Mu N’ag Fan U Wan’um E Kireb Ni Ke Rin’ Be’ Ngom

“Ereram rogon e n’en nra rin’ e Chitamag nu tharmiy ngomed ni faanra dabi bigimed me n’ag fan u wan’ e n’en nib kireb ni ke rin’ reb i walagen ngak.”​—MATTHEW 18:35.

1, 2. (a) Uw rogon ni ke tay reb e ppin nib tadenen fan ku Jesus? (b) Mang e ke tamilangnag Jesus?

SANA ir be’ ni ma pi’ ir nchuway, ma gathi fa mit i girdi’ ni ra moy u lan e naun ku be’ ni ma tayan’ ko teliw. Boch e girdi’ e kar gingad ko re ppin nem ni ke yib, ma kar ra gingad ko n’en ni ke rin’. Ya ke yib ngak fare moon ni ir e th’abi fel’ e ngongol rok, me dag ni be tay fan ya ke munurnag e rifrif u ay Jesus ko lu’ rok, me faley nga piyan lolugen.

² Ma re moon nem ni Jesus e de dabuy e n’en nke rin’ e re ppin nem, ni ir be’ “u lan e re binaw nem nrib tadenen.” Machane ke dabuy Simon e re ppin nem ya be’ nib tadenen ma aram e naun rok ma ir reb e Farise. Ma aram me weliy Jesus u murung’agen l’agruw e pumoon nra tiyew e malfith ni salpiy ngak be’ ni ma pi’ e salpiy ko girdi’ ngan maruwel ngay nge mu’ mi ni fulweg. Bagayow e boor e salpiy ni fek rok ni malfith​—ni taab puluwon ko maruwel nra tay be’ u lan l’agruw e duw. Ma bagayow e reb e guruy ko ragag guruy ko re n’em​—ni taab puluwon ko maruwel nra tay be’ u lan dalip e pul. Ma nap’an ni rognew ni dariy bagayow ni rayog ni nge thang e malfith ngak, ma aram “me thang e malfith rorow ni yow l’agruw u lan babyoren e malfith.” Rib tamilang ni facha’ ni boor e malfith rok nthang babyoren e rib gel feni t’uf e cha’ nem rok. Me puluwnag Jesus e re n’em ko n’en ni rin’ fare ppin me gaar: “Cha’ ni buchuuw e denen rok ni ke m’ay fan, e ri buchuuw e t’ufeg ni be dag.” Me ere gaar Jesus ngak fare ppin: “Ke m’ay fan e denen rom.”​—Luke 7:36-48.

3. Mang a ba t’uf ni ngad lemnaged u murung’agdad?

³ Mu fithem ni, ‘Faan mang e gag e re ppin nem fa ke buch ban’en ngog ni aram rogon ma kan runguyeg, ma gu ra par ni dab gu n’ag fan u wan’ug e kireb ko yugu boch e girdi’?’ Sana ga ra gaar, ‘Ri danga’!’ Machane rriyul’ ni ga ma n’ag fan u wan’um e kireb ni ke rin’ e girdi’ ngom? Aram e n’en ni ga ma rin’ u gubin ngiyal’? Ma kam rin’ ni ke m’agan’um ngay ma ra yog e girdi’ ni gur be’ ni ga ma n’ag fan u wan’um e kireb ni ke rin’ be’ ngom? Ngad guyed ko mang fan ni baga’ fan ni ra bagadad ma nge lemnag e re n’ey.

Ba T’uf Rodad ni Ngan Dag Ngodd ni Kan N’ag Fan e Kireb Rodad​—Ma Kan Dag

4. Mang e susun ni ngad nanged u wan’dad u murung’agdad?

⁴ Gathi gab flont, ma ri ga manang e re n’em. Ma ga ra yog e re n’em nfaanra kan fithem, ma ra yib ngan’um fare thin ni bay ko 1 John 1:8 ni be gaar: “Faanra lungudad e dairy e denen rodad, ma aram e gadad be bannagdad ma tin nib riyul’ e dariy u fithik’ i lanin’dad.” (Roma 3:23; 5:12) Boch e girdi’ e be m’ug ni yad e ta denen ni bochan e denen ni rib ubchiya’ ni yad ma rin’. Machane mus ni ra dam mu un ko denen ni aram rogon, ma dabi siy ni bay yu ngiyal’ ngu boch e kanawo’ ni dam fol ko motochiyel rok Got​—ma kam denen. Arrogon fa?

5. Mang fan ni susun ni ngad pininged e magar ku Got?

⁵ Ere rayog ni ngan puluwnag rarogom ko n’en ni yog apostal Paul ni gaar: “Ba’ ba ngiyal’ ni um pired ni gimed ba yam’ ni bochan e denen romed, ma bochan e um moyed u wuru’ e Motochiyel rok Got ni fan e gathi gimed piyu Israel. Machane chiney e ke unegmed Got ngak Kristus ke fekmed i yib ko yafos! I Got e ke n’ag fan urngin e denen rodad.” (Kolose 2:13; Efesus 2:1-3) Mu tiyan’um ko pi thin nem ni “ke n’ag fan urngin e denen rodad.” Aram boor ban’en ni be upunguy. Ra bagadad ma ba puluw ni ngad weniggad ku Got ni bod David ni ke gaar: “O [Jehovah], mu n’ag fan u wun’um e denen rog, ni bod ni mog ni ga ra rin’, ya denen rog e pire’.”​—Psalm 25:11.

6. Mang e rayog ni nge mudugilan’dad ngay ni fan ku Jehovah nge rogon ni ma n’ag fan e denen?

⁶ Uw rogon nrayog ni ngan n’ag fan e denen rom​—nge gad? Ya ba adag Jehovah Got ni nge n’ag fan e denen. Aram rarogon. (Exodus 34:6, 7; Psalm 86:5) Ma ba adag Got ni ngad meybilgad ngak, ma ngad weniggad ngak ni nge n’ag fan e kireb rodad. (2 Kronikles 6:21; Psalm 103:3, 10, 14) Ma ke pi’ ban’en nrayog ni nge n’ag fan e kireb rodad u rogon nib puluw ko motochiyel​—aram e maligach ni pi’ Jesus ni nge biyuliydad.​—Roma 3:24; 1 Peter 1:18, 19; 1 John 4:9, 14.

7. Mang e susun ni ngam folwok rok Jehovah riy?

⁷ Susun ga ra guy nib m’agan’ Got ngay ni nge n’ag fan e kireb ma aram rogon ni ngam fol riy ni ngam rin’ ngak e yugu girdi’. I tamilangnag Paul e re n’ey ni gaar: “Machane um golgad ngomed, me bigimed me munguy ngak bigimed, mu um n’iged fan u wun’med e tin nib kireb ni ke rin’ bigimed ngak bigimed, ni bod rogon Got ni bochan Kristus ma aram fan ni ke n’ag fan u wan’ e kireb ni kam rin’ed.” (Efesus 4:32) Dariy e maruwar riy ni be tamilangnag Paul ni ba t’uf ni ngad folwokgad rok Got, ya be gaar ko bin migid: “Thingar um guyed rogon nguum pired ni gimed pi fak ni gimed ba t’uf rok.” (Efesus 5:1) Ga ma guy ko uw rogon nib peth? I n’ag Jehovah Got fan e kireb rom, ere​—ba t’uf ni ngam folwok Rok ma “um golgad ngomed, me bigimed me munguy ngak bigimed, mu um n’iged fan u wun’med e tin nib kireb ni ke rin’ bigimed ngak bigimed.” Mu fithem, ‘Gu be rin’ ni aram rogon? Faanra gathi aram rogog, ma gu be athamgil ni nggu folwok rok Got mu gu n’ag fan u wun’ug e kireb ko girdi’ fa?’

Thingarda Athamgilgad ni Ngad N’aged Fan u Wan’dad e N’en ni ke Rin’ e Girdi’ Ngodad

8. Mang e susun ni ngad nanged u murung’agen e girdi’ u lan e ulung?

⁸ Faan mang e de t’uf ni ngad n’aged fan e kireb ko girdi’ u lan e ulung ko Kristiano ma kub fel’. Machane gathi ri aram rogon. Ya rriyul’, ni be athamgil e pi walag ni Kristiano ni pumoon nge ppin ni ngar folgad rok Kristus ni yugu ma daged e t’ufeg. (John 13:35; 15:12, 13; Galatia 6:2) Ke n’uw nap’an ni kar athamgilgad ma ka yad be athamgil ni ngar digeyed e lem nge thin, nge ngongol ko re fayleng ney nib kireb. Ri yad ba adag ni nge m’ug u dakenrad e bin nib biech i pangirad. (Kolose 3:9, 10) Machane dabiyog ni ngad paged talin ni urngin e ulung u ga’ngin e fayleng e goo girdi’ ndar flontgad. Ma kar mon’oggad boch ko kafram, machane ka bay thibngirad.

9, 10. Mang fan ndabni gin ngay ni ra sum e magawon u thilin e pi walag?

⁹ U lan e Bible ma be yog Got ngodad ni ngad nanged ni de flont e pi walagdad ni pumoon nge ppin u lan e ulung. Susun, mu lemnag e n’en ni yog Paul u Kolose 3:13 ni gaar: “Nge bigimed mi i ayuweg bigimed ko meewar rok u fithik’ e runguy, mu um n’iged fan u wun’med e n’en ni manga ke kirebnag bigimed u laniyan’ bigimed ko re ngiyal’ i n’en ni ba’ ban’en ni ke dabuy bigimed ni ke rin’ bigimed ngak. Thingar um n’iged fan u wun’med e n’en ni ke rin’ bigimed ngak bigimed ni bod rogon ni ke n’ag [Jehovah] fan u wan’ e tin ni kam rin’ed nib togopuluw ngak.”

¹⁰ Be weliy e Bible ngodad u rogon ni ma n’ag Got fan e kireb rodad ma aram e thingarda n’aged fan e kireb ni ma rin’ e girdi’ ngodad. Mang fan nib mo’maw e re n’ey? Ya ke yog Paul ni rayog ni nge aw ni “ba’ ban’en ni ke dabuy bigimed ni ke rin’ bigimed ngak.” I nang ni ra sum e pi magawon nem. Dabi siy ni aram rogon u nap’an e bin som’on e chibog, ni mus u fithik’ e pi Kristiano ni yad e “piin nib thothup” ni ke ‘l’aganrad ko par u tharmiy ni ir e be chaariy Got ni fan ngorad.’ (Kolose 1:2, 5) Ere bpuluw ni ngad lemnaged ni gathi aram rogon ko ngiyal’ ney ni boor e tin riyul’ e Kristiano ma dariy e mich ni yad “girdien Got, ya yad ba t’uf rok ma ke dugliyrad ni ngar manged girdien”? (Kolose 3:12) Ere, susun ndabda lemnaged ni rib kireb e ulung rodad ya bay e magawon riy​—ni ke kireban’ boch e girdi’ ni bochan ban’en ni kan rin’.

11. Mang e ke ginangdad James riy?

¹¹ N’en ni yog James ni walagen Jesus e be tamilangnag ni yu ngiyal’ ma ra sum boch ban’en ma ra t’uf ni ngad n’aged fan e n’en ni rin’ e pi walagdad ngodad. “Ba’ be’ nib llowan’ ma ba gonop u fithik’med fa? Faanra ba’ ma nge micheg nga pangin nib fel’ nge ngongol rok nib fel’ ni be ngongliy u fithik’ e sobut’an’ nge gonop. Machane faanra be awan’med ngak be’, fa gimed be fanenikay be’, fa reb e goo gimed e gimed be lemnagmed, ma thingari dab mu ufanthingad ngam lifithed l’ugunmed nib togopuluw ko tin nib riyul’ e thin.” (James 3:13, 14) Tin riyul’ e Kristiano e ma “awan’ ngak be’, fa yad be fanenikay be’”? Arrogon, pi thin nem ni yog James e be dag ni aram boch e magawon ni immoy u lan e ulung u nap’an e bin som’on e chibog maku arrogon e ngiyal’ ney.

12. Mang magawon ni sum u lan e ulung nu Filipi kakrom?

¹² Immoy l’agruw e girdi’ ni kan dugliyrow ko kan ni thothup mar maruwelgad Paul u taabang. Sana kam bieg u murung’agen Euodia nge Sintike, ni ur moyew ko fare ulung u Filippi. Dariy e thin ni boor u murung’agrow machane be dag u Filippi 4:2, 3 ni immoy e magawon u thilrow. Ke tabab ko reb e thin ni yog bagayow nde fel’, fa ke lemnag bagayow ni kan dariy fannag reb e girdi’ rok, fa ke awan’gow ngorow fa? Yugu aram rogon, ma ke ubchiya’ fare magawon ma aram me rung’ag Paul murung’agen u nap’an ni bay u Roma. Sana dakur nongow ngorow e gali walag ney, ni mus u nap’an e muulung fa kar gun’gunnagew yow ngak yugu boch e tafager.

13. Mang e dabi siy ni ke buch u thilin Euodia nge Sintike, ma mang e gad be fil riy?

¹³ Dabi siy ni aram e n’en ni ma buch ku boch e girdi’ u lan e ulung rom fa ke buch ni kam l’ag ngay fa? Sana bay e re magwon nem e chiney. Mang e rayog ni ngad rin’ed? Kakrom, me yog Paul ngak e gali ppin nem ni “nge taareban’row ni bod rogon e walag ni ppin ni ma par u fithik’ Somol.” Sana ke fel’ u wan’row ni ngar puruynagew fare magawon ngar weliyew nib tamilang, mar n’agew fan e n’en ni ke buch, mar folwokgow rok Jehovah. Dariy e maruwar riy ni ke yib angin ngak Eudia nge Sintike, maku rayog ni nge yib angin ngodad. Rayog ni ngan fol ko re n’em ko ngiyal’ ney me yib angin.

Mu N’ag Fan u Wan’um​—Me Aw e Gapas u Thilmed

14. Mang fan nib fel’ ni ngan pag fare magawon?

¹⁴ Ri mang e ba t’uf ni faanra ngam n’ag fan e n’en ni ke rin’ reb e Kristiano ngom? Dariy taab ban’en ni thingarni rin’, machane be weliy e Bible boch ban’en nib fel’ ni ngan rin’. Ban’en nib baga’ fan​—machane de mom ni ngan rin’—​e ngam pag talin fare n’en ni ke kireban’um ngay. Yu ngiyal’ e ma sum e magawon ni bod rogon fare magawon u thilin Euodia nge Sintike, ma ra bagayow ma be lemnag ni bagayow e ba kireb e rok. Ere faanra bay e magwon rom ni aram rogon, ma sana ga be lemnag ni reb e Kristiano ir e ke rin’ ban’en nib kireb ngom. Machane rayog ni ngam pag fare n’en ni ke rin’ ma ga n’ag fan u wan’um? Machane thingar mu nang u wan’um ni faanra rriyul’ ni facha’ e yigoo ir e ke rin’ ban’en nib kireb ma aram e mil fan ngom ni ngam pag mag n’ag fan u wan’um e n’en ni ke rin’.

15, 16. (a) Mang e yog Mikah u murung’agen Jehovah? (b) Mang fan fare thin ni ma “luk’af Got e denen”?

¹⁵ Dabda paged talin ni Got e ke dag e kanawo’ ngodad ya ma n’ag fan e n’en ni ma rin’ e girdi’. (Efesus 4:32–5:1) I weliy Mikah ni profet u murung’agen rogon ni ma n’ag Got fan e pi n’en ni ma rin’ e girdi’ ni gaar: “Somol, dakuriy yugu reb e [Got] nga bayang ni bod gur; kam lukaf e denen rok e tin ni ke magey ko girdi’ rom. Damur par ni gab damumuw ni dariy n’umngin nap’an, ya ga ma dag ngomad ni yig gamad be par ni gamad ba t’uf rom.”​—Mikah 7:18.

¹⁶ Be weliy e Bible ni Jehovah e ma “luk’af e denen,” machane gathi be yog ni der ma lemnag e tin nib kireb ni kan rin’, ma dabki lemnag e tin ni ke turguy ni nge pag talin. Mu lemnag Samson nge David, ni yow l’agruw ma kar denengow nib ubchiya. Ma ke n’uw nap’an u tomren ma dawori pag Got talin e denen rorow; ma gadad manang u murung’agen e denen rorow ya ke dugliy Jehovah ni ngan weliy u murung’agen u lan e Bible. Machane ke runguy Got e gali cha’ nem me n’ag fan e denen rorow, me tay ni ngan folwok rorow ni bochan e michan’ rorow.​—Hebrews 11:32; 12:1.

17. (a) Mang e rayog ni nge ayuwegdad ngad luk’afed e denen ara pi n’en ni ma rin’ e girdi’ ngodad? (b) Faanra gad ra athamgil ni ngad rin’ed e re n’em ma uw rogon ni gad be folwok rok Jehovah? (Mu guy fare footnote.)

¹⁷ Arrogon, ke ‘luk’af’a Jehovah e denen, ma aram e n’en ni i weningnag David ngak ni nge rin’ u gubin ngiyal’. (2 Samuel 12:13; 24:10) Rayog ni ngad folwokgad rok Got ko re n’ey, ma ngad luk’afed e tin ni ma rin’ e pi walagdad ngodad ya dad flontgad? Mu lemnag ni susun ni ga bay ko skoki ni jet ma be n’en ni nge yan nga lang. Ga ra sap ko winda ma ga be guy be’ ni ga manang ni ke pi’ blowthen nga but’ fa be yaannag ban’en nib kireb ngom ni be dariy fannagem ni bod ni ma rin’ e bitir. Ga manang ni bay ban’en ni ke wageynag laniyan’ ma sana gab l’ag ngay. Fa sana gathi be lemnagem. Yugu demtrug, ma be yan fare skoki nga lang ma kam luk’af fare ppin, ma ga ra guy ma rib achig ya ke palog. Ke yan reb e awa ma kam palog nga orel rok, ni bokum e mayal, ma kam pag e tin ni ke rin’ nib kireb. Ku aram rogon ni ra ayuwegdad ni ngad n’aged fan e n’en ni rin’ e girdi’ ngodad ngad folwokgad rok Jehovah ma gad luk’af e n’en ni kan rin’ ni ke kireban’dad ngay. (Proverbs 19:11) Ya ragag e duw nga m’on ma gathi ra m’ay fan e re n’em u wan’dad, ma gathi ra aram rogon l’agruw miriay e duw u tomren ni ke tabab fare Biyu’ e Duw? Ere mang ni dabmu n’ag fan fare n’en ni kan rin’ ngom?

18. Faanra dabiyog ni ngad paged fare magawon ngad pied keru’dad ngay, ma mang fonow e ngad faned?

¹⁸ Machane sana kam yibilay fare magawon ma kam athamgil ni ngam n’ag fan u wan’um, machane dabiyog rom. Ere mang e ngam rin’? I yog Jesus ni ngan non ngak facha’ ni ke rin’ ban’en ngom ma gimew guy rogon ni ngam pithigew fare magawon u fithik’ e gapas. “Ere faanra mman ni ngam pi’ e n’en ni ngam pi’ ngak Got u altar me yib ngan’um ni bay ban’an nib togopluw u wan’ walagem ngom, ma ga pag e n’en ni ngam pi’ ngak Got u mit e altar ma ga yan ni ka chingiyal’ nem ngam fal’eg thilmew walagem; ma aram e fin mu sul ngam pi’ e n’en ni ngam pi’ ngak Got.”​—Matthew 5:23, 24.

19. Susun uw rogon e lem rodad ma mang e ngad siyeged ma ngad gayed e gapas u thildad e pi walagdad?

¹⁹ De yog Jesus ni ngam guy rogon ni ngam micheg ngak walagem ni gab mat’aw, ma ir e de mat’aw. Sana ri arrogon. Machane dabi siy ni gimew l’agruw ma kam olobochgow. Yug demtrug, ma dabmu nameg ni nge wenig facha’ ngom. Ya faanra arrogon ma dabi siy ni dabi fel’. Maku susun ndab mu guy rogon ni ngam sul nga daken urngin ban’en ni kan rin’ fa kan nog ni ke kireban’um ngay. Ngam weliyew fare magawon u rogon nib gapas ngu fithik’ e t’ufeg ko Kristiano, ma sana ra m’ug riy ni sum fare magawon ni bochan e de papuluw e thin romew, ma aram mi gimew guy rogon ni ngam pithigew fare magawon. Machane mus ni dabiyog ni nge taareban’mew ngay, ma gathi ba t’uf ni nge yan i aw ni aram rogon fa? Gathi kab fel’ ni nge taareban’mew ni gimew ba adag ni ngam pigpiggow ngak Got ni ir ba Got ni ma n’ag fan e denen rodad? Ma nap’an ni gimew ra lemnag ni aram rogon, ma ra mom boch ni ngam gaargow u wan’mew: “Ke kireban’ug ni ke sum e re magwon ney u thildow. Wenig ngom, ngad pagew ma ngad piew keru’dow ngay.”

20. Mang e rayog ni ngad filed ko pi apostal?

²⁰ Mu lemnag e pi apostal ni yu ngiyal’ ma de fel’ thilrad ya boch i yad e kar guyed rogon ni ngar tolanggad. (Mark 10:35-39; Luke 9:46; 22:24-26) Ma aram me sum e magawon ma ke kireban’ boch i yad ni bochan. Machane ke yog ni ngar luk’afed fare magawon nguur maruwelgad u taabang. Ma boch nga tomren me yoloy bagayad ni gaar: “En ni ba adag ni ngi i par nib felfelan’ e thingari dab ki yog e thin nib kireb, ma thingari tal ndab ki i lifith l’ugun. Ma thingari pi’ keru’ ko tin nib kireb nge rin’ e tin nib fel’, ma thingari gayiy e gapas ngi i par riy.”​—1 Peter 3:10, 11.

21. Mang fonow ni pi’ Jesus u murung’agen e n’ag fan u wun’uy?

²¹ Kad weliyed faram ni: Ke n’ag Got fan u wan’ boor e denen ni kad rin’ed faram, me ere susun ni ngad folwokgad rok ma ngad n’aged fan e n’en ni rin’ e pi walagdad ngodad. (Psalm 103:12; Isaiah 43:25) Machane ka bay ban’en nib l’ag ngay. Tomren ni yog Jesus fare meybil rok Somol me gaar: “Faanra mu n’iged fan u wun’med e kireb ni ke rin’ boch e girdi’ ngomed, ma ku er rogon e Chitamangimed nu tharmiy nra n’ag fan u wan’ e kireb ni kam rin’ed.” Ma reb e duw nga tomren me sul nga daken e re n’ey me fil ngak pi gachalpen ni ngar meybilgad ni gaar: “Ma ga n’ag fan u wun’um e denen romad, ya kug n’iged fan u wun’mad e kireb ni ke ngongliy urngin e piin ni kar ngongliyed e kireb ngomad.” (Matthew 6:12, 14; Luke 11:4) Ma in e rran u m’on ni yim’ Jesus me gaar: “Ma ngiyal’ ni gimed ba sak’iy ni gimed be meybil, e faanra ba’ ban’en u laniyan’ bigimed nib togopuluw ngak be’ ma nge n’ag fan rok faanem, ni bochan e ngki yog ni n’ag e Chitamangimed nu tharmiy fan e denen romed.”​—Mark 11:25.

22, 23. Uw rogon nib l’ag e gabul nge langleth ko n’ag fan ni gad ma tay?

²² Arrogon, ra n’ag Got fan e denen rodad nfaanra gad ra n’ag fan u wan’dad e kireb ni rin’ e pi walagdad ngodad. Nap’an ni sum e magawon u thilin e Kristiano, mab fel’ ni ngamu fithem ni, ‘Gathi kab ga’ fan ni nge n’ag Got fan e denen rog ko bin ni nggu micheg ni ke rin’ reb e walag ban’en nib kireb ngog, ni ban’en nib achig, ya de flont?’ Goo ga manang e fulweg riy.

²³ Machane faanra ba ubchiya fare magawon, ma gathi ban’en nib achig? Ma wuin ni ra puluw ni ngan fol ko fare thin ni bay ko Matthew 18:15-18? Gad ra weliy e pi thin ney ko bini migid e thin.

[Footnote]

Ka Ga Manang?

◻ Mang kanawo’ ni dag Jehovah ngodad u rogon ni ma n’ag fan e denen?

◻ Mang e thingar dabda paged talin u murung’agen e girdi’ u lan e ulung?

◻ Mang e susun ni ngad rin’ed nfaanra kan kirebnagan’dad?

◻ Mang e rayog ni ngad rin’ed ni ngad fl’eged e gapas u thildad e pi walagdad?

[Picture on page 11]

Nap’an ni sum e magwon u thilmew reb e Kristiano, ma gguy rogon ni ngam pag; ya ra munmun ma ra m’ay fan fare magawon