Mu Tay Fan e Piin Ni Ma Yog e Thin
“Mi gimed tay fan urngin e girdi’, ma nge t’uf romed e pi cha’ ni gimed ni ke mich Got u wun’rad, nge yib madgun Got u wun’med, mi gimed ta’ fan e en ni ir e pilung ni ga’.”—1 PETER 2:17.
1, 2. Uw rogon e piin ni ma yog e thin u wan’ e girdi’ e ngiyal’ ney? Mang fan ni aram rogon?
“PIIN ni bitir e ma rin’ e tin ni yad ba adag. Dar ted fan e piin ni gallabthir.” Aram e n’en ni yog reb e matin. “Mu Togopuluw Ngak E Piin Ni Ma Yog E Thin.” Aram e n’en nyoloy nga daken reb e karro. Gali thin ney e ma tamilangnag rarogon e girdi’ e ngiyal’ n’ey, ma ga manang ni aram rogon. U ga’ngin yang e fayleng e dariy e tay fan ngak e piin ni gallabthir, nge piin ni sensey, nge pi ga’ ko maruwel nge pi am.
2 I gaar boch e girdi’, “Mmo’maw’ rog ni nggu tay fan e piin ni ma gagiyeg ni bochan e ba kireb pangirad.” Yu ngiyal’ ma aram rogon. Boor yay ni ma m’ug ko shimbung morngaagen e pi am ni yad ba sasalap, nge pi ga’ ko maruwel ni ba gel e chogow rorad, nge pi sensey ni dar salapgad ko maruwel rorad nge pi gallabthir ni yad ma gafgownag pi fakrad. Machane gathi aram rogon e piin ni ma gagiyegnag e ulung u wan’ e piin ni Kristiano.—Matthew 24:45-47.
3, 4. Mang fan ni thingari tay e pi Kristiano fan e piin ni ma yog e thin?
3 Gad e pi Kristiano e thingar da ted fan e piin ni yad ma tay morngaagen e girdi’. I yog e apostal Paul ngak e pi Kristiano “ni thingar ra folgad ko am; ya dariy reb e am ni bay ni gathi Got e pag nge yib ma pi am ni bay e Got e ke tayrad.” (Roma 13:1, 2, 5; 1 Peter 2:13-15) Miki weliy Paul fan ni ngan fol rok e piin ni ma tay morngaagen e tabinaw. I gaar: “Piin ni ppin, mu folgad ko thin rok pi figirngimed, ya ereray e n’en ni ngam rin’ed nrogon ni ma rin’ girdien Kristus. Piin ni bitir, thingar um folgad ko thin rok e gallibthir romed ni gubin ngiyal’ nrogon girdien Kristus ya ereray e n’en ni ba adag Got.” (Kolose 3:18, 20) Bay fan ni ngan tay fan e piin ni piilal u lan e ulung ni bochan e “kan ni thothup e ke tayrad ni ngar ayuweged fare ulung i saf rok Got.” (Acts 20:28) Bochan ni gad ma liyor ngak Jehovah e aram fan ni gad ma tay fan e girdi’ ni yad ma tay morngaagen yugu boch e girdi’. Ma gubin ngiyal’ ma Jehovah e somm’on ni gad ra tay fan ma migid e girdi’.—Acts 5:29.
4 Jehovah e ir e ani th’abi tolang ni ma yog e thin, ere ngada filed morngaagen boch e girdi’ ni dar ted fan e piin ni ma yog e thin nge piin ni ur ted fan e piin ni ma yog e thin.
Dar Ted Fan E Piin Ni Ma Yog E Thin Ere Dar Fel’gad U Wan’ Got
5. Uw rogon ni de tay Michal fan David, ma mang wenegan?
5 Faan gad ra fil e chep u morngaagen David ni Pilung ma gad ra nang rogon laniyan’ Jehovah ngak e piin ni dar ted fan e piin ni ke tayrad Jehovah ni ngar rogned e thin. Nap’an ni i fek David fare kiwaren e m’ag i yib nga Jerusalem, ma Michal ni ppin rok David e i “guy David ni pilung ni be churu’ ma be og nga lang u fithik’ fare churu’ ni fan ngak Got, me ri dabuy.” Susun e nge tay Michal fan David ni ir lolgen e tabinaw rok maku ir e pilung ko nam. De tay Michal fan David ma i muningnag ni be dake be yog e sorok ngak ni gaar: “En ni pilung nu Israel e ke gilnag buguwan e daba’! Ya ke chuweg madan u daken u p’eowchen e piin ni ppin ni tapigpig ko piin ntolang ni ba’ nga tan pa’ ni ke darifannag ir.” Bochan e thin rok Michal ma de diyen biid.—2 Samuel 6:14-23.
6. Uw rogon u wan’ Jehovah e n’en ni rin’ Korah ni de tay fan e ani ke duguliy Jehovah?
6 Korah e ir be’ ni ri de tay fan e gagiyeg ni Got e tay. Korah e ir be’ ko tabinaw rok Kohath, ma ba taw’ath ni bochan e rayog ni nge pigpig ku Jehovah u lan e tabernacle! Machane i gaweg thibngin Moses nge Aaron ni Got e duguliyrow ni ngar gagiyegnagew e nam nu Israel. I kunuy Korah boch e pilung nu Israel mar nonad ngak Moses nge Aaron nra gaargad: “Urngin girdien fare ganong e ba thothup, ma bay Jehovah u fithik’rad. Ere mang ni kam tolangnagew gimew ma gimew ba tolang ko ulung rok Jehovah?” Uw rogon laniyan’ Korah nge pi girdi’ rok u wan’ Jehovah? U wan’ Got e be dariy fannag fa picha’ Jehovah. I guy Korah nge fa 250 e pilung ni i dar e but’ me mul e ba’ rorad e girdi’ nga langgin nge mu’ me yib e nifiy u lang rok Jehovah me thang Korah nge fa 250 e pilung.—Numbers 16:1-3, 28-35.
7. Bay rogon ni nge gathibthibnag fa “piin ni gowa yad e apostal” e liw rok Paul fa?
7 Immoy boch e girdi’ u lan e ulung ni Kristiano ko bin somm’on e chibog ni dar ted fan e piin ni duguliyrad Got ni ngar gagiyegnaged e ulung. Fa piin ni gowa yad e apostal u lan e ulung nu Korinth e dar ted fan Paul. Kar gathibthibnaged rogon e welthin rok Paul nra gaargad: “Ngiyal’ ni ba’ rodad e mmeewar ma thin rok e dariy rogon.” (2 Korinth 10:10; 11:5) Yugu demutrug ko ba fel’ e welthin rok Paul fa danga’ ma susun e ngan tay fan, ya ir reb e apostal. Ba riyul’ ni dariy rogon e welthin rok Paul, fa? Fapi welthin rok ni kan yoloy u lan e Bible e be micheg rogon felngin e welthin rok. I welthin Paul biyay u pe’owchen Herod Agrippa II ni ir reb e pilung ni “ba tamilangan’ u yalen nge tin nde taareban’ piyu Israel riy.” Me gaar fare pilung ngak Paul, “Gu be finey ni nrayog ni ngam pingegeg nggu mang reb i girdien Kristus u lan e chi ngiyal’ i n’ey nib ngoch!” (Acts 13:15-43; 17:22-34; 26:1-28) Aram rogon felngin e welthin rok Paul, machane i yog fa pi cha’ ni gowa yad e apostal ni u Korinth ni dariy rogon e welthin rok Paul! Uw rogon lanin’rad u wan’ Jehovah? Nap’an ni i non Jesus Kristus ngak e piin ni piilal ko ulung nu Efesus, i pining e magar ngak e piin ni dar uned ngak e “piin ni be lungurad ni yad e apostel machane gathi yad.”—Revelation 2:2.
Ngan Tay Farad Ni Yugu Aram Rogon Ni Yad Tadenen
8. Uw rogon ni i dag David ni ke tay fan lungun Saul ni Jehovah e ke pi’ ngak?
8 Boor e thin u lan e Bible u morngaagen e piin ni ur ted fan e piin ni ma yog e thin ni yugu aram rogon ni dar gagiyeggad nrogon. David e ir be’ ni i tay fan e piin ni ma yog e thin. I pigpig David ngak Saul ni Pilung machane i buchan’ Saul ni bochan fa pi n’en ni rin’ David me guy Saul rogon ni nge thang e fan rok David. (1 Samuel 18:8-12; 19:9-11; 23:26) Yugu aram rogon ni bay kanawoen ni nge li’ David Saul, i gaar David: “Rogon e changar rok Jehovah e ri dabiyog rog ni nggu furuy paag nib togopuluw ngak e ani ke duguliy Jehovah!” (1 Samuel 24:3-6; 26:7-13) Manang David ni ba kireb e rok Saul, machane i pag fan ngak Jehovah ni nge pufthinnag. (1 Samuel 24:12, 15; 26:22-24) De yog e thin nib kireb u morngaagen Saul ara yog e kireb ngak.
9. (a) Uw rogon e gafgow ni yib rok Saul u wan’ David? (b) Uw rogon ni gad ra nang nib riyul’ ni i tay David fan Saul?
9 I kireban’ David u nap’an ni un gafgownag, fa? I yor David ngak Jehovah ni gaar: “Bay e piin nib kireb ni yad be guy rogon ni ngar thanged e pogofan rog.” (Psalm 54:3) Tin ni bay u fithik’ gumerchaen e i weliy David ngak Jehovah ni gaar: “O Got rog, mu ayuwegeg rok e pi toogor rog . . . O Jehovah, piin ni yad ba gel e yad be cham ngog ni yugu aram rogon ni dariy ban’en ni kugu bucheg. Dariy e denen ni kugu fl’eg machane kar fl’eged rogorad ko cham. Mu suwon ngam guy ni aram rogon.” (Psalm 59:1-4) Bay biyay ni aram rogon lanin’um−ni dariy ban’en nib kireb ni kam rin’ ngak be’ nib tolang, machane me magawonnagem? Machane i tay David fan Saul. Nap’an ni yim’ Saul, de falan’ David ya i tunguy ba dolo’loy ni gaar: “Saul nge Jonathan ni yow ba t’uf rog ma yow ba fel’ u nap’an e yafas rorow . . . Yow ba papey boch ngak e arche’ ni eagle, ma yow ba gel boch ngak e layon. Gimed e ppin ni pi fak Israel, mu yornaged Saul.” (2 Samuel 1:23, 24) Rib fel’ e kanawo’ ni i dag David u rogon ni i tay fan e ani ke duguliy Jehovah, ni yugu aram rogon ni i rin’ Saul e kireb ngak David!
10. Mang kanawo’ nib fel’ ni i dag Paul u rogon ni i tay fan e thin rok e governing body, ma mang e buch rok ni bochan e ke fol rorad?
10 U nap’an e bin somm’on e chibog ma immoy e girdi’ ni ur ted fan e piin ni i tayrad Got ni ngar rogned e thin. Bagayad e Paul. I tay fan e pi n’en ni ke turguy e governing body ko ulung ni Kristiano ko bin somm’on e chibog. Nap’an e bin tomur e chur ni tay Paul nga Jerusalem, me yog girdien e governing body ngak Paul ni nge biechnag ir nrogon yalen piyu Israel ya nge dag ni dariy e togopuluw ni be tay ko pi Motochiyel rok Moses. Rayog ni nge lemnag Paul u wan’ ni gaar: “Pi moon ney e ur rogned ngog ni nggu chuw u Jerusalem ko fa ngiyal’ i n’em ni un guy rogon ni ngan thang e fan rog. Ma chiney e yad ba adag ni nggu dag u pe’owchen e girdi’ ni gu ma tay fan e Motochiyel rok Moses. Mog, ka fini gu yoloy ba babyor ngak piyu Galatia ni dab ra folgad ko Motochiyel rok Moses. Faan manga gu ra yan nga lan e temple ma rayog ni nge oloboch laniyan’ boch e girdi’ ngar lemnaged ni gu be fol rok e piin ni kar maadadgad nrogon piyu Israel.” Machane gathi aram rogon laniyan’ Paul. I fol rok girdien fare governing body me tay farad ni bochan e dariy reb e motochiyel rok Kristus nra th’ab ni faanra fol rorad. Bochan ni i fol ko thin rok e governing body thingar ni ayuweg Paul rok piyu Jew ni ur guyed rogon ni ngar lied, ma aram me par u kalbus ni l’agruw e duw. Machane ke lebug e tin nib m’agan’ Got ngay. I machib Paul ngak e pi tolang nu Caesarea ma aram min fek nga Roma me machibnag Paul Caesar.—Acts 9:26-30; 21:20-26; 23:11; 24:27; Galatia 2:12; 4:9, 10.
Ga Ma Tay Farad?
11. Uw rogon ni gad ma tay fan e am?
11 Ga ma tay fan e piin ni ma yog e thin, fa? Kan tay chilen ngak e pi Kristiano ni gaar: “Thingar mu folgad ko pi am . . . mi gimed liyor ngorad mi gimed tay farad ni yad gubin.” Gathi ke mus ni ngada pied e tax ma aram e kada folgad ko “pi am” ya thingar da daged ko ngongol rodad nge thin rodad ni gad be liyor ngorad. (Roma 13:1-7) Mang e gad ra rin’ ni faanra ba gel boch e thin rok e am? U binaw ni Chiapas u Mexico i fek e am e pi milay’ rok 57 e tabinaw ko Pi Mich Rok Jehovah ni bochan e dar uned ko pi madenom rok e pi yurba’ i teliw. Nap’an e pi puruy’ ntay ni ngan pithig e re magawon ney e ke chuw e Pi Mich Rok Jehovah ko mad nib fel’ ma be m’ug ko thin rorad ni yad ma tay fan e am. Ke pag reb e duw nga tomren min turguy ni ba fel’ e rorad. Boch e girdi’ ni ur yaliyed e Pi Mich Rok Jehovah e yad ba adag ni ngar uned ngorad ni bochan e tay fan ni ur ted ngak e am!
12. Mang fan ni baga’ fan ni nge tay e ani leengiy fan e pumoon rok ni de mich u wan’?
12 Uw rogon ni ngam tay fan e ani ke tay Got ni nge yog e thin u lan e tabinaw? Tomren ni i weliy apostal Peter rogon ni i guman’ Jesus u fithik’ e togopuluw, i yog ni gaar: “Maku er rogomed pi leengiy nthingar um folgad rok pi figirngimed, ni fan e faanra ba’ boch i yad ndawori mich e thin rok Got u wun’rad ma rayog ni nge mich u wun’rad ni bochan pangimed. Ma aram e dakuriy fan bbugithin ni nga mogned ngorad, ya ra guyed rogon feni machalbog pangimed nge rogon ni gimed be ta’ farad.” (1 Peter 3:1, 2; Efesus 5:22-24) I tamilangnag Peter ni thingari fol e pi leengiy ngak pi figirngirad u fithik’ e “tay fan” ni yugu aram rogon ni dariy rogon ni ngan tay farad. Rayog ni nge mich u wan’ e ani figirngiy ni bochan e tay fan ni ma tay e ppin rok u gumerchaen.
13. Uw rogon ni rayog ni nge tay e piin leengiy fan e pi figirngirad?
13 I weliy Peter ngodad rogon e kanawo’ ni i dag Sarah, ma pumoon rok ni Abraham e ba gel e michan’ rok. (Roma 4:16, 17; Galatia 3:6-9; 1 Peter 3:6) Ma piin ni ppin nib mich u wan’ e pumoon rorad, thingar ra ted fan e pi figirngirad ni bod rogon ni thingari tay fan e pi leengiy ni de mich u wan’ pi figirngirad, fa? Ma uw rogon ni faan manga de taareban’mew e pumoon rom u ban’en? I yog Jesus ban’en nrayog ni ngan fanay ko re magawon ney. I gaar: “Faanra gelnag reb e salthaw nu reb e nam ni ba’ ko nam rom ir ngom ni ngam fek e chugum rok ntaareb e mayel, ma ka ga fek u reb e mayel.” (Matthew 5:41) Ga ma tay fan e pumoon rom ma ga m’ing ko thin rok, fa? Faan manga kayigi mo’maw’ rom, mu weliy ngak rogon lanin’um. Dab mu tay ni manang rogon lanin’um ya mu weliy ngak. Ma nap’an ni ga ra non ngak ma ga non u fithik’ e tay fan. Begaar e Bible ngodad: “Ma gubin ngiyal’ nthingar umogned e thin ngorad nib fel’ ma ba’ fan, ma thingar mu nanged rogon ni ngam pied e fulweg nib mat’aw ko tin ni ke fith be’ nge be’ ngomed.”—Kolose 4:6.
14. Mang e kub muun ngay ko bin ni ngam tay fan gallabthir rom?
14 Ma gimed e piin ni bitir? Thin Rok Got e ke tay chilen ngomed ni gaar: “Piin ni bitir, thingar mu folgad rok e gallibthir romed nrogon girdien Kristus, ya ereray e tin nib mat’aw ni ngan rin’. “Mu liyor ko chitamam nge chitinam” e bin somm’on e motochiyel ni bay bbugithin nni yigey ngay.“ (Efesus 6:1-3) Mu tay fanam i yan riy ni ngam fol ko gallabthir e ba taareb rogon ni bin ni ngam “tay fan e chitamam nge chitinam.” Fare bugi thin nu Greek ni kan pilyeg ni “tay fan” e be yip’ fan ni “ngan t’ufeg” ara “ngan tay nib tolang puluwon.” Ere fol ni ga ra tay e ka baga’ ko bin ni ngam fol ko gallabthir rom u fithik’ e thinthinan’ u nap’an ni de puluw e thin rorad u wan’um. Ba adag Got ni ngam t’ufeg e gallabthir rom ma ga tay ni baga’ fan e fonow rorow.—Proverbs 15:5.
15. Uw rogon nrayog ni nge tay e piin ni bitir fan e gallabthir rorad ni yugu aram rogon ni yad be finey ni ke oloboch e gallabthir rorad?
15 Uw rogon ni faan manga rin’ e gallabthir rom ban’en ni de fel’ u wan’um mab mo’maw’ ni ngam tay farow? Mu guy rogon ni ngam nang fan lanin’row. Gathi yow ni kar diyennagew gur mar piew ngom e tin nib t’uf rom? (Proverbs 23:22) Tin ni yow ma rin’ e yow ma rin’ ni bochan e kar t’ufegew gur, fa? (Hebrews 12:7-11) Mu non ngorow u fithik’ e tay fan ma ga weliy rogon lanin’um u fithik’ e sumunguy. Ni mus ni faan manga yow ra fulweg e thin nrogon ni dubum, ma dab mu dariy fannagrow. (Proverbs 24:29) Dab mu pag talin rogon ni i tay David fan Saul ni yugu aram rogon ni de fol fare pilung ko thin rok Got. Mu yibilay Jehovah ni nge ayuwegem ni nge gapas lanin’um. I gaar David: “Mu weliy rogon gumerchaem ngak Got. Ya Got e ir e manab rodad.”—Psalm 62:8; Lamentations 3:25-27.
Mu Tay Fan E Piin Ni Be Gagiyeg
16. Mang e rayog ni ngada filed ko n’en ni rin’ e pi tamachib ni goo bogi ban’en nge n’en ni rin’ e pi engel?
16 Kan ni thothup e ke duguliy e piin ni piilal ko ulung, machane ka yad ba tadenen ma yad ma oloboch yu ngiyal’. (Psalm 130:3; Ecclesiastes 7:20; Acts 20:28; James 3:2) Ma aram e sana ra gun’gun’ boch e girdi’ u lan e ulung. Mang e gad ra rin’ ni faanra dan rin’ ban’en u lan e ulung nrogon, ara gad be finey ni dan nrin’ nrogon? Mu tay fanam i yan riy e n’en nib thil ko pi tamachib ni goo bogi ban’en ko bin somm’on e chibog nge pi engel: “Pi tamachib ni goo bogi ban’en e darir tamdaggad ma yad ba uf, ma darir tiyed fan e piin ni piilal ni yad ba flaab ya n’en ni yad ma rin’ e yad ma yog e thin nib kireb ngorad. Mus ngak e pi engel ni yad ba gel ma kab sororad ngak e pi tamachib nem ni goo bogi ban’en ma darir rogned e thin nib kireb ngak e pi cha’ nem u p’eowchen Somol.” (2 Peter 2:10-13) Pi tamachib nem ni goo bogi ban’en e ba gel e thin rorad ni yad be togopuluw ngak e piin ni piilal u lan e ulung ni Got e tayrad ni ngar rogned e thin u lan e ulung machane fapi engel e dar rogned e kireb rok fapi tamachib ni goo bogi ban’en ni yad be yoor raba’nag e ulung. Fapi engel e yad ba tolang ngak e girdi’ ma kab yal’uw boch e tin nib mat’aw ban’en u wan’rad ere yad manang e n’en ni be buch u lan e ulung. Machane bochan ni yad ma “tay fan Jehovah” kar paged fan ngak Got nge mang ir e nge pufthinnagrad.—Hebrews 2:6, 7; Jude 9.
17. Uw rogon ni bay rogon e michan’ rom ko magawon nra sum ni faan manga ga be finey ni ke oloboch reb e piilal ko ulung?
17 Ni mus ni faan manga dan rin’ ban’en u lan e ulung nrogon, ma susun e nge mich u wan’dad ni Jesus Kristus e ir lolgen e ulung ni Kristiano, fa? Manang e pi n’en ni be buch u lan e ulung rok u fayleng i yan, fa? Susun ngada ted fan rogon ni ma gagiyeg Kristus ma rayog rok ni nge gagiyeg, fa? “Ga be finey me gur mini’ ni ngam thibthibnag be’ ni gimew?” (James 4:12; 1 Korinth 11:3; Kolose 1:18) Mang ni dab mu weliy ngak Jehovah urngin e pi magawon rom u fithik’ e meybil?
18, 19. Mang e rayog ni ngam rin’ ni faanra ga be finey ni ke oloboch reb e piilal ko ulung?
18 Bochan ni gad e girdi’ nib tadenen, ma ra sum boch e magawon. Sana ra oloboch reb e piilal me wagey laniyan’ boch e girdi’ u lan e ulung. Faanra gurgur lanin’dad ni ngada rin’ed ban’en ma dabi chuw fare magawon. Ma sana ra ubchiya’ fare magawon. Piin ni yad ba gonop e ra sonnag Jehovah ni nge yal’uweg fare magawon ma nge pi’ e gechig nrogon nib m’agan’ ngay ko ngiyal’ nra m’ag ngay.—2 Timothy 3:16; Hebrews 12:7-11.
19 Ma uw rogon ni faanra ba wagey lanin’um u ban’en? Gathi ngam non ngak yugu boch e girdi’ u lan e ulung, ya ngam non ngak e piin ni piilal u fithik’ e tay fan ma ga ning e ayuw rorad. Dab nu weliy thibngin be’ ya ngam weliy rarogom ni bochan fare magawon. Mu “nang rogon lanin’rad” ma ga tay farad ni ga be non ngorad. (1 Peter 3:8) Dab mu muningnagrad, machane mu pagan’um ni yad ba ilal nrogon e Kristiano. Mu tay fan e fonow ko Bible ni yad ra weliy ngom. Ma faanra m’ug ni ka bay boch ban’en nthingar ni yal’uweg, mu pagan’um ngak Jehovah ni nge pow’iy e piin ni piilal ni ngar rin’ed e tin nib fel’ nge tin nib mat’aw.—Galatia 6:10; 2 Thessalonika 3:13.
20. Mang e gad ra fil ko bin migid e thin?
20 Machane ka bay yugu reb e thin ni thingar da weliyed u morngaagen rogon ni ngan tay fan e piin ni yad ma yog e thin. Piin ni yad ma yog e thin e susun ngar ted fan e piin ni bay u tan pa’rad, fa? Gad ra weliy e re thin ney ko bin ni migid e thin.
Uw Rogon Ni Ga Ra Fulweg?
• Mang reb i fan ni ngada ted fan e piin ni ma yog e thin?
• Uw rogon u wan’ Jehovah nge Jesus e piin ni dar ted fan e piin ni ke tayrad Jehovah ni ngar rogned e thin?
• Mini’ boch e girdi’ ni kar daged e kanawo’ nib fel’ ngodad u rogon ni ur ted fan e piin ni ma yog e thin?
• Mang e rayog ni ngada rin’ed ni faan manga oloboch be’ ni ma yog e thin ngodad?
[Picture on page 8]
Kari tay Sarah fan e liw rok Abraham me falfalan’ Sarah ni bochan
[Picture on page 9]
De tay Michal fan e liw rok David ni ir lolgen e tabinaw rok maku ir e pilung
[Picture on page 11]
“Ri dabiyog rog . . . ni nggu furuy paag nib togopuluw ngak e ani ke duguliy Jehovah!”
[Picture on page 12]
Mang ni dab mu weliy e pi n’en ni be magawonnag lanin’um ngak Jehovah u fithik’ e meybil?