Pi Wok Nib Fel’ Ma Fel’ Rogom Riy Fa?

“MA aram mi gimed dag e kanawo’ ngak urngin e girdi’ ni ke michan’rad ni yad ba’ u Macedonia ngu Achaia.” Aray e pi thin ni yoloy apostal Paul nge yan ngak e pi Kristiano ni yad ba yul’yul’ ni yad ma par u Thessalonika. Fare kanawo’ ni kar ted ni fan ngak e piin ni ke michan’rad e rriyul’ nib manigil. Maku, pi girdi’ nu Thessalonika nem e yad ma folwok ko fare kanawo’ ni ke tay Paul nge pi chonggin. Paul e gaar: “Ya gu feked i yib ngomed e thin nib fel’ ni yib rok Got, ni gathi ke mus ni ug weliyed, ya ku er rogon gelngin Got nge fare kan ni thothup nib chagil ngay, maku er rogon nib mich uwan’mad nib riyul’. Gimed manang rogon pangimad fa ngiyal’ nem ni ug moyed romed; ya mu folwokgad romad.”​—1 Thessalonika 1:5-7, New World Translation.

Arrogon, Paul e boor ban’en ni i rin’ gathi ke mus ni goo machib. Ke mus ni rogon e yafas rok ma ba machib​—ni aram reb i kanawo’en e michan’, nge gum’an, nge gafgow ni ma tay ni fan ko girdi’. Ma bochan e re n’ey, me Paul nge pi chonggin e gel gelngirad ngar pingeged e yafas rok piyu Thessalonika, ngar piggad ngar adaged e tin ni riyul’ “u fithik’ e gafgow.” Ma gathi ke mus, ni goo Paul, nge piin ni yad taab maruwel e goo yad e ra pingegned e pi cha’ ni baaram ni ke michan’rad. Ya ku pi n’en ni i rin’ boch e girdi’ ni ura athamgilgad u fithik’ e gafgow nib gel e ke pi’ e athamgil nga lanin’rad. I yol Paul ngak piyu Thessalonika ni gaar: “Pi walageg ni girdien kristus, gimed e taareb rogon e n’en ni ke rin’ e girdi’ ngomed ko n’en ni ku ke rin’ e girdi’ ngak e pi galesiya rok Got ni bay u lan yu Judea, ni aram e girdi’ ni yad bay u rom ni kar manged girdien Kristus Jesus e ku kan rin’ ngorad. Taareb rogon e gafgow ni ke tay girdien e nam romed ngomed ko gafgow ni ke tay piyu Israel ngorad.”​—1 Thessalonika 2:14.

Kristus Jesus​—Th’abi Fel’ Wakon ni nga uni Folwok Riy

Yugu aram rogon ni Paul e ke dag e wok nib fel’ ni ngan folwok riy, ma de pag ni nge dag Jesus Kristus ni ir e ani tha’bi som’on ni dag e wok nib fel’ ni thingari folwok e Kristiano riy. (1 Thessalonika 1:6) Kristus e immoy ma ir e tha’bi fel’ e wok rok ni nga udi folwokgad riy. I apostal Peter e yoloy ni gaar: “Ereray e re n’en ni ir e ke piningmed Got ngay; yi Kristus e ir e gafgow ni bochmed me dag ngomed rogon ni ngam folwokgad rok, ni aram e nguum leked luwan’ ay.”​—1 Peter 2:21.

Ma yugu aram rogon, me Jesus e mu’nag e yafas rok nib girdi’ u nap’an 2,000 e duw ni ke yan. Chiney, “e be par u fithik’ i raen e tamilang ni dabiyog e chugur ngay” ni ke mang ba kan ni dabi yim’ biid. Ere aram rogon, “ma dariy be’ ni kaa guy ara rayog ni guy”. (1 Timothy 6:16) Ere, u rogon, ma rayog ni ngad folwokgad rok? Reb e kanawo’ e ngad filed fa aningeg guruy i n’en ni bay u Bible ni murung’agen e yafas rok Jesus. Fapi Gospel e be pi e tamilangan’ ko ba miti mang girdi’, nge wokon, nge rogon e yafas rok, nge u rogon ni “ma lem.” (Filippi 2:5-8, NW) Maku reb ni ku ba’ ni ku rayog e tamilangan’ riy ngodad e ngada filed nib fel’ rogon fare ke babyor ni The Greatest Man Who Ever Lived, ni be weliy murung’agen e pi n’en i buch ko yafas rok Jesus nib fel’ rogon ma ba tamilang ni ku be weliy ni rogon e tin i buch u m’on nge migid nge migid.a

Kanawoen e gafgow ni tay Jesus e rib gel angin nib ngak apostal Paul. I yog ngak e Kristiano nu Korinth ni gaar: “Gu baadag ni nggu pi’ urngin e tin ni ba’ rog nge gag ni fan e nge yog ni gu ayuwegmed.” (2 Korinth 12:15) Ri aram fan ni bod ngongolen Kristus! Nap’an ni gad ra fal’eg i lemnag ngad nanged kanawoen Kristus ni dariy thibngin, maku er rogodad nra mith mithegdad ngad folwokgad rok u nap’an e yafas rodad.

Ni ba’ra rogon, i fil Jesus ngodad ni thingarda pagedan’dad ko n’en ni micheg Got ni ra pi’ e pi n’en ni fan ko tin ba t’uf rodad. Machane ke rin’ boch ban’en ni boor ko binem. Ke dag nib fel’ rogon e michan’ nge pagan’ ni nga un tay ku Jehovah ni yu rran. I gaar: “Gamanman ni Fox e bay e low ni taferad, ma arche’ e bay e taferad ni kar toyed , machane en ni Fak e girdi’ e dariy bang ni nge pag ir riy nga but’ nge toffan.” (Matthew 6:25; 8:20) Ere baga fan ko pi n’en ni fan ko dowef e ir e ke suwey e lem romed nge ngongol romed? Fa yafas romed e be dag e mich riy ni som’on e gimed be gay gil’ilungun Got? Me ere u rogon ngongolmed ko pi maruwel rok Jehovah? Bod rogon fa en ma dag e kanawo’ ngodad, i Jesus? Be dag e Bible ni gathi kemus ni i machib Jesus nib pasig ya boor yay ni ki i dag rogon fene t’uf e machib nib pasig. (John 2:14-17) Maku reb, e re kanawoen e tufeg nem ni rib fel’ ni ki dag Jesus! Ya mang i pi’ e yafas rok ni maligach ni fan ngak e pi gachalpen! (John 15:13) Ere ga be folwok rok Jesus ni ga be dag e t’ufeg ngak e Kristiano ni pi walagem? Fa ga be pag e kireb rok boch e girdi’ nga i magawonnag e t’ufeg rom ngorad?

Gelngin ni gadad ma athamgil nib gel ni ngad leked kanawoen Kristus, e baga’ ni der ma yog. Machane rib mutrug ni Jehovah e ma falan’ ngodad ni gad “ma taga’ nga daken fare Somol i Jesus Kristus.”​—Roma 13:14, NW.

“Kanawo’ ni kan dag ni fan ko Ulung”

Bay boch e girdi’ u lan e ulung e chiney ni rayog ni nga ur daged e kanawo’ ngodad? Ba mich ni bay! Pi walag ni kan duguliyrad nga boch u maruwel e thingara daged e kanawo’. Paul e yog ku Titus, ni i maruwel u boch e ulung u lan yu Crete ma ku ni duguliy ni nge mang overseers, ma ra reb e piilal ni kan duguliy e thingari par ni “be’ nib moon ni dariy ban’en ni ba togopuluw ngak ya ba yaluw.” (Titus 1:5, 6, NW) Maku er rogon ni ta’ apostal Peter chilen ko piin “piilal ni pumoon” ni ngar “daged ko ulung.” (1 Peter 5:1-3, NW) Me ere ba uw rogon e piin ni yad be ayuweg e ulung? Ku ir e ri ta’rad ni thingar ra manged “pumoon ni yad ma pigpig ni fel’ pangirad.”​—1 Timothy 3:13, NW.

Rriyul’, ni de puluw ni ngan lemnag ni urngin e pi piilal ara pi ta ayuweg e ulung ni yad ba cheg ma yad ba salap ko urngin kanawoen e pigpig ko Kristiano. I yog Paul ko pi Kristiano nu Roma ni gaar: “Bay e taw’ath rodad nib thilthil ni bochan gelngin e runguy rok ngodad.” (Roma 12:6, NW) Ba thilthil e salap ko pi walag ra be’ ma bay e n’en nib salap riy. De fel’ ni nga un lemnag ni piin piilal e yad ma ngongol ma yadma non ni dariy thibngirad. “Gadad gubin ni boor yay ni gadad ma oloboch,” ara’ rogon ni yog e Bible ko James 3:2. “Cha’ nder ma oloboch ko tin ni ma yog e be’ nrib yal’uw, ni ku rayog rok ni nge gagiyegnag ir.” Yugu aram rogon ni dar flontgad, machane, piin piilal e ku rayog, ni ngar boded Timothy, “ngar daged e wok nib fel’ ngak e piin nib yul’yul’ ni aram e rogon e numon, nge rogon pangiy, nge rogon e t’ufeg, nge michan’, nge rogon e machalbog.” (1 Timothy 4:12, NW) Nap’an ni ra rin’ e piin ni piilal ni aray rogon, ma piin ni yad bay ko ulung e yad ra rin’ e pi n’en ni kan ning chilen ko Hebrews 13:7: ni gaar, “Um tafinaynaged fa piinem ni yad e urogned e thin ngomed, . . . mi gimed fol u rogon ni ur pired nib michan’rad ngak Got.”

Boch e Folwok ko Tin Chiney-e Rran

In ni baaray e ragag e duw ni ke yan, ma bokum e girdi’ ni kar daged e wok nib fel’. Ma uw rogon fa bokum e biyu’ i missionary ni kar paged farad “kar paged e naun rorad ara pi walagrad ni ppin ara pumoon ara chitamangirad fa chitiningrad fa pi fakrad ara nam rorad” ni bochan ni ngar maruweliyed e pi maruwel ni kan pi’ ko pi Kristiano ni ngara rin’ed u yuyang ni gathi nam rorad? (Matthew 19:29) Ku mu lemnag, fapi cha’, ni yad ma milekag nga u ri lekeged e ulung i yan ni kanog e overseers ngorad nge pi leengirad, nge fapi pumoon nge ppin ni kar ognaged yad yad be maruwel ni dariy puluwrad ko pi ofis ko Watch Tower Society, nge fapi pioneers ni yad ma ayuweg fapi ulung. Ere gur pi ngongol nem rayog ni pug laniyan’ boch e girdi’ ngar folwokgad riy? Reb e Kristiano ni ba tamachib u Asia i yib ngan’ reb e missionary ni un ko yay ni meruk yay ko fare skul ni Watchtower Bible School of Gilead. I gaar, re walag ney nib yul’yul’ e “i magan’ ngay ni nge mada’nag e gafgow ko neng ni boor ni boor nge garbeb ni pag rogon. . . . Ma ri ka ba mom rogon u gelngin ni nge pi’ e welthin ni l’agruw ni thin nu China nge thin nu Malay ni yugu aram rogon ni ir be’ u England.” Ere mang angin e biney e wok nib fel’? Fare walag e gaar: “Fane gapas nge fane pagan’ e karing lanin’ug nggu adag ni nga gu mang reb e missionary ni nap’an ni gu ra ilal.” Ere dab ni gin ngay, ya re walag ney e ri mang reb e missionary.

Fare ke babyor ni Watch Tower Publications Index e ba’ ni kan yoloy ngay murung’agen e yafas rok boch e girdi’ ni baaray ni ki immoy u lan fagal ke babyor ni Wulyang ni Tagil’ e Damit nge Awake! Pi n’en ni murung’agen e pi cha’ ney e yad bogi girdi’ ni kar paged ngongolen e fayleng nge pi n’en ni be nameg e fayleng, ma kar paged e tin nib kireb, kar thiliyeged pangirad, ma kar pired ni yad ba mudugil u fithik’ e pi magawon, ma kar daged ni yad ma maruwel nib gel, ma yad ba guman’, ma yad ba yul’yul’, ma yad ba gol, ma yad ma pag lanin’rad. Reb e tapow babyor e yoloy boch e thin ni murung’agen e re ney ni gaar: “Yad e ra karinged gag nge gel e sobutan’ rog mu gu mang ba Kristiano ni kugu ta pining e magar, nap’an ni gu be bieg murung’agen e pi n’en ni ke yan boch e girdi’ u fithik’ ma kari ayuwegeg ni nge dab ugu lemnigeg ni goo gag fa ugu siin.”

Maku reb, dabmu pagtalin e pi wok nib fel’ u lan e birom e ulung: lolugen e tabinaw ni der tal ni be ayuweg e tabinaw ko tin ba t’uf ni chugum nge tirok Got ban’en nib t’uf ko tabinaw; walag ni ppin nib muun ngay​—e piin ni dariy figirngirad—​ni yad be athamgil i ayuweg pi fakrad maku yad ba pasig ko gi rorad e maruwel ko pigpig ku Got; pi pillibthir nge piin ni meewar ni kar pared ni yad ba yul’yul’ ni dariy fan ni ba gel e meewar rorad ma ba gel e m’ar rorad. Der mithmith e lem rom ko pi ngongol ney?

Riyul’, ni fayleng e ke sug ko ngongol nib kireb. (2 Timothy 3:13) Machane, ngam lemnag e n’en ni i tay Paul chilen ko pi Kristiano ni ur pired u Judea. Nap’an ni ke mu’ i weliy murung’agen ngongolen boch e girdi’ nib kakrom ni pumoon nge ppin ni bay e michan’ rorad, me tay apostal Paul ir ngorad ni gaar: “Ere, bay e pi girdi’ nem, ni bay e michan’ rorad ni kar liyeged gadad, ere nga kuda athamgilgad . . . ko mil ko sagreng ni kan tay nga puluwdad, ma gad par ni kad l’eged owchedad ngak e ani baga’ ko michan’ rodad ma ku eri e tay ni dariy thibngin ni aram, Jesus.” (Hebrews 12:1, 2, NW) Pi Kristiano ni chiney e ni ku ke liyegrad e ‘pi girdi’ nem’ ni ba fel’ e wok rorad​—ni tin kakrom e girdi’ nge tin-chiney. Ere gur be yib angirad ngom? Rayog ni ngeb ni faan ga ra duguliy u wun’um ni nga mu “folwok rorad ni gathi wok ni kireb, ya wok nib manigil.”​—3 John 11, NW.

[Footnote]

[Blurb on page 30]

De puluw ni ngan lemnag ni urngin e piin ni piilal nge piin ni ministerial servant e ri yad ba salap ko urngin e maruwel nib m’ag ko machib ni ma un e pi Kristiano ngay

[Pictures on page 31]

Piin piilal e susun ni ngar “daged e ngongol nib fel’ ngak girdien e ulung”