Mini’ E Ra Daregdad U Rogon Ni Gadad Bat’uf Rok Got
“Gadad e gadad ma dag e t’ufeg, ya bochan ni ir e som’mon ni ke dag ni gadad bat’uf rok.”—1 JOHN 4:19, New World Translation.
1, 2. (a) Mang fan ni baga’ fan ni ngada nanged ni gadad ba t’uf? (b) Rib t’uf rodad e t’ufeg rok mini’?
UW feni ga’fan u wan’um ni ngam nang ni gab t’uf? Nap’an ni ka yib bitir nge taw ko ngiyal’ ni kan ilal ni yima ga’ nga daken e t’ufeg. Kaam mu guy bochi tir ni ke dibey e chitiningin be sibibinag? Baga’ ni, demtrug ko mang e be buch u tooben fare tir, ma nap’an ni ra sap nga owchen e chitiningin ni be siminmin, me pagan’, me gapas laniyan’ u pa’ e chitiningin nib t’uf rok. Fa ka bay u wan’um e n’en ni u mu rin’ ko pi yu pi ngiyal u nap’an e pi duw ni kam ilal boch nib gel e kireb nge wagay riy? (1 Thessalonika 2:7) Yu ngiyal’, e bayi n’en ma dabkum nang ko mang e n’en ni ga baadag, fa kuda ku mur nang lanin’um, me ere, uw feni ga’ fan ni gam nang ni chitamam nge chitinam e gab t’uf rorow! Gathi ba ayuw nib ga’ ni ga manang ni rayog ni ngam man ngorow ko ngiyal’ ni demtrug e magawon ni keb ngom ara bay e n’en ni ngam fith? Rriyul’, ni n’umngin nap’an e yafas, ma reb e ban’en ni ba th’abi ba t’uf rodad e ngan t’ufegdad. Re t’ufeg nem e be dugliy ni ba’ fadad.
2 Fare t’ufeg nib mudugil ni kan dag ngak be’ ni yib ko gallabthir rok e ri ma ayuweg ni nge ilal nib fel’ rogon ma ra par nib thabthabel. Machane, ra bay fare pagan’ rodad ni Chitamangidad nu tharmiy, ni Jehovah, e gad ba t’uf rok e ri kab ga’fan ko tin ba spiritual ban’en rodad nge rarogon e lem rodad. Boch e girdi’ ni ma beeg e re ke babyor ney e sana dariy e gallabthir rorad ni riyul’ ni ma ayuwegrad. Faanra aram rogon e magawon rom, mu tay ngan’um. Yugu kura ndariy ara de gaman e t’ufeg ko gallabthir, ma t’ufeg rok Got nib riyul’ e ra yan nga luwan’.
3. Mang e ke micheg Jehovah ngak e girdi’ rok u murung’agen e t’ufeg rok ni fan ngorad?
3 U daken Isaiah ni profet, me weliy Jehovah ni reb e matin e rayog ni nge “pagtalin” fak ni kabran, machane ir e dabi pagtalin e girdi’ rok. (Isaiah 49:15) Ba taareb rogon, mab mudugil laniyan’ David ni gaar: “Ra n’igeg e chitamag nge chitinag, machane Jehovah e ra ayuwegneg.” (Psalm 27:10, NW) Ri be pi’ e athamgil nga lanin’uy! Demtrug rogon e par rom, faanra kam ognagem ku Got ni Jehovah, ma gubin ngiyal’ e thingar dabmu pagtalin ni t’ufeg rok Got ni fan ngom e kab gel ni dawori chuchugur ko t’ufeg ni ma dag e girdi’!
Nguum Par u Lan e T’ufeg Rok Got
4. Uw rogon ni piin Kristiano ko fa bin som’mon e chibog ni kan micheg ngorad murung’agen e t’ufeg rok Got?
4 Wuin e bin som’mon ni kam nang e t’ufeg rok Jehovah? Sana, tin ke buch rom e ba taareb rogon ko n’en ni ke buch rok fapi Kristiano ko fa bin som’mon e chibog. Fare guruy ni lal ko fare babyor ni ke pi’ Paul ngak piyu Roma e i weliy riy nib gamog e pi tadenen, ni immoy ba ngiyal’ kafram ni kar pared ni yad ba palog ku Got, ma ke yog e t’ufeg ni yib rok Jehovah ngorad. Rayog ni ngada bieged ko verse 5, ni gaar: “Yi Got e ke puog e t’ufeg rok nga fithik’ i lanin’dad u daken fare Kan ni Thothup, ni ir e tow’ath rok Got ngodad.” Ma verse 8, e ulul Paul ngay ni gaar: “Machane Got e ke dag ngodad gelngin feni ri gadad ba t’uf rok, ya ka gadad be par ni gadad bogi tadenen me yan i yim’ Kristus ni fan ngodad.”
5. Mang e ke ayuwegem ni ngam nang ma ga be pining e magar nga ga’ngin e t’ufeg rok Got?
5 Ku taareb rogon, nap’an ni kan dag ngom e thin riyul’ ni kan fek ko Thin rok Got ma aram mag tabab ni ngam maruweliy e michan’ rom, ni kan ni thothup rok Jehovah e ke tabab ni nge maruweliy u lan gum’irchaem. Ireray e kanawo’ ni ke tabab ni nge tamilang u wan’um ma kam pining e magar nga feni ga’fan e n’en ni ke rin’ Jehovah ya ke l’og Fak nib t’uf rok ni fan ni nge pi’ e yafas rok ni fan ngom. Me ere ke ayuwegem Jehovah ni ngam nang feni gel e t’ufeg rok ni fan ko girdi’. Nap’an ni kam nang ni, yugu aram rogon ni kan gargelnagem ni reb e ta denen nib palog rok Jehovah, ma ir e ke bing e kanawo’ ngak e girdi’ ni ngan mat’awnagrad ma bay e athap rorad ko yafas ni dariy n’umngin nap’an, ma dam thamiy ban’en u gum’irchaem? De yib ngan’um ni nguum t’ufeg Jehovah?—Roma 5:10.
6. Mang fan ni yu ngiyal’ e gad ma thamiy ni kad paloggad rok Jehovah?
6 Bochan ni kam adag e t’ufeg rok e Chitamam nu tharmiy ma aram fan ni kam thiliyeg e yafas rom ni nge puluw ko tin ni baadag, ma kam ognag e yafas rom ngak Got. Ma chiney e be par ni ba aw e gapas u thilmew Got. Machane, bay ba ngiyal’ ni ga ma thamiy ni gowa kam palog rok Jehovah? Rayog ni nge buch rodad ni gadad gubin ban’en ni aram rogon. Machane dabmu pagtalin ni Got e dabi thil. T’ufeg rok e taab rogon ko yal’ ni dabi thil mab mudugil, ni dabi tal i pi’ ramaen nge gawelngin nga fayleng. (Malaki 3:6; James 1:17) N’en nib thil riy, e gadad ma thil—nyugu aram rogon ni der n’uw nap’an. Nap’an ni be chel e fayleng, ma barba’ riy e be par u fithik’ e lumor. Taareb rogon ngodad, faanra ngada pied keru’dad ku Got, nyugu aram rogon nib ngoch nap’an, ma gad ra thamiy ni ke war e tha’ u thildad Got. Mang e gad ra rin’ miki yog ni ngada yal’uweged e re magawon nem?
7. Uw rogon ni ngada yaliyed gadad ma rayog ni nge ayuwegdad ni ngada pared ni gadad ba t’uf rok Got?
7 Faanra kada thamiyed ni kad paloggad boch ko t’ufeg rok Got, ma thingarda fithed gadad: ‘Kug dariyfannag e t’ufeg rok Got? Gu be pi’ keru’ug ni buchuw nge buchuw ko fare Got nib fas mab ta runguyey, ma gu be dag ni ke war e michan’ rog u boch e kanawo’ nib thilthil? Kug tiyan’ug ko “tin ni baadag e dowef,” ma gathi “tirok Got ban’en”?’ (Roma 8:5-8; Hebrews 3:12) Faan manga kada paloggad rok Jehovah, rayog ni ngada rin’ed boch ban’en ni fan ni ngada yal’uweged fare magawon, ma rayog ni ngad chuchugurgad ngak biyay, maku ra fel’ thildad. Be fonownagdad James ni gaar: “Mu chuchugurgad ngak Got, me chugur ngomed.” (James 4:8) Mu motoyil ko thin rok Jude ni gaar: “Pi walageg ni gimed ba t’uf rog, ngaum gelnaged e michan’ romed nib th’abi thothup, ma ngam meybilgad ni be ayuwegmed fare kan ni thothup, ma ngam pared ni gimed ba t’uf rok Got.”—Jude 20, 21.
Ke Thil Boch Ban’en ni Dabi Kirebnag e T’ufeg Rok Got
8. Uw rogon rayog ni nge thil e yafas rodad nib papey?
8 Yafas rodad ko re m’ag ney e be thilthil i yan. Solomon ni pilung e ke naab ngay ni “rayog ni nge buch ban’en [rodad] ni gadad gubin ni dan lemnag.” (Eklesiastes 9:11) Rayog ni nge thil e yafas rodad ni polo’ nib tomgin. Chiney e ba fel’ fithik’ i dowdad, ma bin migid e rran e sana ra yib e m’ar ngodad ni rib gel. Reb e rran e bay e maruwel rodad ni gowa ba mudugil, ma bin migid e rran e dakuriy e maruwel rodad. Rayog ni nge yim’ be’ nib t’uf rodad ni dan nang u m’on riy. Piin Kristiano u reb e nam e ba falfalan’ mab gapas ni sana yad be par nib n’uw nap’an boch, machane me yib e togopuluw nib gel nib tomgin. Sana kan t’ar boch e thin nib kireb nga dakendad, ma aram fan ni kad gafgowgad ko tin de mat’aw nbochan e re n’ey. Arrogon, ya yafas e de mudugil ara ba yoyowol.—James 4:13-15.
9. Mang fan nib fel’ ni ngan fal’eg i lemnag bang ko Roma guruy ni 8?
9 Ma nap’an ni ra buch ban’en rodad ni ra k’aring e kireban’, ma rayog ni ngeb ngan’dad ni kan digeydad, ma sana gad ra lemnag ni ke war e t’ufeg rok Got ngodad. Bochan ni gad gubin ma rayog ni buch ban’en rodad ni aray rogon, ma ffel’ ni ngada tiyan’dad ko thin rok Paul ni apostal ni ma fal’eg lanin’uy ni bay ko Roma guruy ni 8. Pi thin ney e kan yoloy ni fan ko fapi Kristiano ni kan dugliyrad. Yugu aram rogon, maku ra m’ag e re thin nem ngak e piin yugu boch e saf, ni kan mat’aw nagrad ni yad e pi fager rok Got, ni bod Abraham kakrom u m’on ko Kristiano.—Roma 4:20-22; James 2:21-23.
10, 11. (a) Yu ngiyal’ ma mang thin e ma yog e piin toogor ko girdi’ rok Got nib togopuluw ngorad? (b) Mang fan ni thin ni yad ma yog nib togopuluw ko piin Kristiano e gathi ri baga’ fan u wan’rad?
10 Mu beeg Roma 8:31-34. Be fith Paul ni gaar: “Faanra ba’ Got u ba’ rodad, me mini’ e rayog rok ni nge togopuluw ngodad?” Riyul, ni Satan nge fayleng rok nib kireb e ba togopuluw ngodad. Piin toogor rodad e sana yad ma yog boch e thin nde riyul’ nib togopuluw ngodad, ni mus u lan tafen e puf oloboch ko fare nam. Boch e gallabthir ni Kristiano e yima yog ni yad be fanenikay e pi bitir rorad ya bochan dar paged ni ngara uned nga boch e tafalay nib togopuluw ko motochiyel rok Got ara dar paged yad ni ngar uned ko madenom ko pagan. (Acts 15:28, 29; 2 Korinth 6:14-16) Yugu boch e Kristiano nib yul’yul’ e yima yog e thin ni de riyul’ u murung’agrad ni ma lunguy yad ma togopuluw ko am ya bochan dubrad ni ngara lied yugu boch e girdi’ u nap’an e mahl ara ra uned ko politics. (John 17:16) Boch e piin tatogopuluw e kara wereged e thin nde riyul’ ma yibe t’ar e thin nga dakenrad u media, ma kan nog ni Pi Mich rok Jehovah e yad reb e ulung ni ngan ayuw rorad.
11 Machane dabmu pagtalin ni nap’an e pi apostal, e ku nog ni gaar: “Gamad manang ni urngin yang ma be non e girdi’ riy nib togopuluw ko re raba’ i girdi’ nem ni gab muun ngay.” (Acts 28:22) Thin ni de riyul’ ni yima t’ar nga dakenrad e ireray e n’en nri baga’ fan? Got e ir e ra mat’awnag e piin Kristiano, nbochan e michan’ rorad ko maligach ni ke pi’ Kristus. Mang fan ni nge tal Jehovah i dag e t’ufeg ngak e pi tapigpig rok u tomren ni ke pi’ ngorad e taw’ath ni bin th’abi fel’—ni aram fak ni rib t’uf rok? (1 John 4:10) Chiney ni kan faseg Kristus ko yam’ ma kan tay nga ba’ ni mat’aw rok Got, ma ba pasig ni be ayuweg e Kristiano. Mini’ e bay rogon ni nge dag nib kireb e ayuw ni ke pi’ Kristus ngak pi gachalpen ara mini’ e bay rogon ni nge dag nib kireb e tin ke dugliy Got ni fan ko girdi’ rok nib yul’yul’? Dariy!—Isaiah 50:8, 9; Hebrews 4:15, 16.
12, 13. (a) Mang boch ban’en ara magawon ni dabiyog ni nge daregdad ko t’ufeg rok Got? (b) Mang e baadag fare Moonyan’ ni nge buch rodad ma arfan ni ma k’aring e magawon ni ngeb ngodad? (c) Mang fan ni piin Kristiano e yad ra gel ni polo’?
12 Mu beeg e Roma 8:35-37. Bay yugu be’ ara ban’en nrayog ni nge daregdad ko t’ufeg rok Jehovah nge Fak i Kristus Jesus? Sana ra fanay Satan e talin e maruwel rok u roy u fayleng ni ngari k’aring e magawon ngak fapi Kristiano. Fa bin ke yan e chibog ni ke yan, ma boor ko fapi walag ni Kristiano ni pumoon nge ppin e kan gafgownagrad nib gel u boor e nam. U yugu boch e nam e chiney, ma fapi walagdad u rom e yad ba magawon ko salpiy ni gubin e rran. Boch i yad e kar gafgowgad ko ggan ara de gaman e mad rorad. Mang e baadag fare Moonyan’ ni nge buch ma arfan ni ke gagiyegnag ni ngeb e magawon? Bang ko tin ni be lemnag e baadag ni nge magawonnag e pigpig ku Jehovah nib riyul’. Baadag Satan ni nge mich u wan’dad ni ke war e t’ufeg rok Got ngodad. Machane, riyul’ ni aram rogon, fa?
13 Bodrogon Paul, ni ke fanay fare thin ko Psalm 44:22, ma kada filed e Thin rok Got ni kan yoloy. Ke tamilang u wan’dad ni gadad e pi “saf” rok ma ke buch e pi n’en ney rodad nbochan fithingan. Ma ba l’ag ngay ni ngani thothupnag fithingan Got ma ngan gagiyelnag e liw rok ni ir e th’abi tolang u palpalthib. Ma bochan e pi magawon ney nib gel ni ke pag Got ni ngeb e magawon ngodad, ma gathi bochan nke war e t’ufeg rok ngodad. Demtrug rogon e magawon ni ra sum ni ma k’aring e kireban’, ma kan micheg ngodad ni t’ufeg rok Got ko girdi’ rok e dawori thil, ma gadad ba muun ngay ni be’ nge be’. Urngin ban’en ni gowa kada wargad riy e ra m’ug ni kada gelgad ngay nfaan gad ra par nib yul’yul’. Ke gelnagdad ma be ayuwegdad ya ke pagan’dad ko fare t’ufeg rok Got ngodad ni dabi kireb.
14. Mang fan ni ke mich u wan’ Paul e t’ufeg rok Got nyugu demtrug ni ra yib e gafgow ngak e piin Kristiano?
14 Mu beeg e Romans 8:38, 39. Mang e ke ayuweg Paul ke mich u wan’ ndariy ban’en ni ra dareg e Kristiano ko t’ufeg rok Got? Dariy e maruwar riy ni tin ni ke buch rok u nap’an ni be machib e ir e ke ayuweg ni ngari mich u wan’ ni gafgow e dabiyog ni nge kirebnag e t’ufeg rok Got ngodad. (2 Korinth 11:23-27; Filippi 4:13) Maku, manang Paul u murung’agen e tin nib m’agan’ Jehovah ngay ndariy n’umngin nap’an ma manang e n’en ni ke rin’ ko girdi’ Rok kakrom. Ra kireb e t’ufeg rok Got ngak e piin ni kara pigpiggad ngak u fithik’ e yul’yul’ u nap’an ni kar m’ad? Ri danga’! Pi cha’ nem ni kar m’ad nib yul’yul’ e ka yad ba fas u laniyan’ Got nib flont, ma ra fasegrad ko yam’ ko ngiyal’ ni ke dugliy.—Luke 20:37, 38; 1 Korinth 15:22-26.
15, 16. Mu weliy murung’agen boch ban’en ni dabiyog ni nge taleg Got i dag e t’ufeg rok ngak e pi tapigpig rok nib yul’yul’.
15 Demtrug rogon e gafgow nra yib ko yafas rodad e chiney—ma sana ke war gelngidad nbochan e maadad nib tomgin, ara ke yib e m’ar ni yima yim’ riy, ara ke yib e magawon ko salpiy ni rib gel—dariy ban’en nra kirebnag e t’ufeg rok Got ni fan ko girdi’ rok. Fapi engel nib gel gelngirad, ni bod fare engel ni de fol ku Got me mang Satan, e dabiyog rok ni gagiyegnag laniyan’ Jehovah ni nge taleg e t’ufeg rok ngak e pi tapigpig rok nib yul’yul’. (Job 2:3) Sana ra taleg fapi am e pi tapigpig rok Got, min kalbusnagrad, min gafgownagrad ma sana ka ra pininged “persona non grata” ngorad. (1 Korinth 4:13) Re fanenikan ney ni de mat’aw ni be dag e pi am e ra k’aring e girdi’ ni ngar togopuluwgad ngodad, machane re n’ey e dabi gagiyegnag laniyan’ e en Pilung ni Th’abi Tolang ni nge digeydad.
16 Gadad e Kristiano, e thingari dabda rusgad ko pi n’en ni ke yog Paul ni “pi n’en ni bay e chiney”—ni tin ni be buch, nge rarogon urngin ban’en, nge fapi magawon ni bay ko re m’ag n’ey e chiney—ara “pi n’en ni bay yib” nga m’on e dabiyog ni nge kirebnag e m’ag u thilin Got nge girdi’ rok. Yugu aram rogon ni tin bay u fayleng nge gelngin e kan nib kireb u lan e tharmiy e ra cham ngodad, ma t’ufeg rok Got ni bay rodad ni be ayuwegdad. “Gathi tolangin ara toarngin” e ra taleg e t’ufeg rok Got ngodad, nrogon ni yog Paul. Arrogon, dariy ban’en ni gomanga rayog ni nge warnag lanin’dad, ara urngin ban’en ni be m’ug ni nge gel ngodad ni rayog ni nge suruy lanin’dad, ni nge yog ni nge daregdad ko t’ufeg rok Got; ara rayog ko tin ni kan sunmiy ni nge kirebnag e th’a u thilin e en Ta Sunmiy nge pi tapigpig rok nib yul’yul’. T’ufeg rok Got e dabi war; ma ra par ndariy n’umngin nap’an.—1 Korinth 13:8.
Mu Chaariy e T’ufeg nib Gol Rok Got ni Dariy N’umngin Nap’an
17. (a) Mang fan nra bay e t’ufeg rok Got ma “kab fel’ ko yafas”? (b) Uw rogon ni gad ra dag ni gad be tayfan e t’ufeg nge yul’yul’ rok Got?
17 Uw feni ga’fan fare t’ufeg rok Got u wan’um? Kam thamiy ban’en ni bod rogon David, ni yoloy ni gaar: “Bochan e t’ufeg nge yul’yul’ rom e kab fel’ ko yafas, ma dap’e l’ugunag e ra pining e sorok ngom. Arfan ni nggu pining e sorok ngom u nap’an e yafas rog ni polo’; mu fithingam ma nggu tining paag nga lang”? (Psalm 63:3, 4) Riyul’, ni bay ban’en nrayog ni nge ognag e yafas ko re fayleng ney ni kab fel’ ko ngan felfelan’ ko t’ufeg nge fager ni yul’yul’ rok Got? Ni bod ni, kab fel’ e maruwel ni boor e salpiy ni ma yib riy ko gapas laniyan’ nge falfalan’ ni ma yib nbochan e rib fel’ thilimew Got? (Luke 12:15) Boch e piin ni Kristiano e keb ngorad e magawon ni susun ni ngara dugliyed ko ngar paged Jehovah ara ngani li’rad ngar m’ad. Aram e n’en ni ke buch rok boor e Pi Mich rok Jehovah u Nazi concentration camps u nap’an e bin II e Mahl ko Fayleng. Pi walagdad ni Kristiano e kara mel’eged ni nge par ni yad ba t’uf rok Got, ma ba m’agan’rad ngay ni ngar m’ad nfaanra dabiyog ni ngar siyeged, ma kemus ni ri yad in u fithik’rad e kar paged e michan’ rorad. Piin ni kar pared nib yul’yul’ ko t’ufeg rok Got e rayog ni ngar pagan’rad ni ra pi’ Got e yafas ndariy n’umngin nap’an ngorad boch nga m’on, ni aram ban’en ni dabiyog ko fayleng ni nge pi’ ngodad. (Mark 8:34-36) Machane gathi kemus ni yafas ni manemus e ba muun ngay.
18. Mang fan ni rib fel’ e yafas ni ndariy n’umngin nap’an?
18 Yugu aram rogon ma dabiyog e yafas ni dariy n’umngin nap’an nfaanra de moy Jehovah, ma gur e ngam guy rogon i sananag rogon e yafas nib n’uw nap’an ni de moy e en Ke Sunmiydad riy. Ereray e yafas ni dariy rogon, ma dariy ban’en nib riyul’ ni yibe nameg. Ke pi’ Jehovah ngak e girdi’ rok e maruwel nib fel’ ni ngara rin’ed ko ngiyal’ ney ni tin tomren e rran. Ere rayog ni ngada pagan’dad ku Jehovah, ni ir e ani Ga’ ni ra lebuguy e tin nib m’agan’ ngay, ma ra pi’ ngodad e yafas ni dariy n’umngin nap’an, ni ireram e yafas nib sug ko pi n’en ni ma k’aring e falfalan’, ni aram e pi n’en ni baga’ fan ni ngan fil rogon min rin’. (Eklesiastes 3:11) Demtrug feni yoor e tin gad ra fil u nap’an taareb e biyu’ e duw boch nga m’on, ma dabiyog ni ngada tawgad nga “toarngin e gonop nge llowan’ rok Got.”—Roma 11:33, NW
En Chitamangiy e Be Runguymed
19. Mang e tin ni tomur e thin ni ke micheg Jesus Kristus ngak pi gachalpen?
19 Rorran ni Nisan 14, 33 C.E., u nap’an e bin tomur e nep’ ni chag Jesus ngak fa 11 i apostal rok nib yul’yul’, me yog boor ban’en ngorad nra gelnagrad nib m’ag nga boch ban’en nra buch rorad boch nga m’on. Kar pared rok Jesus u nap’an ni keb fapi skeng ngak, ma kar thamiyed ni yad ba t’uf rok. (Luke 22:28, 30; John 1:16; 13:1) Me micheg Jesus ngorad ni gaar: “Ya en ni Chitamangiy e gimed ba t’uf rok.” (John 16:27) Pi thin nem e susun ngari ayuweg fapi gachalpen ni nge tamilang u wan’rad ni ri yad ba t’uf rok e en Chitamangiy nu tharmiy!
20. Mang e kam dugliy ni ngam rin’, ma mang e rayog ni ngam pagan’um ngay?
20 Boor e girdi’ ni ka yad ba fas e chiney ni kar pigpiggad ku Jehovah u fithik’ e yul’yul’ u lan boor e duw. Dariy e maruwar riy, ni m’on ni ngeb e tomur ko re m’ag ney nib kireb, ma gad ra mada’nag e skeng ni boor. Dabmu pag ni nge maruwaran’um ko t’ufeg rok Got ngom nib yul’yul’ nbochan e pi skeng nge gafgow. Mo’maw’ ni ngan weliy nge pag rogon e tin ni rib riyul’ riy ni: Jehovah e gab t’uf rok. (James 5:11) Yibe athapeg ni ra bagadad me ulul i rin’ e maruwel rok, ni ba yu’yul’ ngay ni be fol ko motochiyel rok Got. (John 15:8-10) Manga yigi yog ni da fanayed urngin e tayim ni ra mab e kanawo’ ngodad ma ngada pininged e sorok nga fithingan. Thingarda gelnaged e tin kada dugliyed ni ngada chuchugurgad ku Jehovah i yan u daken e meybil ma ngan fil e Thin rok. Demtrug ko mang e n’en ni ra buch gabul, faanra gad be rin’ e tin rayog rodad ni fan ni ngada falfalan’aged Jehovah, ma ra par ni ba aw e gapas u thildad, ya kari pagan’dad ko t’ufeg rok ndabi war.—2 Peter 3:14.
Uwrogon ni Ngam Pi’ e Fulweg?
• Rib t’uf rodad e t’ufeg rok mini’ ni rayog ni ngad pared nib thabthabel ko tirok Got nge lem rodad?
• Mang boch ban’en ni dabiyog ni nge taleg Jehovah ni nge dabki t’ufeg e pi tapigpig rok?
• Mang fan ni yira thamiy ko t’ufeg rok Jehovah e “kab fel’ ko yafas”?
[Pictures on page 7]
Faan manga kada thamiyed ni kad dargad ko t’ufeg rok Got, maku rayog ni ngada yal’uweged boch ban’en
[Picture on page 9]
Ke nang Paul ko mang fan ni keb e togopuluw ngak