Deer ni Fith e Piin ni Yad ma Bieg

Uw e immoy Daniel riy u nap’an nni skengnag fa dalip i Hebrew u m’on ko fare liyos nib ga’ ni suwoneg Nebuchadnezzar u lan fa gi tagpas nu Dura?

Fare Bible e der yog, ere dariy be’ ni rayog ni nge dugliy ko uw e immoy Daniel riy u nap’an ere skeng nem.

Boch e girdi’ e yad be susunnag ni liw rok nib tolang fa bochan nib fel’ u wan’ Nebuchadnezzar e ba tolang ku Shadrach, Meshach, nge Abednego ma aram e dariy rogon ni nge un ko re gi n’enem u Dura. Daniel 2:49 e be dag ni immoy ba ngiyal’ ni immoy e liw rok nib tolang ngak e dalip i girdi’ ni yad nem. Machane dabiyog ni ngad michegned ni re n’ey e rayog ni nge ta’ ni dabi un ko tin baaram e girdi’ ko muulung nga mit ere liyos nem.

Yibe guy rogon ni ngan weliy fan ni da immoy Daniel ko re muulung nem, ma aram e bay boch e girdi’ ni ke gaar rayog ni ma nga ke yan nga bang ni bang ko maruwel rok ni be’ nib tolang ara danga’ ma ba m’ar ma arfan ni de yog ni un ko yan. Machane, fare Bible e der yog ni aram rogon. Ma demtrug rogon, ma n’en i rin Daniel e ngiyal’ nem e dabiyog ni ngan gathibthibnag, ya faan ma nga ba tagan’, ma fapi tayugang nu Babylon e ra awan’rad ngak ma ba mudugil ni yad ra fek ere kireb nem ngar togopuluw niged ngak. (Daniel 3:8) U m’on ngo tomuren ere n’eney ni buch, me Daniel e micheg ir ni be’ ni ma par nib yul’yul’, ma ba yul’yul’ ku Got ni yug demtrug rogon e magawon ni ra yib ngak. (Daniel 1:8; 5:17; 6:4, 10, 11) Ere yugu aram rogon ni der yog e Bible ko mang fan ni da immoy Daniel u rom u lan e tafel’fel’ u Dura, ma rayog ni nge mich u wan’dad ni ba mudugil e yul’yul’ rok ngak Jehovah Got.​—Ezekiel 14:14; Hebrews 11:33.