‘Ngam Pi’ E Tamilang Rom, O Got’

“Mpi’ e tamilang rom nge thin rom nib riyul’ nge yib ngog, ngar pow’iyew gag.”​—PSALM 43:3, New World Translation.

1. Uw rogon ni ma dag Jehovah e tin nib m’agan’ ngay?

KE DAG Jehovah e tin nib m’agan’ ngay ngak e pi tapigpig rok u fithik’ e t’ufeg. De dag e tin riyul’ ni urngin ni taab yay, ya, ke pi’ e tamilang ngodad ni buchuw nge buchuw. Fare milekag ni gad ma tay ko kanawoen e yafas e rayog ni ngan taarebnag ku be’ ni be yan u but’ ko kanawo’ nib n’uw. Ma tabab ko milekag rok nri kakadbul ni kab achichig e tamilang. Bochan ni be yan fare yal’ nga lang nib sasagaal, ma aram me tabab ni nge guy boch ban’en u tooben ni ke tamilang boch. Ma boch ban’en ni ke guy e bod rogon bochi yangi ath. Ma, bochan ni fare yal’ e ka be tolang iyan, ma aram ma rayog ni nge guy boch ban’en nga urel. Ere aram rogon fare tamilang nib spiritual ni be pi’ Got. Ba ngiyal’ e ma pag Got boch ban’en ni nge tamilang u wan’dad. Ku aram rogon Jesus Kristus, ni fak Got, ku ma pi’ e tamilang nib spiritual ni taabrogon ko binem. Ngada lemnaged ko uwrogon ni ke pi’ Jehovah e tamilang rok kakrom nge uwrogon e ngiyal’ n’ey.

2. Uw rogon ni ma pi’ Jehovah e tamilang rok ko ngiyal’ ni dawori yib Kristus?

² Sana pi fak Korah e kar yoloyed fare Psalm 43. Min pi’ ngorad fare maruwel ni ngan fil e Motochiyel rok Got ngak e girdi’ ni bochan ni yad piyu Levi. (Malachi 2:7) Dariy e maruwar riy, ni Jehovah e ir e Sensey rorad nib ga’, ma yad ma sap ngak ya ir e ma yib urngin e gonop rok. (Isaiah 30:20) I meybil fare psalmist ni gaar, “Got, . . . mpi’ e tamilang rom nge thin rom nib riyul’ nge yib ngog,” me ulul ngay ni gaar, “ngar pow’iyew gag.” (Psalm 43:1, 3) Nap’an ni ke par piyu Israel nib yul’yul’ ngak Jehovah, me fil ngorad ngar nanged kanawoen. Tomren ni ke yan boch e chibog, me pi’ Jehovah ngorad e tamilang nge tin riyul’ ni rib fel’. Got e ke rin’ e re n’en ney ko ngiyal ni ke l’og fak nga fayleng.

3. Uw rogon ni ke skengnag piyu Jew e n’en ni ke fil Jesus’ ngorad?

³ Fare moon i Kristus Jesus, ni ir Fak Got e ir “e tamilang ko girdi’ nu fayleng.” (John 8:12) I fil ngak e girdi’ “boor ban’en u fithik’ e fanathin”​—ni aram e pi n’en nib biech. (Mark 4:2) Me gaar ngak Pontius Pilate: “Gin nsuwog e dariy u roy u fayleng.” (John 18:36) Aram e n’en nib biech ku be’ nu Roma nge piyu Jew nib yul’yul’ ko nam rorad, ya kar lemnaged ni ra gel fare Messiah ko am nu Roma ma ra sulweg fare nam nu Israel nga rogon. I dag Jesus e tamilang rok Jehovah, machane de falfalan’ fapi pilung nu Israel ko pi thin ni ke yog, ya “kab t’uf rorad ni ngar fel’gad u laniyan’ e girdi’ ko bin ni ngar fel’gad u laniyan’ Got.” (John 12:42, 43) Boor e girdi’ ni kar turguyed ni ngar folgad ko yalen rorad ko bin ni ngar folgad ko tamilang ko tirok Got nge tin riyul’ ni yib rok.​—Psalm 43:3; Matthew 13:15.

4. Uw rogon ni gad ra nang ni pi gachalpen Jesus e ka be e tamilangan’ rorad iyan?

⁴ Machane, immoy boch e pumoon nge ppin nib yul’yul’ nib fel’ gum’ercha’rad ni kar folgad ko tin riyul’ ni ke fil Jesus ngorad u fithik’ e falfalan’. Ma be mon’og iyan ni be tamilang uwan’rad e tin nib m’agan’ Got ngay. Machane, nap’an ni ke chuchugur ni nge m’ay e yafas rok e Sensey rorad u fayleng, ma ka bay boor ban’en ni dawora filed. I gaar Jesus ngorad: “Ka boor ban’en ni nggu weliy ngomed, machane yugu ra yoor ngomed e chiney.” (John 16:12) Arrogon, pi gachalpen Jesus e yad ra mon’og iyan ko tamilangan’ rorad u murung’agen e tin riyul’ ni yib rok Got.

Fare Tamilang e Be Galgal Iyan

5. Mang e magawon ni ke sum ko fa bin som’on e chibog, ma chon mini’ e mil fan ngorad ni ngar pithiged fare magawon?

⁵ Tomren ni ke yim’ Jesus min faseg ko yam’, ma fare tamilang rok Got e ke gal ramaen ni ke gel boch ko som’on. Reb e changar ni kan piliyeg ke guy Peter, e ke dag Jehovah ni piin ni gathi yad piyu Israel ni daworni maadadnagrad e ku rayog ni ngar manged pi gachalpen Kristus. (Acts 10:9-17) Ere kan dag ban’en ngorad! Machane, munmun me sum reb e deer ni gaar: Ke tay Jehovah chilen ngak e piin ni gathi yad piyu Israel ni pumoon ni ngan maadnagrad u tomren ni kar manged Kristiano? Dan fulweg fare deer u nap’an ni kan piliyeg e changar rok Peter, ma piin Kristiano e kara maluagthingad nib gel ni bochan. Bat’uf ni ngan pithig e re n’em, ya ra danga’ ma yira kirebnag e gapas ni be par u fithik’rad. Ere, u Jerusalem ma “fapi apostal nge piin ni piilal ko galesiya e ra muulunggad ngar puruynaged murung’agen e re bugithin ney.”​—Acts 15:1, 2, 6.

6. Mang kanawo’ e ke fol fapi apostal nge piin ni piilal riy ko ngiyal’ ni kar weliyed fare magawon ko maadadnagey?

⁶ Uwrogon ni nge nang e pi girdi’ ni kar uned ko re muulung nem ko mang e mm’agan’ Got ngay ko piin ni gathi yad piyu Israel ni ke mich Got u wan’rad? De l’og Jehovah reb e engel ni nge yarmiy fare puruy, ku de n’igin ni ngan piliyeg e changar rok bagayad u nap’an e muulung rorad. Machane, dan pag fapi apostal nge piin ni piilal ni ri dariy ban’en ni nge pow’iyrad ko ngiyal’ nem. Kar weliyed murung’agen boch e thin ni ke yog boch e Kristiano ni yad piyu Israel ni kar guyed rogon ni ke tabab Got ni nge ayuweg e girdi’ ni gathi yad piyu Israel, ni ke puog e kan ni thothup rok nga daken e piin dawor ni maadadnagrad. Maku kar gayed boch e Thin nu Bible ni ra pow’iyrad. Ma bochan e re n’em, me yog James boch e thin nib fel’ nib puluw ko thin nu Bible ni ke tamilang. Nap’an ni kara fal’eged i lemnag e mich riy, me tamilang e tin nib m’agan’ Got ngay u wan’rad. Piin ni gathi yad piyu Israel e de t’uf ni ngan maadadnagrad ni fan e nge falfalan’ Jehovah ngorad. De adbey e pi apostal nge piin piilal e tayim rorad ni ngan yoloy e n’en ni kar turguyed ya aram rogon ma rayog ni ngar fanayed e re n’em ni ngar pow’iyed e pi Kristiano.​—Acts 15:12-29; 16:4.

7. Piin Kristiano ko fa bin som’on e chibog e yad be mon’og ko mang?

⁷ Bathil ko pi tayugang ko teliw nu Israel, ni kan yiluy e lem rorad ko pi yalen ko pi chitamangirad, ya baga’ ni Kristiano ni yad piyu Israel e kar falfalan’gad ko ngiyal’ ni yib ngorad e re tamilangan’ nem nib biech nib m’ag ko tin nib m’agan’ Got ngay u murung’agen e piin ni gathi yad piyu Israel, yugu aram rogon ma ngiyal’ nem e bat’uf ni ngar thiliyeged e lem rorad u murung’agen e piin gathi yad piyu Israel. Ke taw’athnagrad Jehovah ni bochan ni kar pired nib sobut’ laniyan’rad, ma aram “mi i gel i yan e michan’ rok girdien e galesiya ma yad be yoor i yan ni gubin e rran.”​—Acts 15:31; 16:5.

8. (a) Uw rogon ni ngad nanged ni ra yib e tamilang ni boor u tomren ni nge m’ay fa bin som’on e chibog? (b) Mang boch e deer nib puluw ni gad ra weliy?

⁸ Nap’an e bin som’on e chibog ma be ulul iyan ni be galgal ramaen fare tamilang nib spiritual. Machane de dag Jehovah e tin nib m’agan’ ngay ni polo’ ngak e pi Kristiano kakrom. Me yog apostal Paul ngak e pi walag ko fa bin som’on e chibog ni gaar: “N’en ni gadad be guy e chiney e bod ban’en ni gadad be guy nga therek ni kab mathmath yaan.” (1 Corinthians 13:12) Re therek nem e dabiyog ni ngan guy ban’en riy nrib tamilang. Ere som’on, ma dawori yib e tamilang nib spiritual nib gel nga laniyan’ e girdi’. Tomren ni ke yim’ fapi apostal, me war raen fare tamilang nib ngoch nap’an, machane de n’uw nap’an me ga’ e llowan’ ko thin nu Bible i yan. (Daniel 12:4) Uwrogon ni be pi’ Jehovah e tamilang rok ngak girdien ko ngiyal’ n’ey? Ma mang e gad ra rin’ nfaan ra nge ga’nag e llowan’ rodad ko Thin rok?

Fare Tamilang e Be Gel’ Iyan ni Buchuw nge Buchuw

9. Mang e kanawo’ nib thil mab fel’ ko fol Bible ni ke fanay e piin ni kan nog e Bible Students ngorad?

⁹ Ngiyal’ n’ey ma ke tabab ni nge m’ug fare tamilang ni riyul’ u nap’an ni ke chuchugur ni nge m’ay fa bin 19 e chibog ni reb e ulung ko Kristiano ni yad e piin ni pumoon nge piin ni ppin ni kar tababgad i fil e thin nu Bible u fithik’ e yul’yul’. Kar yarmiyed reb e kanawo’ nib fel’ rogon ni ngar filed e Bible. Boch i yad e ra fith reb e deer; ngemu’ ma ra gonopiy urngin e girdi’ e pi thin nu Bible nib m’ag ngay. Faanra bay reb e thin nu Bible ni gowa ba togopuluw reb nga reb, ma pi Kristiano nem nib yul’yul’ e yad ma athamgil ni ngar yal’uweged e gali n’em. Ma de taabrogon ko pi tayugang ko pi teliw e ngiyal’ nem, ko fapi Bible Student (Pi Mich rok Jehovah e kan pining ngorad ni aram rogon) ni ke mudugil laniyan’rad ni ngar paged ni nge mang Thin nu Bible e pow’iyrad, ma gathi yalen rorad ni kemus ni girdi’ e ke sunmiy. Tomren ni kar weliyed urngin ban’en nib m’ag ko Thin nu Bible ni kan bieg, mi yad yoloy nga babyor e tin ni kar weliyed. Ereray kanawoen ni ke tamilang e machib nib m’ag ko Bible uwan’rad.

10. Mang babyor ni ke yoloy Charles Taze Russell nib fel’ fel’ ni ngan fanay ko fol Bible?

¹⁰ Fa en nib cheg ko pi Bible Student nem e Charles Taze Russell. Ke yoloy nel’ e babyor ni ma ayuweg e girdi’ ko fol Bible ni kenggin e Studies in the Scriptures. Ke lemnag Russell ni nge yoloy fa bin medlip e babyor, ni ra tamilangnag fa gali babyor u Bible ni Ezekiel nge Revelation. Me gaar, “Nap’an ni gu ra pirieg e kiy,” me ulul ngay ni gaar, “ma gu ra yoloy fa bin Medlip e Babyor.” Machane, ku ke yog ni gaar: “Faan ra pi’ Somol fare kiy ngak be’, ma rayog ni nge yoloy e re n’ey.”

11. Uw rogon ni ngan puthuy e tayim nib puluw ko tamilangan’ rodad ko tin nib m’agan’ Got ngay?

¹¹ Fapi thin ni ke yog C. T. Russell ni bay u lang e be dag e n’en ni baga’ fan ko u rogon ni ngad nanged fan boch e thin nu Bible e aram​—ngan sonnag fare tayim nib puluw. Walagdad i Russell e manang ni dabiyog ni ngan towasariy e tamilang ni nge galgal ramaen nga daken fare babyor ni Revelation ni bod fa cha’ ni be milekag ni ke magafan’ ma dabiyog ni nge guy rogon fare yal’ ni nge yan nga lang ni faanra dawori taw ngal’an.

Ran Dag​—ko Ngiyal’ ni Ke Dugliy Got

12. (a) Wuin e kari nnang e thin ni kan yiiynag u Bible nib fel’ rogon? (b) Mang e n’en ni be dag ni ra nge tamilang e thin nu Bible ni kan yiiynag ma ra tor nga daken ngal’an ni ke dugliy Got? (Mu guy e footnote.)

¹² Bod fapi apostal, ni kar nanged fan fa pi thin ni kan yiiynag u murung’agen fare Messiah ni ke mus u tomren ni ke yim’ Jesus min faseg ko yam’, ma pi Kristiano ko ngiyal’ n’ey e kara nanged fan nib tamilang e thin nu Bible ni kan yiiynag u tomren ni ke lebug e pi n’en ney. (Luke 24:15, 27; Acts 1:15-21; 4:26, 27) Revelation e ir e babyor ko yiiy, ere rayog ni ngad nanged fan nib tamilang e re ke babyor ney ko ngiyal’ ni kan dag e pi n’en ni kan weliy. Bod rogon C. T. Russell, dabiyog ni nge nang fan nib tamilang fare gamanman ni maloboch ni be yip fan ban’en nrogon ni yog ko Revelation 17:9-11, ya bochan fare ulung ni League of Nations nge fare United Nations, ni aram fare gamanman ni dawori m’ug ko ngiyal’ nem nge mada’ nga tomren ni ke yim’.a

13. Yu ngiyal’ ma mang e ra buch u nap’an ni ke aw e tamilang nga reb e kenggin e thin u Bible?

¹³ Nap’an ni ke nang e pi Kristiano kakrom ni piin ni gathi yad piyu Israel ni dan maadadnagrad e rayog ni ngar manged e pi Kristiano, ma aram me m’ug reb e magawon nib biech ni bat’uf ni ngan maadadnag e piin ni gathi yad piyu Israel. Ke k’aring e re n’em e pi apostal nge piin ni piilal ni ngar yaliyed biyay fare magawon ko maadadnagey ni polo’. Aram rogon e n’en ni yima rin’ e ngiyal’ n’ey. Yu ngiyal’ ma ke yib raen e tamilang nib gel nga reb e kenggin u lan e Bible, ma re n’ey e ra k’aring e pi tapigpig rok Got ni kan dugliyrad, ni kan nog “fare tapigpig nib yul’yul’ mab gonop” ngorad, ni ngar yaliyed biyay boch e kenggin e Bible nib l’ag ngay, ntaabrogon ko n’en ni ke buch ndawori n’uw nap’an.​—Matthew 24:45.

14-16. Bochan ni biechnag e lem rodad u murung’agen fare tempel nib spiritual ma uwrogon ni ke ayuwegdad e re n’ey ni nge tamilang uwan’dad fapi thin ni bay ko Ezekiel guruy ni 40 nge mada’ ko 48?

¹⁴ Duw ni 1971 e kan ngongliy fare babyor ni be weliy murung’agen e thin rok Ezekiel ni ke yiiynag ni “The Nations Shall Know That I Am Jehovah”​—How? Reb e guruy ko re ke babyor nem e weliy boch ban’en ni ke guy Ezekiel u lan fare tempel ko ngiyal’ ni kan piliyeg e changar rok. (Ezekiel, chapters 40-48) Ngiyal’ nem, e kan guy rogon ni ngan weliy ko uw rogon ni nge lebug e tin ni ke guy Ezekiel u tempel u nap’an ni ra yib fare fayleng nib biech.​—2 Peter 3:13.

¹⁵ Machane, bay l’agruw e article ni kan yoloy nga babyor ni The Watchtower ni December 1, 1972, e ke thiliyeg e n’en ni kad filed ko som’on u murung’agen e n’en ni ke guy Ezekiel. Kar weliyed murung’agen e tempel ni baga’ nib spiritual ni ke weliy apostle Paul u Hebrews guruy ni 10. Ke weliy fare babyor ni The Watchtower ni fare singgil ni Ba Thothup nge gin u lan e yoror ko fare tempel nib spiritual e ba m’ag ko par rok e piin ni kan dugliyrad ko ngiyal’ ni yad bay u fayleng. Me yan boch e duw nga tomren, u nap’an ni kar yaliyed biyay e Ezekiel guruy ni 40 ni yan nge mada’ ko 48, min nang ni fare tempel ni ke guy Ezekiel ko ngiyal’ ni kan piliyeg e changar rok e be maruwel e chiney, ya be maruwel fare tempel nib spiritual e ngiyal’ ney. Uw rogon?

¹⁶ Ngiyal’ ni kan piliyeg e changar rok Ezekiel, ma ke guy e pi prist ni yad be maruweliy ban’en u lan e yoror ko fare tempel ni yad be pigpig ngak yugu boch e ganong ni gathi yad e pi prist. Ba tamilang ni pi prist nem e be yip fan e “pi prist rok e en ni Pilung,” ni yad e pi tapigpig rok Jehovah ni kan dugliyrad. (1 Peter 2:9) Machane, dabra pared ni ngar maruwelgad u lan e yoror ko fare Tempel u fayleng u lan taareb e biyu’ e duw ko gagiyeg rok Kristus. (Revelation 20:4) Ka boor e tayim ko ngiyal’ nem, nfaanra gathi urngin, ni piin ni kan dugliyrad e yad ra pigpig ku Got u lan e tempel nib spiritual ko gin ni th’abi thothup, ni aram e “tharmiy.” (Hebrews 9:24) Bochan ni kan guy e pi prist ni yad be sul sul u lan e yoror ko tempel rok Ezekiel, ma be dag e re n’em ni pi n’en ni ke guy ko fare tempel e be lebug ko ngiyal’ n’ey. Arfan, ni fare Watchtower ni March 1, 1999, e ke weliy boch ban’en nib biech nib m’ag ko re kenggin n’ey. Ere, ka nap’an kakrom nge yan i mada’ ko tomur ko fa bin reliw e chibog, min wereg e tamilang ni tirok Got u murung’agen e thin ni ke yiiynag Ezekiel.

Ngam Adag ni Ngam Puluwnag e Lem Rom Ngay

17. Uw rogon ni kam thiliyeg boch e lem rom ni ka nap’an ni kam nang e tin tiyul’, ma uw rogon ni ke fel’ rogom riy?

¹⁷ Urngin e girdi’ ni yad baadag ni ngar nanged e tin riyul’ e susun ni ri ngar feked “urngin e lem ni bod ni yima kol e girdi’ ko mahl nggu pingeged nge fol rok Kristus.” (2 Corinthians 10:5) Gathi gubin ngiyal’ nib mom ni ngan yodor, ma baga’ ni aram rogon nfaanra kari mit reb e yalen nga lanin’um. Bod rogon kafram ni dawor mu nang e thin riyul’, ni sana kam falfalan’ ni ngam un ko girdien e tabinaw rom ni ngam madenomnaged reb e madenom ko yugu boch e teliw. Ma tomren ni kam tabab ni ngam fil fare Bible, me tamilang u wan’um ni pi n’en nem e aram e madenom ko pagan. Sana som’on, ma ke maruwaran’um ni ngam fol ko n’en ni kam fil. Machane, tomur riy, me gel e t’ufeg rom ku Got ko t’ufeg rom ko pi madenom nem, ma kam tal ni dab kum un ko pi madenom ni dabun Got. Gathi ke taw’athnagem Jehovah ya kam dugliy ni aray rogon?​—Mu taarebnag ko Hebrews 11:25.

18. Uw rarogodad nfaanra ke tamilang e thin nu Bible uwan’dad?

¹⁸ Gubin ngiyal’ ni gad ra rin’ ban’en nib puluw ko kanawo’ rok Got ma ra yib angin ngodad. (Isaiah 48:17, 18) Ere nap’an ni ra tamilang uwan’dad reb e thin nu Bible, ma gad ma falfalan’ ko tin riyul’ ni gad be mon’og riy! Ya ma yib ngodad e tamilang, ere re n’ey e be micheg ni gad bay ko kanawo’ nib mat’aw. Ereray “fare kanawo’ ko piin nib mat’aw,” ni “taabrogon ko tamilang ni ma pi’ e yal’ ni buchuw nge buchuw ma ra gel iyan nge mada’ ko ngiyal’ ni ke gal ramaen nga gubin yang.” (Proverbs 4:18, NW) Riyul’, ni gad be guy e chiney boch ban’en ko tin nib m’agan’ Got ngay ni “kab ta ath ath.” Machane ngiyal’ ni ke taw ngal’an ni ke dugliy Got, ma rayog ni ngad guyed fare riyul’ ni urngin ban’en riy mab fel’ yaan, nfaan gad ra sakiy nga daken “fare kanawo’.” Ere chiney, yibe athapeg ni ra par nib falfalan’ dad ko pi thin riyul’ ney ni ke tamilangnag Jehovah, ma gad be sonnag ni ra gel e tamilang boch ban’en ni dawori nnang fan nib fel’ rogon ko ngiyal’ n’ey.

19. Mang reb e kanawo’ ni ngan dag ni bat’uf rodad fare thin riyul’?

¹⁹ Uw rogon ni ngad daged e t’ufeg rodad ko fare tamilang nrogon? Reb e kanawo’ e aram e ngan bieg e Thin rok Got u gubin e rran​—nfaan rayog. Ga be fol ko yaram ko bieg e Bible u gubin ngiyal’, fa? Fapi babyor ni Watchtower nge Awake! e ku be pi’ ngodad e ggan nib spiritual ni ra falan’agdad. Maku, mu lemnag e pi babyor, nge pi brochure, nge yugu boch e babyor ni kan ngongliy ni fan ni nge ayuwegdad. Ma uwrogon e pi thin ni kan yoloy nga babyor ni be pi’ e athamgil nga lanin’uy ni aram fare Yearbook of Jehovah’s Witnesses ni be weliy u murung’agen e maruwel ni ngan wereg e thin ko Gil’ilungun Got?

20. Uw rogon nib peth e tamilang nge thin riyul’ ni yib rok Jehovah nge nguud uned ko muulung rodad?

²⁰ Arrogon, kari fulweg Jehovah taban fare meybil ni bay ko Psalm 43:3. Tomren e re verse ney, ma gad ra bieg ni gaar: “Gu be athapeg ni fare [tamilang nge tin riyul’ rom] e ra pow’iyeg ko kanawo’ ni yan ko burey rom nib thothup nge tempel rom ni baga’.” Ga be sonnag e tayim ni ba yib ni ngam un ko yugu boch e girdi’ ni boor ni ngam pigpigad ku Jehovah u taabang? Fapi thin ni yima fil ngodad u nap’an e muulung rodad e aram e kanawo’ ni baga’ fan ni ma fanay Jehovah ni nge pi’ e tamilang ngodad e ngiyal’ n’ey. Mang e gad ra rin’ ni nge gel e falfalan’ rodad ko muulung ni gad ma tay? Gamad be piningmed ni ngam filed e re kenggin ney u daken e meybil ko bin migid e article.

[Footnote]

Rayog ni Ngam Pi’ e Fulweg?

• Mang fan ni ma dag Jehovah e tin nib m’agan’ ngay ni buchuw nge buchuw?

• Uw rogon ni ke pithig e pi apostal nge piin ni piilal u Jerusalem fare magawon ko maadadnagey ni ke sum?

• Mang e kanawo’ ko fol Bible ni ke fanay e piin ni kan nog e Bible Students ngorad, ma mang fan nib thil e re nem ko tin ma rin’ yugu boch e girdi’?

• Ngam weliy ko uwrogon ni kan dag e tamilang rok Got nge ngal’an ni ke dugliy.

[Picture on page 10]

Manang Charles Taze Russell ni ra tamilang fare babyor ni Revelation ko ngal’an ni ke dugliy Got