngam marow ko fa gi binaw ni Moriah ma ngam li’ riy ngam urfeg ni maligach.” (Genesis 22:2) Bochan ni ke micheg Jehovah ni ra yib e bitir rok Isak ba ngiyal’, ma aram e kan skengnag e michan’ rok Abraham ko riyul’ ni bay gelngin Got ni nge faseg Isak ko yam’. Faani guy rogon Abraham ni nge li’ Isak nge pi’ ni maligach, ma aram ke ayuweg Got ni nge par fare pagal nib fas. Ma binem e be fanathinnag ni bayi pi’ Got Fak ni fan ko girdi’ ma ra munmun me ir e ra faseg ko yam’.​—Genesis 17:19; 22:9-18; John 3:16; Acts 2:23, 24, 29-32; Hebrews 11:17-19.

9. Mang fan ni gathi kaygi pag rogon e n’en ni ke yog Jehovah ngak Abraham ni nge rin’?

⁹ Boch e girdi’ e ma lemnag ni kaygi pag rogon e n’en ni ke ning Jehovah ngak Abraham ni nge rin’. Machane riyul’ ni aram rogon, fa? Gathi gad ba t’uf rok fa En ni sunmiydad, ni bay gelngin ni nge faseg e yam’, nfaanra ning ngodad ni ngad pared nib yul’yul’ ngak nge mada’ ko yam’? Jesus Kristus nge pi gachalpen e da ur lemnaged ni aram rogon. Ba m’agan’rad ni ngan gafgownagrad, ma ngan thang e pogofan rorad yu ngiyal’, ni ngar rin’ed e tin nib m’agan’ Got ngay. (John 10:11, 17, 18; Acts 5:40-42; 21:13) Faanra ke yib e magawon ngom ni aram rogon, ma fel’ uwan’um ni ngam bod yad? Ngam mu lemnag boch ban’en ni baadag Jehovah ni nge rin’ boch e girdi’ ni ke fel’ uwan’rad ni ngar manged girdien.

Motochiyel rok Jehovah Ngak Piyu Israel

10. Mini’ e piin ni kar micheged ni ngar folgad ko urngin e ban’en ni baadag Jehovah ni ngar rin’ed, ma mang e ke pi’ ngorad?

¹⁰ Pi owchen Abraham u daken fak ni Isak nge Jakob, ara Israel, ni fak Isak, e kar yoorgad ma kar manged reb e nam ni Israel. Ke ayuweg Jehovah piyu Israel ni nge pithigrad ni dabkuura pared ni yad e sib u Egypt. (Genesis 32:28; 46:1-3; 2 Samuel 7:23, 24) Dawori n’uw nap’an u tomren, ma kar micheged ni ngar folgad ko urngin ban’en ni baadag Got ni ngar rin’ed. Ma kar rogned nra gaargad: “Bay gu rin’ed urngin e tin ni ke yog Jehovah ni nggu rin’ed.” (Exodus 19:8, NW) Mab puluw ko tin ni be tafinaynag piyu Israel ni yad baadag ni Jehovah ira gagiyegnagrad, ma aram me pi’ ngorad e pi motochiyel ni urngin ni ke pag 600, ni ba muun ngay fa ragag i motochiyel. Ma munmun, ma pi motochiyel rok Got nem, ni kan pi’ u daken Moses, e kan nang ni goo fare Motochiyel.​—Ezra 7:6; Luke 10:25-27; John 1:17.

11. Mang reb i fan ni kan pi’ ngorad fare Motochiyel, ma mang boch e kenggin e motochiyel ni kan pi’ ngak piyu Israel nfaan yad ra fol ma ra fel’ rogorad riy?

¹¹ Kan pi’ fare Motochiyel ngak piyu Israel ni fan ni ngan ayuwegrad nge tamilang uwan’rad boch ban’en nib m’ag ko ngongol ni darngal, nge rogon e yaram ko fol chuway, nge rogon ni ngan ayuweg e bitir. (Exodus 20:14; Leviticus 18:6-18, 22-24; 19:35, 36; Deuteronomy 6:6-9) Pi motochiyel nem e ma ayuweg rogon ni ngan dag e ngongol nib fel’ ngak yugu boch e girdi’ nge rogon ni ngan ayuweg e pi gamanman rorad. (Leviticus 19:18; Deuteronomy 22:4, 10) Fapi motochiyel nib m’ag ko madenom ni yima madenomnag u gubin e duw nge fare motochiyel u murung’agen e muulung ni ngar liyorgad ngak Got e ke ayuwegrad ni nge par nib gel e michan’ rorad.​—Leviticus 23:1-43; Deuteronomy 31:10-13.

12. Ri mang fan ni kan pi’ ngorad fare Motochiyel?

¹² Ri fan ni kan ngongliy fare Motochiyel e aram e n’en ni ke weliy Paul ni apostal, me yoloy ni gaar: “I puthuy ngay ni fan e nge dag ko mang e ngongol nib kireb, nge mada’ ko ngiyal’ ni bay yib i m’ug riy faanem ni ir fare owchen [Kristus] ni i micheg Got ban’en u daken.” (Galatians 3:19, NW) Fare Motochiyel e ke puguran ngak piyu Israel ni dawora flontgad. Ere, ar fan, ni ba t’uf rorad e maligach nib flont ni bay rogon ni nge chuweg e denen rorad ni urngin. (Hebrews 10:1-4) Ere kan ngongliy fare motochiyel ni nge ayuwegrad ni nge fel’ Jesus uwan’rad, nge michan’rad ni ir fare Kristus. Ke yoloy Paul ni gaar: “Fare Motochiyel e mang sensey ngodad nge yan i mada’ ko ngiyal’ ni yib Kristus riy, ni aram e rayog ni ngad mat’awgad ngak Got u daken e michan’ rodad ngak Kristus.”​—Galatians 3:24.

Kaygi Tomal e Motochiyel rok Jehovah?

13. (a) Uw rogon uwan’ e girdi’ ni dawora flontgad fare Motochiyel, ma mang fan? (b) Kaygi tomal fare Motochiyel, fa?

¹³ Yugu aram rogon ni fare Motochiyel e “ba thothup, nge ba mat’aw ma ba fel’,” ma boor e girdi’ ni be tafinaynag nib tomal e pi n’en nem. (Romans 7:12) Bochan ni ba flont fare Motochiyel, ma piyu Israel e dabiyog ni ngar folgad riy ni polo’. (Psalm 19:7)Arfan ni Peter ni apostal e ke yog e re nem ni “reb e mat’ ni mus ni gallabthir rodad nge gadad e dabiyog ni ngad feked.” (Acts 15:10) Riyul’, ni fare Motochiyel ni goo ir e de tomal, ma yira fol riy ma ra yib angin ngak e girdi’.

14. Mang boch ban’en ni be dag ni kari fel’ rogon piyu Israel ni bochan fare Motochiyel ni kan pi’ ngorad?

¹⁴ Mu lemnag e re n’ey, u tan fare Motochiyel, ni reb e moro’ro’ e dabi kalbus machane ba t’uf ni nge un ko maruwel nge sulweg e n’en ni ke iring ni l’agruw yay ara ka boor ko l’agruw yay ni nge thang e malfith rok. Fa cha’ ni kan iring boch ban’en ni tirok e dabi kireban’ ngay, ku dabi magawonnag e girdi’ ni ta maruwel ni ngar ayuweged e maruwel u kalbus. (Exodus 22:1, 3, 4, 7) Boch e ggan ni ma yib e m’ar riy ngak e girdi’ e bay e motochiyel riy ni dabni ka’. Bod ufin e babiy, faanra dabni lith nib fel’ rogon, ma ra fek i yib e m’ar ni trichinosis, ma rabbit e rayog ni nge fek i yib e m’ar ni tularemia. (Leviticus 11:4-12) Maku, re Motochiyel nem e aram e n’en ni ma ayuwegey ya bay bang riy ni be weliy ni dabni math ko yam’. Faanra math be’ ko yam’, ma thingari luknag downgin nge mad rok. (Leviticus 11:31-36; Numbers 19:11-22) Magungan e ba t’uf ni ngan tay nga lan e low ngan tharey, ya aram e kanawo’ ni dabni wereg e baiking riy nge m’ar e girdi’, ma ke nang e pi scientist e re n’ey ko boch e chibog ni ke yan.​—Deuteronomy 23:13.

15. Mang e n’en nib tomal ni nge fol piyu Israel riy?

¹⁵ De pag rogon e n’en ni be weliy e fare Motochiyel nge fol e girdi riy. Machane dabiyog ni ngad dogned e pi thin ney ko girdi’ ni yima yog ni yad e piin ni ma weliy fan fare Motochiyel. Bod rogon fapi kenggin e motochiyel ni kar wereged, ma fare babyor ni A Dictionary of the Bible, ni James Hastings e ke fal’eg rogon, e be gaar: “Urngin e motochiyel u lan e Bible e kan tay boor e kenggin e motochiyel nib achichig mab mom’aw ngay. . . . Aram fan ni kan guy rogon ni urngin e magawon ni sum e ngan tay nga tan fare Motochiyel, ma ma fanay boch e thin ni ngan weliy ndariy e runguy riy ma ba gel ni ngan gagiyegnag e ngongol ko girdi’ ni polo’. . . . Dabiyog ni ngan fanay e nangan’ ara lem ko girdi’; kan dariyfannag fare gelngin e thin rok Got ma kan upunguy ko boor e kenggin e motochiyel.”

16. Mang e ke yog Jesus u murung’agen e pi kenggin e motochiyel nge boch e yalen ni ke sunmiy e pi tayugang ko pi yuraba’ i teliw?

¹⁶ Ke yog Jesus ni Kristus e thin nib gel ngak e pi tayugang ko pi yuraba’ i teliw ni yad e piin ni kar wereged boor kenggin e motochiyel ngak e girdi’, me gaar: “Yad be ngongliy rogon bogi ban’en nib tomal ngar m’aged nga daken keru’ e girdi’, machane dariy an’rad ni ngar mithmitheged taab bugul i pa’rad ngar ayuweged yad i fek e pi n’en nib tomal nem.” (Matthew 23:2, 4) Ke weliy ni pi kenggin e motochiyel ni kar sunmiyed nib tomal nge boch e yalen rorad, nib muun ngay e motochiyel ko klin ni ma balyangan’ e girdi’ ngay, e “be dariyfannag fare thin rok Got.” (Mark 7:1-13; Matthew 23:13, 24-26) Mus ko ngiyal’ ni immoy Jesus u fayleng, ma pi tamachib ko pi yuraba’ i teliw nu Israel ko ngiyal’ nem e yad ma machibnag e thin ni de puluw ko mang baadag Jehovah ni ngan rin’.

Ri Mang e Ri Be Ning Jehovah

17. Mang fan ni de falfalan’ Jehovah ko pi maligach ni kan urfeg ni ke pi’piyu Israel ni de michan’rad ngak?

¹⁷ U daken fare profet ni Isaiah, ma ke gaar Jehovah: “Kan chachangeg nga owcheg e pi saf ni gimed be urfiy nguum pied ngog ni maligach; nge mum’ ko tin th’abi fel’ e gamanman romed. Kug dabuy e racha’ ko garbaw nge saf nge kaming.” (Isaiah 1:10, 11) Mang fan ni ke dabuy Got e maligach ni ir e n’en ni ke yog faram ni susun ni ngan rin’ ni aram fare Motochiyel? (Leviticus 1:1–4:35) Ya der ma tay e pi girdi’ nem fan. Arfan ni kan fonownagrad, ni gaar: “Mmalukgad ngam biechgad; Mu taleged urngin e kireb ni gu be guymed ni gimed be rin’; Er rogon, mu talgad ndab kum ngongliyed e kireb. Mi gimed fil rogon i rin’ e tin nib mat’aw; mu guyed rogon ngan rin’ e tin nib yal’uw; mu llowan’naged e piin ni ma gafgownag e girdi’; ngam dugliy ban’en ni fan ko pagal ni ke yim’ e chitamangin; mu wenignaged e piin ni ppin ni ke yim’ e pumoon rorad nga ni pi’ mat’awrad.” (Isaiah 1:16, 17) Gathi be ayuwegdad e pi n’en n’ey ni ngad falfalan’gad ko mang e baadag Jehovah ni ngan rin’ ko pi tapigpig rok?

18. Mang e n’en ni ri baadag Jehovah ni nge rin’ piyu Israel ni fan ngak?

¹⁸ I dag Jesus ko mang e ri baadag Got. Ke rin’ e re nem u nap’an ni kan fith ngak reb e deer ni, “Bin ngan e motochiyel e ir e th’abi ga’ u fithik’ e Motochiyel?” Ke fulweg Jesus ni gaar: “ ‘Thingari t’uf rom Jehovah ni ri ir e Got rom u polo’ i gum’ircha’ ngu polo’ i laniyan’um, ngu polo’ i lem rom.’ Ireray e bin th’abi ga’ nge bin som’on e motochiyel. Ma bin migid ngay e motochiyel ni ku baga’ fan e bod e biney ni gaar, ‘Gin’en ni ga bay riy e thingari t’uf rom e en ni ir e mmigid ngom ni gowa gur.’ Urngin ban’en ni bay u lan fare Motochiyel nge tin i fil e pi profet ko girdi’ e be tor ko gali motochiyel ney.” (Matthew 22:36-40, NW; Leviticus 19:18; Deuteronomy 6:4-6) I Moses ni profet e ke yog e thin ni taab fan ban’en u nap’an ni ke fith e deer ni gaar: “Mang e be ning Jehovah ni Got romed e aram ngam pired ni bay madgun Got uwan’med, ma aram rogon rayog ni ngam marod ko urngin e kanawoen ma nge t’uf Got romed ma ngam mu pigpiggad ngak u polo’ i gum’ircha’med ngu laniyan’med; ma rayog ni ngam mu folgad ko pi motochiyel rok nge urngin ban’en ni baadag ni ngam rin’ed?”​—Deuteronomy 10:12, 13; 15:7, 8, NW.

19. Mang e ke rin’ piyu Israel ni be micheg ni yad be guy rogon ni ngar daged ngak e girdi’ ni yad e piin nib thothup, machane mang e ke yog Jehovah ngorad?

¹⁹ Yugu demtrug ni kar rin’ed e tin nib kireb, ma piyu Israel e ka yad baadag ni ngar rin’ed ban’en nge m’ug ni yad e piin nib thothup. Fare Motochiyel e be motochiyelnag ngorad ni ngar paged e abich ni ke mus ni Chirofen ni Yima Biyul, machane kar tababgad ni ngar madenomnaged e re nem ni boor yay. (Leviticus 16:30, 31) Machane ke puwan’ Jehovah ngorad, me gaar: “Gathi ireray e mit i pag e abich ni gu baadag? Mu chuwegned e chen ni er e gafgow ni gimed be tay ko girdi’, mu lufed e mat’ nib tomal ni kam tiyed nga porad ni er e ngongol nde yal’uw ni gimed be rin’ ngorad, mi gimed pag e girdi’ ni gimed be gafgownagrad, ma ngam mu kirebnaged fare mat’ nge ruwley? Gathi ngam mu pied boch e ggan romed i kay e piin ni yad be yim’ ko bilig, mi gimed bing e naun ngak e piin ni gafgow ndariy e naun rorad? Gathi nga mpied e mad ngak e piin ndariy e mad ni nga ron’ed, ma dabmu siyeged ni nge dab mu ayuweged e girdi’ romed?”​—Isaiah 58:3-7.

20. Mang fan ni ke puwan’ Jesus ngak e piin ni be dake yad be tiyan’ ko teliw rorad?

²⁰ Piyu Israel ni ke mus ni yad ma fol ko n’en ni yad be lemnag nib mat’aw e bay magawon rorad ni taab rogon ko piin ni be dake moding, me gaar Jesus ngorad: “Ba fel’ ni gimed ra pi’ taab guruy u ragag guruy e tin ni ba’ romed, ma dab mpaged e tin nib mat’aw nge runguy nge yul’yul’. Pi nen n’ey e thingar ni rin’, machane dabni pag yugu boch ban’en.” (Matthew 23:23; Leviticus 27:30) Gathi be ayuwegdad e thin rok Jesus ni ngad nanged ko ri mang e baadag Jehovah ni ngad rin’ed ni fan ngak?

21. Uw rogon ni ke sumarnag Mikah ni profet ko mang e tin baadag Jehovah ni ngad rin’ed nge mang e tin ni dabun ni ngad rin’ed?

²¹ Nge tamilang uwan’ e girdi’ ko mang e baadag Jehovah ni ngad rin’ed nge mang e pi n’en ni thingar dabda rin’ed, ma Mikah ni profet rok Got i fith ni gaar: “Mang e nggu fek i yib ngak Jehovah ko ngiyal’ ni gu ra yib ni nggu ta’ fan mu gu meybil ngak? Gur nggu fek i yib e tin th’abi fel’ i pi fak e garbaw nggu urfiy nggu pi’ ngak ni maligach? Gur ra gu fek in e biyu’ i saf i yib ngak Jehovah, ara ug pi’ e gapgep ko olive ngak ndab gu tal ma gur ra fel’ uwan’? Gur nggu pi’ ngak e bin nganni’ i fakag nge yan nga puluwon e denen rog? Gimed e girdi’ u gubin yang, ke yog ngomed e tin nib fel’. Tin ni ke yog ngomed ni ngam rin’ed e tin nib yal’uw, um pired nib t’uf Got romed nge girdi’,mu um folgad rok Got u fithik’ e sobut’an’?”​—Micah 6:6-8, NW.

22. Mang ri baadag Jehovah ni nge rin’ e piin ni yad bay u tan fare Motochiyel?

²² Ere, piin ni kan tayrad nga tan fare Motochiyel ma mang e baadag Jehovah ni ngar rin’ed? Thingara t’ufeged Jehovah ni Got rorad. Maku, ke yog Paul ni apostal ni gaar: “Ya re Motochiyel nem ni polo’ e kan puthuy nga taabang ke i par ntaareb e motochiyel ni baaray ni gaar: ‘Demtrug e gin’en ni ga bay riy ma ngam t’ufeg e cha’ ni ir e mmigid ngom ni gowa gur.’ ” (Galatians 5:14) Ma taab rogon e re ney ko thin ni ke yog Paul ko pi Kristiano nu Rome ni gaar: “En nra t’uf e girdi’ rok e ke fol ko fare motochiyel. . . . Ra t’uf e girdi’ rodad, ma aram e kad folgad ko fare motochiyel ni polo’.”​—Romans 13:8-10.

Gathi Kaygi Pag Rogon

23, 24. (a) Mang fan ni gathi kaygi pag rogon ni ngad rin’ed e tin ni baadag Jehovah ni ngad rin’ed? (b) Mang e bin migid e kenggin ni gad ra fil?

²³ Gathi gad be falfalan’ ya Jehovah ni Got rodad e ba t’uf e girdi’ rok, ma ma lemnagdad ma ma runguydad, fa? Jesus Kristus, ni ir e bin nganni i fak Got e ke yib nga fayleng nge ga’nag e t’ufeg rok Got​—ni fan ni nge nang e girdi’ ni ri yad ba t’uf rok Jehovah. Nge guy e girdi’ e t’ufeg rok Got ngorad, ma aram ke weliy boch e thin u murung’agen nochi arche’ ni sparrow fithingan ni gaar: “Dariy taa bagayad nra mul nga but’ nde nang e Chitamangimed.” Ere ke museg e welthin rok ni gaar: “Ere dabmu tamdaggad: ya ka baga’ famed ngak fa nochi arche’ ni sparrow fithingan.” (Matthew 10:29-31) Ere ba mudugil, ni gathi kaygi pag rogon ni ngad folgad ko urngin ban’en ni baadag Got ni ngad rin’ed ya gad ba t’uf rok!

²⁴ Machane, mang e baadag Jehovah ni ngad rin’ed e chiney? Ma mang fan ni yugu boch e girdi’ e sana yad be lemnag ni kaygi pag rogon e n’en ni ke yog Got ni ngan rin’? Ra ngan yaliy e gali deer n’ey, ma rayog ni ngad nanged fan ko mang fan ni faanra ngad folgad ko urngin ban’en ni baadag ni ngad rin’ed ma aram e gad be un ko maruwel ni rib fel’.

Rayog ni Ngam Pi’ e Fulweg?

◻ Sana mang fan ni ke dabuy yugu boch e girdi’ ni ngar pigpiggad ko Jehovah?

◻ Uw rogon ni ke thil thil e motochiyel rok Jehovah ko pi duw ni ke yan?

◻ Mang fan ni kan sunmiy fare Motochiyel?

◻ Mang fan ni gathi kaygi yoor e pi n’en ni baadag Jehovah ni ngad rin’ed?

[Picture on page 18]

Pi kenggin e motochiyel ni ke mus girdi’ e ke sunmiy, ni taabrogon ko motochiyel ko klin ni ke balyangan’ e girdi’ ngay, e aram tapgin ni tomal e liyor rorad