Mu Motoyil Ko Mang E Be Yog Fare Kan

“Telmed e ra rung’ag e thin ni bay u tomur ni be gaar: ‘Ereray e kanawo’. Gimed e girdi’, ngam marod riy, richey mi gimed yan nga ba’ ni mat’aw ara richey mi gimed yan nga ba’ ni gilay’.”—ISAIAH 30:21, New World Translation.

1, 2. Kab kakrom i yib, ma uw rogon ni ma non Jehovah ngak e girdi’?

FARE donguch ni Puerto Rico e aram fare binaw ni kan ta’ fare n’en ni kan nog ni single-dish radio telescope ngay ni bin th’abi ga’ nge th’abi gel gelngin. U lan e boor e duw, ma piin ni scientist e yad be athapeg ni nge yib ngorad boch e thin ko pi cha’ ni ma par u lan e lang, u daken e re masin ney ni baga’. Machane dawori yib e pi thin ni aray rogon. Machane, n’en nib math keru’ ngay, e bay boor e thin nib tamilang ni de yib rok e girdi’ ni rayog ni nge yog ngodad ni demtrug e ngiyal’​—ni dabni fanay fare masin ni kaygi yoor e parts riy. Ma pi n’ey I Yib rok Faanem ni ka baga’ ko pi cha’ nem ni bay u lan e lang ni goo yima lemnag. I Yib rok mini’ e pi thin nem, ma yima pi’ ngak mini’? Ma mang e be yog?

² Fapi thin nni yoloy nga Bible e be dag ni boor yay nap’an ni kan pi’ e pi thin ni yib rok Got ney e ke rung’ag e girdi’. Yu ngiyal’ ma pi thin nem e kan wereg u daken e pi engel ni yad e pi tamol’og ni be pigpig ku Got. (Genesis 22:11, 15; Zechariah 4:4, 5; Luke 1:26-28) Dalip yay ni kan rung’ag laman Jehovah. (Matthew 3:17; 17:5; John 12:28, 29) Maku i non Got u l’ugun e pi profet, ma boor i yad e kar yoloyed boch e thin ni ir e ke thagthagnag ngorad ni nga rogned. Chiney, ma bay e Bible rodad, ni pi thin riy e ba muun ngay e pi thin nem ni yib rok Got, nge fare machib ni tay Jesus nge pi gachalpen. (Hebrews 1:1, 2) Riyul’ ni ke wereg Jehovah boch e thin ngak e girdi’ ni ir e ke sunmiyrad.

3. Kan pi’ e pi thin rok Got nem ni fan ko mang, ma mang e n’en ni be sonnagdad?

³ Pi thin nem ni urngin ni kan thagthagnag ni yib rok Got e ke mus ni buchuw e ma dag riy ni be weliy murung’agen fare palpalthib. Ma sa peg e pi n’ey ko n’en ni ri baga’ fan, ni aram e tin nib m’ag ko yafas rodad e chiney nge gabul nge langleth. (Psalm 19:7-11; 1 Timothy 4:8) Ma fanay Jehovah e pi n’em ni ngan nang e tin nib m’agan’ ngay me pow’iydad u daken. Aram reb e kanawo’ ni ke lebug e pi thin rok Isaiah ni profet nem, ni gaar: “Telmed e ra rung’ag e thin ni bay u tomur ni be gaar: ‘Ereray fare kanawo’. Gimed e girdi’, nga marod riy,’ richey mi gimed yan nga ba’ ni mat’aw ara richey mi gimed yan nga ba’ ni gilay’.” (Isaiah 30:21, NW) Der ma towasariydad Jehovah ni ngada motoyilgad ko “thin” rok. Gad ra fol u rogon ni be pow’iydad Got ma gad ra yan ko kanawo’ rok ni gadad rodad. Arfan ni fare Bible e be fonownagdad ni ngada motoyilgad ko thin ni yib rok Jehovah. U lan fare babyor ni Revelation, ma fare fonow ni ngan “motoyil ko n’en ni be yog fare kan” e kan yoloy ni dalip yay.​—Revelation 2:7, 11, 17, 29; 3:6, 13, 22.

4. Fel’ ni ngan lemnag ko ngiyal’ ney ni ra yib laman Got u tharmiy nge non ngodad?

⁴ Chiney, e der ma non Jehovah ngodad ni be yib laman u tharmiy. Ni mus nga nap’an e Bible, e ma ri in e yay ni ke non Got ngak e girdi’ ni aram rogon, yu ngiyal’ e ma yan boor e chibog ma fin yib reb biyay. Kab kakrom i yib, ma baga’ ni ke pi’ Jehovah boch e thin ngak girdien ni gathi ir e i non ngorad. Ma aram rogon e n’en ni be buch ko ngiyal’ ney. Ngad weliyed dalip e kanawo’ u rogon ni be pi’ Jehovah boch e thin ngodad ko ngiyal’ ney.

“Urngin e Thin ni Bay u Lan e Bible e Kan Thagthagnag”

5. Mang e n’en ni ri ma fanay Jehovah ko ngiyal’ ney ni fan ni nge pi’ boch e thin ngak e girdi’, ma uw rogon ni nge fel’ rogodad riy?

⁵ Fare n’en ni ri yima fanay ni nge non Got ngak e girdi’ e aram fare Bible. Got e ir e ke thagthagnag, ma urngin ban’en ni bay riy e ra fel’ rogodad riy. (2 Timothy 3:16) Fare Bible e be dag boor e girdi’ ni riyul’ ni kar fanayed mat’awrad ni ngar dugliyed ko yad ra motoyil nga laman Jehovah fa danga’. Ma pi n’ey e ra puguran ngodad ko mang fan ni baga’ fan ni ngada motoyilgad ko n’en ni be yog fare ni kan thothup rok Got. (1 Corinthians 10:11) Fare Bible e bay e gonop riy ni ri yima fanay, ma be pi’ e fonow ngodad ko ngiyal’ ni kada mada’naged e n’en ni thingarda turguyed ko yafas rodad. Ma Got e gowa bay u tomur rodad, ma be yog ngodad fare thin ni gaar: “Ereray fare kanawo’. Ngam marod riy.”

6. Mang fan ni Bible e kab fel’ ko urngin e babyor ni kan yoloy?

⁶ Thingarda bieged e thin u lan e Bible u gubin ngiyal’ ma aram rogon ma rayog ni ngada motoyilgad ko n’en ni be yog fare kan u daken. Fare Bible e gathi ke mus aram e babyor ni kan yoloy nib fel’ rogon, ma ba gilbuguwan, ma reb e babyor nib mom ni ngan pirieg ko ngiyal’ ney. Ya fare Bible e kan thagthagnag ma lem rok Got e bay riy. Hebrews 4:12 e be gaar: “Ya thin rok Got e ba fas ma ba’ gelngin ni ma ma maruwel. Ya kab m’uth nga bangi sayden ni ruw raba’ ma mm’uth. Ya ma yan nge yan i taw nga fithik’ i lanin’dad ko n’en ni gadad be lemnag, nge fithik’ e ul’ul nge yil, ma ma pufthinnag e n’en ni yima yim’ ni bochan nge tin ni yima lemnag.” Nap’an ni gad be bieg fare Bible, ma pi thin ni bay riy e ra rag nga laniyan’dad ni bod ba sayden, ma ra m’ug ko riyul’ nib puluw e yafas rodad ko tin nib m’agan’ Got ngay.

7. Mang ni baga’ fan ni ngan bieg e Bible, ma kan pi’ e athamgil nga lanin’dad ni ngada rin’ed e re n’ey wuin?

⁷ Pi n’en ni bay u “fithik’ i lanin’dad ko n’en ni gadad be lemnag” e ra thil u tomren ni nge yan e tayim ma ke yoor e n’en ni kada mada’naged ko yafas rodad​—ni tin nib ffel’ nge tin mo’maw’. Faanra dabda filed fare Thin rok Got, ma lem rodad, nge ngongol rodad e dabki puluw ko pi kenggin e motochiyel rok Got. Arfan, ni fare Bible e be fonownagdad ni be gaar: “Mu pared ni gimed be skengnagmed ko ka be par nib gel e michan’ romed, mu um pared ni gimed be micheg ko ngongol romed ko gimed mini’.” (2 Corinthians 13:5, NW) Faanra uda rung’aged ko mang e be yog fare kan, me ere kad folgad ko fare fonow ni ngan bieg e Thin rok Got u gubin e rran.​—Psalm 1:2.

8. Mang e pi thin rok Paul ni apostal ni ra ayuwegdad ni ngad yaliyed gadad ko u rogon ni gad ma bieg fare Bible?

⁸ Ereray reb e fonow ni baga’ fan ko piin ni ma bieg e Bible: Mu pag ni nge yan boch e tayim ni ngam nang fan e n’en ni kam bieg! Faanra ngada athamgilgad ni ngad folgad ko fare fonow ni ngan bieg fare Bible u gubin e rran, ma dabda gurnaged i bieg boor e guruy riy nib pey ni dabda nanged fan e pin’en ni kad bieged. Riyul’ ni baga fan ni ngan bieg e Bible u gubin ngiyal’, machane susun e gathi ke mus ni gad baadag ni ngada folgad ko schedule rodad; ya thingarda nameged ni ngad filed murung’agen Jehovah nge tin nib m’agan’ ngay. Ffel’ ni ngada fanayed e pi thin rok Paul ney ni apostal ni ngad skengnaged gadad. I yol ngak e pi Kristiano ni walagen, me gaar: “Ereray fan ni gu ma ragbug u p’eowchen Got ni Chitamangiy, . . . ya nge yib gelngin lanin’med, mi i par Kristus u lanin’med u daken e michan’ romed ngak. Gu be meybil ngak Got ni nge yan lik’ngimed nga fithik’ e t’ufeg nrogon ni nge t’uf Got romed nge girdi’,mi gimed par riy me mang def ngomed, ni fan e gimed nge urngin e girdi’ rok Got e nge yib gelngin e tafinay romed nge yog ni mu nanged fan feni ga’ radan nge feni n’uw nge feni toar nge feni t’uf e girdi’ rok Kritus. Manga mu nanged rogon nib t’uf e girdi’ rok, ni yugu aram rogon ndabiyog ni ngan nang ga’ngin, ni ma par Got u fithik’med nge suguymed nga rarogon ni polo’.”​—Ephesians 3:14, 16-19.

9. Uw rogon ni ngada maruweliyed ban’en nge gel e t’ufeg rodad ko fil ban’en u murung’agen Jehovah?

⁹ Sana riyul’, ni boch i gadad e dubrad ni ngar bieged e babyor, machane boch e yad baadag. Demtrug ko mang e baadag be’ nge be’, machane, rayog ni ngada maruweliyed ni ngad adaged ni ngad filed murung’agen Jehovah. Peter ni apostal e i weliy ni thingari yib lamen e tamilangan’ nu Bible ngodad, me yog ni re n’ey e bat’uf ni ngan maruweliy. Me yoloy ni gaar: “Mpired ni gimed bod e bitir ni ka fin nni gargeleg, ni gubin ngiyal’ ma be yib lamen e milik ngomed, nib machalbog ni fan nga lanin’med, ya ra um unumed mi gimed ilal ngam thapgad ngak Got.” (1 Peter 2:2) Ngan gagiyegnag lanin’uy e baga’ fan ni fan e “nge yib lamen” e fol Bible ngodad. Taabrogon ko ggan nib biech ni thingarda ked ni boor yay ma ra i yib lamen ngodad, ma lem rodad ko bieg nge fol babyor e ra thil nge fel’ boch ni faanra ngada gagiyegnaged lanin’dad ma ngad folgad ko yaram ni kan ta’.

“Ggan ko Ngiyal’ nib Puluw”

10. Mini’ e piin ni yad bang ko “fare tapigpig nib yul’yul’ mab gonop,” ma uwrogon ni be fanayrad Jehovah ko ngiyal’ ney?

¹⁰ Yugu reb e kanawo’ ni ma fanay Jehovah ni nge non ngodad e aram e n’en ni ke weliy Jesus u Matthew 24:45-47. I weliy Jesus uroy u murung’agen e ulung ko pi Kristiano ni kan dugliyrad ni​—“fare tapigpig nib yul’yul’ mab gonop” ma kan dugliyrad ni ngar pied e “ggan nib spiritual ko ngiyal’ nib puluw.” Ma piin ni kan nog e “pi tapigpig u tabinaw” rok Jesus ngorad e yad bang ko re ulung ney.” Yad, nge fare “ulung ni baga’” ko “yugu boch i saf,” e yima pi’ e athamgil nga lanin’rad ma yima pow’iyrad. (Revelation 7:9; John 10:16) Ggan ni ma yib ko ngiyal’ nib puluw e baga’ ni kan yoloy nga babyor, ni bod e The Watchtower, nge fare Awake!, nge yugu boch e babyor. Maku yugu boch e ggan nib spiritual e yibe wereg u daken e pi welthin nge demonstrations u nap’an e pi convention, nge pi assembly, nge pi muulung ko ulung.

11. Uw rogon ni ngada daged ni ba fel’ e n’en ni be yog fare kan uwan’dad u daken “fare tapigpig nib yul’yul’ mab gonop”?

¹¹ Be pi’ “fare tapigpig nib yul’yul’ mab gonop” boch e thin ngodad ni fan e nge gelnag e michan’ rodad ma be ayuwegdad ni ngada nanged e thin nib fel’ ko tin nib kireb. (Hebrews 5:14) Kan pi’ re fonow ney ni fan nga boor ban’en, ma aram rogon, ma ra be’ ma rayog ni nge fanay ban’en nib puluw ko par rok. Boch e tayim, ma ma yib ngodad e fonow nib puluw nga reb e ngongol rodad. Mang e thingari m’ug ko ngongol rodad nfaanra riyul’ ni gad be motoyil ko thin ni be yog fare kan u daken fare tapigpig nib yul’yul’? I fulweg Paul ni apostal ni gaar: “Mu folgad ko thin rok e piin ni yad be yog e thin romed.” (Hebrews 13:17) Riyul’, ni piin ni yad bang ko re yaram ney e dawora flontgad. Machane, ba falfalan’ Jehovah ni nge fanay e girdi’ ni nge mang tapigpig rok, ni yugu aram rogon ni dawora flontgad, ni ngar pow’iyed gadad ko ngiyal’ ney ni gad be par ko tin tomren e rran.

Ayuw ni Yib ko Nangan’ Rodad

12, 13. (a) Mang yugu boch ban’en ni ma yib e ayuw riy ni ke pi’ Jehovah ngodad? (b) Uw rogon ni ma gagiyegnag e nangan’ rok e girdi’ ni dariy e tamilangan’ rorad ko Thin rok Got nib puluw me yib angin ngorad?

¹² Ke pi’Jehovah ngodad yugu boch ban’en ni ma yib e ayuw riy​—ma aram e nangan’ rodad. Ke sunmiy e girdi’ ni bay gelngin ni nge thamiy e tin nib kireb nge tin nib mat’aw. Aram rogon gadad. I weliy Paul ban’en ko babyor rok ni ke pi’ ngak piyu Roma ni gaar: “Piin ni gathi yad piyu Israel e dariy e re Motochiyel nem rorad; machane ngiyal’ ni yad ra ngongliy e tin ni be yog e re Motochiyel nem ni yad e sum u lanin’rad ni ngar ngongliyed, e aram e kar manged ba motochiyel ngorad, ni yugu aram rogon ni dariy fare Motochiyel rok Moses rorad. Ya ngongol rorad e be m’ug riy ni tin be yog fare Motochiyel ni ngan rin’ e yad manang u lanin’rad. Ya ku er rogon lanin’rad ni be dag ni re n’ey e ba riyul’, ni bochan e yu ngiyal’ e ma yog e lem rorad ngorad nib tagan e tin kar ngongliyed, ma yu ngiyal’ e ma yog ngorad nib mat’aw e tin ni kar ngongliyed.”​—Romans 2:14, 15.

¹³ Bay boch i yad ni dar nanged Jehovah, yu ngiyal’, ma rayog ni ngara puluwnaged e lem rorad nge tin ni yad be rin’ ko pi kenggin e motochiyel ko tin nib mat’aw nge tin kireb. Gowa yad be rung’ag bochi lam u fithik’rad ni be pow’iyrad ko kanawo’ nib mat’aw. Faanra riyul’ ni aram rogon e re n’ey ko piin ni dar nanged e tamilangan’ ko Thin rok Got nib puluw, me ere ri ba riyul’ ni fare lam u fithik’ey e ra non ngak e pi Kristiano ni riyul’! Mmutrug, ni nangan’ ko Kristiano ni kan machalbognag ko Thin rok Got ni be maruwel nib puluw ko kan ni thothup rok Jehovah e rayog ni nge pow’iyrad nib mudugil.​—Romans 9:1.

14. Uw rogon ni nge ayuwegdad e nangan’ rodad nib puluw ko Bible ni ngad folgad u rogon ni be pow’iydad e kan rok Jehovah?

¹⁴ Fare nangan’ ni ma fol ko Bible mab fel’, e rayog ni nge puguran ngodad e kanawo’ ni baadag fare kan ni ngadarod riy. Sana bay boch e tayim ni dariy e thin nib tamilang u lan fare Bible ara boch e babyor ni kan ngongliy ni thin riy e kan fek u Bible ni be weliy murung’agen e par rodad. Machane, nangan’ rodad e ra ginangdad, ma ra n’igin ni ngad guyed fare kanawo’ ni ra kirebnagdad. Ra ngan dariyfannag e n’en ni be yog e nangan’ rodad ngodad, ma bod ni gad be dariyfannag e n’en ni be yog fare kan rok Jehovah. Ma yugu reb, e aram ngan fil rogon ni ngan taga’ ko nangan’ rodad ni Kristiano, ma aram e rayog ni ngada mel’eged ban’en nib fel’ rogon ni yugu aram rogon ni dariy e thin nib tamilang ni ra pow’iydad riy. Machane, baga’ fan ni dabda paged talin, ni faanra dariy e kenggin e motochiyel, ara motochiyel ni ke pi’ Got ngodad, ma de puluw ni ngada towasariyed e pi walagdad ni ngar folgad ko n’en ni be yog e nangan’ rodad ngodad ko tin ni susun ni pi walag e ra dugliy.​—Romans 14:1-4; Galatians 6:5.

15, 16. Mang e ra kirebnag e nangan’ rodad ni nge dabki maruwel nib fel’ rogon, ma u rogon ni ngan taleg ni dabi buch?

¹⁵ Fare nangan’ nib biech mab puluw ko Bible e ba taw’ath nib fel’ ni yib rok Got. (James 1:17) Machane thingarda ayuweged e re taw’ath ney ni dariy ban’en ni nge kirebnag ma aram rogon e rayog ni nge maruwel nib fel’ rogon ni bod talin e maruwel ni yima ayuweg. Faanra ngan fol ko pi n’en ni ma rin’ e girdi’ u lan e binaw, nge boch e yalen rorad, nge boch ban’en nib togopuluw ko motochiyel rok Got ma ra kirebnag e nangan’ rodad ma dabkiyog ni nge powiy’dad ko kanawo’ nib mat’aw. Sana dabkiyog ni ngada dugliyed ban’en nib puluw ma kada banniged gadad ni nge michan’dad ni ba fel’ fare ngongol nib kireb.​—Mu taarebnag ko John 16:2.

¹⁶ Faanra gad be par ni gad be dariyfannag e n’en ni be ginangdad e nangan’ rodad riy, ma ra achichig iyan fare lam ni buchuw nge buchuw nge mada’ ko ngiyal’ ni dabkiyog ni nge thamiy ban’en. Be weliy fare psalmist murung’agen e girdi’ ni aram rogon u nap’an ni be weliy ban’en ni gaar: “Gum’ercha’rad e dabkiyog ni nge thamiy ban’en ni bod e mam.” (Psalm 119:70, NW) Boch e girdi’ ni kar dariyfannaged e n’en ni baadag e nangan’ rorad ni ngar rin’ed ma dabkiyog ni ngar lemnaged ban’en nib fel’ rogon. Daki pow’iyrad e nangan’ rorad ni kenggin e motochiyel ni yib rok Got ma dabkiyog ni ngar dugliyed ban’en nib puluw. Rayog ni ngan palog ko re magawon ney, ma aram e thingarda folgad ko n’en ni be yog e nangan’ rodad ni ngad rin’ed ni yugu demtrug feni achichig.​—Luke 16:10.

Ba Falfalan’ e Piin ni Ma Motoyil ma Ma Fol

17. Faan gad ra motoyil ko ‘fare thin ni bay u tomur rodad’ ma ngad folgad ko nangan’ rodad nib puluw ko Bible, ma uw rogon ni nge yib e taw’ath ngodad?

¹⁷ Nap’an ni gad be maruwel uw rogon ni ngada motoyilgad ko ‘fare thin ni bay u tomur rodad’​—ni kan pi’ ngodad u daken e Thin rok Got ngu daken fare tapigpig nib yul’yul’ mab gonop—​ma faanra gad be fol ko pi n’en ni be yog e nangan’ rodad nib puluw ko Bible, ma ra taw’athnagdad Jehovah ko kan rok. Fare kan ni thothup e ra gelnagdad nge mom ni taw ngodad e n’en ni be yog Jehovah ngodad me mom ni ngad nanged fan.

18, 19. Uw rogon ni nge ayuwegdad e thin rok Jehovah ni be pow’iydad ko machib nge yafas rodad?

¹⁸ Maku gelngin Jehovah e ra ayuwegdad ko ngiyal’ ni nge yib ngodad e magawon nib mo’maw’ ma rayog ni ngada rin’ed ban’en u fithik’ e gonop ngu fithik’ e pasig. Ma taabrogon ko pi apostal, ma rayog ni nge ayuwegdad gelngin Got ma ra k’aring gelngin lanin’dad ma aram rogon ma rayog ni ngada rin’ed ban’en nge ku rayog ni nga dogned ban’en nib puluw ko kenggin e motochiyel u Bible. (Matthew 10:18-20; John 14:26; Acts 4:5-8, 13, 31; 15:28) Faan manga gelngin Jehovah nge gelngidad e yow ra par u taabang ma rayog ni nge ayuwegdad e re n’ey nge yib angin ngodad ko ngiyal’ ni ngada dugliyed ban’en ni baga’ fan ko yafas rodad, ma ra pi’ gelngidad e re n’ey ni ngada folgad ko n’en ni kan dugliy. Ni bod rogon, ni sana ga be lemnag ni ngam puluwnag e yafas rom ma aram rogon ma ra yoor e tayim rom ni fan ko tirok Got. Ara ke yib a tayim ni ngam dugliy ban’en ni baga’ fan, nra thiliyeg boch e par rom, ni bod ni ngam mel’eg be’ ni ngam leengiy, ngam thebthebelnag e maruwel ni kan nog ngom ni rayog ni ngam un ngay, ara ga ra chuw’iy reb e naun. Dabda paged ni goo lem rodad e ra powiy’dad ko ngiyal’ ni ngada dugliyed ban’en, ya thingarda motoyilgad ko n’en ni ra yog gelngin Got ma gad fol u rogon ni be pow’iydad.

¹⁹ Gad ba falfalan’ ko pi puguran nge fonow ni ke pi’ e pi walagdad ngodad u fithik’ e gol, mab muun ngay e piin piilal. Machane, de t’uf ni ngada sonnaged yugu boch e girdi’ u gubin ngiyal’ ni ngar rogned boch e magawon ngodad. Faan manga gad manang e n’en ni ffel’ ni ngad rin’ed nge gad manang e pi n’en ni thingarda rin’ed nge fel’ e lem nge ngongol rodad ni nge felan’ Got ngodad, ma gad ra rin’. Ke yog Jesus ni gaar: “Re bugithin ney nib riyul’ e kam nanged e chiney, faan gimed ra maruwel ngay ma ra um pired ni gimed ba falfalan’.”​—John 13:17.

20. Mang taw’ath ni ma yib ngak e piin ni ma motoyil ko ‘fare thin ni bay u tomur rorad’?

²⁰ Ba tamilang, ni piin Kristiano e de t’uf ni ngar rung’aged ba lam ni yib u tharmiy, ma de t’uf ni nge yib e pi engel ni nge guyrad ni fan e ngar nanged ko uw rogon ni ngar falfalan’naged Got. Kan pi’ ngorad e Thin rok Got ni kan yoloy ni ba taw’ath nge piin ni kan dugliyrad u roy u fayleng ni be powiy’rad u fithik’ e t’ufeg. Faan yad ra fol ko re ‘thin ni be yib u tomur rorad’ mar folgad ko nangan’ rorad nib puluw ko Bible, ma ra fel’ rogorad ni ngara rin’ed e tin nib m’agan Got ngay. Ma rayog ni ngar guyed e tin ni ke micheg John ni apostal ni be gaar: “En nra rin’ e tin nib m’agan’ Got ngay e ra par nib fas ndariy n’umngin nap’an.”​—1 John 2:17.

Ngan Weliy Biyay ni Buchuw e Thin

• Mang fan ni ma non Jehovah ngak e girdi’ ni ir e ke sunmiyrad?

• Uw rogon ni nge fel’ rogodad ko yaram ni ngan bieg e Bible u gubin ngiyal’?

• Uw rogon e ayuw ni be pi’ e piin ni kanog fare tapigpig nib yul’yul’ mab gonop ngorad uwan’dad?

• Mang fan ni dabda dariyfannaged e n’en ni be yog e nangan’ rodad ni ngan rin’ nib puluw ko Bible?

[Picture on page 25]

De t’uf ko girdi’ e masin ni bay boor e parts riy ni fan ni nge yib e thin rok got ngorad

[Credit Line]

Courtesy Arecibo Observatory/David Parker/Science Photo Library

[Picture on page 27]

Ma non Jehovah ngodad u daken fare Bible ngu daken “fare tapigpig nib yul’yul’ mab gonop”